প্রধান মন্ত্রী  শ্রী নরেন্দ্র মোদীনা ঙসি নই দিল্লীগী বিজ্ঞান ভবন্দা 98 শুবা অখিল ভারতীয় মরাথী সাহিত্য সম্মেলন হৌদোকখ্রে। থৌরম অসিদা তিল্লিবা মীয়ামদা ৱা ঙাংলদুনা নই দিল্লীদা হৌদোকখিবা মরাথী লোলগী অঙকপনা থল্লবা থৌরম অসিদা মরাথীশিংবু তরাম্না ওকখি।  মহাক্না হায়খি অখিল ভারতীয় মরাথী সাহিত্য সম্মেলন অসি করিগুম্বা লোল নত্রগা লম অমনা লোইবা নত্তবদা নত্তনা সম্মেলন অসিনা নিংতম লালগী লৈনমদা নত্তনা মহারাস্ত্র অমসুং লৈবাক অসিগী নাৎ-চৎনবীগী তুংনফমসুনি।

শ্রী মোদীনা হায়খি মদুদি অখিল ভারতীয় মরাথী সাহিত্য সম্মেলন 1878 দা অহানবা হৌদোকখিবদগীনা ভারতকী চহী 147 গী খোংচৎকী সাক্ষী ওইদুনা লাক্লি। মহাক্না হায়খি মদুদি শ্রী মহাদেব গোবীন্দ রানাদে, শ্রী হরি নারায়ন আপ্তে, শ্রী মাধব, শ্রীহরি অনে, শ্রী শিবরাম পরাজ্ঞপে, শ্রী বীর সাৱরকরগুম্লবা লৈবাক অসিগী থোইদোক-হেন্দোক্না মশক নাইরবা মীওইশিংনা সম্মেলন অসিবু প্রিসাইদ তৌবিখ্রে। মহাক্না শ্রী শরদ পৱারনা চাওথোকচনিংঙাই ওইরবা চৎনবী অসিগী শরুক ওইবিনবা হায়বিরকপগীদমক্তা থাগৎলদুনা লৈবাক অমসুং মালেমসিগী মরাথীবু নুংশিজবা মীওই খুদিংমকপুসু নুংঙাইবা ফোংদোকখি।

প্রধান মন্ত্রীনা খরা মরুওইনা ঙসি অসি অন্তর্রাস্ত্রগী ইমালোল নুমীৎনি  হায়না পল্লদুনা হায়খি মদুদি মরাথী লোলগী মতাংদা খনবা মতমদা ঋষী জ্ঞানেশ্বরগী ৱাশক অদু নিংশিংবা হায়বসি মশানা তাবনি।  ঋষী জ্ঞানেশ্বরগী ৱারেং অদুগী মতাংদা শন্দোক্না হায়রদুনা শ্রী মোদীনা হায়খি মদুদি মরাথী লোল অসি অমৃতদগী হেন্না থু্ম্মী। মরম অসিনা  মরাথী লোল অমসুং মরাথীগী নাৎ-চৎনবীদা মহাক্না খোয়দাজরম্বা অমসুং নুংশিজরম্বা অদু মপান নাইদে। মহাক্না নোল্লুকপগা লোয়ননা হায়খি মদুদি মসিগী থৌরম অসিদা য়াওরিবা মরাথীগী খং-হৈরবশিং অদুক য়াম্না পন্দোন য়ৌবা নত্তবা তারগসু  মরাথী তম্নবগীদমক্তা লেপ্পা লৈতনা হোৎনরিবা ঙাক্তনি।

