গঙ্গা ইমানা য়াইফরে,

গঙ্গা ইমানা য়াইফরে,

গঙ্গা ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে,

ভারত ইমানা য়াইফরে!

উত্তরাখন্দগী ঐগী নুংশিরবা ইচিল-ইনাওশিং, ময়াম পুম্নমক্তা ঐহাক্না খুরুমজরি!

মফম অসিদা লৈরিবা থৌনা ফরবা মুখ্য মন্ত্রী, ঐগী ইনাও পুশকর সিংহ ধামিজী, কেন্দ্রগী মন্ত্রী শ্রী অজয় তামতাজী, রাজ্যগী মন্ত্রী সত্যপাল মহারাজজী, পার্লিয়ামেন্ততা ঐগী মরুপ ওইরিবা অমসুং ভারত জনতা পার্তীগী স্তেৎ প্রসিদেন্ত মহেন্দ্র ভত্তজী, পার্লিয়ামেন্ততা ঐগী মরুপ ওইরিবা,  মালা রাজ্যলক্ষ্মীজী, এম.এল.এ. সুরেশ চৌহানজী, দিগ্নিতরী পুম্নমক, ইচিল-ইনাওশিং।

অহানবদা, ঐহাক্না মানা খুঙ্গংদা নুমিৎ খরনিগী মমাংদা থোকখিবা খুদোংথিবা থৌদোক অদুগী মতাংদা ঐহাক্কী অৱাবা ফোংদোকচরি। ঐনা থৌদোক অদুদা লৈখিদ্রবশিংগী ইমুং-মনুংশিংদা ঐগী অৱাবা ফোংদোকচরি। খুদোংচাদবা মতম অসিদা লৈবাক অসিগী মীয়াম্না উৎখিবা অমত্তা ওইনা লেপ্পবগী ইথিল অসিনা শোকহল্লবা ইমুংশিংদা চাউরবা থৌনা পীরি।

মরুপশিং,

উত্তরাখন্দগী লম অসি, ঐখোয়গী দেবভূমি অসি, স্পিরিচুএল ইনর্জীনা মপুং ফাহল্লি। ধাম মরি অমসুং মশিং থিঙমদ্রবা লাই খুরুমফম, পুন্সি পীবা গঙ্গাগী মফম অসিদা ঙসি অমুক হন্না মফম অসিদা লাকপা অসিদা ঐহাক্না নুংঙাইবা ফাওই। গঙ্গাগী মীনুংশি অসিনা মরম ওইদুনা ঐহাক্না চহি তরাগী খুজিং কয়াদগী উত্তরাখন্দদা সেবা তৌবগী খুদোংচাবা ফংলি। ঐহাক্না থাজৈ মদুদি মহাক্কী য়াইফ-মঙ্গোলনা মরম ওইদুনা ঐহাক কাশীদা য়ৌরকখি, অমসুং হৌজিক ঐহাক্না এম.পি. ওইরে অমসুং মসিনা মরম ওইদুনা কাশীদা ঐনা হায়খি মদুদি মা গঙ্গানা ঐবু কৌরি। অমসুং থা খরগী মমাংদা, গঙ্গা ইমানা ঐহাকপু নাওয়োকপীরে হায়না ফাওখি। মসি গঙ্গাগী মীনুংশি অদুনি। মহাক্কী মচা অসিগীদমক মহাক্কী নুংশিবা অসিনা মরম ওইদুনা ঙসি ঐহাক ঐহাক্কী ইমাগী ময়ুম মুখ্বা খুঙ্গংদা লাক্লে। মফম অসিদা ঐহাক্না দর্শন অমসুং মুখিমথ-মখ্বাদা লাই খুরুমবগী অফবা খুদোংচাবা ফংজখি।

