প্রধান মন্ত্রী শ্রী নরেন্দ্র মোদী রাইপুরদা লৈবা ইন্দিয়ান ইন্সিতিতুৎ ওফ মেনেজমেন্তদা পাংথোকপা ৬০ শুবা পুলিসকী দিরেক্তর জেনরেলশিং/ইন্সপেক্তর জেনেরেলশিংগী ভারত পুম্নমক্কী মীফম শরুক য়াখ্রে। নুমিৎ হুমনিগী মীফম অদুগী থিমনা ‘বিকসিত ভারত: সেকুরিতিগী থবকশিং’ হায়বনি।

প্রধান মন্ত্রীনা হায়খি শীনফম অসিদা হৈথোই-শিংথোইবা হেনগৎহন্দুনা, মিকুপ-নাহুম শিংদুনা অমসুং য়াংনা থবক পাংথোক্তুনা মরুওইনা নহারোলশিংগী মরক্ত অমসুং মীয়াম্না পুলিসতা য়েংলিবা মীৎয়েং অওনবা পুরকপা দরকার ওইরে। নহারোলশিংগা পাউ ফাওনবা হেনগৎহনবা, সহর অমসুং লমকোয়বশিংগী পুলিসকী থবক মপাঙ্গল কনখৎহনবা অমসুং লোলয়ম লৈঙাক মতমগী ক্রিমিনেল লোশিংগী মহুৎশিল্লবা নৌনা চৎনরবা ভারতিয়া ন্যায় সনহিতা, ভারতিয়া সকক্ষ্য অধিনিয়ম অমসুং ভারতিয়া নগরিক সুরক্ষ সনহিতাগী মরমদা মীয়ামদা খঙহনবা হেনগৎহনবা দরকার ওইরে।

প্রধান মন্ত্রীনা হায়খি মী তাদবা ইথৎশিং পুনশিন্নবা, নেতগ্রিদকী মখাদা পুনশিল্লবা দেতাবেজশিং মপুংফানা শীজিন্ননবা অমসুং থবক ওইনা পায়খৎপা য়াবা ইন্তিলিজেন্স পুথোক্নবা আর্তিফিসিএল ইন্তিলিজেন্সকী খুৎথাংদা থবকশিং অসি শম্ননবা রাজ্য অমসুং য়ু.তি পুলিসনা অনৌবা লাল্লোং পায়খৎকদবনি। পুলিসকী থিজিনবশিংদা ফোরেন্সিক শীজিন্নবগী মতাংদা য়ুনিভর্সিতিশিং অমসুং মহৈলোয়শঙশিংনা কেস ষ্টদিজশিং পায়খৎনবা পুক্নিং থৌগৎকদবনি। ফোরেন্সিক শীজিন্নবা হেনগৎপনা ক্রিমিনেল জজতিষ্ট সিষ্টেম মপাঙ্গল কনখৎহনগনি।

প্রধান মন্ত্রীনা হায়খি অথিংবা থমখ্রবা লুপশিং চাংনাইনা য়েংশিন্নবা থবকশিং পায়খৎপা য়াম্না মরুওই, লেফ ৱিং এক্সত্রিমিজমদগী মনিংতম্লবা লমদমশিংদা চাউখৎ-থৌরাংগী থবকশিং পায়খৎলে অমসুং সমুদ্র মপানগী সেকুরিতি মপাঙ্গল কনখৎহন্নবা অনৌবা নমুনাশিং চৎনরে। দ্রগ লান্না শীজিন্নবা লাকশিন্নবা সরকারগী মিনিষ্ট্রিশিং অমসুং এজেন্সিশিং পুন্না থবক তৌমিন্নবা দরকার ওই, অপুনবা ওইনা আইন চৎনহনবা, খুন্দা-লৈতাহনবা অমসুং মীয়াম শরুক য়াবা তঙাইফদে। 

