ಕೇಂದ್ರ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವಾಲಯದ ಅಡಿಯಲ್ಲಿ ಬರುವ ಭಾರತ ಸರ್ಕಾರದ ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆಯು, ತರಕಾರಿ ಎಣ್ಣೆ ಉತ್ಪನ್ನಗಳು, ಉತ್ಪಾದನೆ ಮತ್ತು ಲಭ್ಯತೆ (ನಿಯಂತ್ರಣ) ಆದೇಶ, 2011 (ವೊಪ್ಪ ಆದೇಶ) ಗೆ ಪ್ರಮುಖ ತಿದ್ದುಪಡಿಯನ್ನು ತಿಳಿಸಿದೆ. ಈ ಮೂಲಕ ತಿದ್ದುಪಡಿ ಮಾಡಲಾದ ವೊಪ್ಪ ಆದೇಶ, 2025 ಭಾರತದಲ್ಲಿ ಖಾದ್ಯ ತೈಲ ವಲಯದಾದ್ಯಂತ ಹೆಚ್ಚಿನ ನಿಯಂತ್ರಕ ಮೇಲ್ವಿಚಾರಣೆ ಮತ್ತು ಪಾರದರ್ಶಕತೆಯನ್ನು ತರುವ ಗುರಿಯನ್ನು ಹೊಂದಿದೆ.

ತಿದ್ದುಪಡಿ ಮಾಡಿದ ನೂತನ ಆದೇಶದ ಅಡಿಯಲ್ಲಿ, ಖಾದ್ಯ ತೈಲ ತಯಾರಕರು, ಸಂಸ್ಕಾರಕಗಳು, ಮಿಶ್ರಣಕಾರರು, ಮರು-ಪ್ಯಾಕರ್‌ ಗಳು ಮತ್ತು ಖಾದ್ಯ ತೈಲ ಪೂರೈಕೆ ಸರಪಳಿಯಲ್ಲಿ ತೊಡಗಿರುವ ಇತರ ಪಾಲುದಾರರು ವೊಪ್ಪ ಆದೇಶದ ಅಡಿಯಲ್ಲಿ ನೋಂದಾಯಿಸಿಕೊಳ್ಳುವುದು ಮತ್ತು ಗೊತ್ತುಪಡಿಸಿದ ಆನ್‌ ಲೈನ್ ಪೋರ್ಟಲ್ ಮೂಲಕ ಮಾಸಿಕ ಉತ್ಪಾದನೆ ಮತ್ತು ಸ್ಟಾಕ್ ರಿಟರ್ನ್‌ ಗಳನ್ನು ಸಲ್ಲಿಸುವುದು ಈಗ ಕಡ್ಡಾಯವಾಗಿದೆ.

ಖಾದ್ಯ ತೈಲ ವಲಯದಲ್ಲಿ ನಿಖರವಾದ ದತ್ತಾಂಶ ಸಂಗ್ರಹಣೆ, ನೈಜ-ಸಮಯದ ಮೇಲ್ವಿಚಾರಣೆ ಮತ್ತು ಸುಧಾರಿತ ನೀತಿ ಹಸ್ತಕ್ಷೇಪವನ್ನು ಖಚಿತಪಡಿಸಿಕೊಳ್ಳುವಲ್ಲಿ ಈ ನಿಯಂತ್ರಕ ವರ್ಧನೆಯು ನಿರ್ಣಾಯಕ ಹೆಜ್ಜೆಯಾಗಿದೆ - ಇದು ರಾಷ್ಟ್ರೀಯ ಆಹಾರ ಭದ್ರತೆ ಮತ್ತು ಪೂರೈಕೆ ಸರಪಳಿ ಸ್ಥಿತಿಸ್ಥಾಪಕತ್ವದ ಕಡೆಗೆ ಭಾರತ ಸರ್ಕಾರದ ಪ್ರಯತ್ನಗಳನ್ನು ಮುನ್ನಡೆಸುವಲ್ಲಿ ಪ್ರಮುಖ ಅಂಶವಾಗಿದೆ.