 মরুপশিং,

ঙসি ঐহাক হর্সিলগী লমদম অসিদা লাকপদা, ঐহাক্না ঐহাক্কী দিদি-ভুলিয়নগী নুংশিবা অদুসু নীংশিংলি। মখোয়না ঐঙোন্দা হর্সিল রাজমা অমসুং অতোপ্পা মফমসিগী পোত্থোকশিং থারকখি। মসিগী নুংশিবা অমসুং খুদোল অসিগীদমক্তা ঐহাক ময়ামগী মফমদা থাগৎচরি।

 মরুপশিং,

চহি খরগী মমাংদা, ঐহাক বাবা কেদর্নাথতা দর্শনগীদমক্তা চৎখি। দর্শন অমসুং বাবাগী মফমদা ইকায় খুম্নবা উৎলবা মতুংদা, ঐহাক্না বাবাগী খোঙবুদা চংখি। হায়রিবা ৱাহৈশিং অসি ঐহাক্কীনি, হায়রিবা ৱাখল্লোনশিং অসি ঐহাক্কীনি, অদুবু মখোয়শিং অসিগী মপুং ওইবা শক্তি অসি বাবা কেদর্নাথ মশামক্না পীরম্মি। বাবা কেদরগী য়াইফ-পাউজেলগা লোয়ননা ঐহাক্না উবা ফংলি মদুদি হায়রিবা ৱাহৈশিং অসি, হায়রিবা ৱাখল্লোনশিং অসি তপ্না তপ্না অচুম্বা ওইরক্লি, তশেংনা ওইরক্লি। হায়রিবা দিকেদ অসি উত্তরাখন্দগী দিকেদ ওইরক্লি। উত্তরাখন্দগী চাউখৎ-থৌরাংগীদমক অনৌবা লম্বীশিং হাংলি। উত্তরাখন্দগী চাউখৎ-থৌরাংগীদমক ঐখোয়না লৌখিবা ৱারেপশিং, অনৌবা মাইপাকপা অমসুং অনৌবা পান্দমগী মায়কৈদা নোংম-নোংমগী খোংজেল য়াঙখৎপা, ঙসি ৱারেপশিং অসি মপুং ফাহল্লক্লি। মসিগী মাইকৈ অসিদা, থৱানমিচাক্কী তুরিজম অসি য়াম্না মরু ওইবা অতোপ্পা খোংথাং অমনি। মসিগী খুত্থাংদা, উত্তরাখন্দগী শেন্মিৎলোনগী ওইথোকপা য়াবশিং খঙবদা অচৌবা মতেং পাংগনি। ঐহাক্না ধামি জী অমসুং উত্তরাখন্দ সরকারবু মসিগী অনৌবা খোংথাং অসিগীদমক থাগৎপা ফোংদোকচরি অমসুং উত্তরাখন্দগী চাউখৎ-থৌরাংগীদমক য়াইফ-মঙ্গোল পীজরি।

 মরুপশিং,

উত্তরাখন্দগী তুরিজম সেক্তরবু চহিগী চুপ্পা, নুমিৎ ৩৬৫নিগী ওইনা মখল-মখা কয়া থোকহনবা অসি য়াম্না মরু ওই। ঐহাক্না উত্তরাখন্দদা তুরিজম অসি চহিগী মতমগী খেন্নবা লৈতনা লৈহনবা পাম্মি। হৌজিক্কী মতম অসি থোঙ লোনবগী মতমনি, থোঙ লোনবগী নত্তে। হৌজিক্কী ওইনা, পর্বন্তশিংদা তুরিজম অসি মতমগী মতুং ইন্না চৎলি। অদোম পুম্নমক্না খঙনরবা মতুং ইন্না, মার্চ, এপ্রিল, মে অমসুং জুন থাদা তুরিস্ত মশিং য়াম্না লাকই, অদুবু মদুগী মতুংদা মখোয়গী মশিং অদু য়াম্না হন্থরকই। নীংথম থাগী মতমদা, হোতেল, রিজোর্ৎ অমসুং হোমস্তে অয়াম্বদি হাংলগা লৈ। উত্তরাখন্দদা চহিগী শরুক কয়া অমা অসিগুম্বা ইমবেলেন্স অসিনা মরম ওইরগা ইকনোমীদা তপ্না তপ্না হন্থরকই । মসিনা অকোয়বগী ফিভমদসু শিংনবা অমা ওইহল্লি।

