ঙসি প্রধান মন্ত্রী শ্রী নরেন্দ্র মোদীনা ভিদিও মেসেজ অমগী খুৎথাংদা গায়ত্রী পরিবারনা শীনবা অশ্বমেধ যজ্ঞদা ৱা ঙাংখ্রে। থৌরম অদুদা প্রধান মন্ত্রীনা হায়খি লান্না শন্দোক্কবা লৈবনা মীখল পাংথোক্কদবা মতম লাকপদা অশ্বমেধ যজ্ঞ অমা শরুক য়াবদা মহাক্না লাংতক্নবা অমা লৈরি। অশ্বমেধ যজ্ঞনা অচার্য়া শ্রী রাম শর্মাগী ৱাখল্লোনশিং য়োকখৎকনি অমসুং মসিনা অনৌবা ৱাহন্থোক পীগনি।

প্রধান মন্ত্রীনা হায়খি গায়ত্রী পরিবারনা শীনবা অশ্বমেধ যজ্ঞ অচৌবা খুন্নাইগী খোঙজং অমা ওইরে। নহারোলশিং নিষাদা লাইচুবদগী কন্নবা অমসুং লৈবাক শেমগৎপগী থবকশিংদা শরুক য়ানবা অশ্বমেধ যজ্ঞনা নহারোল লাখ কয়া লমজিংলি। নহারোলশিং ঐখোয়গী লৈবাক্কী তুংগী য়ুম্বীনি। ভারতকী মরাইবক লেপ্পা অমসুং লৈবাক অসি চাউখৎহন্নবা নহারোলশিংগী মরুওইবা থৌদাং লৈরি। অনৌবা থবক অসিগীদমক গায়ত্রী বরিবার থাগৎপা ফোঙদোকচরি। অচার্য়া শ্রী রাম শর্মা অমসুং মাতা ভাগৱাতিগী পাউতাকশিংগী খুৎথাংদা লনাই মীওই কয়া ইথিল পীবা মখোয়গী থবকশিংগীদমক থাগৎচরি। মহাক্না গায়ত্রী পরিবারগী মেম্বর কয়াদা মরী লৈনদুনা লাক্লি।

প্রধান মন্ত্রীনা হায়খি লৈবাক অসিগী নহারোলশিং লাইচুবদগী কনবা অমসুং মাঙজৌননা লাইচুখ্রবশিংদা মতেং পাংবা হায়বসি য়াম্না মরুওই। নিশাদা লাইচুবনা লনাই মীওইশিং অমসুং খুন্নাইশিং মাঙহল্লি। মীওই করোর ১১ হেন্না শরুক য়াদুনা চহি ৩-৪ গী মমাঙদা দ্রগ শীজিন্নদবা ভারত অমা ওইহন্নবা লৈবাক শীনবা থুংনা সরকারনা থবক পায়খৎখ্রে। মীয়াম ৱাখল তাহন্নবা বাইক রেল্লিশিং, ৱাশক লৌবগী থৌরমশিং অমসুং লম্বী মতাইগী লিলা কয়া খুন্নাই অমসুং মীয়ামগী লুপশিংগা খুৎশম্নদুনা পাংথোকখ্রে। মহাক্কী মন কি বাত থৌরমদসু মাঙজৌননা নিশাদা লাইচুবদগী ঙাকথোকপগী মরুওইবগী মতাংদা ফোঙদোকখ্রে।