শ্রী মোদীনা ৱাফম অসিবু লুম্না লৌরদুনা সম্মেলন অসি মরুওইবা তাজ্ঞাদা পাংথোক্লিবা অসি ছত্রপতী শিবাজী মহারাজ নিংথৌ হাপখিবগী চহী 350 শুবদা, পুন্যশ্লোক অহিল্যাবাই হোল্করগী চহী 300 অমসুং বাবাসাহেব অম্বেদকরনা কন্না হোৎনবিরম্বদগী শেমখিবা সংবিধানগী চহী 75 শুবা পাংথোক্নরি। ৱাপম অসিদা ঐহাক্না চাওথোকচৈ মদুদি মহারাস্ত্র গী লম অসিদা মরাথী লোলগী থোইদোক-হেন্দোক্না খংলবা মীওইশিংনা  চহী 100 গী মমাংদা রাস্ত্রীয় স্বয়ম সেবক(আর.এস.এস.) কী মরু হুনখি,  শ্রী মোদীনা ৱাফম অমদা পুক্নিং চিংশিল্লদুনা হায়খি মদুদি ঙসি মফম অসিদা চাউরবা উপাল অমগুম্না চহী চাম্মা শুবগী কুমওন পাংথোক্লি। মহাক্না ৱাফম অসিদা লুম্না লৌরদুনা হায়খি মদুদি হৌখিবা চহী  100 দগী আর.এস.এস. না মহাক্কী চৎনরকপা মওংদা হোৎনদুনা বেদশিংদগী হৌরদুনা বিবেকানন্দফাওবা ভারতকী অথোইবা নাৎ-চৎনবী অসিবু অনৌবা মীরোল তান্না য়ৌহল্লি। প্রধান মন্ত্রীনা হায়খি মদুদি মহাক্কুম্না মীওই লাখ কয়া অমা আর.এস.এস. না লৈবাক অসিগীদমক্তা হিংননবা ইনোৎ হাপ্পিরি।  প্রধান মন্ত্রী মসিমসু য়াজখি মদুদি   আর.এস.এস. কী থোংদগী মহাক্না মরাথী লোল অমসুং ইপানাৎ-ইপুনাৎকা শম্ননবগী খুদোংচাবা অদু ফংজখি। মহাক্না মসিদা মীয়ামগী পুক্নিং চিংশিল্লদুা হায়খি মদুদি হৌখিবা থা খরগী মমাংদা মরাথী অসি ক্লাসিকেল লোলগী থাক্তা চলহনখিদুনা ভারত অমসুং মালেমপুম্বগী   মরাথী লোল ঙাংবা মীওই করোর 12 দগী হেনবনা চহী কয়া কয়াদগী ঙাইনরক্লি।  মহাক্না মসিগী থবক অসি তৌবা ফংজবা অসি লাইবক ফবনি হায়না ফোংদোকখি।  

প্রধান মন্ত্রী  হায়খি, “লোল অসি শুপ্নতগী ৱারী-ৱাতাই ফাওনবগী পাম্বৈখক্তা নত্তে মসিনা ঐখোয়গী ইপাৎ-ইপুংনাৎপু পুদুনা চৎপা অমসুনি।” মহাক্না হায়খি মদুদি লোলশিং অসি খুন্নাইদগী থোকচরক্লবসু খুন্নাই অসি শেম্বদা মরুওইবা থৌদাংসু লৌরি। মহাক্না ৱাফম অসিদা মীৎয়েং চিংশিনখি মদুদি মরাথীনা মহারাস্ত্র অমসুং লৈবাক অসিগী মীওই কয়াগী ৱাখল্লোনশিং ফোংদোকহনদুনা ঐখোয়গী ইপাৎ-ইপুনাৎ অসি চাউখৎহনবদা থৌদাং লৌরি। মরাথী লোলগী থোইোকপা মতিক-ময়াইশিং শৌগৎলোয় রামদাসজীগী ৱাহৈশিং শিংথানরদুনা প্রধান মন্ত্রীনা হায়খি, “মরাথী অসি মপুং ফারবা লোল অমনি, মসিদা থৌনা ফবগী মতৌ, ফজবা-নিংথিবা, খাংবা কনবা, মান্নবা, মরুপকুম নুংশি-চান্নবগী, স্পিরিচুএল ওইবা অমসুংঅনৌবা মওংগী ওইবনি।” মহাক্না হায়খি মদুদি মরাথীদা ভক্তি, শক্তি অমসুং মতিক-ময়াই শুনা য়াওরবসুনি।  শ্রী মোদীনা হায়খি মদুদি ভারত্তা স্পিরিচুএল ওইরবা ইনর্জীগী মথৌ তারকপদা  মহারাস্ত্রগী অথোইবা মুনীশিংনা ঋষিশিংগী জ্ঞান অদুবু  মরাথীদা ফংহনখি।  মহাক্না মরাথীগী ভক্তিগী ইহৌগী থোংদগী খুন্নাইদা অনৌবা লম্বী তাকপিখিবা মুনি জ্ঞানেশ্বর, মুনি তুকারাম, মুনি রামদাস, মুনি নামদেব, মুনি তুকরোজী মহারাজ, গাদৱে বাবা, গোরা কুমহার অমসুং বহীনাবাইনা লৌখিবা থৌদাং অদুবুসু হায়রম্মী। প্রধান মন্ত্রীনা অনৌবা মতমসিদা শ্রী গজানন্দ দিগম্বর মদগুলকর অমসুং শ্রী সুধীর ফরকেগী ইশৈনা রামায়ন্না পীরিবা ইথীলবু শিংথাদুনা হায়খি।