 মরুপশিং,

অচুম্বা ৱাফমদি ভারত অমসুং মপান লৈবাক্কী মীওইশিংনা মফম অসিদা লাক্লবদি মখোয়না দেবভূমিগী অশেংবা মশক অদু উবা ফংলগনি। ৱিন্তর তুরিজমদা ত্রেকিং, স্কিং অসিনচিংবা থবক থৌরমশিং অসি মফম অসিগী মীয়াম্বু তশেংনা নুংঙাইহল্লগনি। উত্তরাখন্দদা ধর্মগী খোঙচৎ চৎপদা অঙনবা মতম অসি য়াম্না অখন্নবা মতম অমনি। মসিগী মতমসিদা লাই খুরুমফম কয়াদা অখন্নবা থৌরম কয়া পাঙথোক্নৈ। মুখ্বা খুঙ্গংদা য়েংবীয়ু, মফম অসিদা পাংথোকপা লাইনিংগী থৌরমশিং অসি ঐখোয়গী অরিবা অমসুং অঙকপা চৎনবীগী শরুক অমনি। মরম অদুনা, উত্তরাখন্দ সরকারগী চহি চুপ্পগী ওইবা তুরিজমগী মীৎয়েং, নুমিৎ ৩৬৫নিগী তুরিজমগী মীৎয়েং অসিনা মীয়ামদা লাইগী ওইবা এক্সপরিয়েন্সকা শম্নবগী খুদোংচাবা অমা পীরগনি। মসিনা চহি চুপ্পগী ওইনা ফংলিবা থবক পীবগী খুদোংচাবশিং হেনগৎহল্লগনি। মসিনা উত্তরাখন্দগী লোকেল মীয়াম, মফমসিগী নহারোলশিংদা কান্নবা ফংহল্লগনি।

 মরুপশিং,

ঐখোয়গী দবল ইঞ্জিন সরকারনা উত্তরাখন্দবু চাউখৎলবা রাজ্য অমা ওইহন্নবা পুন্না হোৎনরি। চারধাম-ওল ৱেতর রোদ, মোদর্ন এক্সপ্রেসৱে, রেলৱে, এয়রক্রাফ অমসুং হেলিকোপ্তর সর্বিসশিং রাজ্য অসিদা পাকথোক চাউথোকহনখ্রে। হৌখিবা চহি ১০ অসিদা উত্তরাখন্দ অসি য়াম্না থুনা চাউখৎলে। ঙরাং খক্তদা কেন্দ্র সরকারনা উত্তরাখন্দগীদমক য়াম্না চাউবা ৱারেপ লৌখি। ঙরাং কেন্দ্রগী মন্ত্রীমন্দলনা কেদারনাথ রোপৱে প্রোজেক্ত অমসুং হেমকুন্দ রোপৱে প্রোজেক্ত অয়াবা পীখ্রে। কেদর্নাথ রোপৱে শেম্লবা মতুংদা, পুং ৮দগী ৯ ফাওবগী খোঙচৎ অসি হৌজিক্তি মিনিৎ ৩০দা লোইশিনগনি। মসিনা কেদরনাথকী খোঙচৎ অসি চহি য়াম্লবা মীওইশিং, অঙাংশিং অমসুং নুপীশিংগীদমক হেন্না লায়থোকহল্লগনি। রোপৱে প্রোজেক্তশিং অসিদা লুপা করোর লিশিং কয়া চাদিং তৌগনি। প্রোজেক্তশিং অসিগীদমক্তা উত্তরাখন্দ য়াওনা লৈবাক পুম্ববু ঐনা থাগৎচরি।

