ಆಹಾರ ಸಂಸ್ಕರಣಾ ಕೈಗಾರಿಕೆಗಳ ಸಚಿವಾಲಯ (ಎಂಒಎಫ್ ಪಿಐ) ವಿಶ್ವ ಆಹಾರ ಭಾರತ (ಡಬ್ಲ್ಯುಎಫ್ಐ) 2025ರ ನಾಲ್ಕನೇ ಆವೃತ್ತಿಯನ್ನು 2025ರ ಸೆಪ್ಟೆಂಬರ್ 25 ರಿಂದ 28 ರವರೆಗೆ ನವದೆಹಲಿಯ ಭಾರತ ಮಂಟಪದಲ್ಲಿ ಆಯೋಜಿಸಲು ಸಜ್ಜಾಗಿದೆ. 1,00,000 ಚದರ ಮೀಟರ್ ವಿಸ್ತೀರ್ಣವನ್ನು ಒಳಗೊಂಡಿರುವ ಈ ಮೆಗಾ ಜಾಗತಿಕ ಆಹಾರ ಕಾರ್ಯಕ್ರಮವು 21ಕ್ಕೂ ಹೆಚ್ಚು ದೇಶಗಳು, 21 ಭಾರತೀಯ ರಾಜ್ಯಗಳು / ಕೇಂದ್ರಾಡಳಿತ ಪ್ರದೇಶಗಳು, 10 ಕೇಂದ್ರ ಸಚಿವಾಲಯಗಳು ಮತ್ತು 5 ಸಂಬಂಧಿತ ಸರ್ಕಾರಿ ಸಂಸ್ಥೆಗಳ ಭಾಗವಹಿಸುವಿಕೆಗೆ ಸಾಕ್ಷಿಯಾಗಲಿದೆ, ಇದು ಭಾರತದ ಆಹಾರ ಸಂಸ್ಕರಣಾ ಕ್ಷೇತ್ರದಲ್ಲಿ ಮಧ್ಯಸ್ಥಗಾರರ ಅತಿದೊಡ್ಡ ಸಮಾವೇಶವಾಗಿದೆ.

ಈ ಕಾರ್ಯಕ್ರಮವನ್ನು ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರು 2025ರ ಸೆಪ್ಟೆಂಬರ್ 25ರಂದು ಸಂಜೆ 6:00 ಗಂಟೆಗೆ ಉದ್ಘಾಟಿಸಲಿದ್ದಾರೆ. ಉದ್ಘಾಟನಾ ಅಧಿವೇಶನದಲ್ಲಿ ರಷ್ಯಾ ಒಕ್ಕೂಟದ ಉಪ ಪ್ರಧಾನಿ ಶ್ರೀ ಡಿಮಿಟ್ರಿ ಪಟ್ರುಶೆವ್, ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ಶ್ರೀ ನಿತಿನ್ ಗಡ್ಕರಿ, ಕೇಂದ್ರ ಆಹಾರ ಸಂಸ್ಕರಣಾ ಕೈಗಾರಿಕೆಗಳ ಸಚಿವ ಶ್ರೀ ಚಿರಾಗ್ ಪಾಸ್ವಾನ್ ಮತ್ತು ಆಹಾರ ಸಂಸ್ಕರಣಾ ಕೈಗಾರಿಕೆಗಳು ಮತ್ತು ರೈಲ್ವೆ ರಾಜ್ಯ ಸಚಿವ ಶ್ರೀ ರವ್ನೀತ್ ಸಿಂಗ್ ಬಿಟ್ಟು ಭಾಗವಹಿಸಲಿದ್ದಾರೆ.

ಮುಂಬರುವ ಕಾರ್ಯಕ್ರಮದ ಬಗ್ಗೆ ಮಾತನಾಡಿದ ಕೇಂದ್ರ ಆಹಾರ ಸಂಸ್ಕರಣಾ ಕೈಗಾರಿಕೆಗಳ ಸಚಿವ ಶ್ರೀ ಚಿರಾಗ್ ಪಾಸ್ವಾನ್, "ವಿಶ್ವ ಆಹಾರ ಭಾರತ ಕೇವಲ ವ್ಯಾಪಾರ ಪ್ರದರ್ಶನವಲ್ಲ, ಆದರೆ ಭಾರತವನ್ನು ಆಹಾರ ನಾವೀನ್ಯತೆ, ಹೂಡಿಕೆ ಮತ್ತು ಸುಸ್ಥಿರತೆಯ ಜಾಗತಿಕ ಕೇಂದ್ರವನ್ನಾಗಿ ಮಾಡುವ ಪರಿವರ್ತಕ ವೇದಿಕೆಯಾಗಿದೆ. ಪ್ರಧಾನಮಂತ್ರಿ ಶ್ರೀ ನರೇಂದ್ರ ಮೋದಿ ಅವರ ನಾಯಕತ್ವದಲ್ಲಿ ಈ ಕಾರ್ಯಕ್ರಮವು ಸುಸ್ಥಿರ, ಅಂತರ್ಗತ ಮತ್ತು ಭವಿಷ್ಯಕ್ಕೆ ಸಿದ್ಧವಾದ ಆಹಾರ ವ್ಯವಸ್ಥೆಗಳಿಗೆ ನಮ್ಮ ಬದ್ಧತೆಯನ್ನು ಪ್ರದರ್ಶಿಸುತ್ತದೆ ಮತ್ತು ವಿಶ್ವದ ಆಹಾರ ಬುಟ್ಟಿಯಾಗಿ ಭಾರತದ ಸ್ಥಾನವನ್ನು ಬಲಪಡಿಸುತ್ತದೆ ಎಂದು ಹೇಳಿದರು.

