ମହାମହିମ,

ଆପଣଙ୍କ ମୂଲ୍ୟବାନ ଅନ୍ତର୍ଦୃଷ୍ଟି ଏବଂ ପରାମର୍ଶ ପାଇଁ ସମସ୍ତଙ୍କୁ ଧନ୍ୟବାଦ। ଆମେ ଭାରତ ଏବଂ ଏସିଆନ ମଧ୍ୟରେ ବ୍ୟାପକ ରଣନୈତିକ ସହଭାଗୀତାକୁ ସୁଦୃଢ଼ କରିବା ପାଇଁ ପ୍ରତିବଦ୍ଧ। ମୁଁ ନିଶ୍ଚିତ ଯେ ଆମେ ମିଳିତ ଭାବରେ ମାନବ କଲ୍ୟାଣ, ଆଞ୍ଚଳିକ ଶାନ୍ତି, ସ୍ଥିରତା ଏବଂ ସମୃଦ୍ଧି ପାଇଁ ପ୍ରୟାସ ଜାରି ରଖିବୁ।

ଆମେ କେବଳ ଭୌତିକ ସଂଯୋଗୀକରଣ ନୁହେଁ ବରଂ ଆର୍ଥିକ, ଡିଜିଟାଲ୍, ସାଂସ୍କୃତିକ ଏବଂ ଆଧ୍ୟାତ୍ମିକ ସମ୍ପର୍କକୁ ବୃଦ୍ଧି କରିବା ପାଇଁ ପଦକ୍ଷେପ ନେବା ଜାରି ରଖିବୁ।

ବନ୍ଧୁଗଣ,

ଏହି ବର୍ଷର ଏସିଆନ ଶିଖର ସମ୍ମିଳନୀର ବିଷୟବସ୍ତୁ, "ସଂଯୋଗ ଏବଂ ସ୍ଥିରତା ବୃଦ୍ଧି କରିବା" ପରିପ୍ରେକ୍ଷୀରେ, ମୁଁ କିଛି ଚିନ୍ତାଧାରା ବାଣ୍ଟିବାକୁ ଚାହେଁ।

ଆଜି ଦଶମ ମାସର ଦଶମ ଦିନ, ତେଣୁ ମୁଁ ଦଶଟି ପରାମର୍ଶ ବାଣ୍ଟିବାକୁ ଚାହେଁ।

ପ୍ରଥମେ, ଆମ ମଧ୍ୟରେ ପର୍ଯ୍ୟଟନକୁ ପ୍ରୋତ୍ସାହିତ କରିବା ପାଇଁ, ଆମେ 2025 କୁ "ଏସିଆନ - ଭାରତ ପର୍ଯ୍ୟଟନ ବର୍ଷ" ଭାବରେ ଘୋଷଣା କରିପାରିବା। ଏହି ପଦକ୍ଷେପ ପାଇଁ, ଭାରତ 5 ନିୟୁତ ଆମେରିକୀୟ ଡଲାର ପାଇଁ ପ୍ରତିବଦ୍ଧ ହେବ।

ଦ୍ୱିତୀୟତଃ, ଭାରତର ପୂର୍ବରେ କାର୍ଯ୍ୟ କରିବା ନୀତିର ଏକ ଦଶନ୍ଧି ପାଳନ କରିବା ପାଇଁ, ଆମେ ଭାରତ ଏବଂ ଏସିଆନ ଦେଶଗୁଡ଼ିକ ମଧ୍ୟରେ ବିଭିନ୍ନ କାର୍ଯ୍ୟକ୍ରମ ଆୟୋଜନ କରିପାରିବା। ଆମର କଳାକାର, ଯୁବପିଢ଼ି, ଉଦ୍ୟୋଗୀ ଏବଂ ବୁଦ୍ଧିଜୀବୀ ଇତ୍ୟାଦିଙ୍କୁ ସଂଯୋଗ କରି, ଆମେ ଏହି ଉତ୍ସବର ଅଂଶ ଭାବରେ ସଙ୍ଗୀତ ମହୋତ୍ସବ, ଯୁବ ସମ୍ମିଳନୀ, ହାକାଥନ ଏବଂ ଷ୍ଟାର୍ଟ-ଅପ୍ ମହୋତ୍ସବ ଭଳି ପଦକ୍ଷେପଗୁଡ଼ିକୁ ଅନ୍ତର୍ଭୁକ୍ତ କରିପାରିବା।

ତୃତୀୟତଃ, "ଭାରତ - ଏସିଆନ ବିଜ୍ଞାନ ଏବଂ ପ୍ରଯୁକ୍ତିବିଦ୍ୟା ପାଣ୍ଠି" ଅଧୀନରେ, ଆମେ ଏକ ବାର୍ଷିକ ମହିଳା ବୈଜ୍ଞାନିକ ସମ୍ମିଳନୀ ଆୟୋଜନ କରିପାରିବା।

ଚତୁର୍ଥତଃ, ନୂତନ ଭାବରେ ପ୍ରତିଷ୍ଠିତ ନାଳନ୍ଦା ବିଶ୍ୱବିଦ୍ୟାଳୟରେ ଏସିଆନ ଦେଶଗୁଡ଼ିକର ଛାତ୍ରମାନଙ୍କ ପାଇଁ ମାଷ୍ଟର୍ସ ସ୍କଲାରସିପ୍ ସଂଖ୍ୟା ଦୁଇଗୁଣ ବୃଦ୍ଧି କରାଯିବ। ଏହା ସହିତ, ଏହି ବର୍ଷ ଠାରୁ ଭାରତର କୃଷି ବିଶ୍ୱବିଦ୍ୟାଳୟଗୁଡ଼ିକରେ ଏସିଆନ ଛାତ୍ରଛାତ୍ରୀମାନଙ୍କ ପାଇଁ ଏକ ନୂତନ ବୃତ୍ତି ଯୋଜନା ମଧ୍ୟ ଆରମ୍ଭ କରାଯିବ।

