ঙসি প্রধান মন্ত্রী শ্রী নরেন্দ্র মোদীনা রাজ্য সভাদা রাষ্ট্রপতিগী ৱারোলগী মোসন ওফ থেঙ্কসতা পাউখুম পীখ্রে। হাওসতা ৱা ঙাংবদা, প্রধান মন্ত্রীনা হায়খি রাষ্ট্রপতিগী ৱারোলদা ভারতকী মাইপাকপশিং, মালেম্না ভারত্ত থম্লিবা থাজবশিং অমসুং বিকসিত ভারত অমা শেমগৎপদা মীচম মীয়ামগী থাজবা কোনশিল্লে। রাষ্ট্রপতিগী ৱারোল অসি পুক্নিং থৌগৎলি, ইথিল পী অমসুং তুংগী থবকশিংগী লমজিংলে। রাষ্ট্রপতিগী ৱারোলগীদমক মহাক্না রাষ্ট্রপতি থাগৎপা ফোঙদোকখি।

প্রধান মন্ত্রীনা হায়খি এম.পি ৭০ হেন্না মোসন ওফ থেঙ্কস শরুক য়াদুনা মখোয়গী মমল য়াম্লবা ৱাফমশিং ফোঙদোকখ্রে। মখোয়না খঙবদা য়ুম্ফম ওইদুনা মেম্বর খুদিংমক্না রাষ্ট্রপতিগী ৱারোল শন্দোক্না তাকপগা লোয়ননা নাকল অনিমক খন্ন-নৈনবা পাংথোকখ্রে। সবকা সাথ, সবকা বিকাসকী মতাংদা য়াম্না হায়নখ্রে অমসুং মসিদা লৈরিবা অরুবা ৱাফমশিং খঙবদা মহাক ৱারে। সবকা সাথ, সবকা বিকাস অসি ঐখোয়গী অপুনবা থৌদাংনি অমসুং মরম অদুনা মীয়ামগী থবক তৌনবা লৈবাক অসিনা মখোয়দা খুদোংচাবা পীরিবনি।

২০১৪ দগী লেপ্তনা মীয়ামগী থবক তৌনবা মখোয়দা ভারতকী মীয়াম্না খুদোংচাবা পীবগীদমক মীয়াম থাগৎলদুনা, প্রধান মন্ত্রীনা হায়খি মসি চাউখৎপগী ঐখোয়গী নমুনা অসি লৈবাক অসিগী মীয়াম্না খঙবা, চাংয়েং তৌবা অমসুং শৌগৎপগী খুদম অমনি। ‘লৈবাক্কী থবক্না হান্না’ হায়বা ৱাহৈ অসিনা মখোয়গী চাউখৎপগী নমুনা অসি হেন্না মশক থোকহল্লে অমসুং মসি সরকারগী থৌশিলশিং, স্কিমশিং অমসুং থবকশিংদা উবা ফংলে। নিংতম্লবা মতুংদা চহি ৫০-৬০ মতম শাংনা লেপ্লুরবা মতুংদা লৈবাক ঙাকপগী অতোপ্পা নমুনা অমা দরকার ওইরে। তুস্তিকারনগী মথক্ত সন্তুস্তিকারন লৈরে, ২০১৪ গী মতুংদা, লৈবাক অসিনা অনৌবা নমুনা অমা উরে অমসুং মসিগী নমুনা অসি য়ানবা চৎপা নত্তে, পেনহলবনি।

প্রধান মন্ত্রীনা হায়খি ভারতকী লন-থুমশিং মপুংফানা শীজিন্নবা হায়বসি ঐখোয়গী খ্বাইদগী মরুওইবা থবকনি। ভারতকী মতম মাঙহল্লোইদবনি অমসুং লৈবাক চাউখৎনবা অমসুং মীয়াম য়াইফনবা লনশিং শীজিন্নরে। মরম অদুনা ঐখোয়না মীওই খুদিংমক খুদোংচাবা ফংহন্নবা থৌরাং অমা পায়খৎলে। থৌরাং অসিগী পান্দমদি স্কিমগী অশেংবা বেনিফিসরিশিংদা কান্নবশিং চাদা ১০০ ফংহনবনি। হৌখিবা চহি ১০ দা সবকা সাথ, সবকা বিকাসকী অশেংবা ৱাখল্লোন থবক ওইনা পায়খৎলে। থবকশিং অসি চাউখৎপগী মওংদা উবা ফংলে। সবকা সাথ, সবকা বিকাস অসি ঐখোয়গী লৈবাক ঙাকপগী মরুওইবা লাইৱানি। এস.সি, এস.তি এক্ত মপাঙ্গল কনখৎহন্দুনা লায়রবা অমসুং ত্রাইবেলশিংগী ইকায়খুম্নবা অমসুং সেকুরিতি হেনগৎহন্দুনা সরকারনা মসিগী থবকশিং উৎলে।