ವಿಶ್ವ ಆಹಾರ ಭಾರತ 2025 ರ ಪ್ರಮುಖ ಮುಖ್ಯಾಂಶಗಳು:

• ಪಾಲುದಾರ ರಾಷ್ಟ್ರಗಳು: ನ್ಯೂಜಿಲೆಂಡ್ ಮತ್ತು ಸೌದಿ ಅರೇಬಿಯಾ
• ಕೇಂದ್ರೀಕೃತ ದೇಶಗಳು: ಜಪಾನ್, ರಷ್ಯಾ, ಯುಎಇ ಮತ್ತು ವಿಯೆಟ್ನಾಂ
• ಭಾಗವಹಿಸುವಿಕೆ: 1700ಕ್ಕೂ ಹೆಚ್ಚು ಪ್ರದರ್ಶಕರು, 500ಕ್ಕೂ ಹೆಚ್ಚು ಅಂತಾರಾಷ್ಟ್ರೀಯ ಖರೀದಿದಾರರು ಮತ್ತು 100 ಕ್ಕೂ ಹೆಚ್ಚು ರಾಷ್ಟ್ರಗಳ ಪ್ರತಿನಿಧಿಗಳು
• ವಿಷಯಾಧಾರಿತ ಚರ್ಚೆಗಳು, ರಾಜ್ಯ ಮತ್ತು ದೇಶ-ನಿರ್ದಿಷ್ಟ ಸಮ್ಮೇಳನಗಳು ಮತ್ತು 100ಕ್ಕೂ ಅಧಿಕ ಜಾಗತಿಕ ಕೃಷಿ-ಆಹಾರ ನಾಯಕರೊಂದಿಗೆ ಸಿಎಕ್ಸ್ ಒ ದುಂಡುಮೇಜಿನ ಸಭೆಗಳು ಸೇರಿದಂತೆ 45ಕ್ಕೂ ಜ್ಞಾನ ಅಧಿವೇಶನಗಳು
• ಸಮಾನಾಂತರ ಘಟನೆಗಳು:
• 3ನೇ ಜಾಗತಿಕ ಆಹಾರ ನಿಯಂತ್ರಕರ ಶೃಂಗಸಭೆ (ಎಫ್ಎಸ್ಎಸ್ಎಐ) - ಜಾಗತಿಕ ಆಹಾರ ಸುರಕ್ಷತಾ ಮಾನದಂಡಗಳ ಸಾಮರಸ್ಯವನ್ನು ಉತ್ತೇಜಿಸಲು
• 24ನೇ ಭಾರತ ಅಂತಾರಾಷ್ಟ್ರೀಯ ಸಮುದ್ರಾಹಾರ ಪ್ರದರ್ಶನ (ಎಸ್ಇಎಐ) - ಭಾರತದ ಸಮುದ್ರಾಹಾರ ರಫ್ತು ಸಾಮರ್ಥ್ಯವನ್ನು ಬಿಂಬಿಸಲು
• ರಿವರ್ಸ್ ಖರೀದಿದಾರ-ಮಾರಾಟಗಾರರ ಸಭೆ (ಎಪಿಇಡಿಎ) - 1000 ಕ್ಕೂ ಹೆಚ್ಚು ಖರೀದಿದಾರರ ಭಾಗವಹಿಸುವಿಕೆಯೊಂದಿಗೆ
• ವಿಶೇಷ ಪ್ರದರ್ಶನಗಳು: ಅಂತಾರಾಷ್ಟ್ರೀಯ ಪೆವಿಲಿಯನ್ ಗಳು, ರಾಜ್ಯ ಮತ್ತು ಸಚಿವಾಲಯದ ಪೆವಿಲಿಯನ್ ಗಳು, ಸಾಕುಪ್ರಾಣಿಗಳ ಆಹಾರ ಪೆವಿಲಿಯನ್, ತಂತ್ರಜ್ಞಾನ ಪೆವಿಲಿಯನ್ ಮತ್ತು ಎಂಒಎಫ್ ಪಿಐ ಸ್ಟಾರ್ಟ್-ಅಪ್ ಇನ್ನೋವೇಶನ್ ಪೆವಿಲಿಯನ್

ಈ ವರ್ಷದ ಆವೃತ್ತಿಯನ್ನು ಐದು ಪ್ರಮುಖ ಸ್ತಂಭಗಳ ಸುತ್ತ ರೂಪಿಸಲಾಗಿದೆ:

