تعارف

دالیں محض ایک زرعی جنس نہیں بلکہ بھارت کی غذائی سلامتی، مٹی کی زرخیزی اور دیہی روزگار کی بنیاد ہیں۔ دنیا میں دالوں کی سب سے بڑی پیداوار، کھپت اور درآمد کرنے والے ملک کے طور پر، بھارت نے ہمیشہ اس اہم شعبے میں پیداواریت اور پائیداری کو بڑھانے پر توجہ مرکوز کی ہے۔ آمدنی میں اضافے اور متوازن غذا سے متعلق بڑھتی ہوئی آگاہی کے ساتھ دالوں کی مانگ میں مسلسل اضافہ ہو رہا ہے، جس سے گھریلو پیداوار میں اضافہ کرنے کے مواقع پیدا ہوئے ہیں۔

اقتصادی اور تجارتی اہمیت سے بالاتر، دالیں غذائیت کے خزانے کی حیثیت رکھتی ہیں۔ نیشنل انسٹی ٹیوٹ آف نیوٹریشن کے مطابق، دالیں بھارتی غذا میں کل پروٹین کی کھپت کا تقریباً 20 تا 25 فیصد حصہ فراہم کرتی ہیں۔ تاہم، فی کس دالوں کا استعمال اب بھی تجویز کردہ 85 گرام یومیہ سے کم ہے، جس کے باعث ملک بھر میں پروٹین کی کمی اور غذائی قلت کے مسائل جنم لے رہے ہیں۔ اس لیے دالوں کی گھریلو پیداوار میں اضافہ نہ صرف اقتصادی ضرورت ہے بلکہ عوامی صحت کو بہتر بنانے کی ایک اہم تدبیر بھی ہے۔

اس دوہری اہمیت کو تسلیم کرتے ہوئے، حکومتِ ہند نے دالوں کے شعبے کو مضبوط بنانے پر خصوصی توجہ دی ہے۔ 11 اکتوبر 2025 کو نئی دہلی کے انڈین ایگریکلچرل ریسرچ انسٹی ٹیوٹ(آئی اے آر آئی) میں ایک خصوصی  کرشی پروگرام منعقد ہوا، جس میں وزیر اعظم نریندر مودی نے ‘‘ دالوں  میں آتم نربھرتا مشن’’ (دلہن آتم نربھرتا مشن) کا آغاز 11,440 کروڑ روپے کے مجموعی بجٹ کے ساتھ کیا۔ اس موقع پر وزیر اعظم نے دالوں کے کاشتکاروں سے بات چیت کی اور زرعی و متعلقہ شعبوں میں ویلیو چین پر مبنی ترقی کو فروغ دینے کی اہمیت پر زور دیا۔لانچ کے دوران اس بات پر بھی زور دیا گیا کہ یہ مشن صرف پیداوار بڑھانے کا نہیں بلکہ ایک پائیدار اور بااختیار مستقبل تعمیر کرنے کا عزم رکھتا ہے۔

یہ مشن غذائی سلامتی اور خودکفالت کے حصول کی سمت میں ایک اہم قدم ہے۔ ‘‘ دالوں میں آتم نربھرتا مشن’’  کا اعلان مرکزی بجٹ 2026-2025  میں کیا گیا تھا اور یکم اکتوبر 2025 کو مرکزی کابینہ نے اسے منظوری دی۔ اسے 2026-2025 سے 2031-2030 کے درمیان نافذ کیا جائے گا۔ اس کا مقصد گھریلو پیداوار میں اضافہ، درآمدی انحصار میں کمی، اور دالوں میں ‘‘آتم نربھر بھارت’’ کے ہدف کو حاصل کرنے کی راہ ہموار کرنا ہے۔

پس منظر

گزشتہ برسوں میں بھارت نے دالوں کی پیداوار میں نمایاں تبدیلی کا مشاہدہ کیا ہے۔ نیشنل فوڈ سیکیورٹی اینڈ نیوٹریشن مشن(این ایف ایس این ایم) کے تحت حکومت کی مسلسل کوششوں کے نتیجے میں دالوں کی پیداوار 2014-2013 میں 192.6 لاکھ ٹن سے بڑھ کر 2025-2024  (تیسرے پیشگی تخمینہ) میں 252.38 لاکھ ٹن تک پہنچ گئی، جو کہ 31 فیصد سے زائد کی شاندار ترقی کی عکاسی کرتی ہے۔ اگرچہ یہ پیش رفت قابلِ ستائش ہے، تاہم اب بھی ملک کی بڑھتی ہوئی کھپت کی ضروریات پوری کرنے کے لیے مزید پیداوار بڑھانے کی بڑی گنجائش موجود ہے۔