প্রধান মন্ত্রী ৱাফম অসিদা পুক্নিং চিংশিল্লম্মী মদুদি মীনাই নাইথাংগী শাংলবা চহী কয়াগী অমম্বা মতমদুদা   মরাথী লোল অসিনা লান্দাশিল্লকখিবশিং অদুগী নান্থোক্তুনা মায় পাকপগী খোল্লাও লাওখি। মহাক্না য়েক্নবশিংবু ইচং থৌনা মায়য়োং য়াখিবা ছত্রপতি শিবাজী মহারাজ, সমভাজী মহারাজ অমসুং বাজীরাও পেশৱাগুম্লবা মরাথা লান্মীশিংগী থৌনাবু শিংথাখিরম্মী। মহাক্না হায়খি মদুদি নিংতম লালহৌদা বাসুদেব বলৱন্ত ফরকে, লোকমান্য তিলক অমসুং বীর সাৱরকরগুম্লবা লান্মীশিংনা অংগ্রেজীশিংগী ৱাখল চায়খাইগীখিরম্মী। প্রধান মন্ত্রীনা মখোয়না লৌবিরম্বা থৌদাংশিং অদুদা   মরাথী লোল অমসুং সাহিত্যগী মরুওইবা থৌদাংদা মীৎয়েং চিংশিনখিরম্মী। শ্রী মোদীনা হায়খি কেসরী অমসুং মরাথাগুম্বা পাওচে, করি গোবিন্দরাজগী মতিং লৈরবা শৈরেংশিং অমসুং রাম গনেশ গদকরীগী দ্রামাশিংনা লৈবাক নিংবগী ইথীল অদু পোকহনখি। মহাক্না হায়খি লোকমান্য তিলকনা গীতা রহস্যসু মরাথীদা ইবিখিরম্মী অদুগা লৈবাকপুম্বদা অনৌবা থৌনা-পাঙ্গল হাপ্পীরমখি।  

শ্রী মোদীনা হায়খি, “মরাথী লোল অমসুং সাহিত্যনা খুন্নাইনা তুহৎপীরবা অমসুং শোত্থরবা মীওই কাংলুপশিংগীদমক্তা খুন্নাইগী ওইনা নিংতম্বগী থোং লাওনা হাংলি।” মহাক্না জ্যোতিবা ফুলে, সাবিত্রীবাই ফুলে, মহামুনী কর্বে অমসুং বাবাসাহেব অম্বেদকরগুম্লবা খুন্নাই শেমদোক্লোইগুম্বা মরাথীদা অনৌবা য়ুগকী ৱাখল্লোন অসিবু চিংশিল্লম্বশিংনা লৌখিবা থৌদাংশিং শিংথাদুনা হায়খি। মহাক্না হায়খি মদুদি মরাথী লোলনা লৈবাক অসিদা মপুং ফানা চোল্লবা জলিত সাহিচ্য পীবিরি।  মহাক্না ৱাপম অসিদা লুম্না লৌরদুনা অনৌবা মতমগী ৱাখল্লোনগী মরম্না  মরাথী সাহিত্যদা সাইন্সকী ৱারীশিংসু ইরি। আয়ুরবেদিক, সাইন্স অমসুং লোজিক্তা মহারাস্ত্রগী মীওইশিংনা ময়ামদগী তোঙানবা থৌদাং লৌই হায়নসু শ্রী মোদীনা হায়রদুনা নাৎ-চৎনবীনা মতম পুম্বদা অনৌবা ৱাখল্লোন অমসুং তেলেন্তশিং থোরকহন্দুনা মহরাস্ত্র অসি চাওখৎহল্লি হায়না ফোংদোকখি। মহাক্না হায়খি মদুদি মুম্বই অসি শুপ্নতগী মহারাস্ত্রখক্তগী নত্তে, মসি লৈবাক অসিগী শেল-থুমগী ওইবা কোনুং ওইদুনা চাওখৎলক্লি। প্রধান মন্ত্রী  হায়খি মদুদি মুম্বইগী মতাংদা হায়বদা ফিল্মশিংগী মতাংদা হায়দবা তারগদি সাহিত্যগী ৱাফম অসি মপুং ফারোই হায়না হায়খি। মহাক্না হায়খি মদুদি মহারাস্ত্র অমসুং মুম্বই অসিমক্নি মরাথী ফিল্মশিং অমসুং হিন্দী সিনেমা অনিমক অৱাংবা থাক্তা পুখৎলিবা। মহাক্না ফিল্ম 'ছাৱা' হায়রিবা শিবাজী সাৱন্তগী মরাথী উপন্যাসকী থোংদা সমভাজী মহারাজগী থৌনা ফবা উৎখিবা সিনেমা অসি হৌজিক মীয়াম্না পাম্নবগী মতাংদা হায়খি।

