منشیات کے استعمال کی بیماری ایک ایسا مسئلہ ہے جو ملک کے سماجی ڈھانچے کو بری طرح متاثر کر رہا ہے۔ کسی بھی نشہ آور مادے کی لت نہ صرف فرد کی صحت پر اثر انداز ہوتی ہے بلکہ اس کے خاندان اور پورے معاشرے کو بھی متاثر کرتی ہے۔ مختلف نفسیاتی اثر رکھنے والے مادوں کا باقاعدہ استعمال فرد میں انحصار پیدا کرتا ہے۔ بعض مادے دماغی و نفسیاتی عوارض، قلبی بیماریوں کے ساتھ ساتھ حادثات، خودکشیوں اور تشدد کا سبب بھی بن سکتے ہیں۔ لہٰذا، منشیات کے استعمال اور اس کی لت کو نفسیاتی، سماجی اور طبی مسئلے کے طور پر دیکھنے کی ضرورت ہے۔

وزارت برائے سماجی انصاف و  تفویض اختیارات  ملک میں منشیات کی طلب کو کم کرنے کے لیے مرکزی وزارت ہے، جو منشیات کے استعمال کی روک تھام، مسئلے کی شدت کا جائزہ، حفاظتی اقدامات، صارفین کا علاج و بحالی، اور معلومات کی ترسیل کے تمام پہلوؤں کی نگرانی اور ہم آہنگی کرتی ہے۔

اس وزارت نے بلند پرواز نَشہ مُکت بھارت مہم (این ایم بی اے) کا آغاز کیا ہے، جو ملک کے تمام اضلاع میں فعال ہے۔ اس مہم کا مقصد نوجوانوں میں منشیات کے نقصانات کے بارے میں آگاہی پیدا کرنا ہے، خاص طور پر اعلیٰ تعلیمی اداروں، یونیورسٹی کیمپس، اسکولوں میں، اور کمیونٹی تک پہنچ کر عوام کی شراکت اور مہم میں ذمہ داری کو فروغ دینا ہے۔

نَشہ مُکت بھارت مہم (این ایم بی اے) کی کامیابیاں درج ذیل ہیں:

