ಜೈ ಮಾ ಖೋಡಲ್!

ಇಂದು, ಈ ಶುಭ ಸಂದರ್ಭದಲ್ಲಿ, ಖೋಡಲ್ ಧಾಮ್‌ನ ಪವಿತ್ರ ಭೂಮಿ ಮತ್ತು ಮಾ ಖೋಡಲ್‌ನ ನಿಷ್ಠಾವಂತ ಅನುಯಾಯಿಗಳೊಂದಿಗೆ ಸಂಪರ್ಕ ಸಾಧಿಸಲು ನನಗೆ ಹೆಮ್ಮೆಯಾಗಿದೆ. ಶ್ರೀ ಖೋಡಲ್‌ಧಾಮ್‌ ಟ್ರಸ್ಟ್ ಸಾರ್ವಜನಿಕ ಕಲ್ಯಾಣ ಮತ್ತು ಸೇವೆಯ ಕ್ಷೇತ್ರದಲ್ಲಿ ಮತ್ತೊಂದು ಮಹತ್ವದ ಉಪಕ್ರಮವನ್ನು ಕೈಗೊಂಡಿದೆ. ಕ್ಯಾನ್ಸರ್ ಆಸ್ಪತ್ರೆ ಮತ್ತು ಸಂಶೋಧನಾ ಕೇಂದ್ರದ ನಿರ್ಮಾಣವು ಇಂದು ಅಮ್ರೇಲಿಯಲ್ಲಿ ಪ್ರಾರಂಭವಾಗುತ್ತಿದೆ. ಕೆಲವು ವಾರಗಳಲ್ಲಿ, ಕಾಗ್ವಾಡ್‌ನ ಶ್ರೀ ಖೋಡಲ್‌ಧಾಮ್‌ ಟ್ರಸ್ಟ್ ಸ್ಥಾಪನೆಯಾಗಿ 14 ವರ್ಷಗಳು ಪೂರ್ಣಗೊಂಡಿರುವುದನ್ನು ನಾವು ಆಚರಿಸುತ್ತೇವೆ. ಈ ಗಮನಾರ್ಹ ಬೆಳವಣಿಗೆಗಳಿಗೆ ನಾನು ಎಲ್ಲರಿಗೂ ಶುಭಾಶಯ ಕೋರುತ್ತೇನೆ.

ನನ್ನ ಆತ್ಮೀಯ ಸದಸ್ಯರೇ,

ಹದಿನಾಲ್ಕು ವರ್ಷಗಳ ಹಿಂದೆ, ಲೆವಾ ಪಾಟಿದಾರ್ ಸಮುದಾಯವು ಸೇವೆ, ಮೌಲ್ಯಗಳು ಮತ್ತು ಸಮರ್ಪಣೆಗೆ ದೃಢವಾದ ಬದ್ಧತೆಯೊಂದಿಗೆ ಶ್ರೀ ಖೋಡಲ್‌ದಾಮ್‌ ಟ್ರಸ್ಟ್ ಅನ್ನು ಸ್ಥಾಪಿಸಿತು. ಆರಂಭದಿಂದಲೂ ಈ ಟ್ರಸ್ಟ್, ಶಿಕ್ಷಣ, ಕೃಷಿ ಮತ್ತು ಆರೋಗ್ಯ ಸೇವೆಗಳನ್ನು ಒಳಗೊಂಡ ತನ್ನ ಸೇವೆಗಳ ಮೂಲಕ ಲಕ್ಷಾಂತರ ಜನರ ಜೀವನದ ಮೇಲೆ ಸಕಾರಾತ್ಮಕ ಪರಿಣಾಮ ಬೀರಲು ಪ್ರಯತ್ನಿಸಿದೆ. ಅಮ್ರೇಲಿಯಲ್ಲಿ ನಿರ್ಮಿಸಲಾಗುತ್ತಿರುವ ಕ್ಯಾನ್ಸರ್ ಆಸ್ಪತ್ರೆಯು ಸೇವಾ ಮನೋಭಾವಕ್ಕೆ ಮತ್ತೊಂದು ಸಾಕ್ಷಿಯಾಗಿದೆ, ಇದು ಅಮ್ರೇಲಿ ಸೇರಿದಂತೆ ಸೌರಾಷ್ಟ್ರದ ದೊಡ್ಡ ಜನಸಂಖ್ಯೆಗೆ ಪ್ರಯೋಜನವನ್ನು ನೀಡುತ್ತದೆ ಎಂಬ ವಿಶ್ವಾಸ ನನಗಿದೆ.

