തമിഴ്നാടിനും കാശിക്കും ഇടയിലുള്ള കാലാതീതമായ നാഗരിക ബന്ധങ്ങളെ ആഘോഷിക്കുന്ന സംരംഭമായ കാശി -തമിഴ് സംഗമം നാലാം പതിപ്പ് 2025 ഡിസംബർ 02 മുതൽ 15 വരെ വാരണാസിയിൽ നടക്കും.

കാശി-തമിഴ് സംഗമം 4.0 യുടെ ഭാഗമായ ആദ്യ ട്രെയിൻ ഇന്ന് (2025 നവംബർ 29) കന്യാകുമാരിയിൽ നിന്ന് 45 പ്രതിനിധികളുമായി യാത്ര ആരംഭിച്ചു. തിരുച്ചിറപ്പള്ളിയിൽ നിന്ന് 86 പ്രതിനിധികളും ചെന്നൈയിൽ നിന്ന് 87 പ്രതിനിധികളും ഈ യാത്രയിൽ ചേരും. ഇതോടെ ആദ്യ ബാച്ചിലെ ആകെ പ്രതിനിധികളുടെ എണ്ണം 216 ആയി. സംഘത്തിൽ 50 തമിഴ് സാഹിത്യ വിദഗ്ധരും 54 സാംസ്കാരിക പണ്ഡിതരും ഉൾപ്പെടുന്നു. കൂടാതെ വിദ്യാർത്ഥികൾ, അധ്യാപകർ, കരകൗശല വിദഗ്ധർ, ശാസ്ത്രീയ സംഗീതജ്‌ഞർ, ഇൻസ്ട്രക്ടർമാർ, ആത്മീയ പഠന വിദ്യാർത്ഥികൾ എന്നിവരും ഉൾപ്പെടുന്നു.

കന്യാകുമാരി റെയിൽവേ സ്റ്റേഷനിൽ ഇന്ന് രാവിലെ പ്രതിനിധികൾക്ക് പ്രദേശത്തെ എംഎൽഎ ശ്രീ എം.ആർ. ഗാന്ധി, പൊതുജനങ്ങളോടൊപ്പം യാത്രയയപ്പ് നൽകി.

കാശി തമിഴ് സംഗമം 4.0, 2025 ഡിസംബർ 2 ന് വാരണാസിയിലെ നമോ ഘട്ടിൽ നടക്കുന്ന  ഉദ്ഘാടന ചടങ്ങോടെ ഔപചാരികമായി ആരംഭിക്കും.

തമിഴ്‌നാട്ടിലെ ഏറ്റവും പ്രധാന ഉത്സവങ്ങളിലൊന്നായ കാർത്തിക ദീപത്തോടനുബന്ധിച്ചാണ് (ഡിസംബർ 4 ന്) ഇത്തവണത്തെ പതിപ്പ് എന്നത് കൂടുതൽ പ്രാധാന്യം നൽകുന്നു. ഇന്ത്യയുടെ വൈവിധ്യമാർന്ന സാംസ്കാരിക പാരമ്പര്യങ്ങളെക്കുറിച്ച് ആഴത്തിലുള്ള ധാരണ വളർത്തിയെടുക്കാൻ ലക്ഷ്യമിട്ടുള്ള വിജ്ഞാന വിനിമയ പരിപാടികളിലായി 1,500 ൽ അധികം പ്രതിനിധികൾ പങ്കെടുക്കും. എട്ട് ദിവസത്തെ പര്യടനത്തിൽ, തമിഴ്‌നാട്ടിൽ നിന്നും, വിവിധ മേഖലകളെ പ്രതിനിധീകരിക്കുന്ന സംഘാംഗങ്ങൾ വാരണാസിയും സമീപ പ്രദേശങ്ങളും, പ്രയാഗ്‌രാജ്, അയോധ്യ എന്നിവിടങ്ങളും സന്ദർശിക്കും. ഈ സാംസ്കാരിക കേന്ദ്രങ്ങളിലേക്കുള്ള സന്ദർശനം ജീവിതത്തിന്റെ വ്യത്യസ്ത വശങ്ങളെക്കുറിച്ച് ആഴത്തിലുള്ള അറിവ് നൽകും. കാശി വിശ്വനാഥ ക്ഷേത്രം, നമോ ഘട്ട്, ഹനുമാൻ ഘട്ട്, ബനാറസ് ഹിന്ദു സർവകലാശാല, സാരനാഥ്, അയോധ്യ ക്ഷേത്രം തുടങ്ങി മതപരവും ചരിത്രപരവുമായി പ്രാധാന്യമുള്ള സ്ഥലങ്ങളും പ്രതിനിധികൾ സന്ദർശിക്കും.

 "ഏക് ഭാരത് ശ്രേഷ്ഠ ഭാരത്" എന്ന വിഷയത്തിലുള്ള ബോധവൽക്കരണ പരിപാടികളുടെ ഭാഗമായി, കെടിഎസ് 4.0 ക്കൊപ്പം നാല് പ്രധാന അനുബന്ധ പരിപാടികളും ആസൂത്രണം ചെയ്തിട്ടുണ്ട്.