 মরুপশিং,

ঙসি, ইকো লোঘু, কনভেন্সন সেন্তরশিং, চীংগী লমশিংদা হেলিপেদ ইনফ্রাস্ত্রকচরদা মীৎয়েং থম্লি। তিমর-সেন মহাদেব, মানা খুঙ্গং, উত্তরাখন্দগী জাদুং খুঙ্গংদা অনৌবা তুরিজম ইনফ্রাস্ত্রকচর অমা শেমগৎলি। অদুগা লৈবাক মীয়ামনা খঙবা য়াই, খঙদবা য়াই, ১৯৬২দা, চাইনানা ভারত লান্দারকপা মতমদা, ঐখোয়গী জাদুং খুঙ্গং, ঐখোয়গী খুঙ্গং অনি অসি লাঞ্জেন্নখি। চহি ৬০-৭০গী মতুংদা, মীয়াম্না কাউরমলগনি, ঐখোয়নদি কাউবা লৈতে, খুঙ্গং অনি অসি অমুক হন্না রিসেত্তক তৌহন্নবা ঐখোয়না কেম্পেন অমা হৌদোক্লে, অমসুং মসি য়াম্না চাউবা তুরিজম দেস্তিনেসন অমা ওইহন্নবা ঐখোয়না মাংলোমদা চংশিল্লি। মসিগী মহৈদি চহি তরা অসিদা উত্তরাখন্দদা তুরিস্ত মশিং য়াম্না হেনগৎলকপা অসিনি। ২০১৪গী মমাংদা চারধাম য়াত্রাদা চহি খুদিংগী চাংচত্তা তীর্থযাত্রী লাখ ১৮ লাকই। হৌজিক্না চহি খুদিংগী লাই খুরুম্বা মীওই লাখ ৫০রোম লাকপা হৌরে। চহি অসিগী বজেৎতা তুরিস্ত দিস্তিনেসন ৫০ চাউখৎহন্নবা প্রোভিজন অমা শেমখ্রে। হায়রিবা মফমশিং অসিদা লৈরিবা হোতেলশিং অসি ইনফ্রাস্ত্রকচরগী থাক অমা পীরগনি। মসিনা তুরিস্তশিংগীদমক খুদোংচাবশিং হেনগৎহল্লগনি অমসুং লোকেল এমপ্লোয়মেন্তসু হেনগৎহল্লগনি।

মরুপশিং,

উত্তরাখন্দগী ঙমখৈগী মফমশিংদা তুরিজমগী অখন্নবা কান্নবা ফংহন্নবা ঐখোয়না হোৎনরি। মমাংদা, ঙমখৈদা লৈবা খুঙ্গংশিংবু অরোইবা খুঙ্গংশিং হায়না কৌনরম্মি। ঐখোয়না মসিগী মীৎয়েং অসি হোংদোক্লে, ঐখোয়না হায়খি মদুদি মসি ঐখোয়গী অরোইবা খুঙ্গংশিং নত্তে, মসি ঐখোয়গী অহানবা খুঙ্গংশিংনি। মখোয়গী চাউখৎ-থৌরাংগীদমক ঐখোয়না ভাইব্রেন্ত ভিলেজ প্রোগ্রাম হৌদোক্লে। লমদম অসিগী খুঙ্গং ১০ অসিসু স্কিম অসিদা য়াওরে। ঐহাক্না খঙহনখি মদুদি খুঙ্গং অদুদগী মরুপ খরসু ঙসি ঐখোয়গী মমাংদা লৈরে। ঐনা ১৯৬২দা থোকখিবা অদুগী মতাংদা ফোংদোকখিবা, নেলং অমসুং জেদুং খুঙ্গংশিংবু অমুক হন্না সেত্তল তৌবগী থবক হৌখ্রে। ঙসি, ঐহাক্না মফমসিদগী জেদোং ফাওবগী বাইক রেলী অমা হৌদোক্লে। হোমস্তে শাবশিংদা মুদ্রা য়োজনাগী কান্নবা ফংহন্নবা ঐখোয়না লাউথোকখ্রে। উত্তরাখন্দ সরকারনসু রাজ্য অসিদা হোমস্তেশিং প্রমোৎ তৌনবা হোৎনরি। চহি তরাগী খুজিং কয়াদগী ইনফ্রাস্ত্রকচর লৈতবা খুঙ্গংশিংদা, অনৌবা হোমস্তেশিং হাংদোকপনা মরম ওইদুনা তুরিজম হেনগৎলক্লি, অমসুং মীয়ামগী ইনকমসু হেনগৎলক্লি।

