ঐগী নুশিরবা ইরৈবাকচাশিং,

খুরুমজরি। অমুক হন্না 'মন কী বাত'তা ময়ামবু তরাম্না ওকচরি। নবেম্বর থা অসিনা ইথিল কয়া পুদুনা লাকই। নুমিৎ খরনিগী মমাংদা, নবেম্বর 26তা, 'কন্সতিত্যুসন দে'দা সেন্ত্রেল হোলদা অখন্নবা প্রোগ্রাম অমা পাংথোকখি। বন্দে মাতরমগী 150শুবা মপোক কুমওন অসিনা লৈবাক শীনবা থুংনা প্রোগ্রাম কয়া অমা হৌদোকখি। নবেম্বরগী তাং 25দা অয়োধ্যাদা লৈবা রাম মন্দিরদা ধর্মধৱাজা চীংখৎৎখি। নুমিৎ অসিমক্তদা, কুরুক্ষেত্রগী জ্যোতিসরদা পাঞ্চজন্যা মেমোরিএল শঙ্গাখি।

মরুপশিং,

নুমিৎ খরনিগী মমাংদা, ঐহাক্না হায়দ্রাবাদতা মালেমগী খ্বাইদগী চাউবা লিপ ইঞ্জিন MRO ফেসিলিতী শঙ্গাখি। ভারতনা এয়রক্রাফতগী মেন্তেনসেন্ত, রিপিয়র অমসুং ওভরহোল সেক্তরদা মরু ওইবা খোঙথাং অমা লৌখৎলে। হৌখিবা চয়োলদা, মুম্বাইদা পাংথোকখিবা থৌরম অমদা, INS 'মাহে' অসি ভারতকী নেভীদা ইন্দক্ত তৌখি। হৌখিবা চয়োলদা, স্কাইরুৎকী ইনফিনিতী কেম্পসনা ভারতকী স্পেস ইকোসিস্তেমদা অনৌবা থৌনা অমা পীখি। মসি ভারতকী অনৌবা ৱাখল্লোন, ইন্নোবেসন অমসুং য়ুবা শক্তিগী মশক অমনি।

মরুপশিং,

লৈবাক অসিনা এগ্রিকলচর সেক্তরদসু অচৌবা মায়পাকপা অমা ফংলে। ভারতনা পুৱারীগী ওইবা রেকোর্দ অমা থম্বগা লোয়ননা মহৈ-মরোং তন মিলিয়ন 357 পুথোকখ্রে। তন মিলিয়ন 357! চহি 10গী মমাংগী মতমগা চাংদম্নবদা, ভারতকী মহৈ-মরোং পুথোকপা অসি তন মিলিয়ন 100 হেনগৎলে। ভারতনা শান্ন-খোৎনবগী লমদসু শিংথানিংঙাই ওইবা মওংদা মায় পাকখ্রে। নুমিৎ খরনিগী মমাংদা, ভারতপু কমনৱেল্থ গেম্সকী হোস্ত ওইনা লাউথোকখি। মসিগী মায়পাকপশিং অসি লৈবাক অসিগীনি, মাগী প্রজাশিংগীনি। অমসুং 'মন কী বাত' অসি লৈবাক অসিগী মীয়ামগী অসিগুম্বা মায়পাকপশিংবু থাগৎনবা, মীয়ামগী অপুনবা খোঙথাংশিংবু মীয়ামদা খঙহন্নবা অফবা প্লেৎফোর্ম অমনি।

মরুপশিং,

করিগুম্বা ৱাখলদা কত্থোকপগা লোয়ননা হোৎনবা, অপুনবগী শক্তিদা থাজবা অমসুং তীম অমা ওইনা থবক তৌরবদি, অমসুং মায়থিরবা মতুংদা অমুক হন্না হৌগৎনবা থৌনা লৈরবদি, খ্বাইদগী অরুবা থবকশিংদসু মায় পাকপা ঙমগনি। সেতেলাইত, GPS সিস্তেম, নেভিগেসনগী খুদোংচাবশিং লৈতবা মতমদুগী মতাংদা খল্লু। মতম অদুদসু, ঐখোয়গী সমুদ্র চৎপা মীওইশিংনা অচৌবা জহাজশিংদা চৎলম্মি অমসুং মখোয়না চৎলিবা মফমশিংদা য়ৌরম্মি। হৌজিক্তি, সমুদ্রগী, মালেমগী লৈবাকশিংগী ৱাংমদা চৎতুনা স্পেসকী লোইনাইদ্রবা মফমশিংদা চংশিল্লি। মদুদা লৈরিবা শীংনবা অসিসু মান্নৈ; GPS সিস্তেম লৈতে, কম্ম্যুনিকেসন সিস্তেম লৈতে... অসুম্না ঐখোয়না মতৌ করম্না মাংলোমদা চংশিনগনি?

মরুপশিং,

নুমিৎ খরনিগী মমাংদা, সোসিএল মীদিয়াদা ভিদিও অমনা ঐগী পুক্নিং চিংশিনখি। মসিগী ভিদিও অসি ISROনা শীনবা অখন্নবা দ্রোন কম্পিতিসনগীনি। ভিদিও অসিদা, ঐখোয়গী লৈবাক অসিগী নহারোলশিং, মরুওইনা জেন-Zনা মার্সকা মান্নবা ফিভমদা দ্রোনশিং পাইনবা হোৎনরি। দ্রোনশিং অসি পাইখৎতুনা মতম খরগী ওইনা বেলেন্স তৌদুনা লৈরগনি, অদুগা তুংদা খঙহৌদনা লৈমায়দা তারকই। করিগীনো খঙব্রা? মরমদি মফম অদুদা উরিবা দ্রোনশিং অদুদা GPS সপোর্ত অমত্তা লৈতে। মার্সতা GPS লৈতে, মরম অদুনা দ্রোনশিংনা মপানগী সিগ্নেল নত্ত্রগা লমজিং-লমতাক অমত্তা ফংবা ঙমদে। দ্রোনশিং অসি মখোয়গী কেমেরাশিং অমসুং ইনবিল্ত সোফৱেয়রশিংগী মতেংগা লোয়ননা পাই। অপীকপা দ্রোন অদুনা লৈমায়গী মওংশিং খঙদোকপা, অৱাংবগী চাং ওনবা, অপনবশিং খঙদোকপা, অমসুং শাফনা লেন্দিং তৌনবগী লম্বী অমা থিদোকপা মথৌ তাই। মরম অদুনা, দ্রোনশিং অসি মথং-মথং মথং-মনাও নাইনা তাথরকখি।