ಸ್ನೇಹಿತರೇ,

ಕ್ಯಾನ್ಸರ್‌ನಂತಹ ಗಂಭೀರ ಕಾಯಿಲೆಯ ಚಿಕಿತ್ಸೆಯು ವ್ಯಕ್ತಿಗಳು ಮತ್ತು ಅವರ ಕುಟುಂಬಗಳಿಗೆ ಗಮನಾರ್ಹ ಸವಾಲನ್ನು ಒಡ್ಡುತ್ತದೆ. ಕ್ಯಾನ್ಸರ್ ಚಿಕಿತ್ಸೆಯನ್ನು ಪಡೆಯುವಲ್ಲಿ ಯಾವುದೇ ರೋಗಿಗೆ ಅಡೆತಡೆಗಳು ಎದುರಾಗದಂತೆ ನೋಡಿಕೊಳ್ಳುವ ಬದ್ಧತೆಯಲ್ಲಿ ಸರ್ಕಾರ ದೃಢವಾಗಿದೆ. ಈ ಬದ್ಧತೆಯೊಂದಿಗೆ, ಕಳೆದ ಒಂಬತ್ತು ವರ್ಷಗಳಲ್ಲಿ ದೇಶದಲ್ಲಿ ಸುಮಾರು 30 ಹೊಸ ಕ್ಯಾನ್ಸರ್ ಆಸ್ಪತ್ರೆಗಳನ್ನು ಸ್ಥಾಪಿಸಲಾಗಿದೆ ಮತ್ತು ಪ್ರಸ್ತುತ 10 ಹೊಸ ಕ್ಯಾನ್ಸರ್ ಆಸ್ಪತ್ರೆಗಳ ಕೆಲಸ ನಡೆಯುತ್ತಿದೆ.

ಸ್ನೇಹಿತರೇ,

ಕ್ಯಾನ್ಸರ್‌ನ ಪರಿಣಾಮಕಾರಿ ಚಿಕಿತ್ಸೆಗಾಗಿ, ಸಕಾಲಿಕ ಪತ್ತೆ ನಿರ್ಣಾಯಕ ಪಾತ್ರ ವಹಿಸುತ್ತದೆ. ಆಗಾಗ್ಗೆ, ನಮ್ಮ ಹಳ್ಳಿಗಳಲ್ಲಿ, ಕ್ಯಾನ್ಸರ್ ಮುಂದುವರಿದ ಹಂತದಲ್ಲಿರುವುದರಿಂದ ಜನರು ತಡವಾಗಿ ಕ್ಯಾನ್ಸರ್ ಬಗ್ಗೆ ಜಾಗೃತರಾಗುತ್ತಾರೆ. ಅಂತಹ ಸಂದರ್ಭಗಳನ್ನು ತಪ್ಪಿಸಲು, ಕೇಂದ್ರ ಸರ್ಕಾರವು ಗ್ರಾಮ ಮಟ್ಟದಲ್ಲಿ 1.5 ಲಕ್ಷಕ್ಕೂ ಹೆಚ್ಚು ಆಯುಷ್ಮಾನ್ ಆರೋಗ್ಯ ಮಂದಿರಗಳನ್ನು ಸ್ಥಾಪಿಸಿದೆ. ಈ ಕೇಂದ್ರಗಳು ಕ್ಯಾನ್ಸರ್ ಸೇರಿದಂತೆ ವಿವಿಧ ತೀವ್ರ ರೋಗಗಳ ಆರಂಭಿಕ ಪತ್ತೆಗೆ ಆದ್ಯತೆ ನೀಡುತ್ತವೆ. ಕ್ಯಾನ್ಸರ್‌ನ ಆರಂಭಿಕ ಗುರುತಿಸುವಿಕೆಯು ವೈದ್ಯರಿಗೆ ಅದರ ಚಿಕಿತ್ಸೆಯಲ್ಲಿ ಸಹಾಯ ಮಾಡುತ್ತದೆ. ಕೇಂದ್ರ ಸರ್ಕಾರದ ಈ ಪ್ರಯತ್ನದಿಂದ ಮಹಿಳೆಯರು ಸಹ ಹೆಚ್ಚಿನ ಪ್ರಯೋಜನವನ್ನು ಪಡೆದಿದ್ದಾರೆ. ಗರ್ಭಕಂಠ ಮತ್ತು ಸ್ತನ ಕ್ಯಾನ್ಸರ್‌ನ ಆರಂಭಿಕ ಪತ್ತೆಯಲ್ಲಿ ಆಯುಷ್ಮಾನ್ ಆರೋಗ್ಯ ಮಂದಿರ ಪ್ರಮುಖ ಪಾತ್ರ ವಹಿಸಿದೆ.

