প্ৰধানমন্ত্ৰী শ্ৰী নৰেন্দ্ৰ মোদীয়ে আজি নতুন দিল্লীৰ ‘চিবিচিআই’ কেন্দ্ৰ চৌহদত ‘ভাৰতীয় কেথলিক বিশ্বপ সন্মিলন’ (চিবিচিআই)ৰ দ্বাৰা আয়োজিত ‘খ্ৰীষ্টমাছ’ উদযাপন অনুষ্ঠানত অংশগ্ৰহণ কৰে। ভাৰতৰ কেথলিক গীৰ্জাৰ মুখ্য কাৰ্যালয়ত এগৰাকী প্ৰধানমন্ত্ৰীয়ে এই প্ৰথমবাৰৰ বাবে এনে কাৰ্যসূচীত অংশগ্ৰহণ কৰিছে। প্ৰধানমন্ত্ৰীয়ে খ্ৰীষ্টান সম্প্ৰদায়ৰ মুখ্য নেতাসকলৰ সৈতে বাৰ্তালাপ কৰে, তেওঁলোকৰ ভিতৰত আছে ‘কাৰ্ডিনেল’, ‘বিশ্বপ’ আৰু গীৰ্জাৰ বিশিষ্ট নেতাসকল।

দেশৰ নাগৰিকসকল আৰু পৃথিৱীৰ খ্ৰীষ্টান সম্প্ৰদায়ক ‘বৰদিন’ৰ শুভেচ্ছা জনাই প্ৰধানমন্ত্ৰীয়ে কয় যে কেইদিনমান পূৰ্বে তেওঁ কেন্দ্ৰীয় মন্ত্ৰী জৰ্জ কুৰিয়ানৰ বাসগৃহত ‘খ্ৰীষ্টমাছ’ উদযাপনত অংশ গ্ৰহণ কৰিছিল আৰু আজি তেওঁ ‘কেথলিক বিশ্বপছ কনফাৰেন্স অব ইণ্ডিয়া’ (চিবিচিআই)ৰ দ্বাৰা আয়োজিত এই অনুষ্ঠানত সকলোৰে সৈতে যোগদান কৰি সন্মানিত হৈছে। এই অনুষ্ঠানটো বিশেষভাৱেই বিশেষ কিয়নো এই অনুষ্ঠানত ‘চিবিচিআই’-ৰ ৮০ সংখ্যক বাৰ্ষিকীও উদযাপন কৰা হৈছে। শ্ৰী মোদীয়ে ‘চিবিচিআই’ আৰু ইয়াৰ সৈতে জড়িত সকলোকে এই উল্লেখযোগ্য সাফল্যৰ বাবে অভিনন্দন জ্ঞাপন কৰে।

প্ৰধানমন্ত্ৰীয়ে ‘চিবিচিআই’-ৰ সৈতে যোৱাবছৰ প্ৰধানমন্ত্ৰীৰ বাসভৱনত আয়োজন কৰা খ্ৰীষ্টমাছ উদযাপন অনুষ্ঠানৰ কথা স্মৰণ কৰে আৰু আজি সকলো ‘চিবিচিআই’ চৌহদত একত্ৰিত হৈছে। "মই ইষ্টাৰৰ সময়ত ছেক্ৰেড হাৰ্ট কেথেড্ৰেল গীৰ্জাও পৰিদৰ্শন কৰিছোঁ, আৰু আপোনালোক সকলোৰে পৰা পোৱা আন্তৰিকতাৰ উম প্ৰদানৰ বাবে মই কৃতজ্ঞ। মই পৰম পূজ্য পোপ ফ্ৰান্সিছৰ পৰাও একেই চেনেহ অনুভৱ কৰোঁ, যাক মই এই বছৰৰ আৰম্ভণিতে ইটালীত ‘জি-৭ সন্মিলন’ৰ সময়ত লগ পাইছিলোঁ– তিনি বছৰৰ ভিতৰত এয়া আছিল আমাৰ দ্বিতীয় বৈঠক। মই তেওঁক ভাৰত ভ্ৰমণৰ বাবে আমন্ত্ৰণ জনাইছো", শ্ৰী মোদীয়ে লগতে কয়। প্ৰধানমন্ত্ৰীয়ে কয় যে ছেপ্টেম্বৰ মাহত নিউয়ৰ্ক ভ্ৰমণৰ সময়ত তেওঁ ‘কাৰ্ডিনেল’ পিয়েট্ৰো পেৰোলিনক সাক্ষাৎ কৰিছিল। এই আধ্যাত্মিক সাক্ষাৎবোৰে সেৱাৰ প্ৰতি থকা প্ৰতিশ্ৰুতিবদ্ধতাক অনুপ্ৰাণিত আৰু শক্তিসমৃদ্ধ কৰে।