প্রধান মন্ত্রীনা হায়খি ঙসিদি কাষ্টতা য়ুম্ফম ওইদুনা অচান-মীরাই নাইবগী হু চাইনবা অকনবা থবক অমা পায়খৎলে। হৌখিবা চহি ৩০ দা হাওস অনিমক্কী দলশিংগী ও.বি.সি এম.পিশিংনা সংবিধান্না ও.বি.সি কম্মিসন মশক খঙনবা তকশিন্দুনা লাক্লি। মখোয়গী সরকারনা ও.বি.সি কম্মিসন সংবিধানগী ষ্টেতস পীখিবনি। সরকার অসিনা ভারতমচা করোর ১৪০ লাৎপগা লোয়ননা তোল্লবা কাংলুপশিং ইকায়খুম্নবা উৎপা হায়বসি মখোয়গী সরকারগী মরুওইবনি।

প্রধান মন্ত্রীনা হায়খি লৈবাক অসিদা রিজার্বেসনগী হিরম খন্নরকপদা, খুদোংচাদবা অসি কোকহন্নবা অকনবা মওংদা থবক পায়খৎতে। তাঙ্কক খুদিংমক্ত, লৈবাক অসি খায়দোক্নবা, উংখৎন্নবা অমসুং অমনা অমবু য়েংথিন্ননবা পাম্বৈশিং লৌখৎখি। লৈবাক অসি নিংতম্লবা মতুংদা ফাওবা চপ মান্নবা থৌরাংশিং পায়খৎখি। অহানবা ওইনা মহাক্কী সরকারনা সবকা সাথ, সবকা বিকাসগী লাইৱানা ইথিল পীবা নমুনা অমা পুথোক্তুনা, উংখৎনবা অমতা লৈতনা শেন-থুমগী ফিবম শোক্লবা কাংলুপশিংদা চাদা ১০ গী রিজার্বেসন পীরে। সবকা সাথ, সবকা বিকাসগী ৱাখল্লোন্দা য়ুম্ফম ওইবা থবক পায়খৎপগী মওং অসি ফজনা অমসুং শান্তি ওইনা পায়খৎপদগী ৱারেপ অসি লৈবাক শীনবা থুংনা য়ানরে।

প্রধান মন্ত্রীনা হায়খি লৈবাক অসিদা দিবয়াংশিং মখোয়গী ফংফম থোকপশিং ফংদে। সবকা সাথ, সবকা বিকাসকী লাইৱা মখাদা, মখোয়দা খুদোংচাবশিং ফংহন্নবা মিসনগী মওংদা মহাক্কী সরকারনা হকচাংগী ফিবম চাদ্রবশিংগী রিজার্বেরসন পীরে। দিবয়াংশিংদা কান্নবা পীনবা স্কিম কয়া পায়খৎ।এ। ত্রান্সজেন্দরশিংদা আইনগী হকশিং ফংহন্নবা থবকশিং পায়খৎলে। খুন্নাইগী মতাইদা লৈরিবা কাংলুপশিংগী খুদোংচাবা পীনবা থবকশিংগী খুৎথাংদা সবকা সাথ, সবকা বিকাসগীদমক সরকারনা পায়খৎলিবা থবক অদু উৎলে।

