کامرس اور صنعت کے مرکزی وزیر جناب پیوش گوئل نے نیوزی لینڈ کے اپنے سرکاری دورے کے دوسرے دن ہندوستان اور نیوزی لینڈ کے درمیان تجارت ، سرمایہ کاری ، رابطے اور ثقافتی تبادلوں میں دو طرفہ تعاون کو گہرا کرنے کے مقصد سے متعدد اعلی سطحی ملاقاتیں کیں ۔

اس سے پہلے دن میں روٹوروا جاتے ہوئے وزیر موصوف نے ایئر نیوزی لینڈ کے سی ای او جناب نکھل روی شنکر سے ملاقات کی ۔  بات چیت علاقائی اور عالمی رابطے کو بڑھانے میں ایئر لائن کے کردار پر مرکوز رہی ۔  جناب گوئل نے ہندوستان کے تیزی سے پھیلتے ہوابازی کے شعبے پر روشنی ڈالی اور فضائی خدمات اور سیاحت میں تعاون کو مستحکم کرنے کے لیے اس کے پیش کردہ اہم مواقع پر زور دیا۔

روٹوروا پہنچنے پر روٹوروا کی میئر محترمہ تانیا ٹیپسیل نے جناب گوئل کا استقبال کیا ۔  وزیر موصوف نے گرمجوشی سے استقبال کے لیے میئر کا شکریہ ادا کیا اور شہر کی منفرد قدرتی خوبصورتی اور بھرپور ثقافتی ورثے کی تعریف کرتے ہوئے اس اعتماد کا اظہار کیا کہ زیادہ سے زیادہ دو طرفہ  رابطے  سے تجارت اور سیاحت کے روابط کو فروغ دینے میں مدد ملے گی۔

ماوری ثقافت اور فنون کے قومی مرکز، ٹی پویا میں ، جناب گوئل کا نیوزی لینڈ کے وزیر تجارت جناب ٹوڈ میک کلے  کی موجودگی میں روایتی ماوری استقبال (پوویری) کیا گیا۔  یہ تقریب، جس میں روایتی منتر اور ہونگی سلامی شامل تھی ، دونوں ممالک کے درمیان گرمجوشی اور باہمی احترام کی عکاسی کرتی ہے۔  جناب گوئل نے ماوری برادری کو ان کی بھرپور ثقافتی روایات کے لیے سراہا اور ماوری اقدار اور ہندوستان کی اپنی تہذیبی اقدار کے درمیان ریزونینس  کا ذکرکیا ، خاص طور پر فطرت اور برادری کے لیے ان کے مشترکہ احترام میں۔

بعد میں، جناب گوئل اور جناب ٹوڈ میک کلے نے ہندوستان-نیوزی لینڈ سی ای اوز راؤنڈ ٹیبل کی مشترکہ صدارت کی ، جس میں دونوں ممالک کے سرکردہ کاروباری نمائندے اکٹھے ہوئے ۔  اجتماع سے خطاب کرتے ہوئے جناب گوئل نے ہندوستان کے تیزی سے بدلتے ہوئے اقتصادی منظر نامے پر روشنی ڈالی اور ٹیکنالوجی ، زراعت ، تعلیم ، صاف ستھری توانائی ، سیاحت اور پائیداری میں تعاون کے وسیع امکانات پر زور دیا ۔  انہوں نے ہندوستانی نژاد کاروباری رہنماؤں کی مضبوط شرکت کا خیرمقدم کیا اور نیوزی لینڈ کی صنعت کو باہمی ترقی کے لیے ہندوستان کے ساتھ گہری شراکت داری  کے امکانات تلاش کرنے کی ترغیب دی۔

جناب گوئل نے وزیر میک کلے کا ان کے آبائی شہر روٹوروا میں دی گئی شائستہ مہمان نوازی کے لیے شکریہ ادا کیا اور اس بات کی تصدیق کی کہ دونوں فریق ہندوستان اور نیوزی لینڈ کے تعلقات کو مزید دوستی ، خوشحالی اور مشترکہ ترقی کی طرف بڑھانے کے لیے پرعزم ہیں۔

 

******

ش ح۔ ف ا۔ م ر

U-NO. 866

(Release ID: 2187116) Visitor Counter : 9