ഈ വർഷത്തെ സംഗമത്തിന്റെ പ്രമേയം - "നമുക്ക് തമിഴ് പഠിക്കാം - തമിഴ് കർക്കാലം" - എന്നത് എല്ലാ ഇന്ത്യൻ ഭാഷകളും ഒരു കുടുംബത്തിൽ പെട്ടവയാണെന്ന സന്ദേശം വ്യക്തമാക്കുന്നു. ഐക്യത്തെ പ്രതീകപ്പെടുത്തുകയും പുരാതന തമിഴ് ഗ്രന്ഥങ്ങളുടെ മഹത്വം മറ്റ് ഇന്ത്യൻ ഭാഷകളിലേക്ക് വ്യാപിപ്പിക്കുകയും ചെയ്തുകൊണ്ട്, തമിഴ് ഭാഷയും സംസ്കാരവും രാജ്യത്തിന്റെ വിവിധ ഭാഗങ്ങളിലേക്ക് എത്തിക്കുക എന്നതാണ് ഈ സംരംഭത്തിന്റെ ലക്ഷ്യം.

തമിഴ്‌നാട്ടിലെ തെങ്കാശിയിൽ നിന്ന് ഉത്തർപ്രദേശിലെ കാശിയിലേക്കുള്ള മുനി അഗസ്ത്യ വാഹന പര്യടനവും ഇതോടൊപ്പം ഡിസംബർ 2 ന് ആരംഭിച്ച് ഡിസംബർ 12 ന് വാരണാസിയിൽ സമാപിക്കും. തമിഴ്‌നാട്ടിൽ നിന്ന് കാശിയിലേക്കുള്ള ചരിത്രപരമായ യാത്രയിലൂടെ സാംസ്കാരിക ഐക്യത്തിന്റെ സന്ദേശം പ്രചരിപ്പിച്ച പാണ്ഡ്യ ഭരണാധികാരിയായ ആദി വീര പരാക്രമ പാണ്ഡ്യനോടുള്ള അനുസ്മരണമായാണ് റാലി സംഘടിപ്പിച്ചിരിക്കുന്നത്. അദ്ദേഹം ശിവക്ഷേത്രം സ്ഥാപിക്കുകയും ഐക്യത്തിന്റെ അന്തസത്തയെ പ്രതിഫലിപ്പിച്ചുകൊണ്ട് പട്ടണത്തെ തെങ്കാശി (ദക്ഷിണ കാശി) എന്ന് പുനർനാമകരണം ചെയ്യുകയും ചെയ്തു. ചേര, ചോള, പാണ്ഡ്യ, പല്ലവ, ചാലൂക്യ രാജവംശങ്ങളുടെ കീഴിൽ തമിഴ്‌നാടിനും കാശിക്കും ഇടയിലുണ്ടായ ചരിത്രപരമായ ബന്ധങ്ങൾ എടുത്തുകാണിക്കുന്ന വൈജ്ഞാനിക സാമഗ്രികൾ റാലിയിൽ പ്രദർശിപ്പിക്കും.

കെടിഎസ് 4.0 യുടെ ഭാഗമായി ആരംഭിക്കുന്ന മറ്റൊരു പ്രധാന സംരംഭം "നമുക്ക് തമിഴ് പഠിക്കാം - കർപോം തമിഴ്" എന്ന കാമ്പെയ്‌നിന്റെ കീഴിൽ നടപ്പാക്കുന്ന "ഉത്തർപ്രദേശിലെ വിദ്യാർത്ഥികളെ തമിഴ് പഠിപ്പിക്കൽ" എന്ന പരിപാടിയാണ്. ഈ സംരംഭത്തിന്റെ കീഴിൽ, തമിഴ്‌നാട് സന്ദർശിക്കുന്ന ഉത്തർപ്രദേശിൽ നിന്നുള്ള വിദ്യാർത്ഥികളെ തമിഴ് ഭാഷയുടെ സമ്പന്നത പരിചയപ്പെടുത്തും. ഉത്തർപ്രദേശിൽ നിന്നുള്ള 30 കോളേജ് വിദ്യാർത്ഥികൾ വീതമുള്ള പത്ത് ബാച്ചുകൾ തമിഴ്‌നാട്ടിലെ നിയുക്ത കോളേജുകൾ സന്ദർശിക്കും. ചെന്നൈയിലെ സെൻട്രൽ ഇൻസ്റ്റിറ്റ്യൂട്ട് ഓഫ് ക്ലാസിക്കൽ തമിഴ് (സിഐസിടി) കേന്ദ്രത്തിലെ അധ്യാപകർ, ഉത്തർപ്രദേശിൽ നിന്നുള്ള വിദ്യാർത്ഥികളെ തമിഴ് പഠിപ്പിക്കുന്നതിനായി മറ്റു അധ്യാപകർക്ക് പരിശീലനം നൽകും.

പ്രധാനമന്ത്രി ശ്രീ നരേന്ദ്ര മോദിയുടെ ദീർഘവീക്ഷണമുള്ള സംരംഭമായ കാശി തമിഴ് സംഗമം, തമിഴ്‌നാടിലെയും കാശിയിലെയും ജനങ്ങൾ തമ്മിലുള്ളതും ഇരു പ്രദേശങ്ങൾക്ക് ഇടയിലുള്ള സാംസ്കാരികപരവുമായ ബന്ധം ശക്തിപ്പെടുത്തുന്നത് ലക്ഷ്യമിട്ട് നടത്തുന്ന ഒരു വാർഷിക പരിപാടിയാണ്. ഒപ്പം ഈ ഗവണ്മെന്റ് പരിപാടിയിൽ പങ്കെടുക്കുന്നതിനു ജനങ്ങൾക്കിടയിൽ വർദ്ധിച്ചുവരുന്ന ആവേശവും കണക്കിലെടുക്കുന്നു.

***