প্রধান মন্ত্রীনা হায়খি ভারতকী চাউখৎপা নারী শক্তিনা থৌনা হাপ্লে। করিগুম্বা নুপীশিং খুদোংচাবা পীরবদি অমসুং থৌশিল শেম্বদা শরুক য়ারবদা, মসিনা লৈবাক অসি চাউখৎপা য়াংখৎহনগনি। মরম অদুনা অনৌবা সংসদতা সরকারনা অহানবা লৌখিবা ৱারেপ অদু নারী শক্তিদা ইকায়খুম্নবা উৎনবা কৎথোকখিবনি। নারী শক্তি ইকায়খুম্নবা উৎখিবগীদমক অহানবা সংসদকী অহানবা ৱারেপ নিংশিংদুনা লৈহৌরগনি। নৌনা শঙ্গারবা সংসদ অসি নুপীশিংগী ইকায়খুম্নবদা কৎথোক্লে। নারী শক্তিগী থৌজালশিংগা লোয়ননা সংসদনা মসিগী থবক হৌরে।

প্রধান মন্ত্রীনা হায়খি দোক্তর বাবাসাহেব অম্বেদকার কৈদৌঙৈদা ভারত রত্ন ফংফম থোক্তে হায়না হৌখিবা সরকারনা খনখি। মসি ওইরবসু, লৈবাক অসিগী মীয়াম্না মতম পুম্নমক্ত দোক্তর অম্বেদকারগী ৱাখল্লোন অমসুং অচুম্বা ফিদমশিং ইকায়খুম্নখি। খুন্নাইগী কাংলুপ খুদিংমক্না ইকায়খুম্নবা মরম ওইদুনা, ফনা য়াম্না য়ানিংদ্রবসু, হৌজিক দল খুদিংমক্কী মেম্বরশিং নমদুনা “জয় ভিম” হায়গদবনি।

শ্রী মোদীনা হায়খি মশাদা চৈনা কয়া ফংখিবদগী, এস.সি অমসুং এস.তি ফুরুপশিংনা মায়োক্নরিবা খুদোংচাদবশিং দোক্তর বাবাসাহেব অম্বেদকার মমুৎ তানা খঙখি। ফরুপশিং অসিগী শেন-থুমগী ফিবম ফগৎনবা নাখৈ শেংলবা লম্বী অমা দোক্তর বাবাসাহেব অম্বেদকারনা পুথোকখি। দোক্তর বাবাসাহেব অম্বেদকারগী ৱাহৈ লৌখৎলদুনা, হায়খি “ ভারত লৌউ-শিংউনা হিংবা লৈবাক অমা ওইরবসু, লৌউ-শিংউ খক্তনা দলিতশিংগী মরুওইবা হিংনবা লম্বী ওইবা ঙম্লোই”। দোক্তর বাবাসাহেব অম্বেদকারনা মরম অনি মশক তাকখি: অহানবা মরম, লম লৈবা ঙমদবা, অমসুং অনিসুবা মরম, শেন লৈরবা ফাওবদা, লম লৈনবা খুদোংচাবা ফংদে। দলিতশিং, ত্রাইবেলশিং অমসুং লায়রবশিংনা থেংনরিবা অরানবা অসি কোক্নবা পাম্বৈ অমা ওইনা উদ্যোগ চাউখৎহন্নবা দোক্তর বাবাসাহেব অম্বেদকারনা লাউখি। শেন-থুমগী লমদা মশা-মরোমদোম লেপচবা ঙম্নবা লৌশিংদা য়ু্ম্ফম ওইবা থবকশিং অমসুং ওন্ত্রেপ্রেন্যুরশিপ চাউখৎহনবদা দোক্তর বাবাসাহেব অম্বেদকারনা থাজখি। নিংতম্লবা মতুং চহি কয়া দোক্তর বাবাসাহেব অম্বেদকারগী মঙলান খন্নখিদে অমসুং মপুংফানা নাথৈখি। এস.তি অমসুং এস.সি ফুরুপশিংগী শেন-থুমগী অৱাবশিং কোকহন্নবা দোক্তর বাবাসাহেব অম্বেদকারনা পান্দম থমখি।