ಸ್ನೇಹಿತರೇ,

ಕಳೆದ ಎರಡು ದಶಕಗಳಲ್ಲಿ, ಆರೋಗ್ಯ ಕ್ಷೇತ್ರದಲ್ಲಿ ಗುಜರಾತ್ ಅಭೂತಪೂರ್ವ ಪ್ರಗತಿಯನ್ನು ಕಂಡಿದೆ. ಇಂದು, ಇದು ಭಾರತದಲ್ಲಿ ನಿರ್ಣಾಯಕ ವೈದ್ಯಕೀಯ ಕೇಂದ್ರವಾಗಿ ಹೊರಹೊಮ್ಮುತ್ತಿದೆ. ಗುಜರಾತ್‌ನಲ್ಲಿ, ವೈದ್ಯಕೀಯ ಕಾಲೇಜುಗಳ ಸಂಖ್ಯೆ 11 ರಿಂದ 40ಕ್ಕೆ ಏರಿದೆ ಮತ್ತು ಎಂಬಿಬಿಎಸ್ ಸೀಟುಗಳು ಸುಮಾರು ಐದು ಪಟ್ಟು ಹೆಚ್ಚಳವನ್ನು ಕಂಡಿವೆ. ಪಿಜಿ ಸೀಟುಗಳು ಮೂರು ಪಟ್ಟು ಹೆಚ್ಚಾಗಿದೆ. ಮತ್ತು ರಾಜ್‌ಕೋಟ್‌ನಲ್ಲಿ ಏಮ್ಸ್ ಸೇರ್ಪಡೆಯು ರಾಜ್ಯದ ವೈದ್ಯಕೀಯ ಪ್ರಗತಿಯನ್ನು ಮತ್ತಷ್ಟು ಸೂಚಿಸುತ್ತದೆ. 2002 ರವರೆಗೆ, ಗುಜರಾತ್‌ನಲ್ಲಿ ಕೇವಲ 13 ಫಾರ್ಮಸಿ ಕಾಲೇಜುಗಳು ಇದ್ದವು, ಆದರೆ ಈಗ ಈ ಸಂಖ್ಯೆ ಸುಮಾರು 100 ಕ್ಕೆ ಏರಿದೆ. 20 ವರ್ಷಗಳಲ್ಲಿ, ಡಿಪ್ಲೊಮಾ ಫಾರ್ಮಸಿ ಕಾಲೇಜುಗಳ ಸಂಖ್ಯೆಯೂ 6 ರಿಂದ 30ಕ್ಕೆ ಏರಿದೆ. ಗುಜರಾತ್ ಆರೋಗ್ಯ ರಕ್ಷಣೆಯಲ್ಲಿ ಪ್ರಮುಖ ಸುಧಾರಣೆಗಳ ಮಾದರಿಯನ್ನು ಪ್ರದರ್ಶಿಸಿದೆ. ಇಲ್ಲಿ, ಪ್ರತಿ ಹಳ್ಳಿಯಲ್ಲಿ ಸಮುದಾಯ ಆರೋಗ್ಯ ಕೇಂದ್ರಗಳನ್ನು ತೆರೆಯಲಾಯಿತು; ಬುಡಕಟ್ಟು ಮತ್ತು ಬಡ ಪ್ರದೇಶಗಳಿಗೆ ಆರೋಗ್ಯ ಸೌಲಭ್ಯಗಳನ್ನು ವಿಸ್ತರಿಸಲಾಗಿದೆ ಮತ್ತು ಗುಜರಾತ್‌ನಲ್ಲಿ 108 ಆಂಬ್ಯುಲೆನ್ಸ್‌ಗಳ ಸೌಲಭ್ಯದ ಬಗ್ಗೆ ಜನರ ನಂಬಿಕೆ ನಿರಂತರವಾಗಿ ಬಲಗೊಂಡಿದೆ.

