ঙসি দিশেম্বর ১১, ২০২৫ গী নুমিদাংৱাইরমদা ইম্ফালদগী সিতি কনভেন্সন সেক্তরদা মনিপুর সরকারনা য়ুম্বু ওইদুনা ভারতকী রাষ্ট্রপতি শ্রী দ্রৌপতি মুর্মু ইকায়খুম্নবা উৎতুনা তরাম্না ওকখ্রে। থৌরম অদুদা মহাক্না তোঙান তোঙানবা চাউখৎ-থৌরাংগী প্রোজেকশিং উরেপ-উয়ুং তমখ্রে অমসুং শঙ্গাখ্রে।

থৌরম অদুদা মীয়ামদা ৱা ঙাংবদা রাষ্ট্রপতিনা হায়খি মদুদি মনিপুর অসি অৱা-অনা মায়োক্নবা ঙম্বা, থৌনা লৈবা অমসুং তোপ-তোপ্পা নাৎশিং মরাংকাইনা লৈবা লমদম অমনি। মীরোল কয়ানা, শান্নবা, আর্মদ ফোর্সশিং, কলা অমসুং নাৎ অমসুং মীয়ামগী থবক য়াওনা হিরম কয়াদা রাজ্য অসিগী মীয়াম্না লৈবাক অসিগী অচৌবা থবক কয়া পাংথোক্লি।

রাষ্ট্রপতিনা হায়খি লাইবক থিবা হিংশাগী মতুংদা মনিপুরগী মীয়াম্না থেংনরিবা অৱাবা মহাক খঙই। মনিপুর মীয়ামগী খুদোংচাদবশিং কোকহন্নবা ঐখোয়না মরুওইনা লৌরি হায়বা অদোমদা থাজবা পীবা পাম্মী। নুংশিন্না হিংমিন্ননবা, সেকুরিতি লৈনবা অমসুং তংদু-লৈতাবা অমসুং নুংঙাই-য়াইফবা পুরক্নবা রাজ্য অসিগী খোঙচত্ত কেন্দ্র সরকারনা মপুংফানা মনিপুর শৌগৎলি। রাজ্য শীনবা থুংনা চাউখৎনবা অমসুং রাজ্য অসিগী কাচিন-কোয়া খুদিংমক চাউখৎপগী মহৈ চাবা ফংনবা অমসুং রাজ্য শীনবা থুংনা থোঙ মান্ননা চাউখৎনবা সরকারনা থবক পায়খৎলে।

ভারতনা খা-নোংপোক এসিয়াগা থবক তৌমিন্ননবা মনিপুরনা থোঙ্গালনি। মসিগী নহারোল, নাৎ অমসুং মহৌশাগী ফজবনা রাজ্য অসিগী মপান নাইদ্রবা খুদোংচাবা অমা ওইহল্লে। রাজ্য অসিগী নুপীশিং মশানা মশাবু থৌনা পীবগীদমক মনিপুর মমিং চৎলি। ২০ শুবা চহিচাগী অঙনবা শরুকশিংদা থৌনা ফরবী মনিপুরগী নুপীশিংনা পুৱারি ওইরবা নুপী লাল অনিরক শোক্নখ্রে। লোয়লম লৈঙাক্না মখোয়গী পাম্লিবা থবকশিং অদু পাংথোক্নবা হোৎনবদা মখোয় মাইপাকখি। মখোয়না ভারতমচা খুদিংমক ইথিল পীখি।

রাষ্ট্রপতিনা হায়খি মিনিপুরগী মীয়াম হৈথোই-শিংথোই অমসুং থবক শুবা-নোম্বা কল্লি। তম অমসুং চীঙগী মীয়াম অমুক হন্না নুংশিন্ননা পুন্না লৈমিন্নগনি অমসুং রাজ্য অসি নুংঙাই য়াইফবা অমসুং হরাওবগী অনৌবা থাকশিংদা পুরক্কনি হায়বগী থাজবা মহাক্না ফোঙদোকখি।

রাষ্ট্রপতিনা হায়খি কাংলুপ মশেল নুংশিন্ননা হিংমিন্ননবা অমসুং চাউখৎ-থৌরাংগী থবকশিংদা মনিপুরগী মীয়াম্না মখা তানা শৌগৎকদবনি। অঙাং খুদিংমক অশোই-অঙাম থোক্তবা, নুপী খুদিংমক শক্তি পীবা, কাংলুপ খুদিংমক কোনশিনবা অমসুং অফবা তুংলমচৎ অমগীদমক মীওই খুদিংমক মাঙলোমদা চঙশিনবা রাজ্য অমা ওইহন্নবা ঐখোয় পুন্না মনিপুর মপাঙ্গল কনখৎহনগদবনি।

মসিগী মমাংদা, রাষ্ট্রপতিনা পুৱারি ওইরবনা মপাল কাংজৈবুংদা পোলো-একজিবিসন মেতচ অমা য়েংখি।

***