প্রধান মন্ত্রীনা হায়খি ২০১৪ দা, মহাক্কী সরকারনা স্কিল লৈহনবা, শেন-থুমগী থবকশিং মীওই খুদিংমক ফংহনবা অমসুং উদ্যোগ চাউখৎনবা মরুওইবা থবক পায়খৎখি। পি.এম বিশ্বাকর্মা য়োজনা হৌদোক্তুনা, খুন্নাইগী মরুওইবা য়ুম্ফম ওইরিবা অমসুং খুঙ্গংশিং শীনবা থুংনা লৈরিবা খুৎহৈবশিং, য়োৎশুবশিং অমসুং চফু শাবশিংগী য়াইফনবা থবক পায়খৎখি। অহানবা ওইনা মখোয়দা ত্রেনিং, তেক্নোলোজি হেনগৎহনবা, অনৌবা খুৎলায়শিং, দিজাইনগী মতেং, শেন-থুমগী মতেং অমসুং য়োনফমগী খুদোংচাবা পীখি। খুন্নাইদা মখোয়না লৌরিবা থৌদাং খঙলদুনা, মীরাইবীরবা কাংলুপ অসিদা অখন্নবা মীৎয়েং চঙদুনা মহাক্কী সরকারনা অখন্নবা কেম্পেন অমা হৌদোক্লে।

প্রধান মন্ত্রীনা হায়খি অহানবা ওইনা থোক্লকপা ওন্ত্রেপ্রেন্যুরশিং শরুক য়ানবা অমসুং পুক্নিং থৌগৎনবা ঐখোয়গী সরকারনা মুদ্রা য়োজনা হৌদোক্লে। অত্মনির্ভরতা ওইনবা মখোয়গী মঙলানশিং মঙফাওনবা ঙম্নবা খুন্নাইগী মরুওইবা কাংলুপ অমা মতেং পাংনবা গেরন্তিশিং য়াওদনা লোনশিং পীনবা অচৌবা খোঙজং অমা পায়খৎপদা মাইপাক্লে। মখোয়গী ললোন-ইতিক্কী থবকশিং শৌগৎনবা, এস.সি, এস.তি অমসুং ফুরুপ খুদিংমক্কী নুপীশিংদা গরেন্তিশিং য়াওদনা লুপা করোর ১ ফাওবা লোন পীনবা ষ্টেন্দ অপ ইন্দিয়া স্কিম হৌদোক্লে। চহি অসিদা য়োজনা অসিগী বজেত শরুক অনি হেনগৎলে। মুদ্রা য়োজনাগী মখাদা শোৎথরবা কাংলুপকী মীওই কয়া অমসুং নুপীশিং মখোয়গী ললোন-ইতিকশিং হৌরে, মখোয় মশামক থবক ফংবতা নত্তনা অতোপ্পশিংগী থবক পীরে। খুৎহৈবা খুদিংমক অমসুং কাংলুপ খুদিংমক্কী ফিবম ফগৎনবা দোক্তর বাবাসাহেব অম্বেদকারগী মঙলান অদু মুদ্রা য়োজনাগী খুৎথাংদা মঙফাওনহল্লে।

প্রধান মন্ত্রীনা হায়খি মীরাইবীরবা মীওইশিং হৌজিক মরুওইনা লৌরে। হৌজিক্কী বজেত অসিনা শউন অমসুং খোঙউপগী উদ্যোগশিংগুম্বা তোঙান তোঙানবা অপীকপা হিরমশিং কোনশিন্দুনা, লায়রবশিং কান্নবা ফংলে। শান্নপোৎ শাবগী থবক অসিদা শোৎথরবা ফুরুপকী মীওই কয়া শরুক য়ারি। হিরম অসিদা সরকারনা মীৎয়েং চঙলে অমসুং লায়রবা ইমুংশিংদা মখল কয়াগী মতেংশিং পাংলে। মসিগী ফল ওইনা মপান্দা শান্নপোৎশিং থাদোকপা শরুক অহুম হেনগৎলে, মখোয়গী হিংনবা লম্বীগীদমক উদ্যোগ অসিগী মখা পোনবা শোৎথরবা ফুরুপ কয়া কান্নবা ফংলে।