মীফম অদুদা লৈবাক্কী সেকুরিতিগী মরুওইবশিং মীফম অদুদা য়াম্না কুপ্না খন্নখ্রে । ভিজন ২০৪৭ গীদমক পুলিসকী থবকশিংগী মতম শাংনা চৎনবা য়াবা রোদমেপ, তেরোরিজম থেংননবা অমসুং রেদিকেলাইজেসন থেংনবগী অনৌবা থবকশিং, নুপীশিং অশোই-অঙাম থোক্তবা হেনগৎহন্নবা তেক্নোলোজি শীজিন্নবা, মপান লৈবাকশিংদা লৈরিবা ভারতকী মীচেলশিং পুরক্নবা লাল্লোংশিং অমসুং মপুংফানা থিজিন্নবা অমসুং চৈরাক পীনবা ফোরেন্সক্কী মপাঙ্গল কনখৎহন্নবগী মতাংদা খন্নখ্রে।

হৌজিক মায়োক্নরিবা নোংলৈ-নুংশিৎ দিতৱাহ য়াওনা, নোংলৈ-নুংশিৎশিং, ঈশিং ইচাউশিং অমসুং অতোপ্পা মহৌশাগী খুদোংথিবশিং মপুংফানা থেংন্নবা থবকশিং হেন্না ফগৎহন্নবা পুলিসকী লুচিংবশিংদা প্রধান মন্ত্রীনা তকশিনখ্রে অমসুং অমাং-অতাশিং মপুংফানা থৌরাং তৌনবা অমসুং পুন্না থবক পায়খৎপগী দরকার ওইবা প্রধান মন্ত্রীনা ফোঙদোকখ্রে। মহাক্না হায়খি মপুংফানা থৌরাং তৌবা, খুদক্ত পুন্না থবক তৌমিন্নবা, মতম চানা থবক পায়খৎপা অমসুং সরকারগী মিনিষ্ট্রিশিং অমসুং এজেন্সিশিং পুন্না থবক তৌমিন্নবা অসি মীওইবগী থৱায়শিং কন্নবা অমসুং অসিগুম্বা থৌদোকশিংদা অমাং-অতা থোকপা হন্থহন্নবা তঙাইফদে।

মহাক্কী ৱারোলদা, প্রধান মন্ত্রীনা হায়খি মদুদি বিকসিত ভারতকী লৈবাক্কী পান্দমগা লোয়ননা পুলিসকী লুচিংবগী থবক মতমগা চুনবা ওইগদবনি অমসুং পুলিসকী থবকশিং শেমদোক্কদবনি।

ইন্তিলিজেন্স ব্যুরোগী ওফিসারশিংদা মশক থোকপা থবক পাংথোকপগীদমক প্রধান মন্ত্রীনা প্রসিদেন্তস পুলিস মেদলশিং য়েন্থোকখ্রে। সহরগী পুলিসকী থবকশিংদা অনৌবা অমসুং হেন্না ফবা থবকশিং পায়খৎপদা পুক্নিং থৌগৎনবা নৌনা লিংখৎপা অর্বান পুলিসিং এৱার্দশিংদা থবক ফজনা পাংথোকপা সহর অহুমদা প্রধান মন্ত্রীনা মনাশিং য়েন্থোকখ্রে। 

মীফম অদুদা য়ুনিয়ন হোম মিনিষ্টর, নেসনেল সেকুরিতি এদভাইজর, হোম এফেয়ার্সকী রাজ্য মন্ত্রীশিং অমসুং য়ুনিয়ন হোম সেক্রেতরি শরুক য়াখি। রাজ্যশিং অমসুং য়ু.তিশিংগী পুলিসকী দিরেক্তর জেনরেলশিং/ইন্সপেক্তর জেনেরেলশিং, সি.এ.পি.এফশিং অমসুং সেন্ত্রেল পুলিস ওর্গনাইজেসনশিংগী লুচিংবশিং হকথেংননা শরুক য়াখি, অমরোমদা তোঙান তোঙানবা রেঙ্কশিংগী ওফিসার ৭০০ হেন্না লৈবাক শীনবা থুংবদগী ভর্চুএল ওইনা শরুক য়াখি।

***