প্ৰধানমন্ত্ৰীয়ে শেহতীয়াকৈ খ্যাতিমন্ত ‘কাৰ্ডিনেল’ জৰ্জ কুভাকাডৰ সৈতে হোৱা বৈঠকৰ কথা স্মৰণ কৰে, যাক শেহতীয়াকৈ পূজ্য পোপ ফ্ৰান্সিছে ‘কাৰ্ডিনেল’ উপাধি প্ৰদান কৰিছিল। প্ৰধানমন্ত্ৰীয়ে কয় যে কেন্দ্ৰীয় মন্ত্ৰী জৰ্জ কুৰিয়ানৰ নেতৃত্বত ভাৰত চৰকাৰে এই অনুষ্ঠানলৈ এক উচ্চ পৰ্যায়ৰ প্ৰতিনিধি দল প্ৰেৰণ কৰিছিল। "যেতিয়া এগৰাকী ভাৰতীয়ই এনে সফলতা অৰ্জন কৰে, সমগ্ৰ দেশেই গৌৰৱ কৰে। এই উল্লেখযোগ্য সাফল্যৰ বাবে মই আকৌ এবাৰ ‘কাৰ্ডিনেল’ জৰ্জ কোৱাকাডক অভিনন্দন জনাইছোঁ", শ্ৰী মোদীয়ে লগতে কয়।

প্ৰধানমন্ত্ৰীয়ে বহুতো স্মৃতিও স্মৰণ কৰে, বিশেষকৈ এক দশক পূৰ্বে যুদ্ধ বিধ্বস্ত আফগানিস্তানৰ পৰা ‘ফাদাৰ’ এলেক্সিছ প্ৰেম কুমাৰক উদ্ধাৰ কৰাৰ সন্তোষৰ মুহূৰ্তবোৰৰ কথাও স্মৰণ কৰে। শ্ৰী মোদীয়ে উল্লেখ কৰে যে ‘ফাদাৰ’ এলেক্সিছ প্ৰেম কুমাৰক আঠমাহ ধৰি বন্দী কৰি ৰখা হৈছিল আৰু কঠিন পৰিস্থিতি স্বত্বেও চৰকাৰে তেওঁক সুৰক্ষিতভাৱে ঘৰলৈ অনাৰ বাবে সকলো প্ৰচেষ্টা চলাইছিল। "আমি সফল হোৱাত তেওঁৰ পৰিয়ালৰ কণ্ঠস্বৰত অনুৰণিত হোৱা আনন্দৰ কথা মই কেতিয়াও পাহৰিব নোৱাৰিম। একেদৰে, যেতিয়া ‘ফাদাৰ’ টমক য়েমেনত বন্দী কৰি ৰখা হৈছিল, তেতিয়াও আমি তেওঁক ঘূৰাই আনিবলৈ অক্লান্ত পৰিশ্ৰম কৰিছিলোঁ আৰু মই তেওঁক মোৰ ঘৰলৈ নিমন্ত্ৰণ কৰাৰ সন্মান লাভ কৰিছিলোঁ। উপসাগৰীয় অঞ্চলৰ সংকটত থকা নাৰ্ছ ভগ্নীসকলক উদ্ধাৰৰ বাবে আমাৰ প্ৰচেষ্টাও সমানেই নিৰলস আৰু সফল আছিল", প্ৰধানমন্ত্ৰীয়ে লগতে কয়। শ্ৰী মোদীয়ে পুনৰ কয় যে এই প্ৰচেষ্টাসমূহ কেৱল কূটনৈতিক অভিযানেই নহয়, এয়া পৰিয়ালৰ সদস্যসকলক ঘূৰাই অনাৰ বাবে আৱেগিক প্ৰতিশ্ৰুতিও। আজিৰ ভাৰতে যতেই নাথাকক কিয়, সংকটৰ সময়ত তেওঁলোকক উদ্ধাৰ কৰাটো কৰ্তব্য বুলি বিবেচনা কৰে।

