ഹരിയാനയിലെ കുരുക്ഷേത്രയിലുള്ള നാഷണൽ ഇൻസ്റ്റിറ്റ്യൂട്ട് ഓഫ് ടെക്‌നോളജി (എൻഐടി) യുടെ ഇന്ന് നടന്ന ഇരുപതാമത് ബിരുദദാന ചടങ്ങിൽ ഇന്ത്യയുടെ ഉപരാഷ്ട്രപതി ശ്രീ. സി.പി. രാധാകൃഷ്ണൻ മുഖ്യാതിഥിയായി പങ്കെടുത്തു.

ഇന്ത്യയിലെ പ്രമുഖ സാങ്കേതിക സ്ഥാപനങ്ങളിലൊന്നിൻ്റെ  സുപ്രധാന ചടങ്ങിൽ പങ്കെടുക്കാൻ കഴിഞ്ഞതിൽ സന്തോഷമുണ്ടെന്ന് ഉപരാഷ്ട്രപതി പറഞ്ഞു. സമ്പന്നമായ പാരമ്പര്യവും, ഓജസ്സുറ്റ വർത്തമാനകാലവും, രാജ്യത്തെ സാങ്കേതിക വിദ്യാഭ്യാസത്തിൻ്റെ  നിലവാരം രൂപപ്പെടുത്തുന്ന ഭാവിയുമുള്ള ഒരു സ്ഥാപനമെന്ന് എൻഐടി കുരുക്ഷേത്രയെ അദ്ദേഹം പ്രശംസിച്ചു.

അധർമ്മം എത്ര ശക്തമാണെന്ന് തോന്നിയാലും, ധർമ്മം എപ്പോഴും അധർമ്മത്തിന്മേൽ വിജയം നേടുമെന്ന് നമ്മെ ഓർമ്മിപ്പിക്കുന്ന പുണ്യഭൂമിയാണ് കുരുക്ഷേത്രമെന്ന് അദ്ദേഹം പറഞ്ഞു.

ബിരുദദാന പരിപാടി വെറുമൊരു ചടങ്ങ് മാത്രമല്ലെന്നും മറിച്ച് വർഷങ്ങളുടെ സമർപ്പണം, അഭിമാനവും പ്രതീക്ഷയും അവസരവും നിറഞ്ഞ ഒരു പുതിയ തുടക്കമായി മാറുന്ന നിമിഷമാണെന്നും ഉപരാഷ്ട്രപതി അഭിപ്രായപ്പെട്ടു.

ആഗോള പരിവർത്തന വേഗത എടുത്തുപറഞ്ഞുകൊണ്ട്, നിർമ്മിതബുദ്ധി, പുനരുപയോഗ ഊർജ്ജ സംവിധാനങ്ങൾ, ബഹിരാകാശ സാങ്കേതികവിദ്യ, ബയോടെക്‌നോളജി, സൈബർ സുരക്ഷ, സെമികണ്ടക്ടറുകൾ എന്നിവയിലെ വികസനങ്ങളെക്കുറിച്ച് അദ്ദേഹം സംസാരിച്ചു.

വ്യവസായങ്ങളെ പുനർനിർമ്മിക്കുന്നതിനും സാമൂഹികപ്രവർത്തന രീതി പുനർനിർവചിക്കുന്നതിനും സാങ്കേതികവിദ്യ ശക്തമായ ഒരു സഹായിയായി മാറിയിരിക്കുന്നുവെന്ന് അദ്ദേഹം ഊന്നിപ്പറഞ്ഞു. 'സാങ്കേതികവിദ്യയുടെ യഥാർത്ഥ ലക്ഷ്യം പുരോഗതി മാത്രമല്ല, ഒരു ലക്ഷ്യബോധത്തോടെയുള്ള പുരോഗമനമാണ്' എന്ന് പ്രസ്താവിച്ചുകൊണ്ട് ഉത്തരവാദിത്തത്തോടെ നൂതനാശയങ്ങൾ ആവിഷ്‌കരിക്കാൻ അദ്ദേഹം വിദ്യാർത്ഥികളെ പ്രോത്സാഹിപ്പിച്ചു.

