ಆದಾಯ ತೆರಿಗೆ ಕಾಯ್ದೆಯಡಿಯಲ್ಲಿ ಕಡಿತಗಳು ಮತ್ತು ವಿನಾಯಿತಿಗಳ ಬಗ್ಗೆ ಸುಳ್ಳು ಕ್ಲೈಮುಗಳನ್ನು ನೀಡುವ ಮೂಲಕ ಆದಾಯ ತೆರಿಗೆ ರಿಟರ್ನ್ಸ್ (ಐಟಿಆರ್) ಸಲ್ಲಿಸುತ್ತಿದ್ದ ಹಲವಾರು ಮಧ್ಯವರ್ತಿಗಳ ವಿರುದ್ಧ ಕೇಂದ್ರ ನೇರ ತೆರಿಗೆ ಮಂಡಳಿ (ಸಿಬಿಡಿಟಿ) ಇತ್ತೀಚೆಗೆ ಕ್ರಮ ಕೈಗೊಂಡಿದೆ. ಕೆಲವು ಮಧ್ಯವರ್ತಿಗಳು ಭಾರತದಾದ್ಯಂತ ಕಮಿಷನ್ ಆಧಾರದ ಮೇಲೆ ಏಜೆಂಟ್‌ ಗಳ ಜಾಲವನ್ನು ಸ್ಥಾಪಿಸಿ ಸುಳ್ಳು ಕ್ಲೇಮುಗಳೊಂದಿಗೆ ರಿಟರ್ನ್ಸ್ ಸಲ್ಲಿಸಿದ್ದಾರೆ ಎಂದು ಈ ಕ್ರಮವು ಬಹಿರಂಗಪಡಿಸಿದೆ. ನೋಂದಾಯಿತ ಆದರೆ ಮಾನ್ಯತೆ ಪಡೆಯದ ರಾಜಕೀಯ ಪಕ್ಷಗಳು (ಆರ್‌ ಯು ಪಿ ಪಿ ಗಳು) ಅಥವಾ ದತ್ತಿ ಸಂಸ್ಥೆಗಳಿಗೆ ದೇಣಿಗೆಗಳ ಹೆಸರಿನಲ್ಲಿ ಹೆಚ್ಚಿನ ಸಂಖ್ಯೆಯ ಸುಳ್ಳು ಕ್ಲೇಮುಗಳನ್ನು ಮಾಡಲಾಗಿದೆ ಎಂದು ಕಂಡುಬಂದಿದೆ. ಇದು ತೆರಿಗೆದಾರರು ತಮ್ಮ ತೆರಿಗೆ ಹೊಣೆಗಾರಿಕೆಗಳನ್ನು ಕಡಿಮೆ ಮಾಡಲು ಮತ್ತು ನಕಲಿ ಮರುಪಾವತಿಗಳನ್ನು ಪಡೆಯಲು ಅನುವು ಮಾಡಿಕೊಟ್ಟಿತು. ಈ ಮಾನ್ಯತೆ ಪಡೆಯದ ರಾಜಕೀಯ ಪಕ್ಷಗಳಲ್ಲಿ ಹಲವು ಫೈಲ್ ಮಾಡದವು, ಅವುಗಳ ನೋಂದಾಯಿತ ವಿಳಾಸಗಳಲ್ಲಿ ಕಾರ್ಯನಿರ್ವಹಿಸುತ್ತಿಲ್ಲ ಮತ್ತು ಯಾವುದೇ ರಾಜಕೀಯ ಚಟುವಟಿಕೆಗಳಲ್ಲಿ ಭಾಗಿಯಾಗಿಲ್ಲ ಎಂದು ಜಾರಿ ಕ್ರಮವು ಬಹಿರಂಗಪಡಿಸಿದೆ. ಈ ಮಾನ್ಯತೆ ಪಡೆಯದ ರಾಜಕೀಯ ಪಕ್ಷಗಳನ್ನು ಹಣವನ್ನು ರವಾನಿಸಲು, ಹವಾಲಾ ವಹಿವಾಟು, ಗಡಿಯಾಚೆಗಿನ ರವಾನೆ ಮತ್ತು ದೇಣಿಗೆಗಳಿಗೆ ನಕಲಿ ರಶೀದಿಗಳನ್ನು ನೀಡುವ ಮಾರ್ಗಗಳಾಗಿಯೂ ಬಳಸಲಾಗುತ್ತಿದೆ. ಸಿಬಿಡಿಟಿ ಈ ಕೆಲವು ಮಾನ್ಯತೆ ಪಡೆಯದ ರಾಜಕೀಯ ಪಕ್ಷಗಳು ಮತ್ತು ಟ್ರಸ್ಟಿಗಳ ಮಂಡಳಿಗಳ ವಿರುದ್ಧ ಶೋಧ ಕಾರ್ಯಾಚರಣೆ ನಡೆಸಿತು ಮತ್ತು ಈ ಕಾರ್ಯಾಚರಣೆಯ ಮೂಲಕ, ವ್ಯಕ್ತಿಗಳಿಂದ ನಕಲಿ ದೇಣಿಗೆಗಳು ಮತ್ತು ಕಂಪನಿಗಳಿಂದ ನಕಲಿ ಕಾರ್ಪೊರೇಟ್ ಸಾಮಾಜಿಕ ಜವಾಬ್ದಾರಿ ಉಪಕ್ರಮಗಳ ಕ್ರಿಮಿನಲ್ ಪುರಾವೆಗಳನ್ನು ಸಂಗ್ರಹಿಸಲಾಯಿತು.