প্ৰধানমন্ত্ৰীয়ে কয় যে ভাৰতৰ বৈদেশিক নীতিয়ে ৰাষ্ট্ৰীয় স্বাৰ্থৰ লগতে মানৱীয় স্বাৰ্থকো প্ৰাথমিকতা প্ৰদান কৰে, যিটো ক’ভিড-১৯ মহামাৰীৰ সময়ত স্পষ্ট হৈ উঠিছিল। যদিও বহুতো দেশে তেওঁলোকৰ নিজৰ স্বাৰ্থত গুৰুত্ব দিছিল, ভাৰতে নিঃস্বাৰ্থভাৱে ১৫০ খনতকৈয়ো অধিক দেশক সহায় কৰিছিল, ঔষধ আৰু প্ৰতিষেধক প্ৰেৰণ কৰিছিল। ইয়াৰ এক ইতিবাচক বিশ্বজোৰা প্ৰভাৱ পৰিছিল, গায়ানাৰ দৰে ৰাষ্ট্ৰসমূহে গভীৰ কৃতজ্ঞতা প্ৰকাশ কৰিছিল। বহুতো দ্বীপ ৰাষ্ট্ৰ, প্ৰশান্ত মহাসাগৰীয় ৰাষ্ট্ৰ আৰু কেৰিবিয়ান দেশসমূহেও ইয়াৰ মানৱীয় প্ৰচেষ্টাৰ বাবে ভাৰতক প্ৰশংসা কৰে। একবিংশ শতিকাত ভাৰতৰ মানৱ-কেন্দ্ৰিক দৃষ্টিভংগীয়ে বিশ্বক উন্নত কৰিবলৈ সাজু হৈছে।

প্ৰধানমন্ত্ৰীয়ে উল্লেখ কৰে যে প্ৰভু খ্ৰীষ্টৰ শিক্ষাই প্ৰেম, সম্প্ৰীতি আৰু ভাতৃত্ববোধত গুৰুত্ব আৰোপ কৰে। আৰু যেতিয়া সমাজত হিংসা আৰু ব্যাঘাত বিয়পি পৰে ই তেওঁক দুখিত কৰে, যিটো শেহতীয়াকৈ জাৰ্মানীৰ খ্ৰীষ্টমাছ বজাৰত আৰু শ্ৰীলংকাত ২০১৯ চনৰ ‘ইষ্টাৰ বোমা বিস্ফোৰণ’ৰ সময়ত দেখা গৈছিল, য'ত তেওঁ ভুক্তভোগীসকলক শ্ৰদ্ধাঞ্জলি জনাইছিল।

শ্ৰী মোদীয়ে কয় যে এইবাৰৰ খ্ৰীষ্টমাছটো অধিক বিশেষ, কিয়নো ই জয়ন্তী বৰ্ষৰ আৰম্ভণিও, আশাৰ ওপৰত গুৰুত্ব আৰোপ কৰে। "পবিত্ৰ বাইবেলে আশাক শক্তি আৰু শান্তিৰ উৎস হিচাপে গণ্য কৰে। আমিও আশা আৰু ইতিবাচকতাৰে পৰিচালিত। মানৱতাৰ আশা এখন উন্নত পৃথিৱীৰ আশা আৰু শান্তি, প্ৰগতি আৰু সমৃদ্ধিৰ আশা", শ্ৰী মোদীয়ে লগতে কয়।