ഗവേഷണം, നൂതനാശയങ്ങൾ, ഇന്ത്യയ്ക്കനുയോജ്യമായ പ്രശ്നപരിഹാരം എന്നിവയിൽ കൂടുതൽ ആഴത്തിൽ പഠിക്കാൻ വിദ്യാർത്ഥികളെ പ്രോത്സാഹിപ്പിച്ചുകൊണ്ട്, ഇന്ത്യയുടെ സാങ്കേതിക നേതൃത്വത്തെ നയിക്കുന്ന ഇരട്ട യന്ത്രങ്ങളാണിവയെന്ന് അദ്ദേഹം പറഞ്ഞു. സുസ്ഥിര ഉത്പാദനം, മികച്ച ചലനക്ഷമത, ക്വാണ്ടം സാങ്കേതികവിദ്യകൾ, ആരോഗ്യ സംരക്ഷണ സാങ്കേതികവിദ്യകൾ, കാർഷിക നൂതനാശയങ്ങൾ, ഹരിത അടിസ്ഥാന സൗകര്യങ്ങൾ തുടങ്ങിയ ദേശീയ പ്രാധാന്യമുള്ള ഉയർന്നുവരുന്ന മേഖലകൾ യുവ നൂതനാശയ സംരംഭകർ പര്യവേക്ഷണം ചെയ്യേണ്ടതിൻ്റെ  ആവശ്യകത അദ്ദേഹം ഊന്നിപ്പറഞ്ഞു.

സാങ്കേതികവിദ്യയുടെ ഉപഭോക്താവ് എന്ന നിലയിൽ നിന്ന് അതിനൂതന പരിഹാരങ്ങളുടെ ആഗോള സ്രഷ്ടാവായി ഇന്ത്യ മാറിക്കൊണ്ടിരിക്കുകയാണെന്ന് ഉപരാഷ്ട്രപതി നിരീക്ഷിച്ചു. ഊർജ്ജസ്വലമായ ഒരു സംരംഭക ആവാസവ്യവസ്ഥയെ പരിപോഷിപ്പിച്ചതിന് ഡിജിറ്റൽ ഇന്ത്യ, സ്റ്റാർട്ടപ്പ് ഇന്ത്യ, മെയ്ക്ക് ഇൻ ഇന്ത്യ തുടങ്ങിയ സംരംഭങ്ങളെ അദ്ദേഹം പ്രശംസിച്ചു. തൊഴിലവസരങ്ങൾ സൃഷ്ടിക്കുകയും ദേശീയ വളർച്ചയ്ക്ക് സംഭാവന നൽകുകയും ചെയ്യുന്ന സംരംഭങ്ങളാക്കി അവരുടെ ആശയങ്ങളെ പരിവർത്തിച്ച് ഉയർത്താൻ ബിരുദധാരികളോട് അദ്ദേഹം അഭ്യർത്ഥിച്ചു.

കാലാവസ്ഥാ വ്യതിയാനം, സൈബർ സുരക്ഷാ ഭീഷണികൾ, സാങ്കേതികവിദ്യയിലേക്കുള്ള തുല്യപ്രവേശനം, നിർമ്മിതബുദ്ധിയുടെ ധാർമ്മിക ഉപയോഗം തുടങ്ങിയ സമകാലിക ആഗോള വെല്ലുവിളികളെ അംഗീകരിച്ചുകൊണ്ട്, ഇവ നൂതനാശയങ്ങൾക്കും നേതൃത്വത്തിനും അതിബൃഹത്തായ അവസരങ്ങൾ നൽകുന്നുണ്ടെന്ന് അദ്ദേഹം പറഞ്ഞു. ബഹുമുഖ പഠന മാർഗങ്ങൾ നൽകുന്നതും ഇന്ത്യയുടെ സംസ്‌കാരത്തിലും പൈതൃകത്തിലും ധാർമ്മികതയിലും ആഴത്തിൽ വേരൂന്നിയതുമായ ദേശീയ വിദ്യാഭ്യാസ നയം (എൻഇപി) 2020 നടപ്പിലാക്കിയ പ്രധാനമന്ത്രി ശ്രീ. നരേന്ദ്ര മോദിയുടെ ദീർഘവീക്ഷണത്തെ അദ്ദേഹം പ്രശംസിച്ചു. ഇന്ത്യയെ ഭരിക്കാനായി അവതരിപ്പിച്ചതും ക്ലാർക്കുമാരെ മാത്രം സൃഷ്ടിച്ചതുമായ മക്കാളെ വിദ്യാഭ്യാസ സമ്പ്രദായത്തിൻ്റെ  കോളനിവത്കരണ (കൊളോണിയൽ) മുദ്രയിൽ നിന്ന് മോചിതമാക്കി എൻഇപി 2020, ഇന്ത്യയെ ഒരു പരിവർത്തന പാതയിലേക്ക് നയിച്ചുവെന്ന് ഉപരാഷ്ട്രപതി അഭിപ്രായപ്പെട്ടു.

