ஹரியானா மாநிலம் குருக்ஷேத்திரத்தில் உள்ள தேசிய தொழில்நுட்ப நிறுவனமான என்ஐடி-யின் (NIT) 20-வது பட்டமளிப்பு விழாவில் குடியரசுத் துணைத்தலைவர் திரு சி.பி. ராதாகிருஷ்ணன் இன்று (30.11.2025) சிறப்பு விருந்தினராக கலந்து கொண்டார். இந்த நிகழ்வில் பேசிய அவர், இந்தியாவின் முதன்மையான தொழில்நுட்ப நிறுவனங்களில் ஒன்றான என்ஐடி-யில் நடைபெறும் இந்த நிகழ்வில் பங்கேற்பதில் பெருமை அடைவதாகக் கூறினார். நாட்டின் தொழில்நுட்பக் கல்வியின் தரத்தை உயர்ந்தும் நிறுவனமாக குருக்ஷேத்ரா என்ஐடி திகழ்வதாக அவர் பாராட்டுத் தெரிவித்தார். பட்டமளிப்பு விழா என்பது பட்டம் பெறுவதற்கான விழா மட்டும் அல்ல எனவும், மாணவர்களுக்கு, வாய்ப்புகளின் புதிய தொடக்கமாக இது உள்ளது என்றும் அவர் குறிப்பிட்டார்.

செயற்கை நுண்ணறிவு, புதுப்பிக்கத்தக்க எரிசக்தி, விண்வெளி தொழில்நுட்பம், உயிரி தொழில்நுட்பம், குறைக்கடத்திகள் ஆகியவற்றில் ஏற்பட்டுள்ள முன்னேற்றங்கள் குறித்தும் அவர் பேசினார். புதிய தொழில்நுட்பங்கள் சமூக முன்னேற்றத்துக்கான சக்திவாய்ந்த கருவியாக மாறியுள்ளன என்பதை அவர் எடுத்துரைத்தார்.

தொழில்நுட்பத்தை வெளிநாடுகளில் இருந்து பெற்ற நிலையிலிருந்து, மேம்பட்ட தீர்வுகளின் உலகளாவிய படைப்பாளராக இந்தியா மாறி வருவதை அவர் குறிப்பிட்டார். துடிப்பான தொழில்முனைவோர் சூழல் அமைப்பை வளர்ப்பதற்கு டிஜிட்டல் இந்தியா, ஸ்டார்ட்அப் இந்தியா, மேக் இன் இந்தியா போன்ற முயற்சிகள் பங்களிப்பதாக அவர் கூறினார்.

பல்துறை கற்றலுக்கான வழிகளை வழங்கும் வகையில் புதிய தேசிய கல்விக் கொள்கை அமைந்துள்ளது என்று அவர் தெரிவித்தார். இந்தியாவின் கலாச்சாரம், பாரம்பரியம், நெறிமுறைகள் ஆகியவற்றில் ஆழமாக வேரூன்றியதாக புதிய தேசிய கல்விக் கொள்கை அமைந்துள்ளது என அவர் கூறினார். 2047-ம் ஆண்டில் வளர்ச்சியடைந்த இந்தியா என்ற தொலைநோக்குப் பார்வையை எட்டுவதில் குருக்ஷேத்திரத்தின் என்ஐடி மாணவர்களும் முக்கிய பங்கு வகிப்பார்கள் என்று திரு சி.பி. ராதாகிருஷ்ணன் தெரிவித்தார்.

***

(Release ID: 2196535)

AD/PLM/RJ