U Myntri Sorkar Pdeng ba dei khmih ia ka Tnat Ports, Shipping and Waterways Sarbananda Sonowal u la ong ba u Myntri Rangbahduh Narendra Modi u la long kum u “nongtei ia ka thain shatei lammihngi kaba thymmai bad kaba la kiew biang,” ha kaba la pynkylla ia ka thain kaba shu shah ieh bein da ki phew snem sha ka kor jong ka jingkiew shaphrang ka India, ka jingiasoh bad ka burom na ka bynta ka ri.

Haba kren shaphang ki jingmih ha ka roi ka par kiba la ïoh ha kine ki phew snem ba la dep, u Sonowal u la ong ba ka thaiñ shatei lammihngi ka la kylla “na ki khappud jong ka jingthaw polisi sha ka lynti ba kongsan jong ki jingthmu ba kongsan jong ka ri,” kaba pynpaw ïa ka jingangnud jong u Myntri Rangbahduh ban kyntiew ïa ki jingtei, ka jingpynkylla ïa ka ïoh ka kot, ka jingkhyllie biang ïa ka kolshor bad ka jingtei ïa ka jingsuk kaba iaineh.

 “Ka thain shatei lammihngi ka la mad ïa ki hynriew phew snem jong ka jingduna ki nongmihkhmat bad ka jingduna ka jingbei tyngka,” la ong u Sarbananda Sonowal. “Hapoh u Modi ji, ïa kane ka thaiñ la ithuh kum ka Ashtalakshmi jong ka ri India — ym tang kum ka thaiñ khappud hynrei ka kor thymmai jong ka roi ka par jong ka ri. Naduh ka jingpyniasoh ia ki nongbah da ki rel bad ki kad liengsuin haduh ki surok bah, ka bording, ki network digital bad ki lad ka leit ka wan lyngba ki jaka shong um hapoh ka ri, ka jingkylla ka la long ka ban sah jingkynmaw.”

U Myntri ka sorkar pdeng u Sarbananda Sonowal u la ong ba ka jingpyniasoh ka la long ka bynta ba kongsan jong ka rukom treikam u Myntri Rangbahduh. Baroh ki jingpyniar ia ki lynti rel ha ka thain ki dei kiba la pyndep ha kaba ka Arunachal Pradesh, Tripura, Manipur bad Mizoram ki la iasoh bad ka rynsan broad gauge bad ki rel kit briew bad ki rel kit mar ki poi sha ki jaka bapher bapher jong ka thain ha ka sien kaba nyngkong. Ka jingkieng rel bad surok Bogibeel — kaba la dep pyndep ha u snem 2018 — bad ka jingpyntreikam ïa ka Bhairabi–Sairang link ha u bnai Jylliew 2025 ka la pynïar ïa ki lad ka leit ka wan ha Assam bad Mizoram.

Saw tylli ki projek ban pyniasoh ia ki rel — Nagaland, Manipur, Sikkim bad Meghalaya — ki dang ïaid shakhmat, katba ïa ka rel India – Bangladesh Agartala – Akhaura la plie lang da ki Myntri Rangbahduh jong baroh ar tylli ki ri ha u bnai Naiwieng 2023.

Ha kaba iadei bad ki surok, palat 11,000 km ki surok bah jong ka ri bad ki surok bah ba la pynbha ki dei kiba la pyntrei ha kine ki shiphew snem ba la dep. Ki lynti ba kongsan ki kynthup ia ka bynta jong ka Shillong-Nongstoin-Tura, ka projek Nechipu-Hoj NH-13, bad ki surok bah kiba pyniasoh ia ka nongbah sha Kohima, Itanagar bad Gangtok, katto katne na kine ki la jan dep ha u snem 2025.

Ka jingpyniasoh da ki liengsuin ka la sakhi ia kaei kaba u Sarbananda Sonowal u la batai kum “ka jingkylla ba khraw.” Na ki khyndai tylli ki kad liengsuiñ ha u snem 2014, ka thain shatei lammihngi mynta ka don 19 tylli ki kad liengsuiñ kiba treikam. Ia ki kad liengsuin ba thymmai ha Pakyong bad Hollongi, ryngkat bad ki kad liengsuin ba la pynbha kum ka Tezu, Rupsi bad Agartala, la pyntreikam hapoh ka skhim UDAN. La wanrah ruh ia ka rynsan jong ki jaka ieng helicopter bad ki jaka ieng liengsuin ha ki jaka shong um ban pyniar ia ka jingpyniasoh sha ki distrik kiba jngai.

Ki jingdon jingem kiba iadei bad ka ioh ka kot bad ki karkhana.