শ্রী মোদীনা কবি কেশবসুতকী মতাংদা কোত তৌদুনা লুম্না লৌরগা ঐখোয় অরিবা ৱাখন্দা শুম লুপ্তুনা লৈবা য়াদে অমদি মীওইবগী সভ্যতা, ৱাখল্লোন অমসুং লোল অসি লেপ্তনা চাওখৎলকপগী মতাংদসু হায়খি। মহাক্না পুক্নিং চিংশিল্লদুনা বারত অসি মালেমদা খ্বাইদগী চাওবা মমাংঙৈগী অহিংবা সভ্যতাশিংগী মরক্তা অমনি মরমদি মসি লেপ্তনা চাওখৎলি, অনৌব ৱাখল্লোনশিংগা শম্নৈ অমসুং অহোংবশিংবু তরাম্না ওকই। প্রধান মন্ত্রীনা ইঙ্গীৎ তৌরদুনা হায়খি মদুদি ভারতকী পাক-শন্না চাউরবা খেৎনবা লোলশিং চাওখৎলক্লিবা অসিনা মসিগী খুদম্নি অমসুং অপুনবা পাঙ্গলগী হৌরকফমসুনি হায়রদুনা মরাথী অসি মশিগী খেৎনবশিংসিগী খুদম্নি।  মহাক্না লোল অসি ইমাগা চাংদম্নরদুনা লোল অসিসু ইমাগুম্না অচান-মীরাই নাইদনা মচাশিংদা অনৌবা অমসুং পাক চাওরবা লৌশিং-গ্যান কয়া অমা পীবিরি হায়না হায়খি। মহাক্না হায়খি মদুদি লোল অসিনা ৱাখল্লোল অমসুং চাওখৎপা খুদিংমক মশানা কোনশিল্লি। শ্রী মোদীনা হায়খি মদুদি মরাথী অসি সংস্কৃত্তগী থোরকখিবনি  অমসুং মসিদা প্রাকৃতকী মমিসু য়াম্না তাই।  মহাক্না অথোইবা ৱাখল্লোন পুথোকপশিং অমসুং অইবশিংগী থৌদাংসু হাইলাইত তৌরদুনা মীওইবগী ৱাখলবু হেন্না হেন্না চাওথোকহনবা য়াই হায়না হায়খি। মহাক্না সংস্কৃত গীতাগী মতাংদা শন্দোক্না তাকপা অমসুং মরাথী লোলদা মীয়ামদা লাইনা খংহনবা লোকমান্য তিলক্কী গীতা রহস্যবু শিংথারদুনা হায়খি। মহাক্না মসিমসু পনখি মদুদি জ্ঞানেশ্বরী গীতাদসু সংস্কৃত্তা মরাথীদা নোতশিং ইদুনা ঙসি অখং-অহৈশিং অমসুং মুনীশিংগীদমক্তা গীতা অসি খংনবগীদমক্তা ওইরে। প্রধান মন্ত্রী  হায়খি মদুদি মরাথীনা অনিশুবা ভারতকী  লোলশিংদগী সাহিত্য লৌই অদুগা মদুগী মহুত্তা লোলশিং অদুবু চাওখৎহল্লি। মহাক্না 'আনন্দমথ' কুম্বা থবকশিং অসি মরাথীদা অর্থ হন্দোক্লিবা ভার্গবরাম ৱিত্থল বরেকর অমসুং পন্না ধ্যায়, দুগ্রাবতী অমসুং রানী পদ্মিনীগী পুন্সিদা য়ুম্ফম ওইবা লোল কয়াদা অর্থ হন্দোক্লবা ৱারেংশিং ইরিবা বিন্দা করমদিকরগুম্বা কয়াগী খুদম পীখি।  মহাক্না লুম্না লৌরদুনা হায়খি, “ভারতীকী লোলশিংগী মরক্তা করিগুম্বা য়ান্নদবা অমত্তা লৈতে।  মখোয়শিং অসি মতম পুম্নমক্তা অমগা অমগা য়াননা অমগা অমগা চাওখৎমিন্নৈ।”