സമഗ്ര പഠനത്തിനുള്ള എൻഐടിയുടെ ശ്രദ്ധ കേന്ദ്രീകരിക്കലിനെ ഉപരാഷ്ട്രപതി അഭിനന്ദിച്ചു. ഭഗവദ്ഗീത, സാർവത്രിക മനുഷ്യ മൂല്യങ്ങൾ, വൈജ്ഞാനിക ശാസ്ത്രം, മാനസികാരോഗ്യം എന്നിവയെക്കുറിച്ചുള്ള പാഠ്യപദ്ധതികളിലൂടെ ബൗദ്ധികവും വൈകാരികവും ധാർമ്മികവുമായ വളർച്ചയെ പ്രോത്സാഹിപ്പിക്കുന്ന സമഗ്ര വ്യക്തിത്വ വികസന കേന്ദ്രം (സെൻ്റർ ഫോർ ഹോളിസ്റ്റിക് പേഴ്‌സണാലിറ്റി ഡെവലപ്‌മെൻ്റ്) സ്ഥാപിച്ചതിനെ അദ്ദേഹം പ്രശംസിച്ചു.

'2047-ഓടെ വികസിത ഭാരതം' എന്ന ദേശീയ ദർശനത്തെക്കുറിച്ച് വിവരിക്കവേ, എൻഐടി കുരുക്ഷേത്രയിലെ ബിരുദധാരികൾ ഈ ലക്ഷ്യം സാക്ഷാത്കരിക്കുന്നതിൽ നിർണായക പങ്ക് വഹിക്കുമെന്ന് ഉപരാഷ്ട്രപതി ആത്മവിശ്വാസം പ്രകടിപ്പിച്ചു. ഗവേഷണം, നൂതനാശയങ്ങൾ, ബൗദ്ധിക സ്വത്തവകാശ സൃഷ്ടി എന്നിവയുടെ ശക്തമായ സംസ്‌കാരത്തെ പ്രതിഫലിപ്പിക്കുന്ന തരത്തിൽ ഇൻസ്റ്റിറ്റ്യൂട്ടിന് ഇതുവരെ 64 പേറ്റൻ്റുകൾ ലഭിച്ചതിൽ അദ്ദേഹം അനുമോദനം രേഖപ്പെടുത്തി.

ഡിആർഡിഒ, ഐഎസ്ആർഒ എന്നിവയുമായുള്ള സഹകരണത്തിലൂടെ എഐ അധിഷ്ഠിത യുദ്ധം, പ്രതിരോധ ഗവേഷണം, ചന്ദ്രയാൻ, മാർസ് ഓർബിറ്റർ മിഷൻ പോലുള്ള ബഹിരാകാശ ദൗത്യങ്ങൾ എന്നിവയിലെ നൂതന സാങ്കേതികവിദ്യകൾക്ക് ഇൻസ്റ്റിറ്റ്യൂട്ട് നൽകിയ ഗണ്യമായ സംഭാവനകളെ അദ്ദേഹം അഭിനന്ദിച്ചു. ഗ്രാമങ്ങളിലെയും ചേരികളിലെയും ജീവിതം മെച്ചപ്പെടുത്താൻ ലക്ഷ്യമിട്ടുള്ള ചെലവു കുറഞ്ഞ, തദ്ദേശീയ സാങ്കേതികവിദ്യകളെക്കുറിച്ചുള്ള ഗവേഷണത്തിലൂടെ 'ആത്മനിർഭർ ഭാരത്'ലേക്കുള്ള ഇൻസ്റ്റിറ്റ്യൂട്ടിൻ്റെ  ശ്രമങ്ങളെയും അദ്ദേഹം അഭിനന്ദിച്ചു.