প্ৰধানমন্ত্ৰীয়ে উল্লেখ কৰে যে বিগত ১০ বছৰত ভাৰতত ২৫০ নিযুত লোকে দৰিদ্ৰতা অতিক্ৰম কৰিছে আৰু দৰিদ্ৰতাৰ বিৰুদ্ধে জয় সম্ভৱ হোৱাৰ আশাত ইন্ধন যোগাইছে। ভাৰতো দশমৰ পৰা পঞ্চম বৃহত্তম অৰ্থনীতিলৈ উন্নীত হৈছে, যি হৈছে আমাৰ আত্ম-বিশ্বাস আৰু অধ্যৱসায়ৰ প্ৰমাণ। উন্নয়নৰ এই সময়ছোৱাই ভৱিষ্যতৰ বাবে নতুন আশাৰ বাৰ্তা কঢ়িয়াই আনিছে, ষ্টাৰ্ট-আপ, বিজ্ঞান, ক্ৰীড়া আৰু উদ্যোগৰ দৰে বিভিন্ন ক্ষেত্ৰত যুৱসকলৰ বাবে সুযোগৰ সৃষ্টি হৈছে। প্ৰধানমন্ত্ৰীয়ে লগতে কয়, "ভাৰতৰ আত্মবিশ্বাসী যুৱক-যুৱতীসকলে দেশখনক প্ৰগতিৰ দিশে আগুৱাই নিছে, যিয়ে আমাক আশান্বিত কৰিছে যে উন্নত ভাৰতৰ সপোন বাস্তৱায়িত হ'বই"।

প্ৰধানমন্ত্ৰীয়ে উল্লেখ কৰে যে বিগত ১০ বছৰত ভাৰতৰ মহিলাসকলে উল্লেখযোগ্য সৱলীকৰণ অৰ্জন কৰিছে, উদ্যোগ, ড্ৰোন, বিমান চলাচল আৰু সশস্ত্ৰ বাহিনীৰ দৰে ক্ষেত্ৰত উৎকৃষ্টতা অৰ্জন কৰিছে। তেওঁলোকৰ প্ৰগতিয়ে আলোকপাত কৰে যে মহিলাসকলৰ সৱলীকৰণ নোহোৱাকৈ কোনো দেশেই আগবাঢ়িব নোৱাৰে। শ্ৰী মোদীয়ে কয় যে যিহেতু অধিক মহিলাই কৰ্মবাহিনী আৰু পেছাদাৰী শ্ৰমিক বাহিনীত যোগদান কৰিছে, ই ভাৰতৰ ভৱিষ্যতৰ বাবে নতুন আশা কঢ়িয়াই আনিছে।

প্ৰধানমন্ত্ৰীয়ে কয় যে বিগত ১০ বছৰত ভাৰতে মোবাইল আৰু অৰ্ধপৰিবাহী উৎপাদনৰ দৰে নিম্ন-অন্বেষণ কৰা ক্ষেত্ৰসমূহত গুৰুত্বপূৰ্ণ অগ্ৰগতি লাভ কৰিছে আৰু নিজকে এক গোলকীয় প্ৰযুক্তি কেন্দ্ৰ হিচাপে প্ৰতিষ্ঠা কৰিছে। তেওঁ কয় যে দেশখনে ‘প্ৰযুক্তি’ আৰু ‘ফিনটেক’-ৰ জৰিয়তে দৰিদ্ৰ লোকসকলক শক্তিসমৃদ্ধ কৰি তুলিছে আৰু নতুন এক্সপ্ৰেছৱে, গ্ৰাম্য পথ সংযোগ আৰু মেট্ৰ' পথৰ সৈতে অভূতপূৰ্ব গতিত আন্তঃগাঁথনি নিৰ্মাণ কৰি আছে। এই সাফল্যসমূহে ভাৰতৰ ভৱিষ্যতৰ বাবে আশা আৰু ইতিবাচকতা কঢ়িয়াই আনিছে, আৰু বিশ্বই এতিয়া ভাৰতক ইয়াৰ দ্ৰুত বিকাশ আৰু সম্ভাৱনাসমূহক একে ইতিবৃত্তৰে চাবলৈ লৈছে।