ಅನುಮಾನಾಸ್ಪದ ಕ್ಲೇಮುಗಳನ್ನು ಪತ್ತೆಹಚ್ಚಲು ಮತ್ತು ಅನುಮಾನಾಸ್ಪದ ನಡವಳಿಕೆಯ ಮಾದರಿಗಳನ್ನು ಗುರುತಿಸಲು ಕೇಂದ್ರೀಯ ನೇರ ತೆರಿಗೆ ಮಂಡಳಿಯು ತನ್ನ ಡೇಟಾ-ಚಾಲಿತ ವಿಧಾನವನ್ನು ಬಲಪಡಿಸಿದೆ. ಈ ವಿಧಾನದಲ್ಲಿ, ಆದಾಯ ತೆರಿಗೆ ಕಾಯ್ದೆ, 1961 ರ ಸೆಕ್ಷನ್ 80G ಅಥವಾ ಸೆಕ್ಷನ್ 80GGC ಅಡಿಯಲ್ಲಿ ಕಡಿತಗಳನ್ನು ಪಡೆಯುವ ತೆರಿಗೆದಾರರಿಗೆ ನಿರ್ದಿಷ್ಟ ಅಪಾಯದ ಮಾದರಿಯನ್ನು ವ್ಯಾಖ್ಯಾನಿಸಲಾಗಿದೆ. ಡೇಟಾ ವಿಶ್ಲೇಷಣೆಯ ಪ್ರಕಾರ, ಅನೇಕ ತೆರಿಗೆದಾರರು ಅನುಮಾನಾಸ್ಪದ ಸಂಸ್ಥೆಗಳಿಗೆ ನೀಡಿದ ದೇಣಿಗೆಗಳ ಮೇಲೆ ಕಡಿತಗಳನ್ನು ಪಡೆದಿದ್ದಾರೆ ಅಥವಾ ಈ ಸಂಸ್ಥೆಗಳ ದೃಢೀಕರಣವನ್ನು ಪರಿಶೀಲಿಸಲು ಯಾವುದೇ ಸಂಬಂಧಿತ ಮಾಹಿತಿಯನ್ನು ಒದಗಿಸಿಲ್ಲ ಎಂದು ಶಂಕಿಸಲಾಗಿದೆ. ಹೆಚ್ಚಿನ ಸಂಖ್ಯೆಯ ತೆರಿಗೆದಾರರು ಪ್ರಸ್ತುತ ಮೌಲ್ಯಮಾಪನ ವರ್ಷ 2025-26 ಕ್ಕೆ ತಮ್ಮ ಐಟಿಆರ್‌ ಗಳನ್ನು ಪರಿಷ್ಕರಿಸಿದ್ದಾರೆ ಮತ್ತು ಹಿಂದಿನ ವರ್ಷಗಳ ನವೀಕರಿಸಿದ ಐಟಿಆರ್‌ ಗಳನ್ನು ಸಹ ಸಲ್ಲಿಸಿದ್ದಾರೆ.

ತೆರಿಗೆದಾರ ಸ್ನೇಹಿ ಕ್ರಮವಾಗಿ, ಸಿಬಿಡಿಟಿಯು NUDGE ಅಭಿಯಾನವನ್ನು ಪ್ರಾರಂಭಿಸಿದೆ, ಇದು ಅವರಿಗೆ ತಮ್ಮ ಐಟಿಆರ್‌ ಗಳನ್ನು ನವೀಕರಿಸಲು ಮತ್ತು ಯಾವುದೇ ತಪ್ಪಾದ ಕ್ಲೈಮುಗಳನ್ನು ಹಿಂಪಡೆಯಲು ಅವಕಾಶವನ್ನು ನೀಡುತ್ತದೆ. ಡಿಸೆಂಬರ್ 12, 2025 ರಿಂದ, ಅಂತಹ ತೆರಿಗೆದಾರರಿಗೆ ಅವರ ನೋಂದಾಯಿತ ಮೊಬೈಲ್ ಸಂಖ್ಯೆ ಮತ್ತು ಇಮೇಲ್ ವಿಳಾಸಕ್ಕೆ ಎಸ್‌ ಎಂ ಎಸ್‌ ಮತ್ತು ಇಮೇಲ್ ಸೂಚನೆಗಳನ್ನು ಕಳುಹಿಸಲಾಗುತ್ತಿದೆ.

ಎಲ್ಲಾ ತೆರಿಗೆದಾರರು ಇಲಾಖೆಗೆ ಸಲ್ಲಿಸುವ ತಮ್ಮ ಫೈಲಿಂಗ್‌ ಗಳಲ್ಲಿ ಸರಿಯಾದ ಮೊಬೈಲ್ ಮತ್ತು ಇಮೇಲ್ ಐಡಿಗಳನ್ನು ಒದಗಿಸುವುದನ್ನು ಖಚಿತಪಡಿಸಿಕೊಳ್ಳುವಂತೆ ಸೂಚಿಸಲಾಗಿದೆ, ಇದರಿಂದ ಅವರು ಯಾವುದೇ ಸಂವಹನದಿಂದ ವಂಚಿತರಾಗುವುದಿಲ್ಲ.

ಕಡಿತ ನಿಬಂಧನೆಗಳು ಮತ್ತು ನವೀಕರಿಸಿದ ರಿಟರ್ನ್‌ ಗಳ ಸಲ್ಲಿಕೆಯ ಕುರಿತು ಹೆಚ್ಚಿನ ಮಾಹಿತಿ www.incometax.gov.in. ನಲ್ಲಿ ಲಭ್ಯವಿದೆ.

*****