தமிழ்நாட்டுக்கும் காசிக்கும் இடையேயான கலாச்சார தொடர்புகள் மற்றும் காலத்தால் அழியாத பிணைப்புகளைக் கொண்டாடும் ஒரு நிகழ்வாக காசி தமிழ் சங்கமம் 4.0, 2025 டிசம்பர் 02 முதல் 15 வரை வாரணாசியில் நடைபெறவுள்ளது.

காசி தமிழ் சங்கமம் 4.0 -ன் முதல் ரயில் கன்னியாகுமரியிலிருந்து இன்று (2025 நவம்பர் 29) 45 பிரதிநிதிகளுடன் தனது பயணத்தைத் தொடங்கியது. திருச்சிராப்பள்ளியில் 86 பிரதிநிதிகளும், சென்னையிலிருந்து 87 பிரதிநிதிகளும் இவர்களுடன் இணைந்து கொள்கிறார்கள். இதன் மூலம் முதல் குழுவின் ரயில் பயணத்தில் மொத்தம் 216 பிரதிநிதிகள் வாரணாசி செல்கின்றனர். இந்தக் குழுவில் 50 தமிழ் இலக்கிய வல்லுநர்கள், 54 கலாச்சார அறிஞர்கள், மாணவர்கள், ஆசிரியர்கள், கைவினைஞர்கள், நாட்டுப்புற பாடகர்கள் மற்றும் பயிற்றுனர்கள், ஆன்மீக மாணவர்கள் இடம்பெற்றுள்ளனர்.

கன்னியாகுமரி ரயில் நிலையத்தில், இன்று காலை நாகர்கோவில்  சட்டப்பேரவை உறுப்பினர் திரு எம்.ஆர். காந்தி மற்றும் பொதுமக்கள்  வழியனுப்பி வைத்தனர்.

காசி தமிழ் சங்கமம் 4.0, வரும் 2025 டிசம்பர் 2 அன்று வாரணாசியில் உள்ள நமோ காட் பகுதியில் பல்வேறு நிகழ்ச்சிகளுடன் முறைப்படித் தொடங்குகிறது.

தமிழ்நாட்டில் மிகவும் புனிதமான பண்டிகைகளில் ஒன்றான கார்த்திகை தீபம்  டிசம்பர் 4 -ம் தேதி அன்று கொண்டாடப்படவுள்ளது, இந்தாண்டு கூடுதல் முக்கியத்துவத்தைப் பெறுகிறது. இந்தியாவின் பன்முக கலாச்சார மரபுகள் குறித்த ஆழமான புரிதல் ஏற்படுத்துவதை நோக்கமாகக் கொண்ட தொடர் அறிவுப் பகிர்வு அமர்வுகளில் 1,500 -க்கும் அதிகமான பிரதிநிதிகள் பங்கேற்கின்றனர். இந்த எட்டு நாள் விழாவில், தமிழ்நாட்டிலிருந்து, பல்வேறு துறைகளைச் சேர்ந்த பிரதிநிதிகள் பிரயாக்ராஜ், அயோத்தி, வாரணாசி மற்றும் அருகிலுள்ள பகுதிகளுக்குச் சென்று, அங்குள்ள கலாச்சார மையங்களில் அங்குள்ள மக்களுடன் கலந்துரையாடி அவர்களின் பழக்கவழக்கங்கள் பற்றி அறிந்து கொள்வார்கள். தமிழ்நாட்டிலிருந்து செல்லும் பிரதிநிதிகள் காசி விஸ்வநாதர் கோயில், நமோ காட், அனுமான் காட், பனாரஸ் இந்து பல்கலைக்கழகம், சாரநாத் மற்றும் அயோத்தி கோயில் போன்ற மதம் மற்றும் வரலாற்று முக்கியத்துவம் வாய்ந்த இடங்களையும் பார்வையிடுவார்கள்.

"ஒரே பாரதம் உன்னத பாரதம்" என்ற கருப்பொருளின் கீழ் விழிப்புணர்வு நடவடிக்கைகளின் ஒரு பகுதியாக, காசி தமிழ் சங்கமம் 4.0 அமர்வுகளுடன் நான்கு முக்கிய நிகழ்ச்சிகளை நடத்தவும்  திட்டமிடப்பட்டுள்ளன.

