محکمہ ریونیو انٹیلی جنس (ڈی آر آئی) نے اپنی جاری کارروائی "آپریشن فائر ٹریل" کے تحت ایک بڑی کامیابی حاصل کرتے ہوئے چین میں تیار کردہ آتش‌بازی اور پٹاخوں کی غیر قانونی درآمد کی ایک منظم اسمگلنگ کی کوشش کو ناکام بنا دیا ہے۔

اس کارروائی کے دوران، ڈی آر آئی کے افسران نے نہاوا شیوا بندرگاہ پر ایک 40 فٹ لمبا کنٹینر روکا، جو چین سے آیا تھا اور آئی سی ڈی انکلیشور کے لیے روانہ کیا گیا تھا۔ دستاویزات میں اس سامان کو "لیگنگز" کے طور پر ظاہر کیا گیا تھا۔ تاہم تفصیلی جانچ کے دوران کنٹینر کے اگلے حصے میں کپڑوں کی ایک سطح کے پیچھے چھپائے گئے 46,640 عدد آتش‌بازی اور پٹاخوں کے ٹکڑے برآمد ہوئے۔ ضبط کی گئی اس کھیپ کی کل مالیت تقریباً 4.82 کروڑ روپے بتائی گئی ہے۔

بعد ازاں کی گئی تلاشی کے دوران اسمگلنگ میں ملوث گروہ کے طریقۂ واردات سے متعلق قابلِ ثبوت دستاویزات برآمد ہوئیں، جن کی بنیاد پر گجرات کے ویراول سے ایک اہم شخص کو گرفتار کیا گیا۔

آتش‌بازی کی درآمد کو غیر ملکی تجارتی پالیسی کے آئی ٹی سی (ایچ ایس) درجہ بندی کے تحت "محدود" قرار دیا گیا ہے، اور اس کے لیے غیر ملکی تجارت کے ڈائریکٹوریٹ جنرل (ڈی جی ایف ٹی) اور پٹرولیم اور دھماکہ خیز مادّوں سے حفاظت سے متعلق آرگنائزیشن (پی ای ایس او) سے دھماکہ خیز مواد کے قوانین 2008 کے تحت باضابطہ لائسنس حاصل کرنا لازمی ہے۔

ایسے خطرناک سامان کی غیر قانونی درآمد عوامی تحفظ، قومی سلامتی، بندرگاہوں کے اہم بنیادی ڈھانچے، اور وسیع تجارتی و لاجسٹک نظام کے لیے شدید خطرہ ثابت ہو سکتی ہے۔ ڈی آر آئی اپنے اس مشن پر ثابت قدم ہے کہ وہ عوام کو خطرناک اسمگل شدہ اشیاء سے محفوظ رکھے اور ایسے منظم اسمگلنگ نیٹ ورکس کو بے نقاب اور تباہ کر کے ملک کے تجارتی و سلامتی کے نظام کی سالمیت کو برقرار رکھے۔

***********

ش ح ۔   م  د ۔  م  ص

(U : 94)