നമസ്‌കാരം ജി!

പരിപാടിയിൽ പങ്കെടുക്കുന്ന കേന്ദ്ര മന്ത്രിസഭയിലെ എന്റെ സഹപ്രവർത്തകരെ, വിവിധ സംസ്ഥാനങ്ങളിലെ ബഹുമാനപ്പെട്ട മുഖ്യമന്ത്രിമാർ, എംപിമാർ, എംഎൽഎമാർ, മറ്റ് വിശിഷ്ട വ്യക്തികളെ, മഹതികളെ, മാന്യരെ 

പദ്മ പുരസ്കാരങ്ങൾ ലഭിച്ച നിരവധി വ്യക്തികളും ഇന്നത്തെ പരിപാടിയിൽ നമ്മോടൊപ്പം ഉണ്ട്. അവരെയും ഞാൻ ബഹുമാനപൂർവ്വം സ്വാഗതം ചെയ്യുകയും അഭിനന്ദിക്കുകയും ചെയ്യുന്നു. ഓൾ ഇന്ത്യ റേഡിയോയുടെ എഫ്എം സേവനത്തിന്റെ വിപുലീകരണം ഓൾ ഇന്ത്യ എഫ്എം ആകുന്നതിനുള്ള വലുതും പ്രധാനപ്പെട്ടതുമായ ഒരു ചുവടുവയ്പ്പാണ്. ഓൾ ഇന്ത്യ റേഡിയോയുടെ 91 എഫ്എം ട്രാൻസ്മിറ്ററുകളുടെ ഉദ്ഘാടനം രാജ്യത്തെ 85 ജില്ലകളിലായി രണ്ട് കോടി ജനങ്ങൾക്ക് ഒരു സമ്മാനം പോലെയാണ്. ഒരു തരത്തിൽ, ഇന്ത്യയുടെ വൈവിധ്യത്തിന്റെയും വ്യത്യസ്ത നിറങ്ങളുടെയും ഒരു നേർക്കാഴ്ചയും ഈ പരിപാടിയിൽ ഉണ്ട്. ഈ സേവനം പ്രയോജനപ്പെടുത്തുന്ന 85 ജില്ലകളിൽ അഭിലാഷ ജില്ലകളും ബ്ലോക്കുകളും ഉൾപ്പെടുന്നു. ഈ നേട്ടത്തിന് ഓൾ ഇന്ത്യ റേഡിയോയെ ഞാൻ അഭിനന്ദിക്കുന്നു. ഇത് വടക്കുകിഴക്കൻ മേഖലയിലെ നമ്മുടെ സഹോദരീസഹോദരന്മാർക്കും നമ്മുടെ യുവ സുഹൃത്തുക്കൾക്കും വളരെയധികം പ്രയോജനം ചെയ്യും. ഈ പുതിയ സേവനത്തിന് ഞാൻ അവരെ പ്രത്യേകം അഭിനന്ദിക്കുന്നു.

സുഹൃത്തുക്കളെ,

റേഡിയോയുടെയും എഫ്എമ്മിന്റെയും കാര്യത്തിൽ, നമ്മുടെ തലമുറയ്ക്ക് ഒരു ആവേശകരമായ ശ്രോതാവെന്ന ബന്ധമുണ്ട് . റേഡിയോയുമായുള്ള എന്റെ ബന്ധം ഒരു അവതാരകൻ എന്ന ബന്ധമായി മാറിയത് എനിക്ക് വളരെ സന്തോഷകരമാണ്. ഏതാനും ദിവസങ്ങൾക്കുള്ളിൽ, ഞാൻ 'മൻ കി ബാത്തിന്റെ' നൂറാമത്തെ എപ്പിസോഡ് റേഡിയോയിൽ അവതരിപ്പിക്കാൻ പോകുന്നു. പൗരന്മാരുമായി ഇത്തരത്തിലുള്ള വൈകാരിക ബന്ധം സൃഷ്ടിക്കുന്ന 'മാൻ കി ബാത്തിന്റെ' ഈ അനുഭവം റേഡിയോയിലൂടെ മാത്രമേ സാധ്യമാകൂ. ഇതിലൂടെ, പൗരന്മാരുടെ കഴിവുകളുമായും രാജ്യത്തിന്റെ കൂട്ടായ കടമയുമായും ഞാൻ ബന്ധപ്പെട്ടിരിക്കുന്നു. സ്വച്ഛ് ഭാരത് അഭിയാനായാലും, ബേട്ടി ബച്ചാവോ ബേട്ടി പഠാവോ ആയാലും, അല്ലെങ്കിൽ ഹർ ഘർ തിരംഗ അഭിയാനായാലും, 'മൻ കി ബാത്ത്' എന്നിവ ഈ പ്രചാരണങ്ങളെ ഒരു ബഹുജന പ്രസ്ഥാനമാക്കി മാറ്റി. അതിനാൽ, ഒരു തരത്തിൽ, ഞാൻ ഓൾ ഇന്ത്യ റേഡിയോയുടെ ടീമിന്റെ ഭാഗമാണ്.

