U Myntri Sorkar Pdeng ba dei khmih ia ka Tnad Communications bad Development of North Eastern Region (DoNER), u Jyotiraditya M. Scindia, u la ïashim bynta ha ki lai tylli ki High-Level Task Force (HLTF) ha ka 27 tarik u Risaw, 2025. Ha kaba sdang jong une u snem, ka Tnad Development of North Eastern Region ka la thaw phra tylli ki High-Level Task Force, ha kaba ia kawei pa kawei la khlieh da uwei na ki Myntri Rangbah jong ka jylla ka thain shatei lammihngi, ryngkat bad u Myntri Sorkar Pdeng ba dei khmih ia ka DoNER bad lai ngut ki Myntri Rangbah jong kiwei pat ki Jylla ka thain shatei lammihngi kum ki dkhot. Kane ka sienjam ka la mih na ka jingïasngewthuh jingmut ha ka Plenary Session ba 72 jong ka North Eastern Council (NEC), kaba la long ha ka 21 tarik u Nohprah, 2024, ha Agartala. Kine ki task force ki kyntiew ia ka jingiatreilang hapdeng ki jylla, kaba iarap ia ka jingpyniadei ia ki polisi, bad ban pynthikna ba ki sienjam jingpynroi kin long kiba iadei bad ki thain ym kiba iadei bad ki jylla.

U Pu Lalduhoma, Myntri Rangbah ka Jylla Mizoram, u la pynïaid ïa ka jingïalang jong ka HLTF halor ka North East Economic Corridor, ha kaba la iashim bynta u Bah Preston Tynsong, Symbud Myntri Rangbah ka Jylla Meghalaya; u Chandra Mohan Patowary, Myntri ka Tnad Industries & Commerce, Act East Policy, EF&CC, Assam; bad u Puneet Kumar Goel, Chief Secretary ka Jylla Manipur. Ha kane ka jingialang, la pyni ia ka lynti kaba bniah na ka bynta ban weng ia ki jingeh kiba kongsan ha ki jingdon jingem ba iadei bad ka ioh ka kot bad ki jingiarap kiba lyngkot, ba pdeng bad ba jrong samoi. La ban jur ia ka jingkyntiew ia ki surok bad ki lynti rel, ka jingpyniasoh liengsuin, ki lad ka leit ka wan lyngba ki jaka shong um hapoh ri, ki jingdon jingem ba iadei bad ka bording, ka jingpyniasoh digital, ki lad khaii pateng bad ki jingdon jingem ba iadei bad ka khaii pateng ha khappud. Ia ki jingai jingmut ba kordor la ai da ki jylla ba la long dkhot jong ka HLTF kata ka Meghalaya, Assam, bad Manipur. U Myntri Sorkar Pdeng u la sngewnguh ïa ka jingbniah jong ka jingai jingtip bad u la kyrpad ïa ka Sorkar Mizoram ban aiti ïa ka kaiphod ba khatduh jong ka HLTF hadien ba la pynrung lang ïa ki jingai jingmut ba la ïoh.

Ia ka jingialang jong ka HLTF halor ka kam jngohkai pyrthei la pyniaid da u Conrad Sangma, Myntri Rangbah ka jylla Meghalaya. Ha kane ka jingialang la iashim bynta ruh da u Gajendra Singh Shekhawat, Myntri Sorkar pdeng ba dei peit ia ka Tnad Kam jngohkai pyrthei bad ka Deiriti, nalor u Myntri Rangbah ka jylla Tripura u Prof. (Dr) Manik Saha bad u Myntri Rangbah ka jylla Sikkim, u Prem Singh Tamang. U Sangma, u la ai ia ka kaiphod ba nyngkong halor ki jingai jingmut jong ka HLTF. U la pynpaw ia ki jinglap ba kongsan, ki jingeh bad ki jingai jingmut na ka bynta ban kyntiew ia ka kam jngohkai pyrthei ha ka thain shatei lammihngi. U Myntri Sorkar Pdeng ba dei peit ia ka DoNER u la ai jingmut ban kyntiew ia ki jaka jngohkai pyrthei ha ka thain shatei lammihngi. U la ban jur ruh ia ka rukom treikam naduh tynrai ban thaw ia ka rukom treikam na ka bynta ban kyntiew ia ka kam jngohkai pyrthei ha ka thain shatei lammihngi bad ka rukom pyntreikam ban khring ia ki nongjngohkai pyrthei na ki ri ba marjan ruh. U Myntri Sorkar Pdeng ba dei khmih ia ka Tnad Deiriti bad kam Jngoh kai u la pynpaw ia ki kam pynroi bad kumjuh ruh ka jingkyntiew ia ki jingdon jingem ba iadei bad ka kam jngohkai pyrthei ba la sdang da ka Tnad kam jngohkai ha ka thain shatei lammihngi. U la ban jur ruh ba ka kam jngohkai pyrthei ka dei ka bynta ba kongsan ban kyntiew ia ka ioh ka kot ha ka thain.

La pynlong ia ka jingialang jong ka High-Level Task Force (HLTF) halor ka rep ka riang bad ka Horticulture hapoh ka jingpyniaid jong u Prem Singh Tamang, Myntri Rangbah ka jylla Sikkim. U Myntri Rangbah ka Jylla Tripura, u Prof. (Dr.) Manik Saha; u Myntri ka tnad ka rep ka riang jong ka jylla Assam, u Atul Bora bad u Myntri ka Tnad ka rep ka riang jong ka jylla Arunachal Pradesh u Gabriel D. Wangsu ruh ki la iashim bynta, nalor ki heh ophisar na ki Jylla Sikkim, Assam, Arunachal Pradesh bad Tripura, bad ruh na ka Tnad DoNER, Tnad ka rep ka riang jong ka sorkar pdeng, Tnad Food Processing Industries, APEDA, NABARD bad kiwei kiwei ki tnad kiba don bynta. Ka Task Force ka la bishar bniah ia ka jingiaid shaphrang jong ki sienjam kiba dang iaid shakhmat ha ka liang ka rep ka riang bad ka kam horticulture ha kylleng ka thain shatei lammihngi bad ka la pyrkhat ia ki buit ban kyntiew ia ka jingpynbha ia ki kam, ka jingpynkhreh, bad ka jingpynpoi iew ia ki mar rep ba kongsan. Ki jingiakren ba kongsan ki long halor ka jingkyntiew ia ki jingdon jingem ba iadei bad ka jingbuh pyndait thah ba la pyniasoh lang, ka jingkyntiew ia ka rukom rep organic, ka jingrep ba la pynshong nongrim ha ki kynhun, bad ka jingpyni ia ki mar ba kyrpang jong ka thain hapoh ka thup “Organic” ba la pyniasoh lang. U Myntri Sorkar Pdeng, MDoNER, u la pynpaw ia ka jingdonkam ban pynbha ia ki kam ha ki jylla bad u la ai jingmut ban thaw ia ki buit treikam kiba lyngkot, pdeng, bad jrong samoi ban pynthikna ia ka jingjop bad jingiaineh jong ki kam paidbah ha ka thain.

***