వేవ్స్, క్రియేట్ ఇన్ ఇండియా ఛాలెంజ్ (సీఐసీ) వంటి సమాచార, ప్రసార మంత్రిత్వ శాఖ ప్రధాన కార్యక్రమాలు దేశంలో పెరుగుతున్న సృజనాత్మక ప్రతిభను వెలుగులోకి తెస్తూనే ఉన్నాయి. బ్యాటిల్ ఆఫ్ బ్యాండ్స్, సింఫనీ ఆఫ్ ఇండియా పోటీల విజేతలు ఢిల్లీ వేదికగా నిర్వహించే సాంస్కృతిక కార్యక్రమాల్లో ఒకటైన నేషనల్ స్ట్రీట్ ఫుడ్ ఫెస్టివల్ 15వ ఎడిషన్‌లో ప్రత్యేక ప్రదర్శన ఇవ్వనున్నారు. ఇది రుచికరమైన ప్రాంతీయ వంటకాల నుంచి ప్రసిద్ధ స్ట్రీట్ ఫుడ్ వరకు విభిన్న రుచులను ఒకచోట చేర్చే గొప్ప ఉత్సవం.

ఈనెల 12 నుంచి 14 వరకు న్యూఢిల్లీలోని జవహర్‌లాల్ నెహ్రూ స్టేడియంలో జరిగే ఈ ఉత్సవంలో ప్రసిద్ధ గాయకులు కైలాష్ ఖేర్, నటులు ఆశిష్ విద్యార్థి, శ్రీలంక పాప్ ఆర్టిస్ట్ యోహాని, గీత రచయిత-గాయకులు అమితాబ్ ఎస్ వర్మ, హిప్-హాప్ కళాకారులు ఎమ్‌సీ స్క్వేర్, కుల్లార్ జి.ల ప్రదర్శనలతో పాటు క్రియేట్ ఇన్ ఇండియా ఛాలెంజ్ - సీజన్ 1 విజేతల అద్భుత ప్రదర్శనను నిర్వహిస్తున్నారు.

మూడు రోజుల ఈ సాంస్కృతిక వేడుకలో ఉత్తేజకరమైన సీఐసీ సంగీత శ్రేణిని నిర్వహిస్తున్నారు, అందులో ఇవి ఉన్నాయి:

1. బ్యాండ్ శివోహం (బ్యాటిల్ ఆఫ్ బ్యాండ్స్) — సభ్యులు ప్యాడీ, సన్నీ, అషు, హితేష్ సూఫీల బృందం మెలోడీలు, బాలీవుడ్ క్లాసిక్‌లను ప్రదర్శిస్తారు.

2. చిరాగ్ తోమర్ (సింఫనీ ఆఫ్ ఇండియా) — పెర్కషనిస్ట్ సాహిల్ వర్మతో కలిసి ప్రసిద్ధ బాలీవుడ్ హిట్‌లను ప్రదర్శిస్తారు.

3. నిషు శర్మ (బ్యాటిల్ ఆఫ్ బ్యాండ్స్) — రాజస్థానీ జానపద సంగీతాన్ని ఈ వేదికపై ప్రదర్శిస్తారు.

4. నయన్ కృష్ణ (సింఫనీ ఆఫ్ ఇండియా) — ఫ్లూట్ వాయిద్య ప్రదర్శన.

5. మాల్దీవులకు చెందిన విజయవంతమైన బ్యాండ్ భారత్‌లో తొలిసారి ప్రదర్శన ఇస్తుంది. ఇది ఈ వేడుకలకు అంతర్జాతీయ కోణాన్ని జోడిస్తుంది.

సీఐసీ, వేవ్స్ కార్యక్రమాల్లో భాగంగా ఈ యువ కళాకారులు జాతీయ, అంతర్జాతీయ స్థాయిలో రాణిస్తూ తమదైన ముద్ర వేస్తున్నారు. బాటిల్ ఆఫ్ బ్యాండ్స్, సింఫనీ ఆఫ్ ఇండియా విజేతలు ముంబయిలోని వేవ్స్ కార్యక్రమంలో తమ కళాత్మక పరిధితో ప్రేక్షకులను మంత్రముగ్ధులను చేశారు. మెల్‌బోర్న్‌లోని ప్రధాన వేవ్స్ బజార్ గ్లోబల్ ఔట్‌రీచ్ ఈవెంట్స్, ఒసాకా వరల్డ్ ఎక్స్‌పో, టొరంటో ఇంటర్నేషనల్ ఫిల్మ్ ఫెస్టివల్‌ వంటి అంతర్జాతీయ వేదికలపైనా తమ ప్రతిభను అద్భుతంగా ప్రదర్శించారు. నేషనల్ స్ట్రీట్ ఫుడ్ ఫెస్టివల్‌లో వారి భాగస్వామ్యం వారి సృజనాత్మక ప్రయాణంలో మరో కీలక ముందడుగు కానుంది. ఇది మరింత విస్తృతమైన, విభిన్నమైన ప్రేక్షకులతో అనుసంధానమయ్యేందుకు వారికి సహాయపడుతుంది.

భారత ఆరెంజ్ ఆర్థిక వ్యవస్థకు ప్రోత్సాహం

కళాకారులు, ఔత్సాహికులు తమ సృజనాత్మకతను పెంపొందించుకోవడానికి... వేవ్స్ వేదికగా దానిని ప్రదర్శించడానికి... వారి ప్రతిభ, సృజనాత్మకతల ద్వారా ఆదాయాన్ని ఆర్జించడానికి... జాతీయ, అంతర్జాతీయ స్థాయిలో విస్తృత అవకాశాలను పొందడానికి... తద్వారా భారత ఆరెంజ్ ఆర్థిక వ్యవస్థను బలోపేతం చేయడానికి ఈ కార్యక్రమాన్ని రూపొందించారు.

వేవ్స్, క్రియేట్ ఇన్ ఇండియా ఛాలెంజ్ గురించి

సమాచార, ప్రసార మంత్రిత్వ శాఖ ఆధ్వర్యంలో వేవ్స్ ప్రధాన కార్యక్రమం కింద నిర్వహిస్తున్న ఒక కీలక కార్యక్రమమే ఈ క్రియేట్ ఇన్ ఇండియా ఛాలెంజ్. ఇది సంగీతం, చలనచిత్రం, యానిమేషన్, వీఎఫ్ఎక్స్, గేమింగ్, కామిక్స్, ఏఐ, ఎక్స్ఆర్, డిజిటల్ మీడియా వంటి వివిధ మీడియా-వినోద రంగ విభాగాల్లో భారత సృజనాత్మక ప్రతిభను గుర్తించడం, ప్రోత్సహించడం, నిర్వహించడం, ప్రదర్శించడం లక్ష్యంగా గలది.

ఎన్ఎస్ఎఫ్ఎఫ్ గురించి తక్షణ సమాచారం కోసం ఈ క్యూఆర్ కోడ్ స్కాన్ చేయండి

****