প্রধান মন্ত্রী  ৱাফম অসিদা ইঙ্গিৎ তৌরদুনা হায়খি মদুদি লোলগী মিংদা খেৎনবা থম্নবা হোৎনরকপশিংদা ঐখোয়গী লোলশিংগী মমাংঙৈদগী লৈরকপা নিংথিরবা ইপানাৎ-ইপুনাৎনা মদুগী অচুম্বা পাওখুম পী। প্রধান মন্ত্রীনা লোলশিংবু চাওখরহল্লিবা অমসুং মখোয়বু মশাগী ওইনা লৌশিন্নবগী থৌদাংদা লুম্না লৌরদুনা চমম্নবা পুম্নমক লৈহন্দনবসু হায়খি। মহাক্না ৱাফম অসিদা হাইলাইত তৌরদুনা ভসিগী লৈবাক অসিগী লোলশিং অসি মেনস্ত্রীমগী লোলশিংগী মওংদা উনৈ। মহাক্না মরাথী য়াওনা অতৈ মরুওইবা লোলশিংদা মহৈ-মশিংবু হেন্না লুম্না লৌনবা থবকশিং পনখি।  শ্রী মোদীনা হায়খি মদুদি হৌজিক মহারাস্ত্রগী নহাশিং অসি মরাথীদা হায়র এজুকেসন, ইজ্ঞীনিয়রিং অমসুং মেদিকেল তম্বা য়ারগনি।  মহাক্না ৱাপম অসিদা লুম্না লৌরদুনা ইংলিশ নিংথিনা খংদবনা তেলেন্তশিং মশক খংবিদবগী ৱাখল্লোন অদু হোংখরে।   