ನನ್ನ ಕುಟುಂಬ ಸದಸ್ಯರೇ,

ದೇಶದ ಅಭಿವೃದ್ಧಿಗಾಗಿ, ಅದರ ಜನರ ಆರೋಗ್ಯ ಮತ್ತು ಶಕ್ತಿ ಅತ್ಯಗತ್ಯ. ಖೋಡಲ್ ಮಾತೆಯ ಆಶೀರ್ವಾದದಿಂದ ನಮ್ಮ ಸರ್ಕಾರವು ಇದಕ್ಕೆ ಬದ್ಧವಾಗಿದೆ. ಆಯುಷ್ಮಾನ್ ಭಾರತ್ ಯೋಜನೆಯ ಪ್ರಾರಂಭವು ದುರ್ಬಲರು ಗಂಭೀರ ಕಾಯಿಲೆಗಳಿಗೆ ಚಿಕಿತ್ಸೆ ಪಡೆಯುವಲ್ಲಿ ಅಡೆತಡೆಗಳನ್ನು ಎದುರಿಸುವುದಿಲ್ಲ ಎಂದು ಖಚಿತಪಡಿಸುತ್ತದೆ. ಈ ಯೋಜನೆಯಡಿಯಲ್ಲಿ ಆರು ಕೋಟಿಗೂ ಹೆಚ್ಚು ವ್ಯಕ್ತಿಗಳಿಗೆ ಚಿಕಿತ್ಸೆ ನೀಡಲಾಗಿದೆ, ಇದರಲ್ಲಿ ಗಮನಾರ್ಹ ಸಂಖ್ಯೆಯ ಕ್ಯಾನ್ಸರ್ ರೋಗಿಗಳು ಸೇರಿದ್ದಾರೆ. ಆಯುಷ್ಮಾನ್ ಭಾರತ್ ಇಲ್ಲದಿದ್ದರೆ, ಈ ವ್ಯಕ್ತಿಗಳು ಒಂದು ಲಕ್ಷ ಕೋಟಿ ರೂಪಾಯಿಗಳವರೆಗೆ ಖರ್ಚು ಮಾಡುತ್ತಿದ್ದರು. ನಮ್ಮ ಸರ್ಕಾರವು 10,000 ಜನೌಷಧಿ ಕೇಂದ್ರಗಳನ್ನು ಸಹ ತೆರೆದಿದೆ, ಅಲ್ಲಿ ಜನರು ಶೇಕಡಾ 80 ರಷ್ಟು ರಿಯಾಯಿತಿಯಲ್ಲಿ ಔಷಧಿಗಳನ್ನು ಪಡೆಯುತ್ತಿದ್ದಾರೆ. ಈಗ ಸರ್ಕಾರವು ಪ್ರಧಾನ ಮಂತ್ರಿ ಜನೌಷಧಿ ಕೇಂದ್ರಗಳ ಸಂಖ್ಯೆಯನ್ನು 25,000 ಕ್ಕೆ ಹೆಚ್ಚಿಸಲಿದೆ. ಕೈಗೆಟುಕುವ ಔಷಧಿಗಳಿಂದಾಗಿ, ರೋಗಿಗಳು ಆಸ್ಪತ್ರೆಯ ಬಿಲ್‌ಗಳಲ್ಲಿ 30 ಸಾವಿರ ಕೋಟಿ ರೂ.ಗಳನ್ನು ಉಳಿಸಿದ್ದಾರೆ. ಸರ್ಕಾರವು ಕ್ಯಾನ್ಸರ್ ಔಷಧಿಗಳ ಬೆಲೆಗಳನ್ನು ಸಹ ನಿಯಂತ್ರಿಸಿದೆ, ಇದು ಹಲವಾರು ಕ್ಯಾನ್ಸರ್ ರೋಗಿಗಳಿಗೆ ಪರಿಹಾರವನ್ನು ತಂದಿದೆ.

