Ka Consultative Committee jong ka Tnad Development of North Eastern Region (MDoNER) ka la iakynduh ha ka 03 tarik Nohprah, 2025 hapoh ka jingpyniaid jong u Myntri ka Sorkar Pdeng ba dei khmih ia ka Tnad Communications bad Development of North Eastern Region, u Jyotiraditya M. Scindia, ha ka Parliament House Annexe. Ha kane ka jingialang la iashim bynta ruh u Myntri Khynnah ka sorkar pdeng ba dei peit ia ka Tnad pule puthi bad Development of North Eastern Region, u Sukanta Majumdar.

U Scindia u la pdiang sngewbha ïa ki Dkhot jong ka committee na Lok Sabha bad Rajya Sabha bad u la ong ba ki jingïalang jong ka Committee ki long ka bynta ba kongsan jong ka jingïakren kaba ïai bteng halor ka jingbei tyngka bad ka jingkiew ha ka roi ka par ha ki Jylla ka thaiñ Shatei Lam Mihngi. U la ai khublei ruh ïa ki Dkhot kiba la ïashim bynta shitrhem bad ki jingai jingmut kiba kordor ha ki jingïalang jong ka Consultative Committee.

Da kaba khot ïa ka PM-DevINE (Prime Minister’s Development Initiative for North East Region) kum ka skhim ba kongsan tam jong ka Tnad, u Scindia u la pyntip ba ïa kane ka skhim la buh jingmut ha ka mang tyngka jong ka sorkar pdeng 2022-2023. Ka skhim ka don ka jingbuh pisa haduh T. 6600 klur na ka bynta ka samoi 2022-2023 haduh 2025-2026. Haduh ka 31 tarik u Risaw 2025, la mynjur haduh 44 tylli ki projek kiba shongdor kumba T.5,700 klur. Lai tylli na ki projek ba la mynjur kiba shongdor kumba T.176 klur la pyndep bad 41 tylli ki projek kiba shongdor kumba T.5,500 klur ki dang iaid shakhmat mynta. Shuh shuh, ïa ki projek kiba shongdor T.111 klur la ai jingmynjur, bad kiwei pat ki projek kiba shongdor T.625 klur ki dang don ha ka jingpynkhreh. Kumta ka Tnad ka don ha ka lynti ban pyndonkam pura ia ka jingbuh pisa hapoh ka skhim.

Haba jubab halor ki mat ba la wanrah da ki Dkhot ka Committee, u Myntri Sorkar Pdeng u la ai ïa ki jingtip ba bniah halor ki projek kiba dang pyntreikam ha Assam, Nagaland, Mizoram bad Tripura. Halor ka jingai jingmut na ka bynta ki projek jong ka kam jngohkai pyrthei ha Tripura, u Myntri u la pyntip ba yn pynbiang ïa ki jaka jngohkai pyrthei kiba don ïa ki jingdonkam katkum ki jinglong jingman ha kylleng ka pyrthei ha man la ka jylla jong ka thain shatei lammihngi, ha ki jaka ba la jied ba la ithuh da kaba ïamir jingmut bad ki Sorkar Jylla. Ia ka Sohra Circuit ha Meghalaya bad ka Matabari Circuit ha Tripura la shim ha ka jingpyntreikam pilot basis. La dep ban buh mawnongrim na ka bynta ka Meghalaya-Sohra Circuit, katba ia ka Tripura–Matabari Circuit pat ka lah jan ioh ia ka jingmynjur. Nalor ka jingpynkhlain ia ki jingdon jingem, ka projek tourist circuit kan don ka jingpynleit jingmut kaba khlain ha ka jingkyntiew ia ka bor treikam ban pynthikna ka jingdon ki briew kiba tbit ban kyrshan ia ka jingkiew ha ka kam jngohkai pyrthei bad na ka bynta ka jingshem ba sngewtynnad jong ki nongjngohkai pyrthei.

U Scindia u la ban jur ba ia ki projek PM-DevINE la buddien lyngba ka rukom treikam kaba pyrkhing bad kaba bun bynta. La pynlong ia ki jingpeit bniah man ka taiew bad la buddien ia kawei pa kawei ka projek katkum ka por ba la khmih lynti ban pyndep bad ka por ba pyntreikam. Ha kine ki jingpeit bniah, la peit ia ka jingiaid shaphrang jong ka kam lyngba ki dur ba la pynpaw ruh ia ka por. Ki ophisar na ka MDoNER & North Eastern Council (NEC) ki pynlong ruh ïa ki jingpeit bniah ha ki jaka treikam, ba la kyrshan da ki lad bishar bniah jong kiwei pat ki kynhun ban pynthikna ïa ka jingkitkhlieh.

U Myntri u la ban biang ïa ka jingkut jingmut jong ka Sorkar ban pynthikna ïa ka roi ka par kaba stet, kaba shai, bad kaba ïahap bad ka jingmih ha ka thaiñ shatei lammihngi, ha kaba ka PM-DevINE kan long kum ka nongplie lad ba kongsan na ka bynta ki jingdon jingem bad ka jingkylla ha ka imlang sahlang bad ka ioh ka kot.

***