মরুপশিং,

মসিগী কম্পিতিসন অসিদা পুনেগী নহাশিংগী তীম অমনা মায় পাকপা খরা ফংখি। মখোয়গী দ্রোন অসিসু কয়ারক তাখি অমসুং কাইখি, অদুবু মখোয়না থাদোকখিদে। চাংয়েং কয়া পাংথোক্লবা মতুংদা, তীম অসিগী দ্রোন অসি মার্সকী অকোয়রোনদা মতম খরগী ওইনা পাইবা ঙম্বা উবা ফংখি।

মরুপশিং,

ভিদিও অসি য়েংলিঙৈদা ঐগী ৱাখলদা অতোপ্পা সিন অমা লাকখি: চন্দ্রয়ান-2গা কন্তেক্ত মাংখিবগী নুমিৎ অদু। নুমিৎ অদুদা, লৈবাক শীনবা থুংনা, অমসুং অখন্ননা সাইন্তিস্তশিংনা, মীকুপ খরগী ওইনা নুংঙাইতবা ফাওখি।

অদুবু মরুপশিং, মায়থিবা অসিনা মখোয়বু থিংবা ঙমখিদে। নুমিৎ অসি মক্তদা মখোয়না চন্দ্রয়ান-3গী মায় পাকপগী ৱারী অসি ইবা হৌখি। মরম অসিনা, চন্দ্রয়ান-3 মায়পাক্না লেন্দ তৌবদা মিসন অমগী মায়পাকপা খক্তা নত্তে। মায়থিবা ফংলবা মতুংদা শেমখিবা অনৌবা থাজবগী মায় পাকপা অদুনি। ঐহাক্না ভিদিও অসিদা উরিবা নহাশিং অদুগী মমিত্তা চপ মান্নবা মঙাল অদু উখি। ঐহাক্না ঐখোয়গী নহারোলশিংগী থৌনা অমসুং ঐখোয়গী সাইন্তিস্তশিংগী থৌনা অদু উবা মতম খুদিংদা, ঐহাক্কী থম্মোয়দা নুংঙাইবা ফাওই। নহারোলশিংগী কত্থোকপা অসি বিক্সিত ভারতকী খ্বাইদগী চাউবা মপাঙ্গল অমনি।

ঐগী নুংশিরবা ইরৈবাকচাশিং,

ময়াম পুম্নমক্না খোইহীগী খোইথুমনবা অদু খঙলে, অদুবু ঐখোয়না কয়া য়াম্না কন্না হোৎনবগে, চৎনবীগী অমসুং মহৌশাগা লোয়ননা ফজবা মওং অমদা লৈবগী মগুন অসি খঙদে।

মরুপশিং,

জম্মু অমসুং কাশ্মীরগী চীংগী মফমশিংদা, ৱাইল্দ বেসিল, সুলাই হায়না খঙনবা অসিদগী তোপ তোপ্পা খোইহী অমা পুথোকই। অঙৌবা মচু ওইবা খোইহী অসিবু রামবান সুলাই খোইহী কৌই। চহি খরগী মমাংদা, রামবান সুলাই খোইহীনা GI তেগ ফংখি। মদুগী মতুংদা, লৈবাক শীনবা থুংনা মসিগী খোইহী অসি শকখঙনরকখি।

মরুপশিং,

দক্ষিনা কন্নরা দিস্ত্রিক্তকী পুত্তুরদা, মফম অদুদা লৈরিবা ভেজেতেসন অসি খোইহী পুথোক্নবগীদমক্তা য়াম্না ফৈ হায়না লৌনৈ। মফম অসিদা, 'গ্রামজন্যা' কৌবা লৌমীশিংগী ওর্গনাইজেসন অমনা মহৌশাগী খুদোল অসিবু অনৌবা মায়কৈ অমদা পুখৎলি। 'গ্রামজন্যা'না মোদর্ন প্রোসেসিং য়ুনিৎ অমা শেম্লে... লেবোরেতরী, বোত্ততলিং, স্তোরেজ, অমসুং অসিগুম্বা দিজিতেল ত্রেকিং ফেসিলিতীশিং হাপচিনখ্রে। হৌজিক্তি, ব্রান্দ তৌরবা পোত্থোক অমা ওইনা হায়রিবা খোইহী অসি খুঙ্গংদগী শহরশিংদা য়ৌরক্লি। লৌমী লিশিং অনি মখাই হেন্না মসিগী খোঙথাং অসিদগী কান্নবা ফংখ্রে।