ಸ್ನೇಹಿತರೇ,

ನಾನು ನಿಮ್ಮೆಲ್ಲರೊಂದಿಗೆ ದೀರ್ಘಕಾಲದ ಸಂಪರ್ಕವನ್ನು ಹೊಂದಿದ್ದೇನೆ. ನಾನು ಪ್ರತಿ ಬಾರಿ ಭೇಟಿ ನೀಡಿದಾಗಲೂ, ನಾನು ಒಂದು ವಿನಂತಿಯನ್ನು ಮುಂದಿಡುತ್ತೇನೆ, ಮತ್ತು ಇಂದು, ನಾನು ಈ ವಿನಂತಿಗಳನ್ನು ಮತ್ತೊಮ್ಮೆ ಪುನರುಚ್ಚರಿಸಲು ಬಯಸುತ್ತೇನೆ. ಒಂದು ರೀತಿಯಲ್ಲಿ, ಅವು ನನ್ನ ಒಂಬತ್ತು ವಿನಂತಿಗಳಾಗಿವೆ. ದೇವಿಗೆ ಸಂಬಂಧಿಸಿದ ಆಧ್ಯಾತ್ಮಿಕ ಕಾರ್ಯಗಳನ್ನು ಪರಿಗಣಿಸುವಾಗ ನವರಾತ್ರಿಯನ್ನು ಚರ್ಚಿಸುವುದು ಸೂಕ್ತವಾಗಿದೆ. ಆದ್ದರಿಂದ, ನಾನು ಈ ವಿನಂತಿಗಳನ್ನು ದೈವಿಕ ಕೆಲಸದ ಸಂದರ್ಭದಲ್ಲಿ ರೂಪಿಸುತ್ತಿದ್ದೇನೆ. ನಿಮ್ಮಲ್ಲಿ ಹಲವರು ಈಗಾಗಲೇ ಈ ಹಲವಾರು ಕ್ಷೇತ್ರಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಂಡಿದ್ದೀರಿ ಎಂದು ನನಗೆ ಅರ್ಥವಾಗಿದೆ, ಆದರೂ ನಾನು ನಿಮಗಾಗಿ ಮತ್ತು ಯುವ ಪೀಳಿಗೆಗಾಗಿ ಈ ಒಂಬತ್ತು ವಿನಂತಿಗಳನ್ನು ಪುನರುಚ್ಚರಿಸುತ್ತೇನೆ. ಮೊದಲನೆಯದಾಗಿ, ಪ್ರತಿ ಹನಿ ನೀರನ್ನು ಸಂರಕ್ಷಿಸಿ ಮತ್ತು ನೀರಿನ ಸಂರಕ್ಷಣೆಯ ಬಗ್ಗೆ ಜಾಗೃತಿ ಮೂಡಿಸಿ. ಎರಡನೆಯದಾಗಿ, ಡಿಜಿಟಲ್ ವಹಿವಾಟಿನ ಬಗ್ಗೆ ಜಾಗೃತಿ ಮೂಡಿಸುತ್ತಾ ಹಳ್ಳಿಯಿಂದ ಹಳ್ಳಿಗೆ ಪ್ರಯಾಣಿಸಿ. ಮೂರನೆಯದಾಗಿ, ನಿಮ್ಮ ಗ್ರಾಮ, ಪ್ರದೇಶ ಮತ್ತು ನಗರವನ್ನು ಸ್ವಚ್ಛತೆಯ ಸಾರಾಂಶವನ್ನಾಗಿ ಮಾಡಲು ಶ್ರಮಿಸಿ. ನಾಲ್ಕನೆಯದಾಗಿ, ಸಾಧ್ಯವಾದಷ್ಟು ಸ್ಥಳೀಯ ಉತ್ಪನ್ನಗಳನ್ನು ಪ್ರಚಾರ ಮಾಡಿ ಮತ್ತು 'ಭಾರತದಲ್ಲಿ ತಯಾರಿಸಿದ' ಸರಕುಗಳನ್ನು ಮಾತ್ರ ಬಳಸಿ. ಐದನೆಯದಾಗಿ, ದೇಶವನ್ನು ಸಾಧ್ಯವಾದಷ್ಟು ಅನ್ವೇಷಿಸಿ ಮತ್ತು ನಿಮ್ಮ ರಾಷ್ಟ್ರದೊಳಗೆ ಪ್ರವಾಸೋದ್ಯಮಕ್ಕಾಗಿ ಪ್ರತಿಪಾದಿಸಿ. ಆರನೆಯದಾಗಿ, ನೈಸರ್ಗಿಕ ಅಥವಾ ಸಾವಯವ ಕೃಷಿ ಪದ್ಧತಿಗಳ ಬಗ್ಗೆ ರೈತರಿಗೆ ನಿರಂತರವಾಗಿ ಶಿಕ್ಷಣ ನೀಡಿ. ನನ್ನ ಏಳನೇ ವಿನಂತಿಯೆಂದರೆ ರಾಗಿ ಮತ್ತು ಶ್ರೀ-ಆನ್ನವನ್ನು ನಿಮ್ಮ ಆಹಾರದಲ್ಲಿ ಬಳಸಿ ಮತ್ತು ಅವುಗಳ ವ್ಯಾಪಕ ಬಳಕೆಯನ್ನು ಉತ್ತೇಜಿಸುವುದು. ಎಂಟನೆಯದಾಗಿ, ಫಿಟ್‌ನೆಸ್, ಯೋಗ ಅಥವಾ ಕ್ರೀಡೆಗಳನ್ನು ನಿಮ್ಮ ಜೀವನದಲ್ಲಿ ಅಳವಡಿಸಿಕೊಳ್ಳಿ. ಒಂಬತ್ತನೆಯದಾಗಿ, ಯಾವುದೇ ರೀತಿಯ ಮಾದಕ ದ್ರವ್ಯ ಮತ್ತು ವ್ಯಸನಗಳಿಂದ ದೂರವಿರಿ