ഇന്ത്യയുടെ വികസന യാത്രയിൽ വിദ്യാർത്ഥികളെ ഉൾപ്പെടുത്തിക്കൊണ്ട്, നഗര-ഗ്രാമീണ വിടവ് നികത്താനും, സൂക്ഷ്മ ചെറുകിട ഇടത്തരം സംരംഭങ്ങളെ ശാക്തീകരിക്കാനും, കൃഷിയെ ആധുനികീകരിക്കാനും, സാങ്കേതികവിദ്യ അവസാനത്തെ വ്യക്തിയിലേക്കും എത്തിച്ചേരുന്ന തരത്തിൽ ഗ്രാമീണ സമ്പദ് വ്യവസ്ഥയെ പിന്തുണയ്ക്കാനും ഗവേഷണം സഹായകരമാവണമെന്ന് അദ്ദേഹം പറഞ്ഞു. 'നമ്മൾ മസ്തിഷ്‌ക ചോർച്ചയിൽ നിന്ന് മസ്തിഷ്‌ക നേട്ടത്തിലേക്ക് മാറണം,' പോകുന്നിടത്തെല്ലാം ഇന്ത്യയെ ഹൃദയത്തിൽ വഹിക്കാൻ ബിരുദധാരികളെ പ്രോത്സാഹിപ്പിച്ചുകൊണ്ട് അദ്ദേഹം പറഞ്ഞു.

ഇന്ത്യയിലെ യുവാക്കളോടുള്ള തൻ്റെ അഭിലാഷങ്ങൾ പ്രകടിപ്പിച്ചുകൊണ്ട് അദ്ദേഹം ഇങ്ങനെ പറഞ്ഞു, 'അടുത്ത ഗൂഗിൾ, അടുത്ത ടെസ്ല, അടുത്ത സ്പേസ് എക്സ് എന്നിവ ഇന്ത്യയിൽ നിന്നാണ് ഉയർന്നുവരേണ്ടതെന്ന് ഞാൻ വിശ്വസിക്കുന്നു- എൻഐടി കുരുക്ഷേത്ര പോലുള്ള സ്ഥാപനങ്ങളിൽ നിന്ന്.'

'ലഹരിയോട് വേണ്ട' എന്ന് പറഞ്ഞുകൊണ്ട് അച്ചടക്കമുള്ള ജീവിതം നയിക്കാൻ ഉപരാഷ്ട്രപതി വിദ്യാർത്ഥികളോട് അഭ്യർത്ഥിച്ചു.
 പ്രസംഗം ഉപസംഹരിക്കവെ, ബിരുദമെന്നത് ഒരു അവസാന ബിന്ദുവല്ല, മറിച്ച് ഒരു പുതിയ ഉത്തരവാദിത്തത്തിൻ്റെ  തുടക്കമാണെന്ന് അദ്ദേഹം ബിരുദധാരികളെ ഓർമ്മിപ്പിച്ചു. സർഗ്ഗാത്മകത, വിനയം, സഹാനുഭൂതി എന്നിവയോടെ സമൂഹത്തെ സേവിക്കാൻ അദ്ദേഹം അവരോട് ആഹ്വാനം ചെയ്തു.

ഹരിയാന ഗവർണർ പ്രൊഫ. ആഷിം കുമാർ ഘോഷ്, ഹരിയാന മുഖ്യമന്ത്രി ശ്രീ നയാബ് സിങ് സൈനി, എൻഐടി കുരുക്ഷേത്ര ഡയറക്ടർ പ്രൊഫ. ബി.വി. രമണ റെഡ്ഡി, എൻഐടി കുരുക്ഷേത്ര ബോർഡ് ഓഫ് ഗവർണേഴ്‌സ് ചെയർപേഴ്‌സൺ ഡോ. തേജസ്വിനി അനന്തകുമാർ, മറ്റ് വിശിഷ്ട വ്യക്തികൾ എന്നിവർ ചടങ്ങിൽ സന്നിഹിതരായി.

****