মরুপশিং,

কর্নাতকাগী তুমকুরু দিস্ত্রিক্তকী 'শিবগঙ্গা কালানজিয়া' কৌবা ওর্গানাইজেসন অমগী হোৎনরিবশিং অসিসু থাগৎনিংঙাইনি। মেম্বর খুদিংমকপু অহানবদা খোই উপু অনি পীখি। অসুম্না তৌদুনা, ওর্গনাইজেসন অসিনা লৌমী কয়াবু মখোয়গী কেম্পেনগা শম্নহল্লে। হৌজিক, ওর্গনাইজেসন অসিগী মরী লৈনবা লৌমীশিংনা পুন্না খোইহী লোকই, মদু ফজনা পেক তৌই অমসুং মফম অদুগী কৈথেলদা য়ৌহল্লি। মসিনা মখোয়দা লাখ কয়াগী শেন্থোক ফংহল্লি। মসিগা মান্নবা খুদম অমা হায়রবদি নাগালেন্দদা লৈবা ক্লিফ-হনি হন্তিংনি। নাগালেন্দগী চোকলাঙান খুঙ্গংদা লৈবা খিয়ামনি-য়ঙ্গন ত্রাইব অসি চহি চা কয়াদগী খোইহী লোক্তুনা লাক্লি। মফম অদুদা, খোইশিংনা মখোয়গী মকোন অসি উদা শাদে অৱাংবা চীংশিংদা শাই। মরম অদুনা, খোইহী লোকপগী থবক অসি য়াম্না রিস্ক লৈবা থবক অমনি। মরম অদুনা, মফম অদুদা লৈরিবা মীওইশিংনা অহানবদা খোইশিং অদুগা ইকায় খুম্নবা উৎতুনা, মখোয়গী অয়াবা লৌই। মখোয়না খোইশিংদা খোইহী লোকপা লাকপনি হায়না হায়খি, মদুগী মতুংদা মখোয়না খোইহী লোকই

মরুপশিং,

ঙসিদি, ভারতনা খোইহী পুথোকপদা অনৌবা রেকোর্দশিং থম্বা ঙম্লে। চহি 11গী মমাংদা, লৈবাক অসিদা খোইহী পুথোকপা অসি মেত্রিক তন 76,000 ওইরম্মি। হৌজিক্তি মসি লেপ্তনা হেনগৎলক্তুনা মেত্রিক তন লাখ 1.5 হেনখ্রে। হৌখিবা চহি খরা অসিদা খোইহী এক্সপোর্তসু শরুক অহুম হেনগৎখ্রে। হনি মিসন প্রোগ্রামগী মখাদা, খাদি গ্রামোদয়োগনা মীয়ামদা খোই উপু লাখ 2.25 হেন্না য়েন্থোকখ্রে। মসিনা মীওই লিশিং কয়াদা অনৌবা থবক্কী খুদোংচাবা ফংহনখ্রে… হায়বদি, লৈবাক অসিগী মফম কয়াদা খোইহীগী খোইথুমনবা হেনগৎলক্লি। অমসুং মসিগী খোইথুমনবা অসিনা লৌমীশিংগী শেল-থুমসু হেনগৎহল্লি।

ঐগী নুংশিরবা ইরৈবাকচাশিং,

ঐখোয় পুম্নমক্না খঙই মদুদি মহাভারতকী লানফম অসি হরিয়ানাগী কুরুক্ষেত্রদা পাংথোকখি। অদুবু হৌজিক্তি অদোম্না মহাভারত এক্সপরিএন্স সেন্তরদা লান অসি তশেংনা এক্সপরিয়েন্স তৌবা য়াই। মহাভারতগী ৱারী অসি 3D, লাইৎ অমসুং সাউন্দ দিসপ্লে অমসুং দিজিতেল তেক্নিকশিং শীজিন্নদুনা উৎলি। ঐহাক্না নবেম্বরগী তাং 25দা কুরুক্ষেত্রাদা চৎখিবা মতমদা, আগী অনুভব কেন্দ্রদা ফংখিবা এক্সপরিয়েন্স অসিনা ঐহাকপু নুংঙাইবা ফাওহনখি।

মরুপশিং,

কুরুক্ষেত্রাগী ব্রহ্মা সরোবরদা পাংথোকখিবা ইন্তর্নেস্নেল গীতা মহোৎসবতা শরুক য়াবা অসি ঐগীদমক্তা য়াম্না অখন্নবা অমনি। মালেম পুম্বগী মীওইশিংনা গীতা, লাইগী লাইরিক অসিনা মতৌ করম্না ইথিল পীবগে হায়বদু উবদা ঐহাক য়াম্না নুংঙাইবা পোকই।

য়ুরোপ অমসুং সেন্ত্রেল এসিয়া য়াওনা মালেমগী লৈবাক কয়াদগী মীওইশিংনা থৌরম অসিদা শরুক য়াখি। থা অসিগী অঙনবা শরুক্তা, সৌদী অরাবিয়াদা মীয়ামগী মফম অমদা গীতা অসি ইহান হানবা ওইনা পাংথোকখি। য়ুরোপকী লেতভিয়াদা কাউঙমদ্রবা গীতা মহোৎসব অমা পাংথোকখি। লেতভিয়া, ইস্তোনিয়া, লিথুয়ানিয়া, অমসুং অলজিরিয়াগী আর্তিস্তশিংনা ফেস্তিবেল অসিদা থৱাই য়াওনা শরুক য়াখি।