ಸ್ನೇಹಿತರೇ,

ನಿಮ್ಮಲ್ಲಿ ಪ್ರತಿಯೊಬ್ಬರೂ ನಿಮ್ಮ ಜವಾಬ್ದಾರಿಗಳನ್ನು ಅತ್ಯಂತ ಸಮರ್ಪಣೆ ಮತ್ತು ಸಾಮರ್ಥ್ಯದಿಂದ ಪೂರೈಸುವುದನ್ನು ಮುಂದುವರಿಸುತ್ತೀರಿ ಎಂದು ನನಗೆ ವಿಶ್ವಾಸವಿದೆ. ಅಮ್ರೇಲಿಯಲ್ಲಿ ನಿರ್ಮಾಣ ಹಂತದಲ್ಲಿರುವ ಕ್ಯಾನ್ಸರ್ ಆಸ್ಪತ್ರೆ ಒಟ್ಟಾರೆ ಸಮಾಜದ ಕಲ್ಯಾಣಕ್ಕೆ ಮಾದರಿಯಾಗಿ ಕಾರ್ಯನಿರ್ವಹಿಸುತ್ತದೆ. ಲೆವಾ ಪಾಟಿದಾರ್ ಸಮಾಜ ಮತ್ತು ಶ್ರೀ ಖೋಡಲ್‌ಧಾಮ್ ಟ್ರಸ್ಟ್‌ಗೆ ಅವರ ಮುಂಬರುವ ಪ್ರಯತ್ನಗಳಿಗಾಗಿ ನಾನು ನನ್ನ ಶುಭಾಶಯಗಳನ್ನು ಸಲ್ಲಿಸುತ್ತೇನೆ. ಮಾ ಖೋಡಲ್ ಅವರ ಆಶೀರ್ವಾದದೊಂದಿಗೆ ನೀವು ಸಾಮಾಜಿಕ ಸೇವೆಯಲ್ಲಿ ತೊಡಗಿಸಿಕೊಳ್ಳುವುದನ್ನು ಮುಂದುವರಿಸಲಿ. ಮತ್ತೊಮ್ಮೆ, ನಿಮ್ಮೆಲ್ಲರಿಗೂ ನನ್ನ ಹೃತ್ಪೂರ್ವಕ ಶುಭಾಶಯಗಳು.

