প্ৰধানমন্ত্ৰী শ্ৰী নৰেন্দ্ৰ মোদীয়ে আজি ৰাজস্থানৰ ছিকাৰত কেইবাটাও উন্নয়নমূলক প্ৰকল্পৰ উৎসৰ্গা আৰু আধাৰশিলা স্থাপন কৰে। তেওঁ দেশবাসীৰ বাবে উৎসৰ্গা কৰা প্ৰকল্পসমূহৰ ভিতৰত আছে ১.২৫ লাখৰো অধিক প্ৰধানমন্ত্ৰী কিষাণ সমৃদ্ধি কেন্দ্ৰ। তেওঁ ছালফাৰ মিশ্ৰণেৰে নতুন প্ৰকাৰৰ ইউৰিয়া গোল্ড সাৰ মুকলি কৰে। ডিজিটেল কমাৰ্চৰ বাবে মুকলি নেটৱৰ্ক (অ’এনডিচি)ত প্ৰধানমন্ত্ৰীয়ে ১৬০০টা কৃষক উৎপাদক সংস্থাৰ শুভাৰম্ভ কৰে। লগতে প্ৰধানমন্ত্ৰী কিষাণ সন্মান নিধিৰ অধীনত প্ৰায় ১৭ হাজাৰ কোটি টকাৰ চতুৰ্দশ কিস্তি ৮.৫ কোটি হিতাধিকাৰীক প্ৰদান কৰে। চিত্তৰগড়, ঢোলপুৰ, ছিৰোহী, ছিকাৰ আৰু শ্ৰীগংগানগৰত ৫খন নতুন চিকিৎসা মহাবিদ্যালয় উদ্বোধন কৰাৰ লগতে বৰাণ, বুণ্ডী, কৰাউলী, ঝুনঝুনু, চোৱাই মাধোপুৰ, জয়ছালমেৰ আৰু টংকত ৭খন চিকিৎসা মহাবিদ্যালয়ৰ আধাৰশিলা স্থাপন কৰে। উদয়পুৰ, বনছোৱাৰা, প্ৰতাপগড় আৰু ডুংগৰপুৰ জিলাত অৱস্থিত ৬ খন আৱাসিক একলব্য আদৰ্শ বিদ্যালয় আৰু যোধপুৰৰ ত্ৰিভাৰীত এখন কেন্দ্ৰীয় বিদ্যালয় উদ্বোধন কৰে প্ৰধানমন্ত্ৰীয়ে।