মরুপশিং,

ভারতকী চাউরবা চৎনবীদা শান্তি অমসুং নুংশিনবগী ৱাখল্লোন অসি খ্বাইদগী মরু ওই। মালেমগী অনিশুবা লাঞ্জাও, মফম খুদিংমক্তা মাং-তাক্নিংঙাই ওইবা ফীভম অমা লৈখিবা মতমদু খল্লু। অসিগুম্বা অৱাবা মতম অসিদা, গুজরাতকী নৱানগরগী জাম সাহেব মহারাজা দিগ্বিজয় সিংহজীনা পাংথোকখিবা অচৌবা থবক অসিনা ঙসিসু ঐখোয়দা ইথিল পীরি। মতম অদুদা, জাম সাহেবনা স্ত্রেতেজিক এল্লাইন্স নত্ত্রগা লানগী স্ত্রেতেজী অমত্তা খল্লমদে। মদুগী মহুত্তা, মহাক্না মালেমগী লাঞ্জাও মনুংদা পোলেন্দগী জিৱিশ অঙাংশিংবু করম্না ঙাক-শেনবগে হায়বগী মরমদা খনখি। মহাক্না গুজরাতকী অঙাং লিশিং কয়াদা য়ুম পীখি অমসুং মখোয়দা অনৌবা পুন্সি অমা পীখি। মসি ঙসি ফাওবা খুদম অমা ওইরি। নুমিৎ খরনিগী মমাংদা, জাম সাহেবকী মীতম অমা খা থংবা ইজরেলগী মোশভ নেভাতিমদা মাইখুম হাংখি। মসি য়াম্না অখন্নবা ইকায় খুম্নবা অমনি। হৌখিবা চহিদা, পোলেন্দগী ৱারসোদা জাম সাহেবকী নিংশিং থৌরমদা ঐহাক্না ইকায় খুম্নবা উৎপগী খুদোংচাবা ফংখি। মীকুপ অদু ঐহাক্কী ওইনা কাউঙমদবা অমা ওইদুনা লৈহৌরগনি।

ঐগী নুংশিরবা ইরৈবাকচাশিং,

নুমিৎ খরনিগী মমাংদা, ঐহাক্না কোইম্বতুরদা নেচরেল ফার্মিংগী মতাংদা মেগা কনফরেন্স অমদা শরুক য়াখি। নেচরেল ফার্মিংগী মায়কৈদা খা ভারত্তা হোৎনরিবশিং অদুদা ঐহাক য়াম্না পুক্নিং চিংশিনখি। য়াম্না নহা ওইরিবা, মগুন লৈরবা প্রোফেস্নেল কয়ানা হৌজিক নেচরেল ফার্মিংগী লমদা থবক তৌরি। ঐহাক্না মফম অদুগী লৌমীশিংগা ৱারী শানখি অমসুং মখোয়গী এক্সপরিয়েন্সশিংগী মরমদা তাখি। নেচরেল ফার্মিং অসি ভারতকী অরিবা চৎনবীশিংগী শরুক অমা ওইদুনা লাক্লি। অমসুং ঐখোয়গী থৌদাংদি ইমা পৃথীবি অসি ঙাকথোক্নবা মসিবু লেপ্পা লৈতনা প্রমোৎ তৌবনি।

মরুপশিং,

মালেমগী খ্বাইদগী লিরবা লোল অমসুং মালেমগী খ্বাইদগী লিরবা শহরশিং পুনশিনবা অসি মতম পুম্নমক্তা য়াম্না নুংঙাইবা এক্সপরিয়েন্স অমনি। ঐনা 'কাশি তামিল সঙ্গমম'গী মতাংদা ঙাংলি। মরিশুবা কাশি-তামিল সঙ্গমম দিসেম্বরগী 2দা কাশিগী নমো ঘাত্তা হৌরগনি। চহি অসিগী কাশি-তামিল সঙ্গমমগী য়াম্না নুংঙাইবা থিম অমা লৈরি: তামিল তম্লু - তামিল কর্কলাম। কাশি-তামিল সঙ্গমম অসি তামিল লোলগা মরী লৈনবা মীওই পুম্নমক্কীদমক মরু ওইবা প্লেৎফোর্ম অমা ওইরক্লি। কনাগুম্বা অমনা কাশিগী মীয়ামগা ৱারী শানবদা…. মখোয়না কাশি-তামিল সঙ্গামমগী শরুক অমা ওইবদা নুংঙাইবা ফাওই। মফম অসিদা মখোয়না অনৌবা খরা তম্বগী অমসুং অনৌবা মীওইশিংগা উন্নবগী খুদোংচাবা ফংই। মসিগী মতাংদসু কাশিগী মীয়াম্না তামিল নাদুদগী লাকপা মখোয়গী মচিল-মনাওশিংবু খৌরাংনা ঙাইবগা লোয়ননা তরাম্না ওক্নবা কন্না হোৎনরি। ঐহাক্না ময়াম পুম্নমকপু কাশি-তামিল সঙ্গমমগী শরুক অমা ওইনবা হায়জরি।

মসিগা লোয়ননা, "এক ভারত-শ্রেস্থ ভারত"কী ৱাখল্লোন অসি মপাঙ্গল কনখৎহন্নবা অতোপ্পা প্লেৎফোর্মশিংগী মতাংদসু খনবিয়ু।

মসিদা ঐহাক্না অমুক হন্না হায়জনীংই:

তামিল কলাচ্চারম উয়ার্বানন্দ

তামিল মোলি উয়র্বানন্দ

তামিল ইন্দিয়াবিন পেরুমিতম |

(মনিপুরী ৱাহন্থোক)

