U Myntri Kam Pohiing jong ka sorkar pdeng uba dei ruh u Myntri ka Tnad iatreilang u Amit Shah u la plie bad buh maw nongrim na ka bynta ki kam pynroi bapher bapher jong ka Ahmedabad Municipal Corporation (AMC) ha Ahmedabad, Gujarat mynta ka sngi. Ha kane ka sngi la donlang u Myntri Rangbah ka Gujarat u Bhupendra Patel bad katto katne ngut kiwei pat ki riew pawkhmat

Ha ka jingai jingkren jong u, u Myntri Kam Pohïing jong ka sorkar pdeng uba dei ruh u Myntri ka tnad iatreilang u Amit Shah u la ong ba hadien ka jingthombor ki lehnoh ha Pahalgam, u Myntri Rangbahduh Narendra Modi u la kular ïa ki paidbah ka ri ha Bihar ba ki shipai jong ka India kin pynpra ïa ki jaka rieh tngen jong ki lehnoh. U la ong ba tang hapoh khyndiat sngi, ka mon sain pyrthei kaba khlain jong u Myntri Rangbahduh Modi, ka jingshlur jong ki shipai, ka jingtip kaba thikna jong ki kynhun syntiat jong ngi bad ka bor jong ki shipai ki la hiar thma ia khyndai tylli ki jaka ha Pakistan bad pynjot ia ki jaka rieh jong ki lehnoh. U la ong ba ka sorkar Modi ka la ai ka jubab kaba biang ia ki lehnoh da kaba pynlong nyngkong ia ki jingther kiba thikna, bad nangta ki jingther da ki liengsuin bad mynta da kaba pynduh jait ia ki lehnoh kiba la niad ia ka jingtah saw na ki khlieh jong ki kynthei jong ka ri jong ngi. U Shah u la ong ba ka Operation Sindoor ka la jubab ia kiba bun jait ki jingeh ha ka shisien jubab. U la ong ba ka Pakistan ka ju iathuh ia ka pyrthei baroh kawei ba ym don ki lehnoh bad ki kam lehnoh ha kane ka ri jong ngi. Hynrei haba u namding jong ngi u la hap hangta hapoh ka Operation Sindoor bad la pynduh jait ia ki lehnoh, la pynpaw pyrthei ia ka Pakistan hakhmat ka pyrthei baroh kawei. U la ong ba haba ki ophisar jong ki shipai Pakistan ki la don lang ha ka jingleit on tep ia ki lehnoh, ka jingiadei jong ki shipai Pakistan, ka Pakistan bad ki kam lehnoh ka la paw pyrthei hakhmat ka pyrthei baroh kawei bad ka pyrthei baroh kawei ka la tip ba ki don ki ktem jong ki lehnoh ha Pakistan.

U Amit Shah u la ong ba ki artylli ki jingther kiba thikna bad ki jingther da ki liengsuin kiba nyngkong ki long tang ha PoK, hynrei ka Operation Sindoor ka la pynduh pyndam ia ki lehnoh haduh 100 km hapoh jong ka Pakistan. U la ong ruh ba hadien ka Operation Sindoor, u Myntri Rangbahduh ka ri u Modi u la kren shai ha ka jingkren jong u sha ka ri ba ka um ka Sindhu bad ka snam kim lah ban tuid ha kajuh ka por. U la ong ba u Myntri Rangbah duh Modi u la iathuh ba lada ym lah ban khanglad ia ki kam lehnoh, wat tang shi drop ka um jong ka wah Sindhu yn ym lah ban ioh, ka khaii pateng bad ka kam lehnoh kim lah ban iaid ryngkat bad lada ai jaka rieh ia ki kam lehnoh, te baroh ki khaii pateng kin hap ban khanglad. U Shah u la ong ba u Myntri Rangbahduh ka ri u Modi u la kren shai ruh sha ka pyrthei baroh kawei ba ngi la pynkhreh na ka bynta ki jingiakren bad ka Pakistan, hynrei ki jingiakren kin long na ka bynta ban shim biang ia ka Pakistan Occupied Kashmir (PoK) bad ban pynkut noh ia ki kam lehnoh. U la ong ba mynta 140 klur ngut ki para ri ki ai khublei bad iaroh ia ka jingshlur jong ki shipai jong ngi, ia ka jinglong thikna jong ki tnad syntiat jong ngi bad ia ka mon sain pyrthei kaba khlain jong u Myntri Rangbahduh ka ri u Modi. U la ong ba ka rukom leh u Modi Ji ia ki kam lehnoh kiba la neh da ki phew snem ka long ka kam kaba sngew sarong ia ngi namar ba u dei u khun jong ka Gujarat

