صدرِجمہوریہ محترمہ دروپدی مورمو نے آج  (23 اکتوبر 2025) کیرالہ کے پلائی میں سینٹ تھامس کالج کی پلاٹینم جوبلی تقریبات کے اختتامی اجلاس کی صدارت کی۔

تقریب سے خطاب کرتے ہوئے، صدر نے کہا کہ تعلیم ترقی اور نشونما کے مواقع تلاش کرنے کی کلید ہے۔ انہوں نے کہا کہ سینٹ تھامس کالج کا قیام خاص طور پر دیہی علاقوں کے طلباء کو تعلیم فراہم کرنے کے مقصد سے کیا گیا تھا۔ انہوں نے خوشی کا اظہارکیا کہ کالج پچھلے 75  سال سے اس قابلِ تحسین مقصد کو پورا کر رہا ہے۔

صدر جمہوریہ نے کہا کہ سینٹ تھامس کالج جیسے تعلیمی ادارے ورکشاپس ہیں جہاں تقدیریں تشکیل پاتی ہیں۔ انہوں نے اس بات پر خوشی کا اظہار کیا کہ کالج جامع تعلیم اور سماجی انصاف پر زور دیتا ہے، اور پائیداری اور شمولیت کی اقدار کو فروغ دیتا ہے۔ انہوں نے یہ بھی کہا کہ کالج اخلاقی رہنمائی کے ساتھ علمی سرگرمیوں کو فروغ دے رہا ہے۔

صدرجمہوریہ نے کہا کہ 21 ویں صدی کو ’علم کی صدی‘ کہا جاتا ہے۔ وہ علم جو جدت کو فروغ دیتا ہے، معاشرے کو آگے لے جاتا ہے اور خود کفیل بناتا ہے۔ خواندگی، تعلیم اور علم کی طاقت نے کیرالہ کو انسانی ترقی کے متعدد پیمانوں پر سرکردہ ریاستوں میں شامل کیا ہے۔

کوٹیم کے بارے میں بات کرتے ہوئے، صدر نے کہا کہ اس شہر نے سماجی اور تعلیمی تبدیلیوں کے شاندار باب دیکھے ہیں۔ چھوٹی ذات کے خاتمے کی عظیم تحریک، جو ‘وائیکم ستیہ گرہ’ کے نام سے مشہور ہے، سو سال پہلے کوٹیم میں ہوئی تھی۔ اسے ‘اکشرا نگر’ کے طور پر جانا جاتا ہے کیونکہ یہ خواندگی اور تعلیم کا سرچشمہ رہا ہے۔ ‘سکشرا کیرالم’ تحریک کو مضبوط بنانے میں اس علاقے کے لوگوں نے بہت فعال کردار ادا کیا۔ جناب پی این  پَنِکَر کی لائبریری تحریک کے ذریعے تعلیم کو فروغ دینے کی عظیم کوشش ایک نہایت سادہ مگر طاقتور پیغام ‘وائچو ولا روگا’ یعنی ‘پڑھو اور بڑھو’ سے متاثر تھی۔

صدر جمہوریہ نے اس بات پر زور دیا کہ تعلیم کی روشنی فرد اور اجتماعی ترقی کے راستے کو روشن کرتی ہے۔ انہوں نے سینٹ تھامس کالج کی تعلیم کی روشنی پھیلانے کی کوششوں کی تعریف کی۔ انہوں نے یقین ظاہر کیا کہ سینٹ تھامس کالج معیاری تعلیم کو فروغ دیتا رہے گا اور اس طرح  2047  تک ایک زیادہ منصفانہ معاشرہ اور وکست بھارت کے قیام میں اپنا حصہ ڈالے گا۔

براہ کرم صدر جمہوریہ کے خطاب کو دیکھنے کے لیے یہاں کلک کریں۔

Please click here to see the President's Speech-

*********

ش ح ۔  ا س  ۔ م ا

Urdu No-214