سال 2024-2023  میں بھارت نے 47.38 لاکھ ٹن دالیں درآمد کیں، جب کہ اسی دوران 5.94 لاکھ ٹن برآمد بھی کیں۔ یہ اعداد و شمار اس حقیقت کو اجاگر کرتے ہیں کہ دنیا کے سب سے بڑے دال پیدا کرنے والے ممالک میں شامل ہونے کے باوجود بھارت کی گھریلو پیداوار میں اب بھی اس حد تک اضافہ درکار ہے کہ وہ اندرونی طلب کو مکمل طور پر پورا کر سکے۔ اس وجہ سے دالوں کی درآمد فی الحال ایک ضروری معاون کے طور پر برقرار ہے۔ 47.38 لاکھ ٹن کی درآمدات کے پیش نظر حکومتِ ہند نے دالوں میں خودکفالت کو ایک قومی ترجیح کے طور پر طے کیا ہے۔

وزیر اعظم نریندر مودی نے دسمبر 2027 تک دالوں میں مکمل ’’آتم نربھرتا‘‘ (خود انحصاری) حاصل کرنے کا ایک بلند ہدف مقرر کیا ہے، جس میں خاص طور پر تور (ارہر)، اُڑد اور مسور پر توجہ مرکوز کی گئی ہے۔ نیا مشن اس وژن کو مزید تقویت دیتا ہے، جس کا مقصد بھارت کی مستقبل کی دالوں کی ضرورت کو مکمل طور پر گھریلو پیداوار کے ذریعے پورا کرنا ہے۔ یہ مشن ‘‘ویژن 2047’’ سے ہم آہنگ ہے، جو پائیدار ترقی، متنوع فصلوں کے نظام اور کسانوں کو یقینی آمدنی، جدید ٹیکنالوجی کے استعمال، اور موسمیاتی لحاظ سے لچکدار زرعی طریقوں کے ذریعے بااختیار بنانے پر زور دیتا ہے۔

حکومتِ ہند نے گزشتہ کئی دہائیوں سے دالوں کی پیداوار کو فروغ دینے کے لیے ہدفی اقدامات کیے ہیں۔ 1966 میں آل انڈیا کوآرڈی نیٹڈ پلس امپروومنٹ پروجیکٹ سے آغاز ہوا، جس کے بعد ‘‘ایکسلیریٹڈ پلسز پروڈکشن پروگرام ’’ اے سی پی) (2010–14 جیسے اقدامات نے پیداواریت میں اضافے اور طویل مدتی خود انحصاری کی بنیاد رکھنے میں اہم کردار ادا کیا۔

مقصد

‘‘ دالوں میں آتم نربھرتا مشن’’ (2031-2025) کا بنیادی مقصد دالوں میں خودکفالت حاصل کرنا ہے، جس کے تحت گھریلو پیداوار میں نمایاں اضافہ، درآمدی انحصار میں کمی، اور کسانوں کی آمدنی میں پائیدار بہتری کو یقینی بنانا شامل ہے۔ اس مشن کے تحت دالوں کی کاشت کے رقبے میں 35 لاکھ ہیکٹیئر کا اضافہ کیا جائے گا، جس کے لیے دھان کی پرالی والی زمینوں اور دیگر موزوں علاقوں کو استعمال میں لایا جائے گا۔ اس کے ساتھ ساتھ فصلوں کی باہمی کاشت(انٹر کراپپینگ) اور متنوع کاشتکاری(کراپ ڈائیورسفیکیشن) کو بھی فروغ دیا جائے گا۔

مشن کا ایک اہم پہلو زیادہ پیداوار دینے والی، کیڑوں کے خلاف مزاحم، اور موسمیاتی تغیرات سے ہم آہنگ دالوں کی اقسام کی تیاری اور ان کے فروغ پر مرکوز ہے، جسے ایک مضبوط بیج نظام کے ذریعے سہارا دیا جائے گا۔ اس کے تحت کسانوں میں 126 لاکھ کوئنٹل تصدیق شدہ بیج تقسیم کیے جائیں گے، جبکہ 88 لاکھ مفت بیج کٹس فراہم کی جائیں گی۔