প্রধান মন্ত্রীনা হায়খি ভারতকী ঙামীশিংগী য়াইফনবা সরকারনা ঙামীশিংগী তোখায়বা মিনিষ্ট্রি অমা লিংখৎলে অমসুং ঙামীশিংদা কিষান ক্রেদিৎ কার্দকী কান্নবা ফংহল্লে। ফিসরিজ সেক্তরদা চাউরাক্না লুপা করোর ৪০,০০০ থাদরে। থবকশিং অসিনা ঙাগী পোৎথোক অমসুং মপান্দা থাদোকপা শরুক অনি হেনগৎলে, ঙামীশিং হকথেংননা কান্নবা ফংলে। খুন্নাইগী খ্বাইদগী মীরাইবীরবা কাংলুপশিং য়াইফনবা থবক পায়খৎপা হায়বসি সরকারগী মরুওইবনি। 

প্রধান মন্ত্রীনা হায়খি কাষ্ট খায়দোকপগী ফত্তব হু চাইবগী অনৌবা থবকশিং অসিনা থাক কয়াদা ঐখোয়গী ত্রাইবেল ফুরুপশিং শোকহল্লে। লৈবাক অসিগী তোঙান তোঙানবা মফম ২০০-৩০০ দা চাইথোক্তুনা লৈরিবা য়াম্না মশিং য়ামদবা ফুরুপশিং শাথিনা মীরাইবীরে। রাষ্ট্রপতিগী লমজিং মখাদগী, কাংলুপশিং অসি মশক খঙলে। পার্তিকুলারলি ভুলনেরেবল ত্রাইবেল গ্রুপশিং অকক্নবা স্কিমশিংদা শরুক য়াহন্নবা অখন্নবা থবকশিং পায়খৎলে। লুপা করোর ২৪,০০০ কাইথোক্তুনা পি.এম জনমন য়োজনা পায়খৎতুনা, ফুরুপশিং অসিদা খুদোংচাবশিং ফংহল্লে। য়োজনা অসিগী পান্দমশিংদি মখোয় অতোপ্পা ত্রাইবেলশিংগী থাক য়ৌনা পুখৎপা অমসুং মখা তারকপদা মখোয় অপুনবা খুন্নাইগী থাক্ত পুখৎপনি।

প্রধান মন্ত্রীনা হায়খি ঙমখৈগী খুঙ্গংশিংগুম্বা শাথিনা শোৎথরবা লৈবাক অসিগী মফম কয়া সরকারনা মীৎয়েং চঙলে। সরকারগী ৱাখল্লোন হোংদুনা, ঙমখৈগী খুঙ্গংশিং মরুওইনা লৌরে। নুমিৎগী অহানবা অমসুং অকোনবা মঙাল হান্না য়ৈবা খুঙ্গংশিং অসি অকক্নবা চাউখৎপগী থৌরাংশিংগা লোয়ননা “অহানবা খুঙ্গংশিং” হায়বা মিংথোল পীরে। মাইনস ১৫ দিগ্রি ফাওবা ইংবা মফমশিংদা খুঙ্গংশিংগী অৱাবশিং খঙনবা অমসুং কোকহন্নবা মফম অদুদা পুং ২৪ লৈনবা মনুং হুঞ্জিনবা খুঙ্গংশিংদা মিনিষ্টরশিং থারে। ঙমখৈগী খুঙ্গংশিংগী লুচিংবশিং নিংতম্বা নুমিৎ অমসুং গনতন্ত্র দিবসগুম্বা লৈবাক্কী থৌরমশিং অতিথি ওইনা শরুক য়াহল্লে। সরকারনা সবকা সাথ, সবকা বিকাস থবক ওইনা পায়খৎলে অমসুং হৌজিক পায়খৎলিবা থবকশিং মীরাইরবা কাংলুপ খুদিংমক্ত য়ৌগদবনি। লৈবাক্কী সেকুরিতিগীদমক ভাইব্রেন্ত ভিলেজ প্রোগ্রাম য়াম্না মরুওই অমসুং সরকারনা মসিদা মখা তানা মীৎয়েং চঙগনি। 

