ہندوستانی صدر جمہوریہ محترمہ دروپدی مرمو نے آج شام (10 نومبر 2025) لوآنڈا میں ہندوستان کے سفیر کی جانب سے ہندوستانی برادری کے اعزاز میں منعقدہ استقبالیہ تقریب میں ہندوستانی برادری سے تعلق رکھنے والے افراد سے خطاب کیا۔ اس موقع پر جل شکتی اور ریلوے کے مرکزی وزیرِ مملکت جناب وی سومنّا اور اراکینِ پارلیمنٹ جناب پربھوبھائی ناگر بھائی وساوا اور محترمہ ڈی کے ارونا بھی موجود تھیں۔

ہندوستانی برادری کے پُرجوش اجتماع سے خطاب کرتے ہوئے صدرِ جمہوریہ ٔ ہند نے کہا کہ بھارت اپنے افریقی شراکت داروں، بالخصوص انگولا، کے ساتھ تعلقات کو انتہائی اہمیت دیتا ہے۔ یہ شراکت داری مساوات، باہمی اعتماد اور ترقی کی مشترکہ امنگوں پر قائم ہے۔ انہوں نے کہا کہ بھارت کے افریقہ کے ساتھ تعلقات انڈیا۔افریقہ فورم سمِٹ (آئی اے ایف ایس) کے فریم ورک کے تحت مسلسل ترقی پا رہے ہیں۔ انہوں نے اس بات کا اظہار کیا کہ بھارت جلد ہی آئندہ آئی اے ایف ایس سمٹ کی میزبانی کا منتظر ہے۔

صدرِ  جمہوریہ ٔہند نے کہا کہ انگولا بھارت کی توانائی سلامتی میں ایک اہم شراکت دار ہےاور اس کے بدلے میں بھارت بھی انگولا کے نمایاں تجارتی شراکت داروں میں شامل ہے۔ انہوں نے اس امر پر خوشی کا اظہار کیا کہ گزشتہ سال بھارت اور انگولا کے درمیان دو طرفہ تجارت 5 ارب امریکی ڈالر کی تاریخی سطح سے تجاوز کر گئی۔

صدرِ جمہوریۂ ہند نے کہا کہ بھارت انگولا کو دواسازی، غذائی مصنوعات، ریفائنڈ پیٹرولیم، آٹوموبائل اور مشینری کا ایک بڑا تقسیم کار ہے۔ بھارتی کمپنیاں ریٹیل، سیاحت، ہیرے، توانائی، بنیادی ڈھانچہ، مہمان نوازی اور زرعی شعبوں سمیت مختلف میدانوں میں فعال ہیں۔ انہوں نے کہا کہ ان سرمایہ کاریوں نے انگولا کی اقتصادی ترقی میں اہم کردار ادا کیا ہے اور روزگار کے مواقع پیدا کیے ہیں۔

صدرِ جمہوریہ ٔ ہند نے بتایا کہ تقریباً 8,000 ہند نژاد افراد انگولا میں مقیم ہیں۔ انہوں نے اس بات پر زور دیا کہ ان کی کاروباری صلاحیت، محنت اور پیشہ ورانہ مہارت نے انگولا کی اقتصادی ترقی اور تعمیر میں نمایاں کردار ادا کیا ہے۔ انہوں نے کہا کہ بھارت اور انگولا کے درمیان تجارت، سرمایہ کاری اور عوامی سطح پر روابط کو مزید مضبوط بنانے کے بے شمار مواقع موجود ہیں۔ انہوں نے انگولا میں ہندوستانی برادری سے تعلق رکھنے والے افراد پر زور دیا کہ وہ ہندوستان اور انگولا کی مشترکہ خوشحالی کے حصول کے لیے اپنا  فعال کردار ادا کریں۔

صدر کی تقریر دیکھنے کے لیے یہاں کلک کریں-

 

********

 

 (ش ح ۔م ح ۔رض)

U. No. 1060

(Release ID: 2188688) Visitor Counter : 9