மத்திய அறிவியல், தொழில்நுட்பம் மற்றும் புவி அறிவியல் துறை இணையமைச்சர் (தனிப்பொறுப்பு) டாக்டர் ஜிதேந்திர சிங், அமைச்சகங்களின் மூத்த அதிகாரிகளுடன், குடியரசு துணைத் தலைவர் திரு சி பி ராதாகிருஷ்ணனை இன்று நாடாளுமன்ற வளாகத்தில்  சந்தித்தார்.

இந்த சந்திப்பின்போது, ​​அறிவியல் ஆராய்ச்சி மற்றும் புத்தாக்கத்தை மேம்படுத்துதல், தொழில்நுட்ப மேம்பாடு மற்றும் வணிகமயமாக்கல், உயிரி தொழில்நுட்பம், குவாண்டம் கம்ப்யூட்டிங் மற்றும் சைபர் பாதுகாப்பு அமைப்புமுறைகளில் முன்னேற்றங்கள், வானிலை சேவைகள், காலநிலை மற்றும் பெருங்கடல் ஆய்வுகள் மற்றும் பேரிடர் அபாயத்தைக் குறைத்தல் ஆகியவற்றை நோக்கமாகக் கொண்ட அமைச்சகங்களின் முக்கிய முயற்சிகள் மற்றும் தற்போதைய திட்டங்கள் குறித்து குடியரசு துணைத் தலைவருக்கு விளக்கமளிக்கப்பட்டது.

இந்தியாவின் புதுமை சார்ந்த அறிவியல் சூழலியலை வலுப்படுத்துவதிலும், எல்லைப்புற தொழில்நுட்பங்களில் ஆராய்ச்சியை முன்னேற்றுவதிலும் அமைச்சகங்கள் ஆற்றிய பங்கிற்காக குடியரசு துணைத் தலைவர் திரு சி பி ராதாகிருஷ்ணன் அவர்களைப் பாராட்டினார். காப்புரிமைகள், அறிவியல் வெளியீடுகள் மற்றும் தொழில்நுட்பம் சார்ந்த வளர்ச்சியில் ஏற்பட்டுள்ள எழுச்சியைக் குறிப்பிட்டு, 2015 ஆம் ஆண்டில் 81 வது இடத்திலிருந்து 2025 ஆம் ஆண்டு உலகளாவிய கண்டுபிடிப்பு குறியீட்டில் 38 வது இடத்திற்கு இந்தியா உயர்ந்துள்ளதை அவர் பாராட்டினார்.

தடுப்பூசி மேம்பாட்டில் நாட்டின் முன்னேற்றங்கள், பாரத்ஜென் ஏஐ மொழி மாதிரி மற்றும் குவாண்டம் கம்ப்யூட்டிங்கில் ஏற்பட்டுள்ள முன்னேற்றம் ஆகியவற்றை அவர் பாராட்டினார். நெறிமுறை சார்ந்த உயிரி தொழில்நுட்ப ஆராய்ச்சியின் முக்கியத்துவத்தையும், இளைஞர்களை அறிவியல் தொழில்களைத் தொடர ஊக்குவிப்பதையும்,

தொழில்துறையுடன் மேம்பட்ட ஒத்துழைப்பையும் அவர் வலியுறுத்தினார். வானிலை முன்னறிவிப்பில் விரைவான முன்னேற்றங்கள் மற்றும் இந்தியாவின் கடல்சார் பொருளாதாரத்தின் பரந்த ஆற்றலை எடுத்துரைத்த அவர், அறிவியல் முன்னேற்றத்தில் இந்தியா முன்னணியில் இருப்பதை உறுதிசெய்ய உலகளாவிய கூட்டாண்மைகளைத் தொடர அழைப்பு விடுத்தார்.

(Release ID: 2181904)

***

SS/BR/SH