1. ಸುಸ್ಥಿರತೆ ಮತ್ತು ನಿವ್ವಳ ಶೂನ್ಯ ಆಹಾರ ಸಂಸ್ಕರಣೆ
2. ಜಾಗತಿಕ ಆಹಾರ ಸಂಸ್ಕರಣಾ ಕೇಂದ್ರವಾಗಿ ಭಾರತ
3. ಆಹಾರ ಸಂಸ್ಕರಣೆ, ಉತ್ಪನ್ನಗಳು ಮತ್ತು ಪ್ಯಾಕೇಜಿಂಗ್ ತಂತ್ರಜ್ಞಾನಗಳಲ್ಲಿ ಗಡಿಗಳು
4. ಪೌಷ್ಠಿಕಾಂಶ, ಆರೋಗ್ಯ ಮತ್ತು ಸ್ವಾಸ್ಥ್ಯಕ್ಕಾಗಿ ಆಹಾರ
5. ಜಾನುವಾರು ಮತ್ತು ಸಾಗರ ಉತ್ಪನ್ನಗಳು ಭಾರತೀಯ ಗ್ರಾಮೀಣ ಆರ್ಥಿಕತೆಯ ತ್ವರಿತಗೊಳಿವಿಕೆ

ಇದಲ್ಲದೆ, ಶ್ರೀ ಚಿರಾಗ್ ಪಾಸ್ವಾನ್ ಅವರು "ಆಹಾರ ಸಂಸ್ಕರಣೆಯ ವಿವಿಧ ಪರಿಕಲ್ಪನೆಗಳ ಕುರಿತು ಪದೇ ಪದೇ ಕೇಳಲಾಗುವ ಪ್ರಶ್ನೆಗಳು" ಎಂಬ ಶೀರ್ಷಿಕೆಯ ಪ್ರಕಟಣೆಯನ್ನು ಸಹ ಬಿಡುಗಡೆ ಮಾಡಿದರು. ಉದ್ಯಮದ ಮಧ್ಯಸ್ಥಗಾರರೊಂದಿಗೆ ಸಮಾಲೋಚಿಸಿ ಸಿದ್ಧಪಡಿಸಲಾದ ಈ ಉಪಕ್ರಮವು ಸಂಸ್ಕರಿಸಿದ ಆಹಾರಗಳ ಸುತ್ತಲಿನ ಮಿಥ್ಯೆಗಳನ್ನು ಹೋಗಲಾಡಿಸಲು ಮತ್ತು ಗ್ರಾಹಕರಲ್ಲಿ ತಿಳುವಳಿಕೆಯುಳ್ಳ ಆಯ್ಕೆಗಳನ್ನು ಉತ್ತೇಜಿಸಲು ವಿಜ್ಞಾನ ಆಧಾರಿತ ಮಾಹಿತಿಯನ್ನು ಒದಗಿಸಲು ಪ್ರಯತ್ನಿಸುತ್ತದೆ.

ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯ, ಮೀನುಗಾರಿಕೆ ಇಲಾಖೆ, ಪಶುಸಂಗೋಪನೆ ಮತ್ತು ಹೈನುಗಾರಿಕೆ ಇಲಾಖೆ, ಎಂಎಸ್ಎಂಇ ಸಚಿವಾಲಯ, ಎಪಿಇಡಿಎ, ಎಂಪಿಇಡಿಎ ಮತ್ತು ಸರಕು ಮಂಡಳಿಗಳು ಸೇರಿದಂತೆ ವಿವಿಧ ಸರ್ಕಾರಿ ಸಚಿವಾಲಯಗಳು, ಇಲಾಖೆಗಳು ಮತ್ತು ಸಂಸ್ಥೆಗಳ ಅಮೂಲ್ಯ ಕೊಡುಗೆಗಳನ್ನು ಸಚಿವಾಲಯವು ಗುರುತಿಸಿದೆ, ಅವರ ಪ್ರಯತ್ನಗಳು ಈ ಬೃಹತ್ ಕಾರ್ಯಕ್ರಮದ ಯಶಸ್ವಿ ಸಂಘಟನೆಯನ್ನು ಖಚಿತಪಡಿಸಿವೆ.

ವಿಶ್ವ ಆಹಾರ ಭಾರತ 2025 ಒಂದು ಹೆಗ್ಗುರುತಿನ ಜಾಗತಿಕ ವೇದಿಕೆಯಾಗಲಿದೆ ಎಂದು ಭರವಸೆ ನೀಡುತ್ತದೆ. ಆಹಾರ ಸಂಸ್ಕರಣೆಯಲ್ಲಿ ಭಾರತದ ಪರಿವರ್ತಕ ಪ್ರಯಾಣವನ್ನು ಪ್ರದರ್ಶಿಸುತ್ತದೆ, ಜೊತೆಗೆ ಅಂತಾರಾಷ್ಟ್ರೀಯ ಸಹಯೋಗಗಳು ಮತ್ತು ಹೂಡಿಕೆ ಅವಕಾಶಗಳನ್ನು ಉತ್ತೇಜಿಸುತ್ತದೆ.

*****