 মরুপশিং,

ঙসি ঐহাক্না দেবভূমিদগী, লৈবাক অসিগী নোংপোক-নোংচুপ-অৱাং-মখা অমসুং ময়াইদগী, মরু ওইনা নহা ওইরিবা মীরোলশিং, অমসুং মসিগী অশেংবা লমদম, মা গঙ্গাগী য়ুমদগী লৈবাক অসিগী নহা ওইরিবা মীরোলশিংদা অখন্ননা আপিল তৌরি অমসুং হায়জরি।

 মরুপশিং,

লৈবাক অসিগী অয়াম্বা শরুকশিংদা নুমিৎ উবা ফংদ্রিঙৈ অমসুং চীংজাওশিং অসিদা নুমিৎ মঙাল ফংই। মসি অখন্নবা থৌরম অমা ওইবা য়াই। অমসুং গারহৱালিদা ঐখোয়না মসিবু করি কৌগনি? 'গাম তাপো পেরিয়তান', চুম্ব্রা? 'গাম তাপো পেরিয়তান'। মসিগীদমক্তা, লৈবাক অসিগী মফম খুদিংমক্তগী লাকপা মীওইশিংনা উত্তরাখন্দদা চৎকদবনি। মরু ওইনা কোর্পোরেৎ ৱার্ল্দদগী ঐখোয়গী মরুপশিং অসি ৱিন্তর তুরিজমগী শরুক অমা ওইগদবনি। মীফমশিং, কনফরেন্সশিং, একজিবিসনশিং পাংথোক্কদৌরবদি, নীংথম মতম অমসুং দেবভূমিদগী হেন্না অফবা মফম অমা লৈতে। ঐহাক্না কোর্পোরেৎ ৱার্ল্দগী শক্নাইরবা মীওইশিংবুসু মখোয়গী অচৌবা সেমিনারশিংগীদমক উত্তরাখন্দদা লাক্নবা, এম.আই.সি.ই. মীওইশিংনা য়োগ অমসুং অয়ুর্বেদকী খুত্থাংদা মফম অসিদা লাকপগা লোয়ননা রিচার্জ অমসুং রি-ইনর্জাইজ তৌগনি। ঐহাক্না লৈবাক অসিগী য়ুনিভর্সিতীশিং, প্রাইবেৎ স্কুলশিং অমসুং কোলেজশিংদা লৈরিবা নহা ওইরিবা মরূপ পুম্নমকপু মহৈরোইশিংগী অইং-অশাগী খোঙচৎকীদমক্তা উত্তরাখন্দবু খনবীনবসু হায়জরি।