তামিলগী নাৎ অসি অথোইবনি।

তামিলগী লোল অসি অথোইবনি।

তামিল অসি ভারতকী চাউথোকচবনি।

ঐগী নুংশিরবা ইরৈবাকচাশিং,

ভারতকী সেক্যুরিতী ইকো-সিস্তেম মপাঙ্গল কনখৎলকপা মতমদা ভারত মচা খুদিংমক্না চাউথোকচবা ফাওই। মমাং চয়োলদা INS 'মাহে' অসি মুম্বাইদা ইন্দিয়ন নেভীদা ইন্দক্ত তৌখি। মাগী লমদমসিগী ওইবা দিজাইন অসি মীওই কয়ানা পাক শন্না খন্নখি। অমরোমদা, পুদুচেরী অমসুং মালাবার কোস্তকী মীওইশিংদা মসিগী মমিং অসিনা থোইদোক্না নুংঙাইখি। তশেংনমক্কীদি, মসি মরাং কায়না পুৱারীগী ওইবা হেরিতেজ লৈরবা মফম অমা ওইরিবা মাহেগী মতুং ইন্না 'মাহে' হায়না মমিং থোল্লি। কেরলা অমসুং তামিল নাদুদা লৈবা মীওই কয়ানা লানগী জহাজ অসিগী ক্রেস্ত অসি উরুমি অমসুং কালারিপায়াত্তুগী চৎনবীগী ওইবা থেক্তোক থেকচিন য়াবা থাংশাংগা মান্নৈ হায়না পনখি। ঐখোয়গী নেভীনা য়াম্না থুনা মশা-মরোমদোম লেপচবা ঙম্নবগী মায়কৈদা চংশিল্লক্লিবা অসি ঐখোয় পুম্নমক্কী চাউথোকচনীংঙাইনি। ঐখোয়না দিসেম্বরগী 4দা নেভী দেসু পাংথোক্কনি। মসিগী থৌরম অসি ঐখোয়গী লান্মীশিংগী হনবা লৈত্রবা থৌনা লিংজেল অদু ইকাই খুম্নবা উৎনবা অখন্নবা নুমিৎ অমনি।

মরুপশিং,

নেভীগা মরী লৈনবা তুরিজমদা পুক্নিং চঙবশিংগীদমক্তা, ঐখোয়গী লৈবাক অসিদা মখোয়না য়াম্না তমজবা য়াবা মফম কয়া অমা লৈরি। গুজরাতকী সোমনাথকী মনাক্তা লৈবা দিয়ু অসি লৈবাক অসিগী নোংচুপ থংবা কোস্ততা লৈ। দিয়ুদা ‘INS খুক্রি'দা কত্থোকপা 'খুক্রি মেমোরিএল অমসুং ম্যুজিয়ম' লৈ। গোৱাদা এসিয়াদা মসিগী মখলগী অমত্তা ঙাইরবা ম্যুজিয়ম ওইরিবা 'নেভেল এভিএসন ম্যুজিয়ম' লৈ। ফোর্ৎ কোচীদা লৈবা INS দ্রোনাচার্য়দা 'ইন্দিয়ন নেভেল মেরিতাইম ম্যুজিয়ম' লৈ। মফম অসিদা, ঐখোয়না ঐখোয়গী লৈবাক অসিগী সমুদ্রগী পুৱারী অমসুং ভারতকী নেভীগী ইভোলুসন উবা ফংই।

মমাংদা পোর্ত ব্লেয়র হায়না খঙনরম্বা শ্রীবিজয়পুরমদা লৈবা 'সমুদ্রিকা - নেভেল মেরিন ম্যুজিয়ম' অসি লমদম অসিগী অঙকপা পুৱারী উৎপদা মমিং চৎলি। কারৱারদা লৈবা রবীন্দ্রনাথ তেগোর বীচতা লৈবা ৱারশিপ ম্যুজিয়মদা মিসাইল অমসুং খুৎলাইশিংগী রেপ্লিকাশিং লৈ। মসিগা লোয়ননা, বিশাখাপত্নমদা ইন্দিয়ন নেভীগা মরী লৈনবা সবমেরিন, হেলিকোপ্তর, অমসুং এয়রক্রাফ ম্যুজিয়ম অমা লৈ। ঐনা ময়াম পুম্নমকপু, মরুওইনা লানগী পুৱারীদা মীৎয়েং চংনবা, ম্যুজিয়মশিং অসিদা চৎপীনবা হায়জরি।

ঐগী নুংশিরবা ইরৈবাকচাশিং,

নীংথম থা লাক্লে, অমসুং ৱিন্তর তুরিজমগী মতমসু লাক্লে। লৈবাক কয়ানা মখোয়গী শেন্মিৎলোনগী মরুওইবা য়ুম্বী অমা ওইনা ৱিন্তর তুরিজম শেমখ্রে। লৈবাক কয়াদা মালেমগী খ্বাইদগী মায় পাকপা ৱিন্তর ফেস্তিবেল অমসুং ৱিন্তর স্পোর্তস মোদেলশিং লৈ।

লৈবাকশিং অসিনা স্কিয়িং, স্নোবোর্দিং, স্নো ত্রেকিং, আইস ক্লাইম্বিং অমসুং ফেমিলী স্নো পার্কশিং অসি মখোয়গী মশক মওংগী শরুক অমা ওইহল্লি। মখোয়না মখোয়গী ৱিন্তর ফেস্তিবেলশিংবু মালেমগী ওইবা এত্রেক্সনশিং ওইহনখ্রে।

মরুপশিং,

ঐখোয়গী লৈবাক অসিদা ৱিন্তর তুরিজমগীদমক্তা পোতেন্সিএল পুম্নমক লৈ। ঐখোয়দা চীংশিং, কলচর, অমসুং এদভেঞ্চরগীদমক লোইনাইদ্রবা ওইথোকপা য়াবা কয়া লৈ। ঐহাক নুংঙাইবা ফাওই। ঙসিদি, উত্তরাখন্দদা ৱিন্তর তুরিজম্না মীওই কয়া পুক্নিং চিংশিল্লি। ওলি, মুন্স্যারী, চোপ্তা, অমসুং দেয়ারাগুম্বা দেস্তিনেসনশিং অসি নীংথম থা মনুংদা মীয়াম্না পাম্নরক্লি। চয়োল খরগী মমাংদা, রাজ্য অসিগী অহানবা হাই অলতিত্যুদ অল্ত্রা রন মেরাথোন অসি পিথোরাগর জিলাগী আদি কৈলাশতা ফিৎ 14,500 হেন্না ৱাংবদা পাংথোকখি। লৈবাক অসিগী রাজ্য 18দগী শান্নরোয় 750 হেন্না শরুক য়াখি। কিলোমীতর 60 শাংবা "আদি কৈলাশ পরিক্রমা রন" অসি অয়ুক পুং 5 তাবদা হৌখি। ইংজরবসু, মীয়ামগী পুক্নিং থৌগৎপা অদু ময়েক শেংনা উবা ফংখি। চহি অহুমগী মমাংদা আদি কৈলাশতা তুরিস্ত 2,000দগী হন্থনা লাকপা অদুগা হৌজিক্তি মসি 30,000 হেনখ্রে।