ପଞ୍ଚମତଃ, "ଏସିଆନ - ଭାରତ ସାମଗ୍ରୀ ବାଣିଜ୍ୟ ଚୁକ୍ତିନାମା" ର ସମୀକ୍ଷା 2025 ସୁଦ୍ଧା ସମାପ୍ତ ହେବା ଉଚିତ। ଏହା ଆମର ଆର୍ଥିକ ସମ୍ପର୍କକୁ ସୁଦୃଢ଼ କରିବ ଏବଂ ଏକ ସୁରକ୍ଷିତ, ସ୍ଥିର ଏବଂ ନିର୍ଭରଯୋଗ୍ୟ ଯୋଗାଣ ଶୃଙ୍ଖଳ ସୃଷ୍ଟି କରିବାରେ ସାହାଯ୍ୟ କରିବ।

ଷଷ୍ଠତଃ, ବିପର୍ଯ୍ୟୟ ପ୍ରତିରୋଧୀ କାର୍ଯ୍ୟ ପାଇଁ, "ଏସିଆନ - ଭାରତ ପାଣ୍ଠି" ରୁ 5 ନିୟୁତ ଆମେରିକୀୟ ଡଲାର ଆବଣ୍ଟନ କରାଯିବ। ଭାରତର ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ ଏବଂ ଏସିଆନ ମାନବିକ ସହାୟତା କେନ୍ଦ୍ର ଏହି କ୍ଷେତ୍ରରେ ଏକାଠି କାମ କରିପାରିବେ।

ସପ୍ତମରେ, ସ୍ୱାସ୍ଥ୍ୟ ସୁରକ୍ଷା ସୁନିଶ୍ଚିତ କରିବା ପାଇଁ, ଏସିଆନ - ଭାରତ ସ୍ୱାସ୍ଥ୍ୟ ମନ୍ତ୍ରୀ ବୈଠକକୁ ସଂସ୍ଥାଗତ କରାଯାଇପାରିବ। ଏହା ବ୍ୟତୀତ, ଆମେ ଭାରତର ବାର୍ଷିକ ଜାତୀୟ କର୍କଟ ଗ୍ରୀଡ୍ 'ବିଶ୍ୱମ୍ ସମ୍ମିଳନୀରେ' ଯୋଗଦେବା ପାଇଁ ପ୍ରତ୍ୟେକ ଏସିଆନ ଦେଶରୁ ଦୁଇ ଜଣ ବିଶେଷଜ୍ଞଙ୍କୁ ନିମନ୍ତ୍ରଣ କରୁଛୁ।

ଅଷ୍ଟମରେ, ଡିଜିଟାଲ୍ ଏବଂ ସାଇବର ସ୍ଥିରତା ପାଇଁ, ଭାରତ ଏବଂ ଏସିଆନ ମଧ୍ୟରେ ଏକ ସାଇବର ନୀତି ଆଲୋଚନାକୁ ସାଂଗଠନିକ କରାଯାଇପାରିବ।

ନବମରେ, ଏକ ସବୁଜ ଭବିଷ୍ୟତକୁ ପ୍ରୋତ୍ସାହିତ କରିବା ପାଇଁ, ମୁଁ ଭାରତ ଏବଂ ଏସିଆନ ଦେଶଗୁଡ଼ିକର ବିଶେଷଜ୍ଞମାନଙ୍କୁ ନେଇ ସବୁଜ ହାଇଡ୍ରୋଜେନ ଉପରେ କର୍ମଶାଳା ଆୟୋଜନ କରିବାର ପ୍ରସ୍ତାବ ଦେଉଛି।

ଏବଂ ଦଶମରେ, ଜଳବାୟୁରେ ସନ୍ତୁଳନ ରକ୍ଷା କରିବା ପାଇଁ, ମୁଁ ଆପଣ ସମସ୍ତଙ୍କୁ ଆମର ଅଭିଯାନ, "ଏକ ପେଡ୍ ମା କେ ନାମ" (ମା ପାଇଁ ଗୋଟିଏ ଗଛ ଲଗାନ୍ତୁ) ରେ ଯୋଗ ଦେବାକୁ ଅନୁରୋଧ କରୁଛି।

ମୁଁ ନିଶ୍ଚିତ ଯେ ମୋର ଦଶଟି ଚିନ୍ତାଧାରା ଆପଣଙ୍କ ସମର୍ଥନ ଲାଭ କରିବ। ଏବଂ ଆମର ଦଳଗୁଡ଼ିକ ସେଗୁଡ଼ିକୁ କାର୍ଯ୍ୟକାରୀ କରିବା ପାଇଁ ସହଯୋଗ କରିବେ।

ଆପଣଙ୍କୁ ବହୁତ ବହୁତ ଧନ୍ୟବାଦ।

ସ୍ୱୀକାର - ଏହା ପ୍ରଧାନମନ୍ତ୍ରୀଙ୍କ ମନ୍ତବ୍ୟର ଆନୁମାନିକ ଅନୁବାଦ। ମୂଳ ମନ୍ତବ୍ୟ ହିନ୍ଦୀରେ ଦିଆଯାଇଥିଲା।

***

SSP