مرکزی وزیر داخلہ اور امداد باہمی کے وزیر جناب امت شاہ نے سال 2025-26 کے لیے ناگالینڈ کو ایس ڈی آر ایف کے مرکزی حصے کی دوسری قسط کے طور پر 20 کروڑ کی پیشگی رقم جاری کرنے کی منظوری دی ہے ، تاکہ ریاست کو اس سال کے جنوب مغربی مانسون کے دوران انتہائی تیز بارش اور اچانک آنے والے سیلاب ، مٹی کے تودے کھسکنے  کے واقعات  سے متاثرہ لوگوں کو فوری امداد فراہم کرنے میں مدد ملے ۔
وزیر اعظم جناب نریندر مودی کی قیادت اور مرکزی وزیر داخلہ اور امداد باہمی کے وزیر جناب امت شاہ کی رہنمائی میں حکومت ہند قدرتی آفات  و حالات کے وقت ریاستی حکومتوں کے ساتھ کندھے سے کندھا ملا کر کھڑی ہے اور انہیں تمام ضروری مدد فراہم کر رہی ہے ۔
مالی سال 2025-26 کے دوران ، مرکزی حکومت پہلے ہی ایس ڈی آر ایف کے تحت 27 ریاستوں کو15,554 کروڑ اور این ڈی آر ایف کے تحت 15 ریاستوں کو2,267.44 کروڑروپے  جاری کر چکی ہے ۔ اس کے علاوہ ،اسٹیٹ ڈیزاسٹر میٹیگیشن فنڈ (ایس ڈی ایم ایف) سے 21 ریاستوں کو 4,571.30 کروڑ روپے جاری کیے گئے ہیں ۔ نیشنل ڈیزاسٹر میٹیگیشن فنڈ (این ڈی ایم ایف) سے 9 ریاستوں کو 372.09 کروڑ روپے کی رقم فراہم کی گئی  ہے۔
مرکزی حکومت نے تمام لاجسٹک امداد بھی فراہم کی ہے ، جس میں تمام سیلاب ، مٹی کے تودے کھسکنے کے واقعات ، بادل پھٹنے سے متاثرہ ریاستوں میں این ڈی آر ایف کی مطلوبہ ٹیموں ، فوج کی ٹیموں اور فضائیہ کی مدد شامل ہے ۔اس سال کے مانسون کے دوران ، بچاؤ اور امدادی کارروائیوں کے لیے 30 ریاستوں/مرکز کے زیر انتظام علاقوں میں این ڈی آر ایف کی 199 ٹیموں کی زیادہ سے زیادہ تعیناتی کی گئی تھی ۔

**********

U.No. 395

(ش ح۔  ا م ۔ر ب)