സുഹൃത്തുക്കളെ,

ഇന്നത്തെ പരിപാടിയിൽ മറ്റൊരു പ്രത്യേകത കൂടിയുണ്ട്. പിന്നാക്കം നിൽക്കുന്നവർക്ക് മുൻഗണന നൽകുക എന്ന ​ഗവൺമെൻ്റിൻ്റെ നയത്തെ ഇത് കൂടുതൽ ശക്തിപ്പെടുത്തുന്നു. ഇതുവരെ ഈ സൗകര്യം നിഷേധിക്കപ്പെട്ടവരും ദൂരെ താമസിച്ചിരുന്നവരുമായ ആളുകൾക്ക് ഇപ്പോൾ നമ്മളുമായി കൂടുതൽ ബന്ധം ലഭിക്കും. ആവശ്യമായ വിവരങ്ങൾ യഥാസമയം എത്തിക്കൽ, കമ്മ്യൂണിറ്റി നിർമ്മാണ പ്രവർത്തനങ്ങൾ, കൃഷിയെക്കുറിച്ചുള്ള കാലാവസ്ഥയുമായി ബന്ധപ്പെട്ട വിവരങ്ങൾ, വിളകളുടെയും പഴങ്ങളുടെയും പച്ചക്കറികളുടെയും വിലകളെക്കുറിച്ചുള്ള ഏറ്റവും പുതിയ വിവരങ്ങൾ കർഷകർക്ക് എത്തിക്കൽ, രാസകൃഷി മൂലമുണ്ടാകുന്ന നാശനഷ്ടങ്ങളെക്കുറിച്ചുള്ള ചർച്ചകൾ, കൃഷിക്കായി ആധുനിക യന്ത്രങ്ങൾ ശേഖരിക്കൽ, വനിതാ സ്വയം സഹായ ഗ്രൂപ്പുകളെ പുതിയ വിപണികളെക്കുറിച്ച് അറിയിക്കൽ, അല്ലെങ്കിൽ പ്രകൃതിദുരന്ത സമയത്ത് മുഴുവൻ പ്രദേശത്തെയും സഹായിക്കൽ എന്നിവയിൽ ഈ എഫ്എം ട്രാൻസ്മിറ്ററുകൾ വളരെ പ്രധാനപ്പെട്ട പങ്ക് വഹിക്കും. ഇതിനുപുറമെ, എഫ്എമ്മിന്റെ ഇൻഫോടെയ്ൻമെന്റ് മൂല്യം തീർച്ചയായും ഉണ്ടാകും.

