وزارت داخلہ، حکومت ہند اور نیشنل جوڈیشل اکیڈمی، بھوپال نے 8-9 نومبر 2025 کو بھوپال میں تین نئے فوجداری قوانین کے تحت دو روزہ قومی کانفرنس کی میزبانی کی۔ کانفرنس میں تمام ریاستوں اور مرکز کے زیر انتظام علاقوں سے 120 شرکاء نے شرکت کی، جس میں فوجداری انصاف کے تین بنیادی ستون—عدلیہ، پراسیکیوشن اور پولیس—کا تفصیلی جائزہ لیا گیا۔ ریسورس پرسنز میں تعلیمی اداروں اور حاضر سروس سینئر پریکٹیشنرز شامل تھے۔

دو روزہ قومی کانفرنس سے خطاب کرتے ہوئے مرکزی داخلہ سکریٹری جناب گووند موہن نے کہا کہ وزیر اعظم جناب نریندر مودی کی قیادت میں حکومت ہند ایک محفوظ، شفاف اور شواہد پر مبنی فوجداری انصاف کے نظام کی تشکیل کر رہی ہے۔ جناب موہن نے مزید کہا کہ مرکزی وزیر داخلہ اور باہمی امداد کے وزیر جناب امت شاہ کی رہنمائی میں ملک نے تیز رفتار انصاف کے نئے دور کا آغاز کیا ہے۔

انہوں نے زور دیا کہ نئے فوجداری قوانین کا مقصد ہندوستان کے فوجداری انصاف کے نظام کو نوآبادیاتی اثرات سے آزاد کرنا، اسے متاثرین پر مرکوز بنانا اور جدید ٹیکنالوجی کے قابل بنانا ہے۔ مرکزی داخلہ سکریٹری نے نیشنل جوڈیشل اکیڈمی، بھوپال کے تعاون کی بھی تعریف کی، جس نے نئے فریم ورک کے تحت متعارف کرائی گئی تکنیکی اختراعات کے لیے ماڈل رولز اور اسٹینڈرڈ آپریٹنگ طریقہ کار تیار کیے ہیں۔

ان کلیدی تکنیکی اختراعات میں ای سکشیا (الیکٹرانک ثبوت)، ای سمن (ڈیجیٹل اجرا اور قانونی نوٹسوں کی فراہمی)، کمیونٹی سروس (سزا سنانے کے متبادل طریقہ کار کے طور پر) اور نیائے شروتی (قابل رسائی انصاف کی فراہمی کے لیے آڈیو ویژول سسٹم) شامل ہیں۔

مرکزی داخلہ سکریٹری نے کہا کہ ٹیکنالوجی نئے فوجداری قوانین کی اساس ہے، جن کا مقصد انصاف کی فراہمی کے نظام کو تیز تر اور زیادہ مؤثر بنانا ہے، تاکہ تاخیر کے دیرینہ مسئلے کو ختم کیا جا سکے۔ نئے قوانین میں تفتیش، مقدمے کی سماعت اور دیگر طریقہ کار کے مراحل میں تاخیر کو کم کرنے کے لیے متعدد دفعات شامل کی گئی ہیں۔ انہوں نے کہا کہ سپریم کورٹ آف انڈیا کی ای-کمیٹی نے ان قوانین کے مؤثر نفاذ کے لیے درکار تکنیکی انضمام کو فروغ دینے میں کلیدی کردار ادا کیا ہے۔

مرکزی داخلہ سکریٹری نے مزید کہا کہ آئندہ مرحلے میں توجہ کو تینوں نئے فوجداری قوانین کے تحت متعارف کرائی گئی اصلاحات کے مستقل نفاذ، مسلسل بہتری اور ادارہ جاتی استحکام پر مرکوز کیا جانا چاہیے۔ ریاستی حکومتوں کو چاہیے کہ وہ نفاذ کی پیش رفت کا باقاعدہ جائزہ لینے، عملی رکاوٹوں کی نشاندہی کرنے اور بدلتی ہوئی عدالتی و تکنیکی ضروریات کے مطابق قواعد، اطلاعات اور معیاری عملی طریقہ کار (ایس او پیز) کی بروقت تازہ کاری کے لیے مؤثر نگرانی کا نظام قائم کریں۔

انہوں نے اس بات پر زور دیا کہ پولیس محکمے تفتیش اور استغاثہ کے تمام مراحل کی مکمل ڈیجیٹلائزیشن کو اپنی اولین ترجیح بنائیں، اور یہ یقینی بنائیں کہ ای-سکشیا، ای-سمن اور آئی سی جے ایس جیسے نظام کو عملدرآمد کے بنیادی طریقہ کار کے طور پر استعمال کیا جائے۔

عزت مآب سپریم کورٹ کی ای-کمیٹی، نیشنل جوڈیشل اکیڈمی اور ریاستی جوڈیشل اکیڈمیوں کی رہنمائی میں عدلیہ کو چاہیے کہ وہ عدالتی عمل کی ڈیجیٹلائزیشن کے اقدامات کو مزید آگے بڑھائے، تاکہ عدالتی نظام کا پولیس اور استغاثہ کے پلیٹ فارمز کے ساتھ مکمل انضمام یقینی بنایا جا سکے۔ پولیس، پراسیکیوشن، فارنزک، جیلوں اور عدلیہ جیسے ستونوں کے درمیان باقاعدہ فیڈ بیک کے نظام کو ادارہ جاتی شکل دی جانی چاہیے، تاکہ حقیقی وقت میں مسائل کا حل ممکن ہو اور ڈیجیٹل ورک فلو کو مزید مؤثر بنایا جا سکے۔