"Hapoh ka jingialam ba don jingshemphang jong u Myntri Rangbahduh ka ri u Narendra Modi ji, ka thain shatei lammihngi ka la sakhi ia ka jingkylla kaba phylla na ka jingshah iehnoh bein kaba la neh da ki phew snem. Naduh ka jingpyniasoh da ki rel kaba poi sha ki nongbah jong ki jylla haduh ki surok bah, ki kad liengsuin bad ki lad ka leit ka wan lyngba ki jaka shong um kiba pawnam ha ka pyrthei, kane ka thain ka la mih kum ka kor kaba thymmai kaba wanrah ia ka roi ka par jong ka India. Ka jingpyndep ïa ki projek ba kongsan kum ka Bogibeel, ka jingpynheh ïa ka AIIMS Guwahati, bad ka jingsted jong ka jingtei ia ki surok bad ki jingdon jingem kiba iadei bad ki surok bad ki kad liengsuin ki pyni ïa ka jingiar jong ka jingkylla kaba dang ïaid shakhmat,” la ong u Sarbananda Sonowal .

U Sonowal u la ong ba ka jingthmu jong u Myntri Rangbahduh u Modi ka la khring ïa ki nongbei tyngka kiba ym pat ju iohi ha ka thaiñ shatei lammihngi. Ka Bio-refinery ha Numaligarh, kaba dei ka karkhana pynmih ethanol na u siej kaba nyngkong eh ha India, ka la thaw ïa ki lad kamai kaba thymmai na ka bynta ki nongrep. Ka Numaligarh Refinery Expansion, kaba la pynlut haduh ₹22,594 klur, ka la kyntiew lai shah ia ka bor treikam jong ka, kaba la buh ia ka thain kum ka jaka pynmih bor ding kaba donkam bha. Ka jaka pyndait bad test ia ki semiconductor ha Jagiroad – ia kaba la bei tyngka haduh T 27,000 klur ka la pynpaw ia ka thain shatei lammihngi ha ki kam teknoloji jong ka pyrthei. Ka rep ka riang bad ki mar rep ki long ka bynta kaba kongsan jong ka roi ka par ha ka thain. Ka thain shatei lammihngi mynta ka ialam ia ka kam organic jong ka India, kaba la kyrshan da ki seng nongrep-nongpynmih mar, ka jingpynkylla ia ki ain kiba iadei bad ki siej bad ki mishon kiba kyrpang.

U Myntri ka sorkar pdeng u Sarbananda Sonowal u la ong ba ka jingshong shngain ha ka thain shatei lammihngi ka la nang kiew namar ka jingiateh jingiasuk bad ki kynhun Bodo, Karbi, Bru bad kiwei kiwei ki kynhun, katba ia ka AFSPA la pynduna da 75 percent naduh u snem 2014. “Ka jingkiew biang ka kolshor ka dang iaid shakhmat, la ong u Sonowal da kaba kdew sha ka jingioh jingburom jong ka ri ia ki riewkhraw kum u Bharat Ratna Dr. Bhupen Hazarika, ka jingkynmaw burom ïa u Lachit Barphukon, bad ka jingpynrung kyrteng ïa ki Maidam jong ka Assam ha ka thup jong ka UNESCO World Heritage List.

"Ki shiphew snem jong u Modi ki la plie lad ïa ka lad kamai kiba khlem pat ju don mynno mynno ruh na ka bynta ka thaiñ shatei lammihngi — naduh ka karkhana pynkhuid um da ki siej ha Numaligarh haduh ka karkhana semiconductor ba nyngkong eh ha Jagiroad. Kine kim dei ki projek ba marwei; ki pynpaw ïa ka jingshaniah ba thymmai jong ka ri ha ka thaiñ jong ngi. Ha ryngkat ki jingiakut iasuk, ka jingkhyllie biang ia ka kolshor, ka jingithuh ka pyrthei ia ki riewkhraw kum u Lachit Barphukon bad Bhupen Hazarika, ngi sakhi ïa ka jingmih thymmai jong ka jinglong kyrpang, ka jingsarong, ka lad bad ka jingbei tyngka ha ka khyndew ka shyiap jong ngi,” la ong u Sarbananda Sonowal.

U Sonowal u la ong ba ka jingleit jngoh palat 70 sien jong u Myntri Rangbahduh u Modi sha kane ka thaiñ bad ka jingbishar bniah jong ki myntri ba man ka por ka pynpaw ïa ka “jingsynshar kaba paw ha ki jaka ba ki briew ki shong ki sah.”

Ka khyrdop sha ka Southeast Asia

Hapoh ka Act East Policy, u Sonowal u la ong, ka thain shatei lammihngi ka kylla long ka khyrdop jong ka kam pynpoi mar bad ka kolshor sha ka thain South East Asia, lyngba ki integrated checkpost, ki jingtei ha ki jaka khappud bad ka jingpyniasoh ba bun rukom kaba pyniasoh ia ki lad ka leit ka wan lyngba ki jaka shong um, ki surok bah bad ki lynti rel.

 “Ka khana jong ka thain shatei lammihngi mynta ka dei ka khana jong ka India kaba la kiew biang,” la ong u Sonowal. “Kane ka jingkylla ka don ka dak jong u Myntri Rangbahduh Modi – u nongialam uba la wanrah ia ka jingshaniah, ka jingpeit bniah bad ka lawei ha ka kti jong ki briew jong ka thain shatei lammihngi.”

***

(रिलीज़ आईडी: 2198993) आगंतुक पटल : 3