ڈائریکٹوریٹ آف ریونیو انٹیلی جنس (ڈی آر آئی) نے اتوار کے روز ممبئی کے چھترپتی شیواجی مہاراج بین الاقوامی ہوائی اڈے (سی ایس ایم آئی اے) پر بینکاک سے آنے والے دو مسافروں سے 42.34 کلو گرام اعلیٰ درجے کی ہائیڈروپونک ویڈ ضبط کی ہے، جس کی قیمت غیر قانونی مارکیٹ میں تقریبا 42 کروڑ روپے ہے۔

خصوصی خفیہ اطلاع پر کارروائی کرتے ہوئے، ڈی آر آئی افسران نے دونوں مسافروں کو پہنچنے کے فورا بعد ہی روکا اور ان کے سامان کی تفصیلی جانچ کی۔ تلاشی کے نتیجے میں 21 کھانے کے پیکٹ برآمد ہوئے - جن میں نوڈلز اور بسکٹ شامل تھے - جن میں ہائیڈروپونک ویڈ موجود تھی جو عام کھانے کی پیکیجنگ میں چالاکی سے چھپائی گئی تھی۔ این ڈی پی ایس کٹ کا استعمال کرتے ہوئے فیلڈ ٹیسٹوں نے نشہ آور مادوں کی موجودگی کی تصدیق کی۔

42.34 کلوگرام وزنی ممنوعہ اشیا کو نارکوٹک ڈرگس اینڈ سائیکو ٹراپک سبسٹنس (این ڈی پی ایس) ایکٹ 1985 کی دفعات کے تحت ضبط کیا گیا اور دونوں مسافروں کو گرفتار کر لیا گیا ۔

جمعہ (31.10.2025) کو 47 کروڑ روپے مالیت کی 4.7 کلو گرام کوکین ضبط کرنے کے بعد ڈی آر آئی کی طرف سے صرف تین دنوں میں یہ دوسری بڑا منشیات کی برآمدگی ہے، جس میں کیریئرز، فنانسرز، ہینڈلرز اور ڈسٹری بیوٹرز سمیت پانچ افراد کو گرفتار کیا گیا ۔ ان کارروائیوں کے نتیجے میں گذشتہ تین دنوں میں 100 کروڑ روپے سے زیادہ مالیت کی منشیات برآمد ہوئی ہیں، جس سے بھارت کے مغربی گیٹ ویز کے ذریعے کام کرنے والے منظم منشیات کی اسمگلنگ کے نیٹ ورکس کو فیصلہ کن دھچکا پہنچا ہے۔

اس کے علاوہ آپریشن ویڈ آؤٹ کے تحت ڈی آر آئی نے بھارت کے مختلف ہوائی اڈوں پر 292.9 کلو گرام ہائیڈروپونک ویڈ ضبط کی ہے۔

ڈی آر آئی اسمگلنگ کے ابھرتے ہوئے رجحانات، خاص طور پر منشیات کو چھپانے کے لیے کھانے کے پیکٹوں اور استعمال کی اشیاء کے بڑھتے ہوئے استعمال اور بھارتی شہریوں کو کیریئر کے طور پر استعمال کرنے کے خلاف چوکس ہے۔

ڈی آر آئی منشیات کو مسلسل روک کر، بین الاقوامی اسمگلنگ کے نیٹ ورکس کو ختم کرکے، اور شہریوں کی صحت، بہبود اور سلامتی کی حفاظت کے ذریعے نشہ سے پاک بھارت کی تعمیر کے اپنے عزم پر قائم ہے۔

***

(ش ح – ع ا)

U. No. 787