دالوں میں آتم نربھرتا کے لئے حکمت عملی

دالوں کے شعبے کے لئے نیتی  آیوگ کی سفارشات

4 ستمبر 2025 کو دالوں میں آتم نربھرتا پر نیتی آیوگ کی رپورٹ کا اجرا کیا۔

 نیتی آیوگ نے پانچ بڑی دال پیدا کرنے والی ریاستیں ،  راجستھان، مدھیہ پردیش، گجرات، آندھرا پردیش اور کرناٹک میں 885 کسانوں سے حاصل شدہ بصیرت کی بنیاد پر دالوں کے شعبے کو مضبوط بنانے، پیداوار بڑھانے اور پائیداری کو یقینی بنانے کے لیے چند اہم سفارشات پیش کی ہیں،کاشتکاری میں توسیع اور تنوع، دھان کی پرالی والی زمینوں میں دالوں کی کاشت کو بڑھانا اور کلسٹر پر مبنی حکمتِ عملی کے ذریعے فصلوں کے نمونوں میں تنوع کو فروغ دینا۔حوافز اور قیمت کی ضمانت: اعلیٰ ممکنہ ریاستوں میں پائلٹ پروجیکٹس، یقینی قیمتیں اور دیگر مراعات فراہم کر کے کسانوں کی حوصلہ افزائی کرنا۔بیج کے نظام کو مضبوط کرنا، اعلیٰ معیار کے بیج کی فراہمی اور ٹریسبلٹی کے لیے ‘‘ایک بلاک-ایک بیج گاؤں’’ جیسے ماڈلز اپنانا، کلسٹر بیسڈ بیج ہبز اور کسان-پروڈیوسر آرگنائزیشنز (ایف پی اوز) کی مدد سے بہتر اقسام کی بروقت دستیابی اور پیداواریت میں اضافہ یقینی بنانا ہے۔خریداری اور ویلیو چین کی مضبوطی،مقامی خریداری مراکز اور پروسیسنگ یونٹس کے ذریعے بیچولیوں کی مداخلتوں میں کمی، کسانوں کی آمدنی میں اضافہ، اور صارفین کے لیے قیمتوں کا استحکام۔غذائی و فلاحی پروگراموں میں شمولیت،  عوامی نظام تقسیم (پی ڈی ایس) اور مڈ ڈے میل پروگرام میں دالوں کو شامل کر کے مانگ بڑھانا اور غذائی قلت کے مسائل کو حل کرنا۔جدید زرعی طریقے اور پائیداری،مکینائزیشن، مؤثر آبپاشی، بائیو-کھاد، کیڑوں سے محفوظ، کم مدت والی اور موسمیاتی تغیرات کے مطابق مزاحمتی  اقسام کو فروغ دینا۔ڈیٹا اور مانیٹرنگ، ساتھی پورٹل کے ذریعے ابتدائی وارننگ نظام  اور ڈیٹا پر مبنی نگرانی کو اپنانا، تاکہ دالوں کی کاشت زیادہ مضبوط، پائیدار اور فائدہ مند بن سکے۔یہ سفارشات دالوں کی پیداوار میں اضافہ، کسانوں کی آمدنی اور غذائی سلامتی کو فروغ دینے کے لیے ایک جامع حکمتِ عملی فراہم کرتی ہیں۔

نتیجہ

‘‘دالوں  میں آتم نربھرتا مشن’’  بھارت کے لیے غذائی اور اقتصادی سلامتی کے حصول کی جانب ایک اہم قدم ہے۔ خودکفالت کو ترجیح دیتے ہوئے، یہ مشن کسانوں کو جدید ٹیکنالوجی اپنانے، یقینی خریداری، صلاحیت سازی، اور معیاری بیجوں تک رسائی فراہم کر کے بااختیار بناتا ہے، جبکہ پائیدار اور موسمیاتی لحاظ سے لچکدار زرعی طریقوں کو فروغ دیتا ہے۔

سائنسی جدت، کلسٹر پر مبنی مداخلتیں، اور مضبوط ویلیو چین کے امتزاج کے ذریعے، مشن نہ صرف گھریلو دالوں کی مانگ کو پورا کرنے بلکہ درآمدی انحصار کم کرنے، کسانوں کی آمدنی بڑھانے، اور بھارت کو پائیدار دال  کی پیداواری میں عالمی رہنما کے طور پر قائم کرنے کا ہدف رکھتا ہے۔ غذائی پروگراموں میں دالوں کے شامل ہونے، بعد از فصل انفراسٹرکچر کی بہتری، اور دیہی روزگار کے فروغ کے ذریعے، مشن کا اثر محض غذائی سلامتی تک محدود نہیں رہے گا بلکہ مٹی کی صحت، دیہی خوشحالی، اور ‘‘وِکست بھارت’’ کے تصور کے حصول میں بھی معاون ہوگا۔

مختصراً، یہ مشن ایک خودانحصار، مضبوط اور پیداواری(پروڈکٹیو)  دال شعبے کی بنیاد رکھتا ہے، جو کسانوں، صارفین، اور پوری قوم کے لیے طویل مدتی فوائد کو یقینی بناتا ہے۔

حوالہ جات:

• PM Speech – https://youtu.be/Yd4yFhWVSOo?si=WHt9Sfq24LjucNCF
• PIB –

1. https://www.pib.gov.in/PressReleasePage.aspx?PRID=2173547
2. https://www.pib.gov.in/PressReleaseIframePage.aspx?PRID=2039209
3. https://www.pib.gov.in/PressReleasePage.aspx?PRID=2085530
4. https://static.pib.gov.in/WriteReadData/specificdocs/documents/2022/feb/doc202221616601.pdf
5. https://www.pib.gov.in/PressReleasePage.aspx?PRID=1993155

• NITI Aayog Report - https://niti.gov.in/sites/default/files/2025-09/Strategies-and-Pathways-for-Accelerating-Growth-in-Pulses-towards-the-Goal-of-Atmanirbharta.pdf
• Budget 2025-26 - https://www.indiabudget.gov.in/doc/budget_speech.pdf
• Ministry of Agriculture & Farmers Welfare - https://sansad.in/getFile/loksabhaquestions/annex/185/AU4231_bGGta7.pdf?source=pqals
• SATHI Portal - https://seedtrace.gov.in/ms014/aboutUs
• Image - Ministry of Information & Broadcasting, GoI

Click here to see pdf

********

ش ح۔ش ت ۔ رض

7455U-