প্রধান মন্ত্রীনা হায়খি ঐখোয়গী নহারোলশিং লৈবাক্কী অমসুং মালেমগী অচৌবা থবকশিং পুনশিনবনা নহারোলশিংনা অপীকপা খুদোংচাদবশিং কোকহনগনি। বিকসিত ভারত অমসুং অত্মনির্ভর ভারতগী পান্দমশিং ফংনবা হোৎনবদা নহারোলশিংগী মরুওইবা থৌদাং লৈরি। ঐখোয়না মালেমদা শরুক য়ারিবা মীওইবগী গুনশিং অমসুং অপাম্বশিং অদু ভারতনা লুচিংখিবা জি-২০ মীফমগী থিম ‘মালেম অমা, ইমুং অমা, তুংলমচৎ’ অমনা হেন্না মশক থোকহনখি। ‘হকশেল অমা, মালেম অমা, গ্রিদ অমা’ অমসুং ‘মালেম অমা, হকশেল অমা’ হায়রিবা মালেমগী থবকশিং অসিনা অপুনবগী থবকশিংগী মরুওইবা অদু মশক তাক্লি। অসিগুম্বা লৈবাক্কী অমসুং মালেমগী খোঙজংশিংদা, ঐখোয়গী নহারোলশিং মশিং হেন্না শরুক য়ারিবমখৈ, মখোয় মশিং হেন্না অরানবা লম্বীদগী লাপ্না লৈগনি। 

প্রধান মন্ত্রীনা হায়খি শান্নবা অমসুং সাইন্সতা সরকারনা মীৎয়েং চঙলি। চন্দ্রয়ান মাইপাকপা অসিনা নহারোলশিংগী মরক্ত তেক্নোলোজিগী অনৌবা থৱায় য়াওবা লৈহল্লে। অসিগুম্বা থবকশিংনা অফবা ইথিল পীবদগী নহারোলশিংগী থৌনা অচুম্বা মাইকৈদা পুরক্লে। ফিত ইন্দিয়া মুভমেন্ত অমসুং খেলো ইন্দিয়াগুম্বা থবকশিংনা নহারোলশিং পুক্নিং থৌগৎকনি অমসুং পুক্নিং থৌগৎপা নহারোল অমতা নিশা শীজিন্নরোই।

প্রধান মন্ত্রীনা হায়খি মেরা যুব ভারত (মাই ভারত) কৌবা অনৌবা লুপ অমা শেম্লে অমসুং মসিদা নহারোল করোর ১.৫ হেন্না মিংচল্লে অমসুং লৈবাক শেমগৎনবগীদমক নহারোলশিংগী থৌনা অচুম্বা মওংদা শীজিন্ননবা পোর্তেলনা ইথিল অমা পীরে।

প্রধান মন্ত্রীনা হায়খি পোৎলম কয়া লান্না শীজিন্নবদগী অচৌবা অমাঙবশিং থোকহল্লে অমসুং মখোঙদগী হৌনা পোৎলমশিং লান্না শীজিন্নবা থিংনবা সরকারনা অকনবা থবকশিং পায়খৎলে। পোৎলমশিং লান্না শীজিন্নবা মপুংফানা থিংনবা ইমুং-মনুংগী অকনবা মতেং য়াম্না দরকার ওই। মরম অদুনা, পোৎলম কয়া লান্না শীজিন্নদবা ভারত অমা ওইহন্নবা, ইন্সতিতুসনশিংগুম্না ইমুংশিং মপাঙ্গল কনখৎহনবা মরুওই।

প্রধান মন্ত্রীনা হায়খি রাম মন্দির শঙ্গাবা থৌরম মনুংদা, ঐনা হায়খি মদুদি মসি ভারতকী চহি লিশিং কয়াগী অনৌবা খোঙচৎ অমগী অহৌবা অমনি। হেন্না ফবা মাইকৈ অমদা লৈবাক অসি চঙশিনগনি হায়বগী থাজবা লৈরি। অমৃত কাল অসিদা, অনৌবা যুগ অমা লাকপা ঐখোয়না উরে। লনাই মীওইশিং চাউখৎতুনা অমসুং লৈবাক চাউখৎতুনা মালেমগী লুচিংবা অমা ওইরক্নবা মাইকৈদা ভারতনা চঙশিনগনি হায়বগী থাজবা থম্লি।

***