শ্রী মোদীনা হায়খি, “সাহিত্য অসি খুন্নাইগী মিংশেল ওইবগা লোয়ন-লোয়ননা লমজিং-লমতাকপা অমসুনি” মহাক্না লৈবাকসিদা সাহিত্য সম্মেলন অমসুং সাহিত্যগা মরি লৈনবা ওর্গানাইজেসনশিংগী রোলদসু হায়খি।  মহাক্না আশা তৌরদুনা ফোংদোকখি মদুদি অখিল ভারতীয় মরাথী সাহিত্য মহামন্দল গোবিন্দ রানাদে, হরিনারায়ন আপ্তে, আচার্য অত্রে অমসুং বীর সাৱরকরগুম্লবা অথোইবা মীওইশিংনা শেম্বা ফীলোজোফীশিং মমাংলোমদা চিংশিনগনি। প্রধান মন্ত্রীনা ৱাফম অসিদা হাইলাইত তৌখি মদুদি 2027 দা সাহিত্য সম্মেলন তৌরকপগী চৎনবী অসি চহী 150 মপুং ফারগনি।  অদুগা 100 শুবা সম্মেলন পাংথোক্কনি। মহাক্না পুম্নমক্তগী থৌরম অসিবু মরুওইহন্নবা অদুগা হৌজিক্তগী হৌনা থৌরাং তৌবা হৌনবসু হায়খি। সোসিএল মেদিয়াগী থোংদা মরাথী সাহিত্যগী সর্ভিস তৌরিবা নহাশিংনা কন্না হোরনবশিং অদু য়ারদুনা প্রধান মন্ত্রীনা মখোয়দা প্লেৎফোর্ম পীননবা  অমসুং অমসুং মখোয়গী তেলেন্তশিং অদু মশক খংবিন্নবগীদমক্তা পুক্নিং থৌগৎখি। প্রধান মন্ত্রী না ওনলাইন প্লেৎফোর্ম অমসুং ভাষিনীগুম্বা থৌরাংশিংদগী মরাথী তম্নবা পুক্নিং থৌগৎপরেমদা লুম্না হায়খি। নহাশিংগী মরক্তা মরাথী লোল অমসুং সাহিত্যগা মরি লৈনবা চাংদম্নবশিং শিন্নবা সজেসনসু পীখি।  মহাক্না থাজবা ফোংদোকখি মদুদি মসিগী থৌরাং অমসুং মরাথী সাহিত্যগী ইথীলশিং হেনগৎহন্নবা ভারতকী ওইনা মীওই করোর 140 না পুক্নিং থৌগৎকনি। মহাক্না মহাদেব গোবিন্দ রানাদে, হরিনারায়ন আপ্তে, মাধব শ্রীহরি অনে অমসুং শিবরাম পরাজ্ঞপেদুম্বা থোইদোক্না মতিক ময়াই লৈরবা মীওইশিংগী অথোইবা চৎনবীবু অদুম্মক চৎনহন্নবা হায়জবগা লোয়ননা থাগৎপা ফোংদোক্তুনা লোইশিন ৱাফম থমখি।

থৌরমসিদা মহারাস্ত্রগী মুখ্যমন্ত্রী শ্রী দেবেন্দ্র ফরনবীস, সাংসদ(রাজ্যসভা) শ্রী শরদ পৱর, 98 শুবা সম্মেলনগী থৌরম মপু দা. তারা ভৱালকর য়াওনা অতৈ ইকাইখুম্ননিংঙাই ওইরবা মীওইশিং য়াওরমখি।

বেকগ্রাউন্দ

98 শুবা অখিল ভারতীয় মরাথী সাহিত্য সম্মেলন ফেব্রুৱারী 21 দগী 23 ফাওবা পাংথোক্কদৌরি অমসুং মসিদা পেনেল দিসকসন, বুক একজিবিসন, নাৎকী থৌরম, অমসুং লাক্লিবা সাহিস্থকারশিংগা ৱারী-ৱাতাই শান্নবসু থমগনি। মসিগী সম্মেলন অসিনা  মরাথী সাহিত্যগী লোইনাইদ্রবা মতাংশিং উৎকনি অদুগা কন্তেম্পোরেরী দিসকোর্স তৌদুনা মদুগী মরুওইবা রোল অদু খংদোক্কনি মদুদা লোলবু ঙাক শেনবা, ত্রান্সলেসন মসুং নাৎকী থবকশিংদা দিজিতাইজেসন তৌবগী মমিগুম্বা হীরমশিং য়াওগনি।  

লৈবাকসিগী কোনুংদা চহী 71 গী মতুংদা পাংথোক্কদৌরিবা  মরাথী সাহিত্য সম্মেলন্দা সাহিত্যগী শুনা য়াওরবা নিংথিজবা শো অমা উত্তুনা পুনেদগী দিল্লীফাওবা সিম্পোলিক ওইবা সাহিত্যগী ত্রেনগী খোংচৎ অসিসু য়াওরি। মসিদা পার্তিসিপেন্ত 1,200 শরুক য়াগনি।  সম্মেলনসিদা শৈরেং লাইরিক 2,600 হেন্না উৎকনি, লাইরিক 50 লোঞ্চ তৌগনি অমসুং বুক স্তোল 100 হাংগনি। লৈবাক শিন-থুংবদগী অখং-অহৈ, অইবা, কবি অমসুং সাহিত্যবু নুংশিজবশিংনা শরুক য়াগনি।

***