মরুপশিং,

ৱিন্তর গেম্সসু চয়োল খরগী মতুংদা উত্তরাখন্দদা পাংথোক্কনি। শান্নরোইশিং, এদভেঞ্চর পামজবশিং, অমসুং লৈবাক শিনবা থুংবদগী শান্ন-খোৎনবদা থৱায় য়াওজবশিংনা থৌরম অসিদা য়াম্না নুংঙাইবা ফাওই।

স্কিয়িং নৎত্রগা স্নোবোর্দিং ওইগেরা, স্নোদা য়ুম্ফম ওইবা তোঙান-তোঙানবা শান্ন-খোৎনবশিংগী শেম-শাবা অসি হান্ননা হৌখ্রে। উত্তরাখন্দনা ৱিন্তর তুরিজম প্রমোৎ তৌনবা কনেক্তিবিতী অমসুং ইনফ্রাস্ত্রকচরদা মীৎয়েং থম্লি। হোমস্তেশিংগা মরী লৈননা অনৌবা পোলিসী অমসু শেমখ্রে।

মরুপশিং,

নীংথম থাশিংদা পাংথোকপা "ৱেদ ইন ইন্দিয়া" কেম্পেনগী মশাগী ওইবা মগুন লৈ। নীংথম থাগী সনা মচুগী নুমিৎ ওইরো নত্রগা চীংশিংদগী লাকপা লৈচিল মরোল ওইরো; চীংশিং অসি লুহোংবগী মফম ওইনা য়াম্না পাম্নরক্লি। হৌজিক্তি মরু ওইনা গঙ্গাগী তুরেলদা লুহোংবগী থৌরম কয়া পাংথোক্লি।

মরুপশিং,

নীংথম থাগী নুমিৎশিং অসিদা, হিমালয়গী তম্পাকশিং অসি পুন্সি চুপ্পগী ওইনা কাউঙমলরোইদবা এক্সপরিয়েন্স অমগী শরুক অমা ওইরকই। করিগুম্বা নহাক্না নীংথম থা অসিদা খোঙচৎ অমা থৌরাং তৌরবদি, হিমালয়গী তম্পাকশিং অদু শোইদনা ৱাখলদা খনবীয়ু।

মরুপশিং,

চয়োল খরগী মমাংদা, ঐহাক ভুতানদা চৎখি। অসিগুম্বা খোঙচৎশিং অসিনা তোঙান তোঙানবা মখলগী ইন্তরেক্সন অমসুং খন্ন-নৈনবগী খুদোংচাবা পী। খোঙচৎ অসিগী মনুংদা, ঐহাক্না ভুতানগী নিংথৌ, হৌজিক্কী নিংথৌগী মপা, মহাক মশামকসু নিংথৌ অমা ওইরম্বা, প্রধান মন্ত্রী অমসুং অতোপ্পশিংগা উনখি। চৎপা মতমদা, ঐনা মীপুম খুদিংমক্না করিগুম্বা অমা হায়বা তাবা ফংখি। মীপুম খুদিংমক্না মফম অদুদা ভগৱান বুদ্ধগী শেংলবা রেলিকশিংবু থাগৎপা ফোংদোকখি। মদু ঐনা তাবদা ঐগী থম্মোয়দা চাউথোকচবা ফাওই।

মরুপশিং,

ভগৱান বুদ্ধগী অশেংবা রেলিকশিংগীদমক অসিগুম্বা থৌনা অসি অতোপ্পা লৈবাক কয়াদসু উবা ফংলি। হৌখিবা থা খক্তদা, মসিগী অশেংবা রেলিকশিং অসি নেস্নেল ম্যুজিয়মদগী রাসিয়াগী কাল্মিকিয়াদা পুখি। মফম অদুদা বুদ্ধ ধর্মনা অখন্নবা মরুওইবা অমা লৈ। মীওই কয়া, রসিয়াগী অরাপ্পা মফমশিংদগী ফাওবা, মখোয়বু উনবা লাকখি হায়না ঐঙোন্দা পাউদমখি। রেলিকশিং অসি মোঙ্গোলিয়া, ভিয়েতনাম, অমসুং থাইলেন্দদসু পুরকখ্রে। মফম খুদিংমক্তা হরাও নুংঙাইবা অমা উবা ফংখি। থাইলেন্দগী নিংথৌ ফাওবা দর্শন পীনবা লাকখি। মালেম শীনবা থুংনা ভগৱান বুদ্ধগী অশেংবা লাইশিংগা অসিগুম্বা অচেৎপা মরী লৈনরিবা অসি উবদা নুংঙাইবা ফাওই। অসিগুম্বা খোঙথাংশিং অসি মালেম শিনবা থুংনা লৈরিবা মীওইশিংগা শম্নহন্নবা মেদিয়ম অমা ওইরক্লিবা অসি উবদা নুংঙাইবা ফাওই।

