#IFFIWood, 27 नोव्‍हेंबर 2025

'ए.आर.एम.' (अजयन्ते रँडम मोशनम) हा चित्रपट केरळच्या लोककथेचे संपूर्ण आकर्षण घेऊन महाकाव्याच्या चित्रपट सामर्थ्यासह इफ्फीमध्ये दाखल झाला. दिग्दर्शक जिथिन लाला, अभिनेते टोविनो थॉमस आणि राष्ट्रीय पुरस्कार विजेत्या सुरभी लक्ष्मी मंचावर उपस्थित होते, आणि त्यांनी चित्रपटाचा दीर्घ सर्जनशील प्रवास, त्याचे बहुस्तीय लेखन आणि कलाकार तसेच इतर तांत्रिक कर्मचाऱ्यांकडून आवश्यक असलेल्या वचनबद्धतेबद्दल आकर्षक भाष्य केले.

"इफ्फी माझी चित्रपट शाळा होती," जिथिन लाला

जिथिन यांनी आपल्या अनपेक्षित भावनिक आठवणीने सत्राची सुरुवात केली. 2013 मध्ये त्यांचा पहिला चित्रपट इफ्फीमध्ये होता आणि चित्रपटाविषयी शिकण्यासाठी, ते ज्ञान आत्मसात करण्यासाठी आणि कलावंत म्हणून वाढ व्हावी यासाठी आपण दरवर्षी परत आलो, असे त्यांनी सांगितले. "मी चित्रपट प्रशिक्षण संस्थेत गेलो नाही. इफ्फी हीच माझी चित्रपट शाळा होती," असे त्यांनी सांगितले. "बारा वर्षांनंतर आज माझा चित्रपट इंडियन पॅनोरामा मध्ये आहे. हे एक वर्तुळ पूर्ण झाल्यासारखे वाटते."

त्यांनी ए.आर.एम. चे वर्णन रूपकांचे अनेक स्तर असलेले कल्पनारम्य साहस असे केले, त्यात कथेच्या केंद्रस्थानी असलेला पौराणिक दिवा हे देखील एक अधिक गहन प्रतीक आहे. ते म्हणाले की, या चित्रपटाची पटकथा जात आणि सांस्कृतिक वारसा यावर सूक्ष्म भाष्य करते, तरीही केवळ एक भव्य देखावा पाहू इच्छिणाऱ्या प्रेक्षकांनाही आकर्षित करते.

टोविनो थॉमस तीन भूमिका साकारण्याविषयी: “माझ्या कारकिर्दीतील हे सर्वात मोठे आव्हान होते”

जिथिन आपल्या कलाप्रवासावर बोलले, तर टोविनो यांनी संघर्ष आणि थराराबद्दल सांगितले.  “2017 मध्ये हा माझ्याकडे आला, तेव्हा मी ते करू शकेन की नाही याची मला खात्री नव्हती,” अशी कबुली त्यांनी दिली. तीन वेगवेगळ्या युगांमध्ये मनियन, कुंजिकेलू आणि अजयन या भूमिका साकारण्यासाठी वरवरच्या बदलांपेक्षा अधिक आवश्यक होते. “हे फक्त दिसण्याबद्दल नाही. प्रत्येक पात्रासाठी देहबोली पूर्णपणे वेगळी असावी लागली.”, असे ते म्हणाले.

बजेटच्या समस्यांमधून मार्ग काढणे, योग्य निर्माता शोधणे, शारीरिक आणि मानसिक तयारी करणे अशाप्रकारे चित्रपटाला आकार घेण्यासाठी अनेक वर्षे लागली, असे त्यांनी सांगितले. “मी त्या वेळी स्वतःला सिनेमाचा विद्यार्थी मानत होतो. माझा स्वतःवर विश्वास नसतानाही दिग्दर्शक आणि लेखक यांना माझ्याबद्दल खात्री होती, असेही ते म्हणाले. एखादा चित्रपट महोत्सवासाठी योग्य असूनही मनोरंजक असू शकतो असे टोविनो यांनी सांगितले. “ए.आर.एम. हे सिद्ध करतो की दोन्ही विश्वे एकत्र येऊ शकतात.”