• اب تک، مختلف زمینی سرگرمیوں کے ذریعے 23.06 کروڑ سے زائد افراد کو منشیات کے استعمال کے خطرات سے آگاہ کیا جا چکا ہے، جن میں 7.73 کروڑ سے زائد نوجوان اور 5.18 کروڑ سے زائد خواتین شامل ہیں۔
• 16.92 لاکھ سے زائد تعلیمی اداروں کی شرکت نے اس بات کو یقینی بنایا کہ مہم کا پیغام ملک کے بچوں اور نوجوانوں تک پہنچے۔
• 5.70 لاکھ سے زائد منشیات سے نجات پانے والے افراد مختلف سرگرمیوں میں حصہ لے کر مہم کا حصہ بن چکے ہیں۔
• 20,000 سے زائد ماسٹر والنٹیرز (ایم ویز) کو شناخت کر کے تربیت دی گئی ہے۔
• ڈِی ایڈکشن سینٹرز کی تعداد 490 (2020-21) سے بڑھ کر 780 سے زائد (2025-26) ہو گئی ہے، جس میں 154 گورنمنٹ ہسپتالوں میں ایڈکشن ٹریٹمنٹ فیسلٹیز شامل ہیں۔
• ہر سال 26 جون کو ‘بین الاقوامی یومِ منشیات’ کے خلاف اور غیر قانونی منشیات کی روک تھام کے طور پر منایا جاتا ہے تاکہ منشیات کے نقصانات کے بارے میں آگاہی پھیلائی جا سکے۔
• یو این ڈی پی کے ذریعے کیے گئے اثرات کے جائزے سے معلوم ہوا کہ 2020 میں مہم کے آغاز کے بعد 64 فیصد لوگوں کو این ایم بی اے  کے بارے میں علم تھا، 76 فیصد نے محسوس کیا کہ مہم کی ضرورت ہے، 23 فیصد نے تقریبات اور سرگرمیوں میں شرکت کی، اور 50 فیصد افراد کو مہم کے ذریعے دستیاب ڈِی ایڈکشن سینٹرز کا علم ہوا۔
•  این ایم بی اے موبائل ایپلیکیشن تیار کی گئی ہے تاکہ مہم کی سرگرمیوں کا ڈیٹا جمع کیا جا سکے اور ضلعی، ریاستی اور قومی سطح پر  این ایم بی اے ڈیش بورڈ پر پیش کیا جا سکے۔
•  این ایم بی اے پورٹل www.nmba.dojse.gov.in ایک مرکزی پلیٹ فارم کے طور پر کام کر رہا ہے، جو منشیات کے استعمال سے متعلق اہم معلومات، معاونت اور عوامی شمولیت فراہم کرتا ہے۔ اس پورٹل کی ایک اہم خصوصیت ملک بھر کے جیو-ٹیگڈ ڈِی ایڈکشن سینٹرز کی فہرست ہے، جو ضرورت مند افراد کو قریب ترین سہولت تک رسائی یقینی بناتی ہے۔
• ‘‘منشیات سے پاک رہنے’’ کے قومی آن لائن عہد میں 1.67 کروڑ سے زائد طلبہ نے حصہ لیا، جو 99,595 تعلیمی اداروں سے تعلق رکھتے ہیں۔
• آرٹ آف لیونگ ، برہما کماری ، سنت نرنکاری مشن ، آل ورلڈ گایتری پریوار ، اسکان اور شری رام چندر مشن جیسی چھ روحانی/سماجی خدمت کی تنظیموں کے ساتھ مفاہمت ناموں پر دستخط کیے گئے ہیں تاکہ این ایم بی اے کی مدد کی جا سکے اور بڑے پیمانے پر بیداری کی سرگرمیاں انجام دی جا سکیں اور اب تک 3.37 کروڑ سے زیادہ لوگوں تک رسائی ممکن ہوئی ہے ۔
• ڈِی ایڈکشن کے لیے 14446 ہیلپ لائن نمبر قائم کیے گئے  ہیں  تاکہ پرائمری مشاورت اور فوری ریفرل سروسز فراہم کی جا سکیں۔ اب تک اس ہیلپ لائن پر 4.30 لاکھ سے زائد کالز موصول ہو چکی ہیں۔
• اولمپک میڈلسٹ روی کمار ڈہیا، سریش رینا، اجنکیا رہانے، سندیپ سنگھ، سویتا پونیا اور امان سہرواٹ جیسے کھلاڑیوں نے  این ایم بی اے کی حمایت میں پیغامات مشترک کیے ہیں۔
• ‘‘نشے سے آزادی – نیشنل یوتھ اینڈ اسٹوڈنٹس انٹریکشن پروگرام’’، ‘‘نیا بھارت، نشہ مُکت بھارت’’، اور  این ایم بی اے کی این سی سی کیڈٹس کے ساتھ انٹریکشن پروگرام منعقد ہوئے، جن میں 700 افسران نے حقیقی طور پر شرکت کی جبکہ تقریباً 40,000 کیڈٹس نے آن لائن حصہ لیا۔
• سرحدی علاقوں میں  این ایم بی اے کے نفاذ کے لیے سرحدی فورسز کی تربیت کے لیے خصوصی ماڈیولز تیار کیے گئے اور ان علاقوں میں ڈِی ایڈکشن سینٹرز قائم کیے گئے۔
• این ایم بی اے پر ایک بڑے پیمانے پر عہد کی تقریب 12 اگست 2024 کو منعقد ہوئی، جس میں 2 لاکھ سے زائد تعلیمی اداروں کے تقریباً 3 کروڑ افراد نے حصہ لیا۔
• این ایم بی اے کی پانچویں سالگرہ کے موقع پر 13 اگست 2025 کو سماجی انصاف و تفویض اختیارات کے محکمہ نے حکومت این سی ٹی دہلی کے تعاون سے خصوصی تقریب کا انعقاد کیا، جس میں دہلی کے 1,000 سے زائد طلبہ نے حقیقی طور پر شرکت کی اور ملک بھر میں لاکھوں افراد نے عہد میں حصہ لیا۔
• 1 اگست 2025 سے ملک کی تمام ریاستوں اور مرکز کے زیر انتظام علاقوں میں شہریوں کو  این ایم بی اے کی پانچویں سالگرہ کی قومی مہم میں شرکت کے لیے متحرک کرنے کے لیے مقابلہ جاتی اور شمولیتی سرگرمیوں کی ایک سیریز شروع کی گئی، جس سے وسیع پیمانے پر آگاہی اور شہری شمولیت کو فروغ ملا۔
• 8 نومبر 2025 تک، 1,12,202 نوجوانوں اور طلبہ نے کوئز مقابلے میں حصہ لیا، جو منشیات سے پاک بھارت کے فروغ میں نوجوانوں کی فعال دلچسپی اور جوش و خروش کو ظاہر کرتا ہے۔
• شمولیتی مہم کے حصہ کے طور پر، ملک بھر میں کل 97,336 تقریبات منعقد کی گئیں، جن سے 2.42 کروڑ افراد (1.43 کروڑ مرد اور 1 کروڑ خواتین) تک رسائی حاصل ہوئی۔ ان سرگرمیوں میں نعرہ نویسی، رنگولی مقابلے، ڈرائنگ مقابلے، عہد کی تقریبات، ریلیاں اور میراتھن شامل ہیں جو اسکولوں، کالجوں اور کمیونٹی مقامات میں منعقد ہوئے۔
• مہم کے دوران 16 لاکھ ای-عہد اور 1 کروڑ سے زائد آف لائن عہد ریکارڈ کیے گئے، جو عوام کی مضبوط شمولیت کو ظاہر کرتے ہیں۔

