#IFFIWood, 24 नोव्‍हेंबर 2025 

56 व्या भारतीय आंतरराष्ट्रीय चित्रपट महोत्सवात (IFFI) जगभरातील विविधतेने नटलेले चित्रपट प्रदर्शित होत आहेत. या चित्रपटातून सामर्थ्यवान आणि प्रभावी कथा प्रेक्षकांसमोर प्रदर्शित केल्या जात आहेत. यापैकी लक्ष वेधून घेणाऱ्या आंतरराष्ट्रीय चित्रपटांमध्ये उझबेक चित्रपट 'इन पर्सूट ऑफ स्प्रिंग' आणि स्लोव्हाक चित्रपट 'फ्लड' यांचा समावेश आहे.

आज झालेल्या पत्रकार परिषदेत, या दोन्ही चित्रपटांचे दिग्दर्शक, निर्माते आणि कलाकारांनी त्यांच्या चित्रपट निर्मितीच्या प्रवासातील अनुभव कथन केले.

स्लोव्हाक चित्रपट "फ्लड" च्या निर्मात्या, कॅटरिना क्रॅनाकोवा म्हणाल्या की हा चित्रपट एका जलाशयाच्या बांधकामासाठी एका गावातील लोकांना कराव्या लागलेल्या स्थलांतरावर आधारित आहे. स्लोव्हाकियाच्या माजोवा प्रदेशात चित्रित झालेल्या या चित्रपटात जवळजवळ 80 टक्के कलाकार रुथेनियन अल्पसंख्याक समुदायातील आहेत. "या चित्रपटाने रुथेनियन समुदायाला स्वतःच्या भाषेत रुपेरी पडद्यावर सादरीकरण करण्याची दुर्मिळ संधी दिली," असे त्यांनी नमूद केले.

अर्जेंटिनामधील एका चित्रपट महोत्सवात प्रदर्शित झाल्यानंतर, ‘फ्लड’ या चित्रपटाचे जगातील दुसरा प्रीमियर गोव्यातील इफ्फीमध्ये झाला. खरोखरच ज्यांना प्रकल्पामुळे स्थलांतर करावे लागले अशा लोकांच्या जीवनप्रसंगावर आधारित असणाऱ्या या चित्रपटाचे एक विशेष प्रदर्शन त्याच समुदायासाठी करण्याची योजना या चित्रपटाचा चमू आखत आहे. 

पत्रकार परिषदेत "इन पर्सूट ऑफ स्प्रिंग" या उझबेक चित्रपटाचे प्रतिनिधित्व दिग्दर्शक अयुब शाहोबिद्दिनोव्ह आणि मुख्य अभिनेत्री फरिना जुमाविया यांनी केले. चित्रपटाची ओळख करून देताना दिग्दर्शक म्हणाले की या चित्रपटात मुख्य व्यक्तिरेखा राहत शुकुरोव्हा हिचा प्रवास दाखवला आहे. या प्रवासात तिच्या अनेक वेदनादायक आठवणी आणि दीर्घकाळ दडलेली रहस्य प्रेक्षकांसमोर येतात. "भूतकाळ पुन्हा समोर येत असताना, राहतला स्वतःशी समेट करण्यासाठी जुन्या जखमा आणि लपलेल्या सत्यांमधून मार्गक्रमण करावे लागते," असे त्यांनी स्पष्ट केले.

जरी या चित्रपटाची कथा उझबेकिस्तानमध्ये सोव्हिएत काळाच्या शेवटच्या टप्प्यात घडलेली असली तरीही, चित्रपटाचा विषय आणि भावनिक संघर्ष आजही तितकाच प्रासंगिक आहे. जगभरातील चित्रपट निर्मात्यांना आपले काम प्रदर्शित करण्यासाठी आणि जागतिक नेटवर्क तयार करण्यासाठी इफ्फी एक मौल्यवान आंतरराष्ट्रीय व्यासपीठ प्रदान करते, असे चित्रपटाच्या दिग्दर्शकांनी इफ्फी’ची प्रशंसा करताना सांगितले. "आम्ही इफ्फीचा भाग आहोत याचा आम्हाला आनंद आहे," असेही त्यांनी म्हटले.

सारांश:

"इन पर्सूट ऑफ स्प्रिंग”

ताश्कंदची रहिवासी राहत शुकुरोव्हा आपल्या भूतकाळातील एका व्यक्तीच्या मृत्यूबद्दल माहिती समजल्यावर हादरुन जाते. आणि ती अर्चली या दुर्गम पर्वतीय गावात परतते. या गावात एकेकाळी ती शिक्षिका म्हणून काम करत असते. सुमारे दशकभरापूर्वी, सोव्हिएत काळात, तिचे जीवन एका वादग्रस्त प्रकरणामुळे उद्ध्वस्त झालेले असते, ज्यामुळे तिला अपमानित होऊन गाव सोडावे लागलेले असते. आता, अर्चलीमध्ये परतल्यावर, तिला तिच्या वेदनादायक आठवणी आणि दीर्घकाळ दडवून ठेवलेल्या गुपित्यांचा सामना करावा लागतो. भूतकाळ पुन्हा समोर आल्यावर राहतला जुन्या जखमा आणि लपलेल्या सत्यांमधून मार्ग काढत स्वतःशी समेट साधायचा असतो.

फ्लड:

चित्रपटातील मुख्य व्यक्तिरेखा असलेल्या मारा’च्या दरीत वसलेल्या मूळ गावाचे भविष्य एका नव्या जलाशय प्रकल्पामुळे बदलते आणि गावकऱ्यांना हळूहळू त्यांची घरे सोडावी लागतात. माराला ग्रामीण भाग सोडून शहरात शिक्षण घेण्याची इच्छा आहे, तथापि, तिचे वडील जे एक रुथेनियन शेतकरी असतात, ते कुटुंबाच्या मालकीची जमीन सोडायला तयार नसतात, अगदी गाव पाण्याखाली जाण्याची वेळ आली तरीही! मारा ढासळणाऱ्या पायाभूत सुविधा, अधिकाऱ्यांची छुपी दडपशाही आणि आगामी पुराच्या भीतीशी सामना करणाऱ्या गावकऱ्यांच्या संघर्षाची पुढारी बनते.  

पत्रकार परिषदेची लिंक:

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | गोपाळ चिप्पलकट्टी/श्रद्धा मुखेडकर/दर्शना राणे | IFFI 56