সভাস্থলীত উপস্থিত হৈয়ে প্ৰধানমন্ত্ৰীয়ে মডেল পি এম কিষাণ সমৃদ্ধি কেন্দ্ৰক পৰিদৰ্শন কৰে। ৰাজহুৱা সভাত ভাষণ দি প্ৰধানমন্ত্ৰীয়ে দেশৰ বিভিন্ন প্ৰান্তৰ পৰা আজিৰ কাৰ্যসূচীত যোগদান কৰা কোটি কোটি কৃষকক শ্ৰদ্ধাঞ্জলি জ্ঞাপন কৰে। শেখৱতী বীৰ ভূমিৰ পৰা বিভিন্ন উন্নয়নমূলক কাৰ্যসূচী আৰম্ভ কৰাৰ সুযোগ পোৱাৰ বাবে কৃতজ্ঞতা প্ৰকাশ কৰি প্ৰধানমন্ত্ৰী কিষাণ সন্মান নিধিৰ অধীনত কিস্তিৰ ধন কোটি কোটি কৃষক হিতাধিকাৰীলৈ প্ৰত্যক্ষভাৱে হস্তান্তৰ কৰাৰ কথা উল্লেখ কৰে। ১.২৫ লাখৰো অধিক প্ৰধানমন্ত্ৰী কিষাণ সমৃদ্ধি কেন্দ্ৰ জাতিলৈ উচৰ্গা কৰাৰ কথা উল্লেখ কৰি শ্ৰী মোদীয়ে কয় যে ইয়াৰ দ্বাৰা গাঁও আৰু ব্লক পৰ্যায়ৰ কোটি কোটি কৃষক পোনপটীয়াকৈ উপকৃত হ’ব। ডিজিটেল বাণিজ্যৰ বাবে মুকলি নেটৱৰ্কত কৃষি উৎপাদক সংস্থাসমূহ আৰম্ভ কৰাৰ কথাও তেওঁ উল্লেখ কৰে। ইয়াৰ জৰিয়তে কৃষকসকলে দেশৰ যিকোনো প্ৰান্তৰ পৰা উৎপাদিত সামগ্ৰীৰ বজাৰ কৰিবলৈ সহজ হ’ব বুলিও তেওঁ কয়। প্ৰধানমন্ত্ৰীয়ে ইউৰিয়া গোল্ড, নতুন চিকিৎসা মহাবিদ্যালয় আৰু একলব্য আদৰ্শ বিদ্যালয় মুকলি কৰাৰ কথাও উল্লেখ কৰে। আজিৰ উন্নয়নমূলক প্ৰকল্পৰ বাবে প্ৰধানমন্ত্ৰীয়ে দেশবাসীৰ লগতে কোটি কোটি কৃষকক অভিনন্দন জ্ঞাপন কৰে। প্ৰধানমন্ত্ৰীয়ে ছিকাৰ আৰু শেখৱতী অঞ্চলৰ কৃষকসকলৰ গুৰুত্বৰ কথা উল্লেখ কৰাৰ লগতে তেওঁলোকৰ কঠোৰ পৰিশ্ৰমৰ প্ৰতি শ্ৰদ্ধাঞ্জলি জ্ঞাপন কৰে। শ্ৰী মোদীয়ে কয় যে কেন্দ্ৰৰ বৰ্তমানৰ চৰকাৰখনে কৃষকৰ কষ্ট আৰু প্ৰয়োজনীয়তা বুজি পায়। বীজৰ পৰা শস্যৰ বজাৰ কেনেকৈ কৰিব পাৰি তাৰ ওপৰত বিগত ৯ বছৰত নতুন ব্যৱস্থা গঢ়ি তোলা হৈছে। তেওঁ স্মৰণ কৰি কয় যে ২০১৫ চনত চুৰাটগড়ত ভূমিৰ স্বাস্থ্য পৰীক্ষাৰ বাবে কাৰ্ড আঁচনি আৰম্ভ কৰা হৈছিল।এই আঁচনিৰ জৰিয়তে কোটি কোটি কৃষকে মাটিৰ স্বাস্থ্যৰ বিষয়ে জানিবলৈ সক্ষম হৈছে আৰু সেই জ্ঞানৰ আধাৰত উত্তম সিদ্ধান্ত গ্ৰহণ কৰিছে। তেওঁ কয় যে ১ লাখ ২৫ হাজাৰ প্ৰধানমন্ত্ৰী কিষাণ সমৃদ্ধি কেন্দ্ৰই কৃষকৰ সমৃদ্ধিৰ পথ প্ৰশস্ত কৰিব। প্ৰয়োজন হ’লে এই কেন্দ্ৰসমূহ ৱান ষ্টপ শ্বপ হিচাপে স্থাপন কৰা হ’ব। এই কেন্দ্ৰসমূহে কৃষকসকলক কৃষি বিষয়ৰ উন্নত আধুনিক তথ্য প্ৰদান কৰিব। এই কেন্দ্ৰসমূহে চৰকাৰৰ কৃষি আঁচনিৰ বিষয়েও সময়োপযোগী তথ্য প্ৰদান কৰিব। প্ৰধানমন্ত্ৰীয়ে কৃষকসকলক এই কেন্দ্ৰসমূহ পৰিদৰ্শন কৰি তাৰ পৰা জ্ঞান আহৰণ কৰিবলৈ পৰামৰ্শ দিয়ে। শ্ৰী মোদীয়ে কয় যে চলিত বৰ্ষৰ শেষৰ পূৰ্বে অতিৰিক্ত ১.৭৫ লাখ প্ৰধানমন্ত্ৰী কিষাণ সমৃদ্ধি কেন্দ্ৰ স্থাপন কৰা হ’ব।

প্ৰধানমন্ত্ৰীয়ে কয় যে বৰ্তমান চৰকাৰে কৃষকৰ খৰচ হ্ৰাস কৰি সময়মতে সাহায্য প্ৰদানৰ বাবে আন্তৰিকতাৰে কাম কৰি আছে। প্ৰধানমন্ত্ৰী কিষাণ সন্মান নিধিৰ কথা উল্লেখ কৰি শ্ৰী মোদীয়ে কয় যে এইখন বিশ্বৰ সৰ্ববৃহৎ আঁচনি, য’ত কৃষকৰ বেংক একাউণ্টলৈ পোনপটীয়াকৈ ধন স্থানান্তৰ কৰা হয়। তেওঁ কয় যে আজিৰ চতুৰ্দশ কিস্তি যোগ কৰিলে এই পৰ্যন্ত কৃষকৰ বেংক একাউণ্টলৈ পোনপটীয়াকৈ ২,৬০,০০০ কোটিতকৈ অধিক টকা হস্তান্তৰ কৰা হৈছে। ইয়াৰ দ্বাৰা কৃষকসকল উপকৃত হৈছে। তেওঁ কয় যে দেশত সাৰৰ মূল্যৰ ক্ষেত্ৰত চৰকাৰে লোৱা পদক্ষেপ কৃষকৰ খৰচ ৰাহি কৰাৰ নিদৰ্শন। কৰ’না মহামাৰী আৰু ৰাছিয়া-ইউক্ৰেইন যুদ্ধই সাৰ খণ্ডত ব্যাপক প্ৰভাৱ পেলাইছিল। কিন্তু বৰ্তমানৰ চৰকাৰে দেশৰ কৃষকক প্ৰভাৱিত কৰিবলৈ নিদিলে। সাৰৰ দাম সন্দৰ্ভত কথা পাতি প্ৰধানমন্ত্ৰীয়ে কয় যে ভাৰতত সাৰ বেগ এটাৰ দাম ২৬৬ টকা হ’লেও পাকিস্তানত ৮০০ টকা, বাংলাদেশত ৭২০ টকা, চীনত ২১০০ টকা আৰু আমেৰিকাত ৩০০০ টকা। প্ৰধানমন্ত্ৰীয়ে কয়, "চৰকাৰে কৃষকক সাৰৰ দামক লৈ চিন্তিত নকৰে। কোনো কৃষকে যেতিয়া সাৰ কিনিবলৈ যায় তেতিয়া তেওঁ বিশ্বাস কৰে যে মোদী আছে।"

