કેન્દ્રીય યુવા બાબતો અને રમતગમત મંત્રી, ડૉ. મનસુખ માંડવિયાએ FEI એશિયન ઇક્વેસ્ટ્રિયન ચેમ્પિયનશિપ 2025 માં તેમના ઐતિહાસિક પ્રદર્શન બદલ મેડલ વિજેતા ઇવેન્ટિંગ અને ડ્રેસેજ ટીમોનું શુક્રવારે સન્માન કર્યું હતું. પટાયા ખાતે યોજાયેલી ટીમ તથા વ્યક્તિગત સ્પર્ધાઓમાંથી છ સભ્યોની ટુકડી કુલ પાંચ પદકો સાથે પરત ફરી હતી, જેના કારણે આ ખંડસ્તરીય ચેમ્પિયનશિપ ભારત માટે ઐતિહાસિક બની હતી.

આશિષ લિમાયે બે મેડલ જીત્યા – ઇવેન્ટિંગમાં સીમાચિહ્નરૂપ વ્યક્તિગત ગોલ્ડ અને ટીમ ઇવેન્ટમાં સિલ્વર, જ્યારે શ્રુતિ વોરાએ ત્રણ સિલ્વર મેળવ્યા – બે વ્યક્તિગત અને એક ટીમ ડ્રેસેજમાં. ટીમના અન્ય સભ્યોમાં ઇવેન્ટિંગમાં શશાંક સિંહ કટારિયા અને શશાંક કનમૂરી તેમજ ડ્રેસેજમાં દિવ્યકૃતિ સિંહ અને ગૌરવ પુંડીર હતા.

શુક્રવારે રમતવીરોનું સન્માન કરતાં, ડૉ. માંડવિયાએ અશ્વ સવારીની રમતોમાં ભારતના તાજેતરના ઉદય પર ભાર મૂક્યો હતો. તેમણે કહ્યું, “ભારત એવી રમતોમાં પણ સારું પ્રદર્શન કરી રહ્યું છે જેમાં અગાઉ આપણી વૈશ્વિક હાજરી ભાગ્યે જ હતી. ભારતમાં મર્યાદિત ઇકોસિસ્ટમ ધરાવતા ક્ષેત્રમાં તમે જે જુસ્સા સાથે કામ કર્યું છે તેના માટે હું તમારા બધાની પ્રશંસા કરું છું. જોકે, આ 10 વર્ષ પહેલાનું ભારત નથી. તમે છેલ્લા દાયકામાં રમતગમતની ઇકોસિસ્ટમમાં થયેલા ફેરફારો જોયા હશે. હું તમને ખાતરી આપું છું કે સરકાર રમતવીર અને તેના મેડલ વચ્ચે આવતી કોઈપણ અવરોધને દૂર કરશે. અમે ભારતમાં અશ્વ સવારી મૈત્રીપૂર્ણ રમતગમત ઇકોસિસ્ટમ બનાવીશું, જેથી રમતવીરોને વિદેશમાં તાલીમ લેવાની જરૂર ન પડે."

માનનીય મંત્રીશ્રીએ એક વર્ષની અંદર ભારતમાં ક્વોરન્ટાઇન સેન્ટર સ્થાપિત કરવાની સરકારની પ્રતિબદ્ધતાનો પણ પુનરોચ્ચાર કર્યો, જે આંતરરાષ્ટ્રીય સ્પર્ધાઓ માટે ઘોડાઓની અવરજવર માટે જરૂરી લાંબા સમયથી પડતર માંગ હતી.

સ્પર્ધામાંથી ત્રણ સિલ્વર મેડલ જીતનાર શ્રુતિ વોરાએ રમતવીરોની ચિંતાઓ પર મંત્રીશ્રીના ઝડપી પ્રતિભાવની પ્રશંસા કરી હતી. 54 વર્ષીય શ્રુતિ વોરાએ કહ્યું, “જ્યારે અમે અમારી ચિંતાઓ રજૂ કરી, ત્યારે તેમણે તરત જ દરેકને અશ્વોના રોગમુક્ત ક્ષેત્ર પર કામ કરવા જણાવ્યું. તેમણે કહ્યું કે અમને એક સંપૂર્ણ ઇકોસિસ્ટમની જરૂર છે, માત્ર થોડા રમતવીરો વિદેશ જાય તેની નહીં. અમને સમગ્ર અશ્વ સવારી સમુદાયને તે તક આપવાની જરૂર છે કે તેઓ ભારતમાં સ્પર્ધા કરી શકે, તેઓ ભારતમાં લાયકાત મેળવી શકે અને એકવાર તેઓ પસંદગીના માપદંડોને પૂર્ણ કરે, પછી તેમને ભારતમાંથી કોઈપણ અન્ય દેશમાં તેમના અશ્વોને લઈ જવાની મંજૂરી આપવામાં આવે. એકવાર આ સિસ્ટમ્સ ગોઠવાઈ જાય, પછી બધું સરળ થઈ જશે.”

SM/BS/GP//JD