প্রধান মন্ত্রীনা হায়খি ৭৫ শুবা গনতন্ত্র দিবস থৌরমদা রাষ্ট্রপতিনা মহাক্কী ৱারোলদা, সংবিধান শেমখিবশিংদগী ইথিল লৌনবা মীওই খুদিংমক্ত তকশিনখি। সংবিধান শেমখিবশিং ইকায়খুম্নবা অমসুং মখোয়গী ৱাখল্লোন্দগী ইথিল লৌদুনা সরকারনা মাঙলোমদা চঙশিনবদা মহাক্না অপেনবা ফোঙদোকখি। কন্সতিতুয়েন্ত এশেমব্লিগী মরৈ য়েৎনবা পাখিবা মীওইশিংনা য়ু.সি.সিগী ৱাখল্লোন পুখৎলক্নবা হোৎনবগী মতাংদা খঙগনি। মীওই খরনা রাজনিতিগী ওইনা য়েৎলকখি, অদুবু মসিগী পান্দম অসি থবক ওইনা পাংথোক্নবা থৌনা অমসুং কৎথোকপগা লোয়ননা সরকারনা থবক পায়খৎলে।

সংবিধান শেমখিবশিং ইকায়খুম্নবা অমসুং মখোয়গী ৱাখল্লোন্দগী ইথিল লৌবগী মরুওইবা পল্লদুনা, প্রধান মন্ত্রীনা হায়খি নিংতম্বা ফংলবা মতুংদা খুদক্ত সংবিধান শেমখিবশিংগী ৱাখল্লোন ইকায়খুম্নবা উৎতবা অসি লাইবক থিবনি। মীয়াম্না খনবা সরকার অমনা পাংথোক্কদবা অদু ঙাইদনা, মীয়াম্না খনবা সরকার নত্তবা, মরক্কী সরকার অমনা সংবিধান শেমদোকখি। মতম অদুগী সরকারনা নিংতম্বা ৱা ঙাংবা য়াহনখিদে অমসুং প্রেসতা অথিংবা কয়া থমখি। মসি সংবিধানগী ৱাখল্লোন মপুংফানা খোঙ্গোইনবনি।

প্রধান মন্ত্রীনা হায়খি প্রধান মন্ত্রী জৱাহরলাল নেহরুনা লুচিংবা নিংতম্বা ভারতকী অহানবা সরকারগী মতমদা, ৱা ঙাংবগী নিংতম্বা ফংহনখিদবগী থৌদোক কয়া লৈখি। মুম্বাইদা শিন্মীশিংগী খোঙজং অমগী মনুংদা, শক্নাইরবা কবি শ্রী মজরুহ সুতালপুরিনা কম্মনৱেল্থ চৈবা শৈরেং অমা থিরুবদগী মহাক জেল য়ৌখি। য়ানিংদবগী খোঙচৎ শরুক য়ারুবগীদমক মমিং লৈরবা এক্তর বালরাজ সাহনি জেল চঙখি। ওল ইন্দিয়া রেদিওদা বীর সাবারকরগী শৈরেং অমা থিনবা থৌরাং তৌরুবগীদমক লতা মঙ্গেসকরগী মৌপা নুপা শ্রী হরিদ্যনাথ মঙ্গেসকর অৱাবা নংখি। করিসু লৈতবা মরম অসিগীদমক, শ্রী হরিদ্যনাথ মঙ্গেসকর ওল ইন্দিয়া রেদিওদগী থবক লৌথোকখি।

প্রধান মন্ত্রীনা হায়খি ইমর্জেন্সি মনুংদা লৈবাক অসিদা সংবিধান নমহৎখি অমসুং শক্তি পায়নবগীদমক মসিগী ৱাখল্লোন খোঙনেৎনখি। লৈবাক অসি মসি নিংশিংলি। ইমর্জেন্সি মনুংদা, শক্নাইরবা এক্তর শ্রী দেব অনন্দদা ইমর্জেন্সি শৌগৎলে হায়না লাউথোক্নবা হায়খি। শ্রী দেব অনন্দনা থৌনা উৎখি অমসুং ইমর্জেন্সি শৌগৎলে হায়না লাউথোকউ হায়বা য়াখিদে, মসিগী দুরদর্সন্দা মহাক্কী ফিল্মশিং উৎপা থিংখি। সংবিধানগী মরমদা ৱা ঙাংবা মীওইশিং প্রধান মন্ত্রীনা চৈখি অমসুং মসি চহি কয়া মখোয়গী ফুরিৎখাউশিংদা থমখি, মসিগীদমক ইকায়খুম্নবা উৎখিদে। শ্রী কিশোর কুমারনা মতম অদুগী লৈঙাক পায়বা দলগী ঈশৈ শকউ হায়বা য়াখিদে অমসুং মদুগী মহৈ ওইনা ওল ইন্দিয়া রেদিওদা মহাক্কী ঈশৈশিং থিংখি।