ನಾನು ವಿದಾಯ ಹೇಳುವ ಮೊದಲು, ಇನ್ನೊಂದು ವಿಷಯವನ್ನು ತಿಳಿಸಬಯಸುತ್ತೇನೆ. ಇತ್ತೀಚಿನ ದಿನಗಳಲ್ಲಿ, ದೇವರ ಕೃಪೆಯಿಂದ, ಲಕ್ಷ್ಮಿ ದೇವಿಯು ಈ ಸ್ಥಳವನ್ನು ಅಲಂಕರಿಸಿದ್ದಾಳೆ ಮತ್ತು ನಾನು ಸಂತೋಷಗೊಂಡಿದ್ದೇನೆ. ಆದಾಗ್ಯೂ, ವಿದೇಶದಲ್ಲಿ ಮದುವೆಗಳನ್ನು ನಡೆಸುವುದು ಸೂಕ್ತವೇ? ನಮ್ಮ ಸ್ವಂತ ದೇಶದಲ್ಲಿ ಮದುವೆಗಳು ನಡೆಯಲು ಸಾಧ್ಯವಿಲ್ಲವೇ? ಈ ಅಭ್ಯಾಸದಿಂದಾಗಿ ಭಾರತದಿಂದ ಹೊರಹೊಮ್ಮುವ ಗಮನಾರ್ಹ ಪ್ರಮಾಣದ ಸಂಪತ್ತನ್ನು ಪರಿಗಣಿಸಿ! ಈ ಪ್ರವೃತ್ತಿ ನಮ್ಮ ಸಮಾಜವನ್ನು ಮುಟ್ಟದಿರಲಿ. ಮಾ ಖೋಡಲ್ ಅವರ ದೈವಿಕ ಪಾದಗಳಲ್ಲಿ ವಿವಾಹಗಳನ್ನು ಏಕೆ ಮಾಡಬಾರದು? ಅದಕ್ಕಾಗಿಯೇ ನಾನು 'ಭಾರತದಲ್ಲಿ ವಿವಾಹ' ಎಂದು ಪ್ರಸ್ತಾಪಿಸುತ್ತೇನೆ; ವಿವಾಹಗಳನ್ನು ಭಾರತದಲ್ಲಿಯೇ ಮಾಡಿಕೊಳ್ಳಿ. 'ಮೇಡ್ ಇನ್ ಇಂಡಿಯಾ' ನಂತೆ, 'ಭಾರತದಲ್ಲೇ ವಿವಾಹ' ಆಗಲಿ. ನೀವು ನನಗೆ ಕುಟುಂಬದವರಂತೆ , ನಿಮ್ಮೆಲ್ಲರೊಂದಿಗೆ ನನ್ನ ಆಲೋಚನೆ ಹಂಚಿಕೊಂಡಿದ್ದೇನೆ. ನಿಮ್ಮೆಲ್ಲರಿಗೂ ಶುಭಾಶಯಗಳು. ಧನ್ಯವಾದಗಳು.

ಜೈ ಮಾ ಖೋಡಲ್!

ಹಕ್ಕು ಸ್ವಾಮ್ಯ: ಇದು ಪ್ರಧಾನ ಮಂತ್ರಿ ಅವರ ಭಾಷಣದ ಅನುವಾದವಾಗಿದೆ. ಮೂಲ ಭಾಷಣವನ್ನು ಹಿಂದಿಯಲ್ಲಿ ಮಾಡಲಾಗಿದೆ.

*****