ಖಾದ್ಯ ತೈಲ ಉದ್ಯಮದಿಂದ ಪ್ರತಿಕ್ರಿಯೆ ಉತ್ತೇಜನಕಾರಿಯಾಗಿದೆ. ದೇಶಾದ್ಯಂತ ಗಮನಾರ್ಹ ಸಂಖ್ಯೆಯ ಖಾದ್ಯ ತೈಲ ಘಟಕಗಳು ಈಗಾಗಲೇ ರಾಷ್ಟ್ರೀಯ ಏಕ ಗವಾಕ್ಷಿ ವ್ಯವಸ್ಥೆಯ ಪೋರ್ಟಲ್‌ ನಲ್ಲಿ ನೋಂದಾಯಿಸಿಕೊಂಡಿವೆ ಮತ್ತು ನಿಯಮಿತವಾಗಿ ತಮ್ಮ ಮಾಸಿಕ ಆದಾಯ, ರಿಟರ್ನ್ಸ್ ವಿವರವನ್ನು https://www.edibleoilindia.in ಪೋರ್ಟಲ್ ನಲ್ಲಿ ಸಲ್ಲಿಸುತ್ತಿವೆ.

ಇದು ಪಾರದರ್ಶಕತೆ ಮತ್ತು ಅನುಸರಣೆಯ ಕಡೆಗೆ ಉದ್ಯಮದ ಪಾಲುದಾರರಿಂದ ಉತ್ತಮ ಹಾಗೂ ಬಲವಾದ ಬದ್ಧತೆಯನ್ನು ಪ್ರದರ್ಶಿಸುತ್ತದೆ. ಖಾದ್ಯ ತೈಲಗಳ ಉತ್ಪಾದನೆ, ಸಂಸ್ಕರಣೆ, ಮಿಶ್ರಣ ಅಥವಾ ಮರು-ಪ್ಯಾಕಿಂಗ್‌ ನಲ್ಲಿ ತೊಡಗಿರುವ ಎಲ್ಲಾ ಘಟಕಗಳು ತಿದ್ದುಪಡಿ ಮಾಡಿದ ವೊಪ್ಪ ಆದೇಶದ ಅಡಿಯಲ್ಲಿ ಈ ಕೆಳಗಿನವುಗಳನ್ನು ಪಾಲಿಸಬೇಕಾಗುತ್ತದೆ: ಎಲ್ಲಾ ಖಾದ್ಯ ತೈಲ-ಸಂಬಂಧಿತ ಘಟಕಗಳು https://www.nsws.gov.in ನಲ್ಲಿ ರಾಷ್ಟ್ರೀಯ ಏಕ ಗವಾಕ್ಷಿ ವ್ಯವಸ್ಥೆಯ ಮೂಲಕ ನೋಂದಾಯಿಸಿಕೊಳ್ಳಬೇಕು.  ನಂತರ, ಘಟಕಗಳು ತಮ್ಮ ಮಾಸಿಕ ಉತ್ಪಾದನೆ, ದಾಸ್ತಾನು ಮತ್ತು ಲಭ್ಯತೆಯ ರಿಟರ್ನ್‌ ವಿವರಗಳನ್ನು https://www.edibleoilindia.in ಮೂಲಕ ತುಂಬಿ ಸಲ್ಲಿಸಬೇಕು.

ತಿದ್ದುಪಡಿ ಮಾಡಿದ ವೊಪ್ಪ ಆದೇಶ, 2025 ಅನ್ನು ಪಾಲಿಸದಿರುವುದನ್ನು ಉಲ್ಲಂಘನೆ ಎಂದು ಪರಿಗಣಿಸಲಾಗುತ್ತದೆ ಮತ್ತು ತಮ್ಮ ರಿಟರ್ನ್‌ ಗಳ ವಿವರಗಳನ್ನು ನಮೂದಿಸಲು, ನೋಂದಾಯಿಸಲು ಅಥವಾ ಸಲ್ಲಿಸಲು ವಿಫಲವಾದ ಘಟಕಗಳು ತಿದ್ದುಪಡಿ ಮಾಡಿದ ವೊಪ್ಪ ಆದೇಶ ಮತ್ತು ಅಂಕಿಅಂಶಗಳ ಸಂಗ್ರಹ ಕಾಯ್ದೆ, 2008ರ ನಿಬಂಧನೆಗಳ ಅಡಿಯಲ್ಲಿ ದಂಡದ ಕ್ರಮವನ್ನು ಎದುರಿಸಬೇಕಾಗುತ್ತದೆ.