സുഹൃത്തുക്കളെ,

സാങ്കേതികവിദ്യയുടെ ജനാധിപത്യവൽക്കരണത്തിനായി നമ്മുടെ ​ഗവൺമെൻ്റ് നിരന്തരം പ്രവർത്തിക്കുന്നു. ഇന്ത്യയ്ക്ക് അതിന്റെ സാധ്യതകൾ പൂർണ്ണമായി പ്രയോജനപ്പെടുത്താൻ കഴിയണമെങ്കിൽ, ഒരു ഇന്ത്യക്കാരനും അവസരങ്ങളുടെ അഭാവം ഉണ്ടാകരുത്. ആധുനിക സാങ്കേതികവിദ്യ എല്ലാവർക്കും പ്രാപ്യവും താങ്ങാനാവുന്നതുമാക്കി മാറ്റുക എന്നത് ഈ ആവശ്യത്തിനുള്ള ഒരു വലിയ മാധ്യമമാണ്. ഗ്രാമങ്ങളിൽ ഒപ്റ്റിക്കൽ ഫൈബർ സ്ഥാപിക്കുന്നതിലൂടെയും മൊബൈൽ ഫോണുകളുടെയും മൊബൈൽ ഡാറ്റയുടെയും വില വളരെയധികം കുറയ്ക്കുന്നതിലൂടെയും ഇന്ന് ഇന്ത്യയിൽ വിവരങ്ങളിലേക്കുള്ള പ്രവേശനം വളരെ എളുപ്പമായിരിക്കുന്നു. ഇക്കാലത്ത്, രാജ്യത്തിന്റെ എല്ലാ കോണുകളിലും പുതിയ ഡിജിറ്റൽ സംരംഭകർ ഉയർന്നുവരുന്നത് നാം കാണുന്നു. ഗ്രാമങ്ങളിൽ താമസിക്കുമ്പോൾ തന്നെ ഡിജിറ്റൽ സാങ്കേതികവിദ്യ പ്രയോജനപ്പെടുത്തി യുവാക്കൾ സമ്പാദിക്കുന്നു. അതുപോലെ, നമ്മുടെ ചെറുകിട കടയുടമകൾക്കും തെരുവ് കച്ചവടക്കാർക്കും ഇന്റർനെറ്റും യുപിഐയും ലഭ്യമായപ്പോൾ, അവർ ബാങ്കിംഗ് സംവിധാനവും പ്രയോജനപ്പെടുത്താൻ തുടങ്ങി. ഇന്ന് നമ്മുടെ മത്സ്യത്തൊഴിലാളി സഹപ്രവർത്തകർക്ക് സാങ്കേതികവിദ്യയുടെ സഹായത്തോടെ ശരിയായ സമയത്ത് കാലാവസ്ഥയുമായി ബന്ധപ്പെട്ട കൃത്യമായ വിവരങ്ങൾ ലഭിക്കുന്നു. ഇന്ന് നമ്മുടെ ചെറുകിട സംരംഭകർക്ക് സാങ്കേതികവിദ്യയുടെ സഹായത്തോടെ രാജ്യത്തിന്റെ എല്ലാ മുക്കിലും മൂലയിലും അവരുടെ ഉൽപ്പന്നങ്ങൾ വിൽക്കാൻ കഴിയും. ഇക്കാര്യത്തിൽ അവർക്ക് ഗവൺമെന്റ്-ഇ-മാർക്കറ്റ്പ്ലേസിൽ നിന്ന് അതായത് ജെമ്മിൽ നിന്ന് സഹായം ലഭിക്കുന്നു.