تمام متعلقہ فریقوں کو باہمی تعاون، ڈیٹا پر مبنی فیصلہ سازی اور مسلسل جدت طرازی کی ثقافت کو فروغ دینا چاہیے، تاکہ نئے فوجداری قوانین کے تحت تصور کیے گئے جدید، مؤثر اور ٹیکنالوجی پر مبنی فوجداری انصاف کے نظام کے وژن کو مکمل طور پر حاصل کیا جا سکے۔

نیشنل جوڈیشل اکیڈمی کے ڈائریکٹر، عزت مآب جسٹس شری انیرودھ بوس نے کہا کہ یہ ایک غیر معمولی موقع تھا جب فوجداری انصاف کے نظام کے تین ستون — پولیس، پراسیکیوشن اور عدلیہ — ایک پلیٹ فارم پر یکجا ہوئے۔ انہوں نے وزارت داخلہ کی جانب سے مشترکہ صلاحیت سازی پروگرام کے تصور کی ستائش کی۔

تحقیقات، استغاثہ اور عدالتی عمل کے نفاذ میں درپیش چیلنجوں پر روشنی ڈالتے ہوئے عزت مآب جسٹس بوس نے نئی تکنیکی اختراعات، آئی سی ٹی ایپلی کیشنز اور نئے قانونی فریم ورک کے تحت متعارف کردہ تصورات کے ساتھ ہم آہنگ رہنے کی اہمیت پر زور دیا۔ انہوں نے اس بات کو اجاگر کیا کہ ایسے صلاحیت سازی پروگرام شرکاء کے لیے سیکھنے، تبادلۂ خیال کرنے اور نئے قانونی و تکنیکی منظرنامے کی گہری سمجھ حاصل کرنے کا ایک اہم موقع فراہم کرتے ہیں۔

کانفرنس کے بارے میں:

دو روزہ قومی کانفرنس نے ایک منفرد اور قیمتی فورم فراہم کیا، جہاں فوجداری انصاف کے نظام کے تین اہم ستون — پولیس، پراسیکیوشن اور عدلیہ — ایک ساتھ جمع ہوئے۔ اجلاس کے ایجنڈے میں نئے فوجداری قوانین کے تحت متعارف کرائی گئی بنیادی اصلاحات، سائنسی تحقیقات کے لیے تکنیکی نقطۂ نظر، عدالتی عمل میں ڈیجیٹل تبدیلی، ڈیجیٹل شواہد کے انتظام، ڈائریکٹوریٹ آف پراسیکیوشن کے کردار، اور مقررہ مدت کے اندر انصاف کی فراہمی کے لیے وضع کردہ نئی ٹائم لائنز پر تفصیلی تبادلۂ خیال شامل تھا۔

اس پروگرام میں بصیرت افروز کیس اسٹڈیز، انٹرایکٹو سیشنز، اور ممتاز قانونی ماہرین، عدلیہ اور پولیس کے ارکان کے ساتھ تبادلۂ خیال کے علاوہ تیار کردہ ڈیجیٹل پلیٹ فارمز کے عملی مظاہرے بھی پیش کیے گئے۔

یہ امر قابلِ ذکر ہے کہ ای-سکشیا کے نفاذ پر 26 ریاستوں اور مرکز کے زیرِ انتظام علاقوں، ای-سمن پر 24 ریاستوں و مرکز کے زیرِ انتظام علاقوں، نیائے شروتی (ویڈیو کانفرنسنگ) پر 16 معزز ہائی کورٹس جن کا دائرہ 20 ریاستوں و مرکز کے زیرِ انتظام علاقوں تک پھیلا ہوا ہے، اور کمیونٹی سروس بطور سزا کے نفاذ پر 28 ریاستوں و مرکز کے زیرِ انتظام علاقوں کی جانب سے نوٹیفکیشنز جاری کیے گئے ہیں۔

نئے فوجداری قوانین کے تحت اب تک 15,30,790 پولیس افسران، 12,100 پراسیکیوشن افسران، 43,941 جیل افسران، 3,036 فارنزک سائنس دانوں اور 18,884 عدالتی افسران کی تربیت مکمل کی جا چکی ہے۔

اب تک بھارتیہ نیا سنہیتا (بی این ایس) کے تحت تقریباً 50 لاکھ ایف آئی آرز درج کی گئی ہیں؛ 33 لاکھ سے زیادہ چارج شیٹ یا حتمی رپورٹس داخل کی گئی ہیں؛ 22 لاکھ سکشیا شناختی کارڈز تیار کیے گئے ہیں، جبکہ 14 لاکھ سے زائد متاثرین نے ڈیجیٹل اطلاعات کے ذریعے خودکار کیس اپ ڈیٹس حاصل کیے ہیں۔ یکم جولائی 2024 سے اب تک 38 ہزار سے زیادہ زیرو ایف آئی آرز درج کی جا چکی ہیں۔

***

UR-998

(ش ح۔اس ک  )