U Myntri kam Pohiing jong ka sorkar pdeng u la ong ba u Myntri Rangbah duh ka ri u Modi u la kular ban pynlong ia ka ri India kum ka ri kaba bha tam ha ka pyrthei ha man la ki bynta shuwa u snem 2047. U la ong ba ha kine ki 11 snem ba la dep, u Myntri Rangbah duh Modi ym tang ba u la buh ia ka nongrim kaba skhem na ka bynta ka roi ka par jong ka ri India, hynrei u la thaw ruh ia ka histori kaba thymmai jong ka jingshngain jong ka ri, ka jinglong ba la pynkhreh bad kiba la tbit jong ki shipai jong ngi bad ka jingiada ia ki khappud. U la ong ba ki namding Brahmos jong ngi ki la pynjot ia ki jaka buh liengsuin jong ka Pakistan. U Shah u la ong ba ki shipai ba shlur jong ka ri ki la pynduh pyndam ia ki jaka rieh jong u Hafiz Saeed, u Masood Azhar bad kiba bun ki lehnoh kiba la rieh tngen ha Pakistan bad na ka bynta kane, ka ri baroh kawei ka dem khrup ha ki Jawan jong ki kynhun shipai jong ngi. U la ong ba ha kano kano ka por ba yn thoh ia ka histori ban iada ia ka jingshngain jong ka ri bad ki pud ki sam jong ka, ka Operation Sindoor kan paw bha.

U Amit Shah u la ong ba mynta ka sngi ka jingplie bad ka jingbuh mawnongrim ia ki kam pynroi kiba shongdor palat T. 1550 klur ka jia ha kajuh ka por. Kine ki kam ki kynthup ïa ki 31 tylli ki jingplie paidbah, 60 tylli ki jingbuh maw nongrim bad ka jingpynbiang la ki jong ki ïing sha palat 1070 tylli ki longïing ha ki lai tylli ki complex. U la ïathuh ruh ba mynta ka sngi ki nongïoh jingmyntoi ki la ïoh jingmyntoi ruh na kiba bun ki skhim pynïoh kam da ka Khadi Village Industries Commission (KVIC). U la ong ba la plie ruh ia ka Pallav Overbridge ha kaba 1.5 lak tylli ki kali kin lah ban iaid ban poi sha ka jaka ba ki thmu khlem kano kano ka jingeh ha ka leit ka wan. U Shah u la ïathuh ruh ba la shna ïa ki jaka sam um, ki nala na ka bynta ban pyntuid ïa ka um slap, ka jingkieng rel Sabarmati-Chandkheda ba shongdor T.237 klur la shna ha Ahmedabad ha ka jinglut kaba da ki klur tyngka, ka jingbuh ia ki light pynitynnad halor ka wah Sabarmati ha ka jinglut kaba T.131 klur bad ki kam ba iadei ba ka kam ialehkai hapoh ki overbridge ba bun ha ka jinglut kaba T. 38 klur. U la ong ruh ba ha kajuh ka rukom, ka jingshna ia ki iing PM Awas Yojana kiba shongdor T.38 klur, ka hydroelectric power station, ka flyover ha Panchvati junction, ka jaka sam um kaba shongdor T.44 klur ha Vatva, ka jaka sam um kaba shongdor T.38 klur ha Nikol bad ka jaka sam um ba shongdor T.38 klur ha Vasana kaba sdang ha ka phang mihngi bad sepngi

U Amit Shah u la ïathuh ruh ba mynta ka sngi ka KVIC ka la pynbiang ïa ki lad ai kam ai jam sha palat 1000 ngut ki nongïoh jingmyntoi lyngba ki kor shna khiew kiba pyniaid da ka bording, ka kor suh jaiñ, ki tiar ba iadei bad ka kam kaba iadei bad ki snieh, ka mashin shna umphniang Kachi Ghani, ka mashin shna dieng sma iwbih. U la ong ba ha kine ki hynriew snem, baroh ngi la pynlong ia ka campaign ban thung da ki lak tylli ki dieng man la ka aiom slap hapoh ka Green Gandhinagar Lok Sabha Mission. U la kyrpad ia ki samla ka thain ba kumba u Myntri Rangbahduh ka ri u Narendra Modi u la pynpaw ia ka jingsngewnguh ia la ka kmie da kaba thung ia u dieng ha ka kyrteng jong ka, ha kajuh ka rukom uwei pa uwei u samla jong ka Ahmedabad u hap ban thung ia u dieng ha ka kyrteng jong ka kmie bad ban pynheh pynsan ia u. U la ong ba u dieng ba la thung kum ka jingkynmaw ia ka kmie jong phi kan long ruh kum ka lad ban siew kylliang ia ka ram sha ka Mei Mariang. U Shah u la ong ba ka Ahmedabad Municipal Corporation ka kular ban thung 40 lak tylli ki dieng. U la ong ba lada uwei pa uwei u nongshong shnong u thung la kumno kumno uwei u dieng, te ha ki sngi ban wan, lah ban ioh ia ka jingjop ha kaba pynduna ia ka jingktah jong ka jingkhluit jong ka pyrthei ha Ahmedabad da palat shiteng.

*****