இந்த ஆண்டு நடைபெறும் காசி தமிழ் சங்கமத்தின் கருப்பொருள் "தமிழ் கற்றுக்கொள்வோம் - தமிழ் கற்கலாம்" என்பதாகும். அனைத்து இந்திய மொழிகளும் ஒரே குடும்பத்தைச் சேர்ந்தவை என்ற செய்தியை இது எடுத்துக் காட்டுவதாக உள்ளது. தமிழ் மொழி மற்றும் அதன் தொன்மையான கலாச்சாரத்தை நாட்டின் பிற பகுதிகளுக்கு கொண்டு செல்வதையும், ஒற்றுமையைக் குறிக்கும் வகையிலும், பண்டைய தமிழ் நூல்களை இதர இந்திய மொழிகளிலும் கொண்டுசெல்வதை ஊக்குவிப்பதன் வாயிலாக, அவற்றின் எல்லைகளை விரிவுபடுத்துவதையும் இந்த முயற்சி நோக்கமாகக் கொண்டுள்ளது.

தமிழ்நாட்டின் தென்காசியில் இருந்து உத்தரபிரதேசத்தின் காசிக்கு அகத்திய முனிவர் வாகனப் பேரணி டிசம்பர் 2-ம் தேதி தொடங்கி  டிசம்பர் 12 ஆம் தேதி வாரணாசியில் முடிவடையும். தமிழ்நாட்டிலிருந்து காசிக்கு தனது வரலாற்றுப் பயணத்தின் மூலம் கலாச்சார ஒற்றுமையின் செய்தியைப் பரப்பிய பாண்டிய மன்னனான அதிவீர பராக்கிரம பாண்டியன் ஒற்றுமையின் உணர்வைப் பிரதிபலிக்கும் வகையில் அந்த நகரத்தை தென்காசி (தட்சிண காசி) என்று பெயரிட்டார். இந்தப் பேரணியில் சேர, சோழ, பாண்டிய, பல்லவ மற்றும் சாளுக்கிய வம்சங்களால் வளர்க்கப்பட்ட தமிழ்நாட்டிற்கும் காசிக்கும் இடையிலான வரலாற்றுத் தொடர்புகளை எடுத்துக்காட்டும் கல்விப் பொருட்கள் காட்சிப்படுத்தப்படும்.

இதன் மற்றொரு முக்கிய முயற்சியாக, "தமிழ் கற்றுக்கொள்வோம் -  தமிழ் கற்கலாம் " என்ற பிரச்சாரத்தின் கீழ் "உத்தரப்பிரதேசத்தில் உள்ள மாணவர்களுக்குத் தமிழ் கற்பித்தல்" என்ற முயற்சியும் மேற்கொள்ளப்படுகிறது. இந்த முயற்சியின் கீழ், உத்தரப்பிரதேச மாநிலத்திலிருந்து தமிழ்நாட்டிற்கு வருகை தரும் மாணவர்களுக்கு வளமான தமிழ் மொழி அறிமுகம் செய்து வைக்கப்படும். உத்தரப்பிரதேசத்திலிருந்து தலா 30 கல்லூரி மாணவர்கள் கொண்ட பத்து குழுக்கள் தமிழ்நாட்டில் உள்ள இதற்கென பிரத்யேகமாக தேர்ந்தெடுக்கப்பட்டுள்ள கல்லூரிகளுக்குச் செல்வார்கள். சென்னையிலுள்ள மத்திய செம்மொழித் தமிழாய்வு நிறுவனத்தின் ஆசிரியர்கள், தமிழ் கற்பிக்கும் ஆசிரியர்களுக்கு பயிற்சி அளிப்பார்கள். இங்கு பயிற்சி பெறும்  மாணவர்கள் உத்தரப்பிரதேசத்தில் இருந்து பங்கேற்கும் மாணவர்களுக்குத் தமிழ் மொழியைக் கற்பிப்பார்கள்.

பிரதமர் திரு நரேந்திர மோடியின் தொலைநோக்குப் பார்வையின் கீழ், மேற்கொள்ளப்படும் முன் முயற்சியான காசி தமிழ் சங்கமம், அரசின்  திட்டத்தில் பங்கேற்பதற்கான அதிகரித்து வரும் ஆர்வத்தை நிறைவு செய்யும் அதே வேளையில், தமிழ்நாட்டிற்கும், காசிக்கும் இடையிலான நீண்டகால கலாச்சார மற்றும் மக்களிடையேயான தொடர்பை வலுப்படுத்தும் வகையில் ஆண்டுதோறும் நடத்தப்படும் ஒரு நிகழ்வாக காசி தமிழ் சங்கமம் தொடர்ந்து நடைபெறுகிறது

***

AD/SV/RJ