സുഹൃത്തുക്കളെ,

കഴിഞ്ഞ കുറച്ച് വർഷങ്ങളായി രാജ്യത്ത് നടന്ന സാങ്കേതിക വിപ്ലവം റേഡിയോയെയും പ്രത്യേകിച്ച് എഫ്എമ്മിനെയും പുതിയൊരു രൂപത്തിൽ രൂപപ്പെടുത്തിയിട്ടുണ്ട്. ഇന്റർനെറ്റ് കാരണം, റേഡിയോ പിന്നോട്ട് പോയിട്ടില്ല, മറിച്ച് ഓൺലൈൻ എഫ്എം, പോഡ്‌കാസ്റ്റുകൾ എന്നിവയിലൂടെ നൂതനമായ രീതികളിൽ മുന്നോട്ട് വന്നിട്ടുണ്ട്. അതായത്, ഡിജിറ്റൽ ഇന്ത്യ റേഡിയോയ്ക്ക് പുതിയ ശ്രോതാക്കളെയും പുതിയ ചിന്താരീതിയെയും നൽകിയിട്ടുണ്ട്. എല്ലാ ആശയവിനിമയ മാധ്യമങ്ങളിലും നിങ്ങൾക്ക് ഈ വിപ്ലവം കാണാൻ കഴിയും. ഉദാഹരണത്തിന്, രാജ്യത്തെ ഏറ്റവും വലിയ ഡിടിഎച്ച് പ്ലാറ്റ്‌ഫോമായ ഡിഡി ഫ്രീ ഡിഷിന്റെ സേവനം 4.30 കോടി കുടുംബങ്ങൾക്ക് ലഭ്യമാണ്. ഇന്ന് ലോകത്തിലെ എല്ലാ വിവരങ്ങളും അതിർത്തിക്കടുത്തുള്ള പ്രദേശങ്ങളിലെ കോടിക്കണക്കിന് ഗ്രാമീണ വീടുകളിൽ തത്സമയം എത്തിച്ചേരുന്നു. പതിറ്റാണ്ടുകളായി ദുർബലരും പിന്നാക്കം നിൽക്കുന്നവരുമായ സമൂഹത്തിലെ ഒരു വിഭാഗത്തിന് ഫ്രീ ഡിഷിലൂടെ വിദ്യാഭ്യാസത്തിന്റെയും വിനോദത്തിന്റെയും സൗകര്യങ്ങൾ ലഭിക്കുന്നു. ഇത് സമൂഹത്തിലെ വിവിധ വിഭാഗങ്ങൾ തമ്മിലുള്ള അസമത്വം ഇല്ലാതാക്കുന്നതിനും എല്ലാവർക്കും ഗുണനിലവാരമുള്ള വിവരങ്ങൾ നൽകുന്നതിനും കാരണമായി. ഇന്ന് വിവിധ തരം വിദ്യാഭ്യാസ കോഴ്‌സുകൾ ഡിടിഎച്ച് ചാനലുകളിൽ ലഭ്യമാണ്. മികച്ച സർവകലാശാലകളുടെ വൈദഗ്ദ്ധ്യം നിങ്ങളുടെ വീടുകളിൽ നേരിട്ട് ലഭ്യമാണ്. കൊറോണ കാലത്ത് രാജ്യത്തെ കോടിക്കണക്കിന് വിദ്യാർത്ഥികളെ ഇത് വളരെയധികം സഹായിച്ചിട്ടുണ്ട്. ഡിടിഎച്ച് ആയാലും എഫ്എം റേഡിയോ ആയാലും, അവയുടെ ശക്തി ഭാവി ഇന്ത്യയിലേക്ക് എത്തിനോക്കാനുള്ള ഒരു ജാലകം നമുക്ക് നൽകുന്നു. ഈ ഭാവിക്കായി നാം സ്വയം തയ്യാറെടുക്കണം.

സുഹൃത്തുക്കളെ,

എഫ്എം ട്രാൻസ്മിറ്ററുകൾ വഴിയുള്ള കണക്റ്റിവിറ്റിക്ക് മറ്റൊരു മാനം കൂടിയുണ്ട്. ഈ എഫ്എം ട്രാൻസ്മിറ്ററുകൾ രാജ്യത്തെ എല്ലാ ഭാഷകളിലും, പ്രത്യേകിച്ച് 27 ഭാഷകളിലും പ്രക്ഷേപണം ചെയ്യും. മറ്റൊരു വിധത്തിൽ പറഞ്ഞാൽ, ഈ കണക്റ്റിവിറ്റി ആശയവിനിമയ മാർഗങ്ങളെ ബന്ധിപ്പിക്കുക മാത്രമല്ല, ആളുകളെ ബന്ധിപ്പിക്കുകയും ചെയ്യുന്നു. ഇത് നമ്മുടെ ​ഗവൺമെൻ്റ് പ്രവർത്തിക്കുന്ന രീതിയുടെ ഒരു മുഖമുദ്രയാണ്. പലപ്പോഴും നമ്മൾ കണക്റ്റിവിറ്റിയെക്കുറിച്ച് സംസാരിക്കുമ്പോൾ, റോഡ്, റെയിൽ, വിമാനത്താവളം എന്നിവയുടെ ചിത്രം നമ്മുടെ മുന്നിൽ ഉയർന്നുവരുന്നു. എന്നാൽ ഭൗതിക കണക്റ്റിവിറ്റിക്ക് പുറമേ, സാമൂഹിക കണക്റ്റിവിറ്റി വർദ്ധിപ്പിക്കുന്നതിലും നമ്മുടെ ഗവൺമെന്റ് തുല്യ ഊന്നൽ നൽകിയിട്ടുണ്ട്. സാംസ്കാരികവും ബൗദ്ധികവുമായ കണക്റ്റിവിറ്റിയും നമ്മുടെ ഗവൺമെന്റ് തുടർച്ചയായി ശക്തിപ്പെടുത്തുന്നു.