نَشہ مُکت بھارت مہم ( این ایم بی اے) کو ملک بھر میں پرجوش پذیرائی حاصل ہوئی ہے اور تمام ریاستوں میں متعدد آگاہی مہمات منعقد کی گئی ہیں۔ نَشہ مُکت بھارت مہم کے پانچ سال مکمل ہونے کی شاندار اختتامی تقریب 18 نومبر 2025 کو گرو نانک دیو یونیورسٹی، امرتسر میں منعقد کی جائے گی۔ یہ تقریب محترم گورنر پنجاب اور محترم وزیر برائے سماجی انصاف و تفویض اختیارات کی سربراہی میں منعقد ہوگی۔ تقریب میں تقریباً 7,000 شرکاء کی شرکت متوقع ہے۔

اس تقریب کا مقصد مہم کی کامیابیوں کو اجاگر کرنا، کمیونٹی کی شمولیت کو فروغ دینا، اور منشیات سے پاک معاشرے کی تعمیر کے لیے اجتماعی کوششوں کو مضبوط کرنا ہے۔ پروگرام میں مختلف سرگرمیاں شامل ہوں گی، جن میں ثقافتی پروگرام، منشیات کے خلاف آن لائن اور آف لائن عہد، اسکول اور کالج کی سطح پر مقابلے، اور ایک بڑے پیمانے پر ریلی شامل ہیں۔

ایسی تقریبات کو فروغ دے کر اور منانے کے ذریعے، وزارت برائے سماجی انصاف و تفویض اختیارات نوجوانوں اور عام شہریوں کو منشیات سے دور رہنے اور صحت مند، اقدار پر مبنی طرز زندگی اپنانے کی ترغیب دینا چاہتی ہے۔

*******

ش ح ۔ش ت۔ رب

 

U- 1259

 

(Release ID: 2190069) Visitor Counter : 3