ಪರಿಣಾಮಕಾರಿ ಜಾರಿಯನ್ನು ಖಚಿತಪಡಿಸಿಕೊಳ್ಳಲು, ಇಲಾಖೆಯು ಅನುಸರಣೆ ಮಾಡದ ಘಟಕಗಳ ವಿಶೇಷ ತಪಾಸಣಾ ಕಾರ್ಯಾಚರಣೆಗಳು ಮತ್ತು ಕ್ಷೇತ್ರ ಪರಿಶೀಲನೆಯನ್ನು ಪ್ರಾರಂಭಿಸಲು ಯೋಜಿಸುತ್ತಿದೆ. ಈ ಪರಿಶೀಲನೆಗಳು ಅನುಸರಣೆಯ ಗಂಭೀರತೆಯನ್ನು ಬಲಪಡಿಸಲು ಮತ್ತು ಖಾದ್ಯ ತೈಲ ವಲಯಕ್ಕೆ ರಾಷ್ಟ್ರೀಯ ದತ್ತಾಂಶ ಪರಿಸರ ವ್ಯವಸ್ಥೆಯ ಸಮಗ್ರತೆಯನ್ನು ಕಾಪಾಡಿಕೊಳ್ಳಲು ಉದ್ದೇಶಿಸಲಾಗಿದೆ.

ತಿದ್ದುಪಡಿ ಮಾಡಿದ ಆದೇಶದ ಅನುಸರಣೆ ಕೇವಲ ನಿಯಂತ್ರಕ ಅವಶ್ಯಕತೆಯಲ್ಲ - ಇದು ಭಾರತದ ಆಹಾರ ಭದ್ರತಾ ಮೂಲಸೌಕರ್ಯಕ್ಕೆ ನಿರ್ಣಾಯಕ ಕೊಡುಗೆಯಾಗಿದೆ. ಈ ಉಪಕ್ರಮವು ಉತ್ತಮ ಯೋಜನೆ, ಮಾಹಿತಿಯುಕ್ತ ನಿರ್ಧಾರ ತೆಗೆದುಕೊಳ್ಳುವಿಕೆಯನ್ನು ಬೆಂಬಲಿಸುತ್ತದೆ ಮತ್ತು ಹೆಚ್ಚು ಪರಿಣಾಮಕಾರಿ ಮತ್ತು ಪಾರದರ್ಶಕ ಖಾದ್ಯ ತೈಲ ಪರಿಸರ ವ್ಯವಸ್ಥೆಯನ್ನು ಬೆಳೆಸುತ್ತದೆ. ಇಲಾಖೆಯು ಎಲ್ಲಾ ಪಾಲುದಾರರನ್ನು ಸಾಧ್ಯವಾದಷ್ಟು ಬೇಗ ಪೂರ್ಣ ಅನುಸರಣೆಯನ್ನು ಖಚಿತಪಡಿಸಿಕೊಳ್ಳಲು ಮತ್ತು ದೇಶದಲ್ಲಿ ದೃಢವಾದ ಮತ್ತು ವಿಶ್ವಾಸಾರ್ಹ ದತ್ತಾಂಶ-ಚಾಲಿತ ಖಾದ್ಯ ತೈಲ ವಲಯವನ್ನು ನಿರ್ಮಿಸುವಲ್ಲಿ ಪಾಲುದಾರರನ್ನಾಗಿ ಮಾಡಲು ಒತ್ತಾಯಿಸುತ್ತದೆ.

ಉಪಯುಕ್ತ ಲಿಂಕ್ ಗಳು:

ನೋಂದಣಿ ಪಡೆಯಲು: https://www.nsws.gov.in

ಮಾಸಿಕ ರಿಟರ್ನ್ಸ್ ವಿವರ ಸಲ್ಲಿಸಲು: https://www.edibleoilindia.

*****