પ્રધાનમંત્રી શ્રી નરેન્દ્ર મોદીની અધ્યક્ષતામાં કેન્દ્રીય મંત્રીમંડળે આજે રવિ સીઝન 2025-26 (01.10.2025થી 31.03.2026 સુધી) માટે ફોસ્ફેટિક અને પોટાશ (P&K) ખાતરો પર પોષક તત્વો આધારિત સબસિડી (NBS) દર નક્કી કરવા માટે ખાતર વિભાગના પ્રસ્તાવને મંજૂરી આપી. રવિ 2025-26 માટે અંદાજિત બજેટની જરૂરિયાત આશરે રૂ. 37,952.29 કરોડ હશે. આ ખરીફ સિઝન 2025 માટે બજેટની જરૂરિયાત કરતાં અંદાજે રૂ. 736 કરોડ વધુ છે.

ડી એમોનિયમ ફોસ્ફેટ (DAP) અને NPKS (નાઇટ્રોજન, ફોસ્ફરસ, પોટાશ, સલ્ફર) ગ્રેડ સહિત P&K ખાતરો પર સબસિડી રવિ 2025-26 (01.10.2025 થી 31.03.2026 સુધી લાગુ) માટે મંજૂર દરોના આધારે પૂરી પાડવામાં આવશે જેથી ખેડૂતોને પોષણક્ષમ ભાવે આ ખાતરોની સરળ ઉપલબ્ધતા સુનિશ્ચિત કરી શકાય.

લાભો:

ખેડૂતોને સબસિડીવાળા, પોષણક્ષમ અને વાજબી ભાવે ખાતરોની ઉપલબ્ધતા સુનિશ્ચિત કરવામાં આવશે.

ખાતરો અને ઇનપુટ્સના આંતરરાષ્ટ્રીય ભાવમાં તાજેતરના વલણોને ધ્યાનમાં રાખીને P&K ખાતરો પર સબસિડીનું તર્કસંગતીકરણ.

પૃષ્ઠભૂમિ:

સરકાર ખાતર ઉત્પાદકો/આયાતકારો દ્વારા ખેડૂતોને સબસિડીવાળા ભાવે DAP સહિત 28 ગ્રેડના P&K ખાતરો ઉપલબ્ધ કરાવી રહી છે. પી એન્ડ કે ખાતરો પર સબસિડી 01.04.2010 થી NBS યોજના દ્વારા સંચાલિત થાય છે. ખેડૂત મૈત્રીપૂર્ણ અભિગમ અનુસાર, સરકાર ખેડૂતોને પોષણક્ષમ ભાવે પી એન્ડ કે ખાતરો ઉપલબ્ધ કરાવવા માટે પ્રતિબદ્ધ છે. યુરિયા, DAP, MOP અને સલ્ફર જેવા ખાતરો અને ઇનપુટ્સના આંતરરાષ્ટ્રીય ભાવમાં તાજેતરના વલણોને ધ્યાનમાં રાખીને, સરકારે રવિ 2025-26 માટે NBS દરોને મંજૂરી આપવાનો નિર્ણય લીધો છે જે 1.10.2025 થી 31.03.2026 સુધી DAP અને NPKS ગ્રેડ સહિત ફોસ્ફેટિક અને પોટાશિક (પી એન્ડ કે) ખાતરો પર લાગુ થશે. ખાતર કંપનીઓને મંજૂર અને સૂચિત દરો અનુસાર સબસિડી આપવામાં આવશે જેથી ખેડૂતોને પોષણક્ષમ ભાવે ખાતરો ઉપલબ્ધ થાય.

SM/IJ/GP/JD