ঐগী নুংশিরবা ইরৈবাকচাশিং,

ঐহাক্না ময়াম পুম্নমকপু 'ভোকেল ফোর লোকেল'গী মন্ত্র অসি মাংলোমদা পুখৎনবা মতম পুম্নমক্তা হায়জরি। নুমিৎ খরনিগী মমাংদা, জি-20 সমিৎকী মনুংদা, মালেমগী লুচিংবা কয়াদা খুদোংচাবা পীরকপা মতমদা, ঐহাক্না 'ভোকেল ফোর লোকেল' হায়বা ৱাখল্লোন অসি অমুক হন্না ফোংদোকখি। ঐহাক্কী লৈবাক মীয়ামগী মহুৎ শিন্দুনা মালেমগী লুচিংবশিংদা ঐহাক্না পীখিবা খুদোলশিং অদুদা মসিগী ৱাখল্লোন অসি য়াম্না চেকশিন্না থমখি। জি-20গী মনুংদা, ঐহাক্না খা আফ্রিকাগী রাস্ত্রপতিদা নাতরাজকী ব্রোঞ্জগী মীতম অমা খুৎশিন্নখি। মসি তামিল নাদুগী থানজাবুরগী কলচরেল হেরিতেজতা য়ুম্ফম ওইবা, চোলা ইরাগী খুৎশা হৈবগী মশক থোকপা খুদম অমনি।

কেনাদাগী প্রধান মন্ত্রীদা চান্দিগী শগোলগী রেপ্লিকা অমা পীখি। মসিনা রাজস্থানগী উদাইপুরগী ফজরবা খুৎ-শা হৈবা উৎলি। জাপানগী প্রধান মন্ত্রীদা চান্দিগী বুদ্ধগী রেপ্লিকা অমা পীখি। মসিনা তেলঙ্গনা অমসুং করিমনগরগী মমিং লৈরবা চান্দিগী ক্রাফশিংগী মগুনশিং উৎলি। ইতালিগী প্রধান মন্ত্রীদা লৈগী মোতিফ য়াওবা চান্দিগী মীংশেল অমা খুদোল ওইনা পীখি। মসিদা করিমনগরগী ত্রেদিস্নেল মেতল ক্রাফমেন্সকী শক্তমসু উৎলি। ঐহাক্না ওস্ত্রেলিয়াগী প্রধান মন্ত্রীদা কেরলাগী মনারদগী শাবা ব্রাস উর্লি অমা খুদোল তমখি। ঐহাক্কী পান্দমদি মালেমদা ভারতকী খুৎশা হৈবগী থবকশিং, কলা অমসুং চৎনবীশিং খঙহনবা অমসুং ঐখোয়গী আর্তিসানশিংগী হৈশিংববু মালেমগী থাক্তা শকখঙহনবা হায়বসিনি।

মরুপশিং,

লৈবাক অসিদা মীওই মিলিয়ন কয়ানা 'ভোকেল ফোর লোকেল'গী ৱাখল্লোন অসি মখোয়গী পুন্সিগী শরুক অমা ওইহনবদা ঐহাক নুংঙাইবা ফাওই। চহি অসিদা, হরাও কুহ্মৈগীদমক কৈথেলদা পোৎচৈ লৈবা চৎপা মতমদা, অদোম্না করিগুম্বা অমা উবা ফংলমগনি। মীয়ামগী অপাম্বশিং অমসুং মখোয়গী য়ুমদা পুশিল্লকপা পোৎলমশিং অসিনা লৈবাক অসিনা স্বদেশীদা হল্লক্লিবসি ময়েক শেংনা তাক্লি। মীওইশিংনা ভারতকী পোত্থোকশিংবু পাম্ননা খনখি। অপীকপা দুকান মপুশিংনসু মসিগী অহোংবা অসি উবা ফংই। মসিগী মতম অসিদা, নহারোলশিংনা 'ভোকেল ফোর লোকেল' কেম্পেনবুসু খুমাং চাউশিলহনখি। লাক্কদৌরিবা নুমিৎ খরনি অসিদা খৃস্তমাস অমসুং ন্যু ইয়রগীদমক্তা শোপ্পিংগী অনৌবা রাউন্দ অমা হৌগদৌরি।

ঐহাক্না অমুক হন্না নখোয়দা নিংশিংহল্লি, 'ভোকেল ফোর লোকেল'গী মন্ত্র অসি নিংশিংবিয়ু, লৈবাক অসিদা শাবা পোৎলমশিং খক্তমক লৈনবা হোৎনবিয়ু, লৈবাক অসিগী নাগরিক অমনা কন্না হোৎনদুনা পুথোকপা পোৎলমশিং খক্তমক য়োনবিয়ু।