ഉദാഹരണത്തിന്, കഴിഞ്ഞ ഒൻപത് വർഷത്തിനിടെ രാജ്യത്തിന്റെ വിവിധ ഭാഗങ്ങളിൽ നിന്നുള്ള യഥാർത്ഥ നായകന്മാരെ പദ്മ പുരസ്കാരങ്ങൾ, സാഹിത്യ, കലാ പുരസ്കാരങ്ങൾ എന്നിവയിലൂടെ ഞങ്ങൾ ആദരിച്ചിട്ടുണ്ട്. മുമ്പത്തെപ്പോലെയല്ല, ശുപാർശയുടെ അടിസ്ഥാനത്തിലല്ല, മറിച്ച് രാജ്യത്തിനും സമൂഹത്തിനും വേണ്ടിയുള്ള സേവനത്തിന്റെ അടിസ്ഥാനത്തിലാണ് പദ്മ അവാർഡുകൾ നൽകുന്നത്. ഇന്ന് നമ്മോടൊപ്പമുള്ള പദ്മ പുരസ്കാര ജേതാക്കൾക്ക് ഇത് നന്നായി അറിയാം. രാജ്യത്തിന്റെ വിവിധ ഭാഗങ്ങളിലെ തീർത്ഥാടനങ്ങൾ മതസ്ഥലങ്ങൾ എന്നിവ  പുനരുജ്ജീവിപ്പിച്ചതിനുശേഷം, ഒരു സംസ്ഥാനത്ത് നിന്നുള്ള ആളുകൾ മറ്റൊരു സംസ്ഥാനത്തേക്ക് പോകുന്നു. വിനോദസഞ്ചാര കേന്ദ്രങ്ങൾ സന്ദർശിക്കുന്ന ആളുകളുടെ എണ്ണം വർദ്ധിക്കുന്നത് രാജ്യത്ത് വർദ്ധിച്ചുവരുന്ന സാംസ്കാരിക ബന്ധത്തിന്റെ തെളിവാണ്. ​ഗോത്രവർ​ഗ സ്വാതന്ത്ര്യ സമര സേനാനികളുമായി ബന്ധപ്പെട്ട മ്യൂസിയമായാലും, ബാബാസാഹേബ് അംബേദ്കറുടെ പഞ്ചതീർത്ഥത്തിന്റെ പുനർനിർമ്മാണമായാലും, പ്രധാനമന്ത്രി മ്യൂസിയമായാലും, ദേശീയ യുദ്ധ സ്മാരകമായാലും, അത്തരം സംരംഭങ്ങൾ രാജ്യത്തെ ബൗദ്ധികവും വൈകാരികവുമായ ബന്ധത്തിന് ഒരു പുതിയ മാനം നൽകിയിട്ടുണ്ട്.

സുഹൃത്തുക്കളെ,

ഏത് രൂപത്തിലുള്ള കണക്റ്റിവിറ്റിയുടെ ഉദ്ദേശ്യവും രാജ്യത്തെ ബന്ധിപ്പിക്കുക, 140 കോടി നാട്ടുകാരെ ബന്ധിപ്പിക്കുക എന്നതാണ്. ഓൾ ഇന്ത്യ റേഡിയോ പോലുള്ള എല്ലാ ആശയവിനിമയ ചാനലുകളുടെയും ദർശനവും ദൗത്യവും ഇതായിരിക്കണം. നിങ്ങൾ ഈ ദർശനവുമായി മുന്നോട്ട് പോകുമെന്ന് എനിക്ക് ഉറപ്പുണ്ട്, ഈ വികാസം സംഭാഷണത്തിലൂടെ രാജ്യത്തിന് പുതിയ ശക്തി നൽകുന്നത് തുടരും. ഒരിക്കൽ കൂടി, ഓൾ ഇന്ത്യ റേഡിയോയ്ക്കും രാജ്യത്തിന്റെ വിദൂര പ്രദേശങ്ങളിൽ നിന്നുള്ള എന്റെ പ്രിയപ്പെട്ട സഹോദരീസഹോദരന്മാർക്കും എന്റെ ആശംസകളും അഭിനന്ദനങ്ങളും അറിയിക്കുന്നു. നന്ദി.

ഡിസ്ക്ലയ്മർ: പ്രധാനമന്ത്രിയുടെ പ്രസംഗത്തിന്റെ ഏകദേശ വിവർത്തനമാണിത്. യഥാർത്ഥ പ്രസംഗം ഹിന്ദിയിലായിരുന്നു നടത്തിയത്.

-NK-