প্ৰধানমন্ত্ৰীয়ে বাজৰাৰ প্ৰচাৰ আৰু শ্ৰী অন্ন বুলি ব্ৰেণ্ড কৰাৰ বাবে গ্ৰহণ কৰা পদক্ষেপৰ কথা উল্লেখ কৰে। তেওঁ কয় যে শ্ৰী অন্নৰ প্ৰচাৰৰ জৰিয়তে ইয়াৰ উৎপাদন, প্ৰক্ৰিয়াকৰণ আৰু ৰপ্তানি বৃদ্ধি পাইছে। শেহতীয়াকৈ আমেৰিকা ভ্ৰমণৰ সময়ত হোৱাইট হাউছৰ নৈশ আহাৰত বাজৰাৰ খাদ্যৰ উপস্থিতিৰ কথা তেওঁ স্মৰণ কৰে।

প্ৰধানমন্ত্ৰীয়ে কয়, “গাওঁ উন্নত হ’লেহে ভাৰতৰ উন্নয়ন সম্ভৱ। উন্নত গাঁৱৰ জৰিয়তেহে ভাৰতৰ উন্নয়ন হ’ব পাৰে।সেয়েহে চৰকাৰে এনে সা-সুবিধা গাঁৱত প্ৰৱৰ্তনৰ বাবে কাম কৰি আছে যিবোৰ এতিয়ালৈকে কেৱল চহৰতহে উপলব্ধ আছিল।” স্বাস্থ্য আন্তঃগাঁথনি সম্প্ৰসাৰণৰ কথা উল্লেখ কৰি প্ৰধানমন্ত্ৰীয়ে কয় যে ৯ বছৰ পূৰ্বে ৰাজস্থানত মাত্ৰ ১০খন চিকিৎসা মহাবিদ্যালয় আছিল। আজি এই সংখ্যা ৩৫ লৈ বৃদ্ধি পাইছে।ইয়াৰ ফলত সংশ্লিষ্ট অঞ্চলটোৰ চিকিৎসা ব্যৱস্থাৰ উন্নতি হৈছে। চিকিৎসা বিজ্ঞানৰ ছাত্ৰ-ছাত্ৰীসকলে গুণগত শিক্ষা লাভৰ সুযোগ লাভ কৰিছে। আজি উদ্বোধন হোৱা চিকিৎসা মহাবিদ্যালয়সমূহ আৰু আধাৰশিলা স্থাপনে ৰাজ্যৰ চিকিৎসা আন্তঃগাঁথনিৰ উন্নতি সাধন কৰিব বুলিও তেওঁ কয়। চিকিৎসা শিক্ষাক সহজ কৰি তোলা হৈছে। মাতৃভাষাত চিকিৎসা শিক্ষাৰ ব্যৱস্থা কৰা হৈছে। ৰাইজৰ পিছপৰা আৰু বঞ্চিত শ্ৰেণীৰ বাবে এয়া এক বিশেষ পদক্ষেপ বুলিও তেওঁ উল্লেখ কৰে। প্ৰধানমন্ত্ৰীয়ে কয়, “এতিয়া কোনো দুখীয়াৰ কন্যা বা পুত্ৰ ইংৰাজী নজনা বাবে চিকিৎসক হোৱাৰ সুযোগৰ পৰা বঞ্চিত নহ’ব, এয়াও মোদীৰ আশ্বাস।”