ঐগী নুংশিরবা ইরৈবাকচাশিং,

থা অসি ভারতকী শান্ন-খোৎনবগী লমদা য়াম্না মরু ওই। থা অসি ভারতকী নুপীগী তীম্না ICCগী ৱুমেন ৱার্ল্দ কপ লৌখিবগা লোয়ননা হৌখি। অদুবু মদুগী মতুংদসু, লমদম অসিদা এক্সন হেন্না উবা ফংখি। নুমিৎ খরনিগী মমাংদা, তোকিওদা দেফ ওলিম্পিক্স পাংথোকখি। মসিদা ভারতনা মেদল 20 ফংদুনা ঙসি ফাওবদা খ্বাইদগী ফজবা পর্ফোমেন্স পীখি। ঐখোয়গী নুপী শান্নরোয়শিংনা কাবাদি ৱার্ল্দ কপ লৌদুনা পুৱারী শেমখি। তোর্নামেন্ত অসিদা মখোয়গী অফবা পর্ফোমেন্সনা ভারত মচা খুদিংমক্কী থম্মোয়বু মায় পাকহনখি। ঐখোয়গী শান্নরোয়শিংনা ৱার্ল্দ বোক্সিং কপ ফাইনেলদা হৈশিংনা শান্নখি অমসুং মখোয়না মেদল 20 ফংখি। মরুপশিং, হৌজিক খন্ন-নৈনরিবা অসি ঐখোয়গী নুপীগী তীম্না ব্লাইন্দ ক্রিকেৎ ৱার্ল্দ কপ লৌরকপনি। য়াম্না শিংথানিংঙাই ওইরিবদি ঐখোয়গী তীম্না মেৎচ অমত্তা মায়থীবা নংদনা তোর্নামেন্ত অসি মায় পাকখিবনি। লৈবাক মীয়াম অসি তীম অসিগী শান্নরোই খুদিংমক্কীদমক চাউথোকচৈ। নুমিৎ নিনিগী মমাংদা, ঐহাক্না প্রধান মন্ত্রীগী লৈফমদা কাংলুপ অসিগা উনখি। তশেংনমক, তীম অসিগী থৌনা অমসুং পেসন্না ঐখোয়দা কয়া অমা তম্বিরি। মসিগী মায়পাকপা অসি ঐখোয়গী স্পোর্তসকী পুৱারীদা খ্বাইদগী চাউবা মায়পাকপা অমনি, মসিনা ভারত মচা খুদিংমকপু ইথিল পীদুনা লৈহৌরগনি।

মরুপশিং,

ঙসিদি ঐখোয়গী লৈবাক অসিদা এন্দুরেন্স স্পোর্তসকী অনৌবা স্পোর্তস কলচরসু খোঙজেল য়াংনা থোক্লক্লি। এন্দুরেন্স স্পোর্তস হায়রগা, ঐহাক্না নহাক্কী লিমিৎশিং চাংয়েং তৌরিবা স্পোর্তস এক্তিবিতীশিংবু খংনৈ। চহি খরগী মমাং ফাওবদা, মরাথোন অমসুং বাইকেথোনগুম্বা অখন্নবা থৌরমশিং অসি খনগৎলবা মীওই খরখক্তদা য়ুম্ফম ওইখি। অদুবু হৌজিক্তি, কয়া অমা হোংখ্রে। থা খুদিংগী লৈবাক শীনবা থুংনা এন্দুরেন্স স্পোর্ত ইভেন্ত 1500 হেন্না পাংথোকই হায়না ঐনা খঙলে। শান্নরোয়শিংনা হায়রিবা ইভেন্তশিং অসিদা শরুক য়ানবগীদমক্তা অরাপ্পা মফম কয়াদা চৎলি।

মরুপশিং,

এন্দুরেন্স স্পোর্তসকী খুদম অমা হায়রগদি আইরনমেন ত্রাইএথলোন অসিনি। মসি খল্লু! করিগুম্বা নুমিৎ অমদগী তাদনা অদোমদা থবক অহুম অসি পাংথোক্নবা হায়রবদি: সমুদ্রদা কিলোমীতর 4 ইরোইবা, কিলোমীতর 180 সাইকল থৌবা, অমসুং কিলোমীতর 42 রোমগী মেরাথোন অমা চেনবা, মসি করম্না ওইথোকপা ঙমগনি হায়না অদোম্না হংবা য়াই। অদুম ওইনমক, ফিরেপ চেৎপা মীওইশিংনসু মসি মায় পাক্না পাংথোকপা ঙম্মী। মরম অদুনা মসিবু আইরনমেন ত্রাইএথলোন কৌই।

অসিগুম্লবা থৌরম অমা গোৱাদা হন্দক্তা পাংথোকখ্রে। হৌজিক্কী মতমদা, মীয়াম্না অসিগুম্বা থৌরমশিংদা থৌনা ফনা শরুক য়াবা হৌরে। ঐখোয়গী নহা ওইরিবা মরুপশিংগী মরক্তা য়াম্না পাম্নরক্লিবা অতোপ্পা কম্পিতিসন কয়া অমসু লৈরি। মীওই কয়ানা ফিৎ ইন্দিয়া সন্দে ওন সাইকলগুম্বা প্রোগ্রামশিংদা শরুক য়ানবা পুন্না লাক্লি। মসি পুম্নমক ফিৎনেস থৌগৎনবা পাম্বৈশিংনি।

মরুপশিং,

থা খুদিংগী ময়ামগা উন্নবা অসি ঐহাক্কী ওইনা অনৌবা এক্সপরিয়েন্স অমনি। অদোমগী ৱারীশিং, অদোমগী হোৎনরিবশিং অসিনা ঐঙোন্দা অনৌবা ইথিল পীরি। অদোম্না অদোমগী পাউতাকশিংদা পীরিবা ৱাখল্লোনশিং অমসুং এক্সপরিয়েন্সশিং অসিনা ভারতকী দাইভর্সিতী অসি প্রোগ্রাম অসিদা য়াওহন্নবা ঐখোয়দা ইথিল পীরি। ঐখোয়না মথংগী থাদা উন্নবা মতমদা, 2025 অসি লোইশিল্লক্লগনি। লৈবাক অসিগী মফম অয়াম্বদা হৌজিক হেন্না ইংশিল্লক্লগনি। অদোম অমসুং অদোমগী ইমুং-মনুং নীংথম থাগী মতমদা অখন্নবা চেকশিনবিয়ু। লাক্কদৌরিবা থা অসিদা, ঐখোয়না অনৌবা হীরমশিং অমসুং অনৌবা মওং-মতৌশিং খন্ন-নৈনগনি। ময়ামবু হন্না-হন্না থাগৎচরি। খুরুমজরি।

***