Ka Sorkar ka la shim bun ki sienjam ban pyniar ia ka jingkynthup ia ka kam pisa tyngka bad ban pynthikna ba ka jinglah ban ioh ia ki jingshakri ba kongsan jong ki bank ka ialam sha ka jingiashim bynta kaba don jingmut ha ka rukom pyniaid pisa kaba pura, kynthup ia ka jinglah ban ioh ia ka ram. Ka jingsdang ia ka Pradhan Mantri Jan Dhan Yojana (PMJDY) ha u bnai Nailar 2014 ka dei ka sienjam kaba kongsan ban ai ki jingshakri jong ki bank sha kito ki bym pat ioh ia kane da kaba pynsuk ia ka jingplie ia ki savings bank deposit account, ryngkat bad ki jingdonkam ba iadei kum ki RuPay debit card bad ka lad ban sei pisa kham bun kaba don bad kine ki card. Haduh mynta, palat 55.90 klur tylli ki account la plie hapoh ka PMJDY.

Ka Sorkar ka la shim katto katne ki sienjam ban pynthikna ba ka jingai ia ka ram ka iahap bad ka jingthep ia ka pisa, da kaba pynleit jingmut bha ha kaba ai pisa ia ki bym don pisa:

1. La sdang ïa ka Pradhan Mantri MUDRA Yojana (PMMY) bad ka ai ram khlem  da hap buh bynda haduh T.20 lak sha ki karkhana rit bad ki kam barit baria, kaba iarap ban seng kam seng jam ïalade bad ban pynmih ki lad kamai kajih. Naduh ba la sdang ia ka, la mynjur 53.85 klur ki ram kiba kot palat T.35.13 lak klur hapoh katei ka skhim.
2. La pyntreikam ïa ki skhim ba kyrpang kum ka Stand-Up India (SUPI), ka PM Street Vendor’s AtmaNirbhar Nidhi (PM SVANidhi), PM Vishwakarma, bad ka Prime Minister’s Employment Generation Programme (PMEGP) ban pyniar ïa ka jingïoh ram na ka bynta ki SC/ST bad kynthei kiba seng kam seng jam, ki nongdie jingdie harud surok, ki nongtrei kti bad kiwei kiwei ki kam barit baria.
3. Ki jingpynthikna ban ioh shim ram: Ka kynthup ia ka Credit Guarantee Fund for Micro Units (CGFMU) bad ka Credit Guarantee Fund Trust for Micro and Small Enterprises (CGTMSE), kiba pynduna ia ka jingma na ka bynta ki nongai ram bad ai jingmyntoi ia ka jingai ram kaba pura sha ki bynta kiba ioh duna ka jingshakri.

Ban pynkhlain ia ki rukom bishar bniah ia ka ram na ka bynta ki briew kiba duna ka jingshim ram, ka Sorkar ka pyndonkam ia ka teknoloji bad kiwei pat ki lad ioh jingtip .

1. La pynbna ia ka Grameen Credit Score ban kyrshan ia ka jingpeit ia ka jinglah shim ram ki Self-Help Group (SHG) bad ki briew ha ki jaka nongkyndong, kynthup ia ki nongrep bad ki briew kiba duna ka ioh ka kot. La khmih lynti ba kane ka sienjam kan pynbha ia ka jinglong jong ki rai ban ai ram bad pynsuk ia ka jingpynbha ia ka jinglah ban ioh ram ba pura ha ki jaka nongkyndong .
2. Ka MSME New Digital Credit Assessment Framework da ki Public Sector Bank ka pyndonkam ia ki jingtip ba la pyniasoh lang na ki jingpyntip ia ka khajna kamai kajih, ki jingpynrung ia ka GST, bad ki jingsiew ia ki jingdonkam ban pynlah ia ka jingbishar bniah ia ka ram kaba kham stet bad kaba thikna.
3. La plie paidbah ia ka Jan Samarth Portal, ka rynsan digital, ban pyniasoh ia ki nongwad ram bad ki skhim Sorkar, da kaba kyntiew ia ka jinglong shai, pynduna ia ka por pyntreikam, bad pynbha ia ka jingpynpoi kam.

Shuh shuh, ka Reserve Bank of India (RBI) ka bthah ia ki thong jong ka Priority Sector Lending (PSL) ban pynthikna ba ki ram kin poi sha ki kam kum ka rep ka riang, ki karkhana rit bad ki kam barit baria, ki bynta kiba kham tlot ha ka imlang sahlang, bad kiwei kiwei ki bynta jong ka ioh ka kot kiba duna ka jingshakri. Lyngba kine ki sienjam, ka Sorkar ka thmu ban pynthikna ba ka jingkynthup ia ka kam pisa tyngka kan nangroi na kaba shu ioh ia ki bank account ban kynthup ia ka jinglah ban ioh ia ka ram kaba ha ka por bad kaba jem dor, da kaba kyntiew ia ka jingroi kaba kynthup lang.

Ia kane ka jingtip la ai da u Myntri Khynnah ka Tnad Kam Pla Tyngka jong ka sorkar pdeng, u Pankaj Chaudhary ha ka jubab ba shu thoh ia ka jingkylli ha Lok Sabha mynta ka sngi.

****