 মরুপশিং,

ঐখোয়গী ইকোনোমী অসি লুপা করোর লিশিং কয়াগীনি, লুহোংবগী ইকোনোমীনি, লুহোংবগী থৌরমশিংদা লুপা করোর লিশিং কয়া চাদিং তৌই, মসি য়াম্না চাউবা ইকোনোমী অমনি। অদোম্না নীংশিংগনি, ঐহাক্না লৈবাক অসিগী মীয়ামদা হায়জখি মদুদি ভারত্তা লুহোংবীয়ু, ভারত্তা লুহোংবীয়ু, ঙসিদি মীওই কয়ানা মালেমগী অতোপ্পা লৈবাকশিংদা চৎলি, মফম অসিদা করি লৈতবগে? মফম অসিদা শেল থাদবিয়ু, অমসুং উত্তরাখন্দদগী হেন্না অফবা করি লৈবগে। ঐহাক্না লৈবাক মীয়াম্বু হায়জখি মদুদি নীংথম থাগী মতমদা দেস্তিনেসন ৱেতিংগীদমক উত্তরাখন্দবু অখন্নবা মফম অমা ওইনা লৌবিয়ু। মসিগা মান্ননা, ঐহাক্না ভারতকী ফিল্ম ইন্দস্ত্রীদগী য়াম্না চাউনা আশা তৌরি। উত্তরাখন্দনা খ্বাইদগী ফিল্ম ফ্রেন্দলী স্তেৎকী এৱার্দ ফংখ্রে। মোদর্ন ফেসিলিতীশিং অসি মফম অসিদা য়াম্না থুনা দিবেলপ তৌরি। মরম অসিনা, উত্তরাখন্দ অসি শারিঙৈ মনুংদা ফিল্ম শুতিং তৌনবগীদমক্তা ভারত পুম্বগী খ্বাইদগী পাম্নবা মফম অমা ওইরকপা ঙমগনি।

মরুপশিং,

মালেমগী লৈবাক কয়াদা নোংজু থাগী তুরিজম য়াম্না পাম্নৈ। উত্তরাখন্দদা ৱিন্দর তুরিজম প্রমোৎ তৌনবা, অমসুং মসিগীদমক ঐখোয়না অসিগুম্বা লৈবাকশিং অসিদগী কয়া অমা তম্বা য়াগনি। উত্তরাখন্দগী তুরিজম সেক্তরগা মরী লৈনবা স্তেকহোল্দর পুম্নমক, হোতেলশিং অমসুং রিজোর্ৎশিংনা লৈবাকশিং অসি নৈনগদবনি হায়না ঐনা হায়জরি। হৌজিক ঐহাক মফম অসিদা লৈরে, অপীকপা একজিবিসন অমা উরে, মসি ঐহাক্না য়াম্না থাগৎনীংই, হৌজিক শেম্লিবা মোদর্ন ক্রীএসনশিং, মফম খুদিংমক্কী ফোতো খুদিংমক অদুক্কী মতিক শীংথানীংঙাই ওই মদুদি ঐহাক্না অমুক হন্না মফম অসিদা লাক্নবা অমসুং ঐহাক্কী চহি ৫০গী পুন্সিগী নুমিৎশিং অসি নখোয়গী মরক্তা কায়থোক্নবা, অমসুং মফম খুদিংমক্তা চৎপগী খুদোংচাবা ফংনবা মফমশিং অসিদা লাক্নবা হোৎনরি। ফোরেন স্তদীশিংদগী ফংবা থবক ওইনা পাংথোকপা য়াবা ৱাফমশিংদা উত্তরাখন্দ সরকারনা থবক পায়খৎনবা ঐহাক্না হায়জবা পাম্মি । ঐখোয়না লোকেল ত্রেদিসনশিং, ম্যুজিক, দান্স অমসুং ক্যুজিনবু প্রমোৎ তৌগদবনি। মফম অসিদা হোৎ স্প্রিং কয়া লৈরি, মসি বদ্রীনাথ খক্তা নত্তে, মসিদগী হেন্না কয়া অমসু লৈরি, হায়রিবা মফমশিং অসি ৱেলনেস স্পা ওইনা শেমগৎপা য়াই। নীংথম থাগী মতমদা য়োগ রিত্রীৎশিং অসি ইং চিকপা অমসুং উন তাবা মফমশিংদা শিনবা য়াই। ঐহাক্না অচৌবা মুনিশিং, মোনাস্ত্রীশিং অমসুং লাইশঙশিংগী মকোকশিং অমসুং য়োগাগী ওজা পুম্নমকপু চহি অমদা অমুত্তং নীংথম থাগী মতমদা উত্তরাখন্দদা মখোয়গী মহৈরোইশিংগীদমক য়োগাগী কেম্প অমা পাংথোক্নবা হায়জরি। নীংথম থাগী মতমগীদমক্তা অখন্নবা ৱাইল্দলাইফ সাফারিগী এত্রেক্সন অসি উত্তরাখন্দগী অখন্নবা মশক অমা ওইরকপা য়াই। মসিনা তাক্লিবদি ঐখোয়না দিগ্রী ৩৬০গী এপ্রোচ অমগা লোয়ননা খোংজেল য়াংনা চংশিনবা তাই অমসুং লেভেল খুদিংমক্তা থবক তৌগদবনি।

