کاشی تمل سنگم، جو تمل ناڈو اور کاشی کے درمیان تہذیبی رشتوں اور صدیوں پرانی وابستگیوں کا جشن منانے کا ایک اقدام ہے، اپنے چوتھے مرحلے میں داخل ہو رہا ہے، جو 2 سے 15 دسمبر 2025 تک وارانسی میں منعقد ہوگا۔

کاشی تمل سنگم 4.0 کی پہلی ٹرین نے آج (29 نومبر 2025) کنیا کماری سے اپنے سفر کا آغاز کیا، جس میں 45 مندوبین شامل ہیں۔ تیرچراپلی میں 86 مندوبین اور چنئی سے 87 مندوبین اس میں شامل ہوں گے، جس سے اس پہلے قافلے میں مندوبین کی مجموعی تعداد 216 ہو جائے گی۔ اس گروپ میں 50 تمل ادبی ماہرین، 54 ثقافتی اسکالروں کے علاوہ طلبہ، اساتذہ، دستکار، کلاسیکی گلوکار اور روحانی متون کے معلم و طالب علم شامل ہیں۔

کنیا کماری ریلوے اسٹیشن پر آج صبح مقامی ایم ایل اے جناب ایم۔ آر۔ گاندھی نے عوام کے ساتھ مل کر مندوبین کو رخصت کیا۔

کاشی تمل سنگم 4.0 باقاعدہ طور پر 2 دسمبر 2025 کو وارانسی کے نمو گھاٹ میں افتتاحی تقریب کے ساتھ شروع ہوگا۔

اس ایڈیشن کی اہمیت اس لیے بھی بڑھ جاتی ہے کہ یہ تمل ناڈو کے مقدس ترین تہواروں میں سے ایک، کارتھگئی دیپم کے موقع پر منایا جا رہا ہے، جو 4 دسمبر کو منایا جاتا ہے۔ 1,500 سے زائد مندوبین ملک کی متنوع ثقافتی روایات کی گہری سمجھ بوجھ کو فروغ دینے کے مقصد سے منعقدہ مختلف علمی نشستوں میں شرکت کریں گے۔ آٹھ روزہ دورے کے دوران تمل ناڈو سے تعلق رکھنے والے مختلف شعبہ ہائے زندگی کے شرکا وارانسی اور اس کے آس پاس کے علاقوں، جن میں پریاگ راج اور ایودھیا شامل ہیں، کا دورہ کریں گے اور ان ثقافتی مراکز کی زندگی کے مختلف پہلوؤں سے قریب سے آگاہی حاصل کریں گے۔ مندوبین مذہبی و تاریخی اہمیت کے مقامات جیسے کاشی وشو ناتھ مندر، نمو گھاٹ، ہنومان گھاٹ، بنارس ہندو یونیورسٹی، سرناتھ اور ایودھیا مندر کا بھی دورہ کریں گے۔

’’ایک بھارت شریشٹھ بھارت‘‘ کے تحت آگاہی پروگراموں کے حصے کے طور پر کے ٹی ایس 4.0 کے ساتھ چار بڑے ذیلی پروگرام بھی منعقد کیے جائیں گے۔

اس سال کے سنگم کا موضوع ’’آؤ تمل سیکھیں – تمل کرکلام‘‘اس پیغام کو اجاگر کرتا ہے کہ تمام بھارتی زبانیں ایک ہی خاندان سے تعلق رکھتی ہیں۔ اس پہل کا مقصد تمل زبان اور ثقافت کو ملک کے دیگر حصوں تک پہنچانا ہے، جو اتحاد کی علامت ہے اور قدیم تمل متون کو دیگر بھارتی زبانوں میں منتقل کرنے کی حوصلہ افزائی کے ذریعے ان کے دائرۂ اثر کو وسیع کرتا ہے۔

تمل ناڈو کے تِنکاسی سے اتر پردیش کے کاشی تک سَنت اگستیا وہیکل ایکسپیڈیشن بھی 2 دسمبر کو شروع ہوگی اور 12 دسمبر کو وارانسی میں اختتام پذیر ہوگی۔ یہ ریلی آدی ویر پڑاکرما پانڈین کی یاد میں منعقد کی جا رہی ہے، جو پانڈیا حکمران تھے اور جنہوں نے تمل ناڈو سے کاشی تک اپنے تاریخی سفر کے ذریعے ثقافتی یکجہتی کا پیغام عام کیا اور وہاں بھگوان شیو کو منسوب ایک مندر قائم کیا۔ انہوں نے اس شہر کا نام ’’تِنکاسی‘‘ (دکشن کاشی) رکھا جو اتحاد کی علامتی تعبیر تھا۔ ریلی میں چیر، چولا، پانڈیا، پالاوا اور چالوکیہ سلطنتوں کے ذریعے قائم کیے گئے تمل ناڈو اور کاشی کے تاریخی روابط پر روشنی ڈالنے والے تعلیمی مواد بھی نمائش کے لیے پیش کیے جائیں گے۔

کے ٹی ایس 4.0 کے دوران ایک اور اہم پہل ’’اتر پردیش کے طلبہ کو تمل کی تعلیم‘‘ کے عنوان سے ’’آؤ تمل سیکھیں – کرپوم تمل‘‘ مہم کے تحت شروع کی جائے گی۔ اس پہل کے تحت اتر پردیش کے وہ طلبہ جو تمل ناڈو کا دورہ کریں گے، انہیں تمل زبان کی عظمت اور اس کے ذخیرۂ علم سے روشناس کرایا جائے گا۔ اتر پردیش کے کالجوں کے 10 گروپ، جن میں ہر گروپ میں 30 طلبہ شامل ہوں گے، تمل ناڈو کے منتخب کالجوں کا دورہ کریں گے۔ سینٹرل انسٹی ٹیوٹ آف کلاسیکل تمل (سی آئی سی ٹی) چنئی کے اساتذہ تدریسی فیکلٹی کو تربیت فراہم کریں گے، جو بعد میں اتر پردیش سے آنے والے ان طلبہ کو تمل زبان سکھائیں گے۔

کاشی تمل سنگم، جو وزیر اعظم جناب نریندر مودی کا ایک بصیرت افروز اقدام ہے، ہر سال منعقد کیا جاتا ہے تاکہ تمل ناڈو اور کاشی کے درمیان صدیوں پرانے ثقافتی اور عوامی روابط کو مزید مضبوط کیا جا سکے اور اس سرکاری پروگرام میں بڑھتی ہوئی عوامی دلچسپی کو پورا کیا جا سکے۔

******

ش ح۔ ش ا ر۔ ول

Uno-2042