প্ৰধানমন্ত্ৰীয়ে কয় যে দশক দশক ধৰি গাঁৱত ভাল স্কুল আৰু শিক্ষাৰ অভাৱত দুখীয়া লোকসকল পিছপৰা হৈ আছিল। ইয়াৰ বাবে দুখ প্ৰকাশ কৰি তেওঁ কয় যে পূর্বে পিছপৰা জনজাতি জনগোষ্ঠীৰ সন্তানৰ সপোন পূৰণৰ কোনো উপায় নাছিল৷ তেওঁ কয় যে বৰ্তমান চৰকাৰে শিক্ষাৰ বাজেট আবণ্টন বৃদ্ধি কৰি আৱাসিক একলব্য বিদ্যালয় মুকলি কৰিছে। ইয়াৰ জৰিয়তে জনজাতীয় সমাজৰ যুৱক-যুৱতীসকল উপকৃত হ’ব।

শ্ৰী মোদীয়ে কৈছিল, “সপোন ডাঙৰ হ’লেহে সফলতা আহে।” প্ৰধানমন্ত্ৰীয়ে কয় যে ৰাজস্থান এনে এখন ৰাজ্য যাৰ শোভাই যুগ যুগ ধৰি বিশ্বক মুগ্ধ কৰি ৰাখিছে। এই ৰাজ্যখনক আধুনিক উন্নয়নৰ নতুন উচ্চতালৈ লৈ যাবলৈ তেওঁ ঐতিহ্য সংৰক্ষণৰ ওপৰত গুৰুত্ব আৰোপ কৰে। প্ৰধানমন্ত্ৰীয়ে কয় যে ৰাজস্থানত আধুনিক আন্তঃগাঁথনি সৃষ্টি কৰাটোত আমি প্ৰাধান্য দিছো। তেওঁ যোৱা কেইমাহমানত দুটা হাইটেক এক্সপ্ৰেছৱে উদ্বোধনৰ কথা উল্লেখ কৰে। শ্ৰী মোদীয়ে কয় যে দিল্লী-মুম্বাই এক্সপ্ৰেছৱে আৰু অমৃতসৰ-জামনগৰ এক্সপ্ৰেছৱেৰ জৰিয়তে ৰাজস্থানত উন্নয়নৰ এক নতুন অধ্যায় আৰম্ভ হ’ব। ৰাজ্যৰ পৰা উৎক্ষেপণ কৰা বন্দে ভাৰত এক্সপ্ৰেছ ৰে’লৰ কথাও তেওঁ উল্লেখ কৰে। শ্ৰী মোদীয়ে কয় যে চৰকাৰে আন্তঃগাঁথনি আৰু পৰ্যটনৰ উন্নয়নত বিনিয়োগ কৰিছে। এই এক্সপ্ৰেছৱে’ৰ সুবিধা আৰু উন্নত ৰে’ল সংযোগক পৰ্যটকসকলে আদৰণি জনাব বুলিও তেওঁ কয়। স্বদেশ দৰ্শন আঁচনিৰ অধীনত খাতু শ্যাম জী মন্দিৰত সা-সুবিধা সম্প্ৰসাৰণৰ বিষয়ে কোৱাৰ সময়ত শ্ৰী মোদীয়ে শ্ৰী খাতু শ্যামৰ আশীৰ্বাদত ৰাজস্থানৰ উন্নয়নে আৰু অধিক গতি লাভ কৰিব বুলি আশা প্ৰকাশ কৰে। তেওঁ কয় যে আমি সকলোৱে বিশ্ব আদালতত ৰাজস্থানৰ ঐতিহ্য আৰু গৌৰৱলৈ এক নতুন পৰিচয় আনিম।

প্ৰধানমন্ত্ৰীয়ে ৰাজস্থানৰ মুখ্যমন্ত্ৰী শ্ৰী অশোক গেহলটৰ সুস্বাস্থ্য কামনা কৰে। কিছুদিন অসুস্থতাৰ বাবে এই অনুষ্ঠানত উপস্থিত থাকিব নোৱাৰিলে ৰাজস্থানৰ মুখ্যমন্ত্ৰীগৰাকীয়ে।

অনুষ্ঠানত ৰাজস্থানৰ ৰাজ্যপাল শ্ৰী কালৰাজ মিশ্ৰ, কেন্দ্ৰীয় কৃষি আৰু কৃষক কল্যাণ মন্ত্ৰী শ্ৰী নৰেন্দ্ৰ সিং টোমৰ, জল শক্তি মন্ত্ৰী শ্ৰী গজেন্দ্ৰ সিং শ্বেখাৱত, কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰী শ্ৰী মনসুখ মাণ্ডভিয়া, আইন আৰু ন্যায় মন্ত্ৰী শ্ৰী অৰ্জুন ৰাম মেঘৱাল, কৃষি আৰু কৃষক কল্যাণ ৰাজ্য মন্ত্ৰী শ্ৰী কৈলাশ চৌধাৰীকে ধৰি অন্যান্য বিশিষ্ট ব্যক্তিসকল উপস্থিত থাকে।

*****

DS/TS