প্ৰধানমন্ত্ৰীয়ে কয় যে বাইবেলে আমাক ইজনে সিজনৰ বোজা বহন কৰিবলৈ শিকায়, আমাক ইজনে সিজনৰ যত্ন ল'বলৈ আৰু ইজনে সিজনৰ কল্যাণৰ দায়িত্ব ল'বলৈ উৎসাহিত কৰে। এই মানসিকতাৰ সৈতে, প্ৰতিষ্ঠান আৰু সংগঠনবোৰে সমাজসেৱাত এক গুৰুত্বপূৰ্ণ ভূমিকা পালন কৰে, সেয়া লাগিলে নতুন বিদ্যালয় স্থাপনেই হওঁক, শিক্ষাৰ জৰিয়তে সম্প্ৰদায়ৰ উন্নতিয়েই হওঁক, বা জনসাধাৰণৰ সেৱাৰ বাবে স্বাস্থ্য প্ৰচেষ্টা ৰূপায়ণেই হওঁক। তেওঁ কয় যে এনেবোৰ প্ৰচেষ্টাক সামূহিক দায়িত্ব হিচাপেই গ্ৰহণ কৰা হয়।

প্ৰধানমন্ত্ৰীয়ে পুনৰ কয় যে যীশু খ্ৰীষ্টই বিশ্বক সহানুভূতি আৰু নিস্বাৰ্থ সেৱাৰ পথ দেখুৱাইছে। আমি খ্ৰীষ্টমাছ উদযাপন কৰোঁ আৰু যীশুক স্মৰণ কৰোঁ যাতে আমি এই মূল্যবোধবোৰ আমাৰ জীৱনত অন্তৰ্ভুক্ত কৰিব পাৰোঁ আৰু সদায়ে আমাৰ কৰ্তব্যক প্ৰাথমিকতা দিব পাৰোঁ। এইটো কেৱল আমাৰ ব্যক্তিগত দায়িত্বই নহয়, বৰং এক সামাজিক কৰ্তব্যও। "আজি 'সবকা সাথ, সবকা বিকাশ, সবকা প্ৰয়াস'ৰ প্ৰস্তাৱৰ জৰিয়তে দেশখনে এই মনোবৃত্তিৰে আগবাঢ়িছে। এনে বহুতো বিষয় আছিল যিবোৰৰ বিষয়ে আগতে কেতিয়াও ভবা হোৱা নাছিল, কিন্তু মানৱীয় দৃষ্টিকোণৰ পৰা সেইবোৰ আটাইতকৈ প্ৰয়োজনীয় আছিল। আমি সেইসমূহকে আমাৰ প্ৰাথমিকতা প্ৰদান কৰিছোঁ।  আমি চৰকাৰক কঠোৰ নিয়ম আৰু আনুষ্ঠানিকতাৰ পৰা বাহিৰ লৈ আনিছোঁ। আমি সংবেদনশীলতাক এটা প্ৰচল হিচাপে নিৰ্ধাৰণ কৰিছোঁ। প্ৰতিগৰাকী দৰিদ্ৰ ব্যক্তিয়ে স্থায়ী ঘৰ পোৱাটো নিশ্চিত কৰি, প্ৰতিখন গাঁৱে বিদ্যুৎ পোৱাটো নিশ্চিত কৰি মানুহৰ জীৱনৰ পৰা অন্ধকাৰ আঁতৰ কৰি, বিশুদ্ধ খোৱা পানী প্ৰদান কৰি, ধনৰ অভাৱৰ বাবে কোনেও যাতে চিকিৎসাৰ পৰা বঞ্চিত হ’ব লগা নহয় সেয়া নিশ্চিত কৰা হৈছে। আমি এক সংবেদনশীল ব্যৱস্থা গঢ়ি তুলিছোঁ যি এনে সেৱা আৰু এনে শাসনৰ নিশ্চয়তা দিব পাৰে", শ্ৰী মোদীয়ে লগতে কয়।