 মরুপশিং,

ফেসিলিতীশিং শেমগৎপগা লোয়ননা মীয়ামদা ই-পাউ পীবা অসিসু চপ মান্ননা মরু ওই। মসিগীদমক, ঐহাক্না লৈবাক অসিগী নহা ওইরিবা কন্তেন্ত ক্রিএতরশিংদা হায়জনীংই, ঙসিদি সোসিএল মেদিয়াদা কন্তেন্ত ক্রিএতরশিং, ইনফ্লুয়েন্সরশিং মশিং য়াম্না লৈরে। মখোয়না ঐগী উত্তরাখন্দ, ঐগী দেবভূমিগী সেবা তৌবা ঙমগনি। লৈবাক অসিগী তুরিজম সেক্তর খোংজেল য়াংশিলহনবদা, মীয়ামদা পাউ য়ৌহনবদা অদোম্না অচৌবা থৌদাং লৌবা য়াই। অদোম্না লৌরিবা থৌদাং অসি মখা তানা পাকথোক চাউথোকহনবগী মথৌ তাই। উত্তরাখন্দদা ৱিন্তর তুরিজমগী কেম্পেন অসিদা অদোমসু শরুক য়াবিয়ু। উত্তরাখন্দ সরকারনা অচৌবা কম্পিতিসন অমা পাংথোক্নবা ঐহাক্না হায়জরি। মসিগী কন্তেন্ত ক্রিএতরশিং, ইনফ্লুয়েন্সরশিংনা ৱিন্তর তুরিজম প্রমোৎ তৌনবা মিনিত ৫গী ফিল্ম অমা পুথোক্কদবনি। মখোয়গী কম্পিতিসন অমা পাংথোক্কদবনি অমসুং খ্বাইদগী ফবা ফিল্ম পুথোক্লিবা মীওই অদুদা খ্বাইদগী ফবা প্রাইজ অমা পীগদবনি। অমসুং ঐহাক্না থাজৈ মদুদি অসিগুম্বা কম্পিতিসনশিং অসি পাংথোকপা মতমদা, অনৌবা মফমশিং থিদোক্কনি, অনৌবা ফিল্মশিং পুথোক্কনি, মীয়ামদা মসিগী মরমদা খঙহনগনি।

 মরুপশিং,

লাক্কদৌরিবা চহিশিংদা ঐখোয়না সেক্তর অসিদা য়াম্না থুনা চাউখৎলকপা উবা ফংলগনি হায়না ঐনা থাজবা থম্লি। অমুক্কা হন্না নুমিৎ ৩৬৫নি চুপ্না চত্থগদবা তুরিজম কেম্পেনগীদমক্তা ঐহাক্না য়াইফ-পাউজেল পীজরি। উত্তরাখন্দগী ঐহাক্কী ইচিল-ইনাওশিং অমসুং রাজ্য সরকারবু ঐহাক্না থাগৎচরি। ময়াম পুম্নমক্না ঐগা লোয়ননা হায়বিয়ু-

ইমা গঙ্গানা য়াইফরে,

ভারত ইমানা য়াইফরে,

ভারত ইমানা য়াইফরে,

হন্না-হন্না থাগৎচরি।

খঙহঞ্জবা: মসি পি.এম.গী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***