आपला अनुभव सांगताना, सुरभी यांनी त्यांच्या भूमिकेमागील तीव्र तयारीबद्दल सांगितले. त्यांनी कलरीपयट्टूचे प्रशिक्षण घेतले त्यांच्या पात्राचा सखोल अभ्यास केला आणि प्रत्येक प्रसंगात पूर्णपणे उपस्थित राहण्याच्या दृढनिश्चयाने सामोरे गेल्या. टोविनो सोबत अभिनय करण्याच्या अनुभवाविषयी सांगताना त्या म्हणाल्या, की "अभिनेत्यापासून-अभिनेत्याची ऊर्जा" निर्माण झाली, मग कलाकार अदृश्य झाले आणि केवळ पात्रे उरली.

सिनेमा, कला आणि केरळचे विकसित होणारे प्रेक्षक

हे संभाषण लवकरच मल्याळम सिनेमाच्या बदलत्या परिदृश्यापर्यंत येऊन पोहोचले. टोविनो यांनी मल्याळी प्रेक्षकांच्या बदलत्या आवडीची त्वरित कबुली दिली: “ते जागतिक सिनेमा पाहतात. त्यामुळे आम्हाला आमचे सर्वोत्तम काम करावे लागेल, असे त्यांनी सांगितले

त्यांनी उद्योगातील एक महत्त्वपूर्ण आव्हान सांगितले: केरळ मधील केवळ 15 टक्के लोक थिएटर्समध्ये चित्रपट पाहतात. हिंदी किंवा तेलुगू उद्योगांच्या तुलनेत लहान असलेल्या समुदायामुळे बजेट वाढवणे सोपे नाही. “केवळ मल्याळी लोकच मल्याळम चित्रपट पाहतील तर बजेट मर्यादित राहील. बिगर-मल्याळी प्रेक्षकांनीही आमचे चित्रपट त्यांच्या स्वतःच्या चित्रपटांसारखेच पाहिले पाहिजेत, असे त्यांनी सांगितले.

तरीही त्यांना एक सकारात्मक बाजू दिसते. “बजेटच्या अडचणींमुळे आम्ही अधिक सर्जनशील बनतो. आम्ही आमच्या दृष्टिकोनाला मूर्त रूप देण्यासाठी नवीन मार्ग शोधतो.” श्वासोच्छ्वासाचा अभ्यास, पात्र कार्यशाळा आणि कलरी यांसारख्या व्यायामांमुळे त्यांना त्यांच्या तीन पात्रांची शारीरिकता वेगळी करायला कशी मदत झाली, याचे वर्णन त्यांनी केले. “प्रत्येक पात्र कलरी वेगळ्या पद्धतीने करेल, इतक्या खोलात आम्ही गेलो होतो.” असे ते म्हणाले.

पत्रकार परिषदेच्या अखेरीस, हे स्पष्ट झाले की ए.आर.एम. केवळ एक कल्पनारम्य महाकाव्य नाही, तर ते चिकाटी, सांस्कृतिक अभिमान आणि मल्याळम सिनेमाच्या सीमा ओलांडण्याच्या अटळ इच्छेचे फलित आहे. लोककथा हृदयात, स्तर असलेले लेखन गाभ्यात आणि कलात्मकता व धैर्याने आकारलेल्या अभिनयासह, चित्रपटाच्या चमूने इफ्फीच्या प्रेक्षकांना एक वचन दिले: दिव्याची जादू ही केवळ सुरुवात आहे. लोककथा त्याच्या मुळाशी आहे, बहुस्तरीय लेखन त्याच्या केंद्रस्थानी आहे आणि कलाकौशल्याने घडवलेल्या अभिनयाने त्याला आत्मा दिला आहे. इफ्फीच्या प्रेक्षकांना या चमूने एक आश्वासन दिले: दिव्याची जादू हा फक्त प्रारंभ आहे.

Trailer:

PC Link:

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | गोपाळ चिप्‍पलकट्टी/निखिलेश चित्रे/दर्शना राणे | IFFI 56