প্ৰধানমন্ত্ৰীয়ে উল্লেখ কৰে যে চৰকাৰৰ পদক্ষেপসমূহে বিভিন্ন সম্প্ৰদায়ক গুৰুত্বপূৰ্ণভাৱে উন্নত কৰিছে। ‘প্ৰধানমন্ত্ৰী আৱাস যোজনা’-ৰ অধীনত যেতিয়া মহিলাৰ নামত ঘৰ নিৰ্মাণ কৰা হয়, ই তেওঁলোকক শক্তিসমৃদ্ধ কৰে। ‘নাৰী শক্তি বন্দন আইন’য়ে সংসদত মহিলাৰ অংশগ্ৰহণ বৃদ্ধি কৰিছে। শ্ৰী মোদীয়ে কয় যে এসময়ত প্রান্তিক হৈ পৰা বিশেষভাৱে সক্ষম সম্প্ৰদায়সমূহক এতিয়া ৰাজহুৱা আন্তঃগাঁথনিৰ পৰা নিযুক্তিলৈকে প্ৰতিটো ক্ষেত্ৰতে অগ্ৰাধিকাৰ দিয়া হৈছে। তেওঁ কয় যে অৰ্থনৈতিক বিকাশৰ ক্ষেত্ৰত সংবেদনশীলতা হৈছে অতি গুৰুত্বপূৰ্ণ, যিটো ‘কিষাণ ক্ৰেডিট কাৰ্ড’ আৰু ‘মৎস্য সম্পদা যোজনা’-ৰ দৰে এক পৃথক মীন মন্ত্ৰালয় আৰু কাৰ্যসূচী সৃষ্টিৰ সৈতে দেখা গৈছে, যিয়ে লাখ লাখ মাছমৰীয়াৰ জীৱন উন্নত কৰিছে আৰু অৰ্থনীতিক স্থিতি উন্নত কৰিছে।

প্ৰধানমন্ত্ৰীয়ে কয়, "লালকিল্লাৰ প্ৰাচীৰৰ পৰা মই "সবকা প্ৰয়াস" বা সামূহিক প্ৰচেষ্টাৰ কথা কৈছিলোঁ, যিয়ে দেশৰ ভৱিষ্যত গঢ়ি তোলাত প্ৰতিগৰাকী ব্যক্তিৰ ভূমিকাৰ গুৰুত্বত আলোকপাত কৰিছিল। সামাজিকভাৱে সচেতন ভাৰতীয়সকলে স্বচ্ছ ভাৰতৰ দৰে গুৰুত্বপূৰ্ণ আন্দোলন চলাই আছে, যি মহিলা আৰু শিশুসকলৰ বাবে পৰিষ্কাৰ পৰিচ্ছন্নতা আৰু স্বাস্থ্যৰ ফলাফল উন্নত কৰিছে"। ‘বাজ্ৰা’ৰ প্ৰচাৰ(শ্ৰী অন্ন), স্থানীয় শিল্পীসকলক সমৰ্থন কৰা, আৰু "এক পেড় মা কে নাম" অভিযান, যি প্ৰকৃতি মাতৃ আৰু আমাৰ মাতৃ দুয়োকে সন্মানিত কৰে, আদি পদক্ষেপে গতি লাভ কৰিছে। খ্ৰীষ্টান সম্প্ৰদায়ৰ বহুতে এই প্ৰচেষ্টাত সক্ৰিয় হৈ আছে। উন্নত ভাৰত গঢ়ি তোলাৰ বাবে এই সামূহিক কাৰ্যসমূহ হৈছে অপৰিহাৰ্য।

প্ৰধানমন্ত্ৰীয়ে কয় যে তেওঁ নিশ্চিত যে সামূহিক প্ৰচেষ্টাই দেশখনক আগুৱাই নিব। "এক উন্নত ভাৰত হৈছে আমাৰ অংশীদাৰী লক্ষ্য আৰু একেলগে আমি ইয়াক প্ৰাপ্ত কৰিম। আমি ভৱিষ্যত প্ৰজন্মৰ বাবে এখন উজ্জ্বল ভাৰত এৰি যোৱাটো নিশ্চিত কৰাটো হৈছে আমাৰ দায়িত্ব। আকৌ এবাৰ মই আপোনালোক সকলোকে বৰদিন আৰু জয়ন্তী বৰ্ষৰ বাবে আন্তৰিক শুভেচ্ছা জনাইছোঁ", শ্ৰী মোদীয়ে ভাষণৰ সামৰণি মাৰে।

***

MJPS/VJ/KB