প্রধান মন্ত্রীনা হায়খি মহাক্না ইমর্জেন্সিগী মতম কাউবা ঙম্লোই। ইমর্জেন্সি মনুংদা গনতন্ত্র অমসুং মীওইবগী ইকায়খুম্নবগী মতাংদা ঙাংখিবা মীওইশিং, শ্রী জর্জ ফরনান্দেজ য়াওনা লৈবাক অসিগী শক্নাইরবা মীওইশিং ফাজিনখি। মতম অসিদা সংসদকী মেম্বরশিং অমসুং লৈবাক্কী লুচিংবশিং ফাওবা চেন্না পুনখি অমসুং ফাখি। সংবিধান হায়বা ৱাহৈ অসি মখোয়গা চুনখিদে।

প্রধান মন্ত্রীনা হায়খি শক্তি পাম্বদগী অমসুং ইমুং অমনা মঙক কনবদগী, লৈবাক অসিদা মীওই মিল্লিয়ন কয়া মাঙ-তাকখি অমসুং লৈবাক অসি কৈশুমশঙ অমা ওন্থোকখি। য়াম্না কন্না লান্থেংনবদগী, মখোয় মশামক মাইথিবা পীবা ঙম্লোই হায়না খঞ্জবা মীওইশিং মীয়ামগী মপাঙ্গলদা চঙজখি। ভারতকী মীয়ামগী শিংলিশিংদা গনতন্ত্রগী থৌনা চেনবদগী ইমর্জেন্সি লৌথোকখি। মতম শাংনা মীয়ামগী থবক তৌরক্লবা অহল ওইরবা লুচিংবশিং মহাক্না ইকায়খুম্নবা উৎচরি। শ্রী মাল্লিক অর্জুন খারগে অমসুং হান্নগী প্রধান মন্ত্রী শ্রী দেবে গৌরাগুম্বা লুচিংবশিংগী মাইপাকপশিং প্রধান মন্ত্রীনা পনখি।

প্রধান মন্ত্রীনা হায়খি মহাক্কী সরকার মতমদা লায়রবগী ফিবম ফগৎনবা পায়খৎলিবা থবক অসিগুম্না কৈদৌঙৈদা পায়খৎত্রি। লায়রবগী ফিবম ফগৎনবা অমসুং মখোয় লারবা কোকপা ঙম্নবা সরকারনা স্কিমশিং দিজাইন তৌবনি। লৈবাক অসিগী লায়রবশিংগী তৌবা ঙম্বদা মহাক্না থাজবা থম্লি অমসুং মখোয়দা খুদোংচাবা পীবা মতমদা মখোয়না খুদোংচাদবা অমা হেক্ত থেংনবা ঙমগনি। স্কিমশিংগী কান্নবশিং অমসুং খুদোংচাবশিং লৌদুনা লায়রবশিংনা মখোয়গী থৌনা উৎথোক্লে। মখোয়গী ফিবম ফগৎহন্দুনা, মীওই করোর ২৫ লায়রবা কোকহনবা অসি সরকার অসিগী চাউথোকচবা অমনি। লায়রবা কোক্লবা মীওইশিং থবক অসুক্কী মতিক কন্না শুখি, সরকারদা থাজবা থমখি অমসুং স্কিমশিংগী কান্নবা লৌরে অমসুং হৌজিক মখোয় লৈবাক অসিদা নিও-মিদল ক্লাস অমা ওইরে।

প্রধান মন্ত্রীনা মখা তানা হায়খি সরকারনা নিও-মিদল ক্লাস অমসুং মিদল ক্লাসতা অচেৎপা থাজবা থম্লি অমসুং মখোয়গী অনিংবশিং লৈবাক অসি চাউখৎনবা শাফু অমনি, লৈবাক চাউখৎনবা অনৌবা থৌনা ওইরি অমসুং অকনবা য়ুম্ফম অমনি। নিও-মিদল ক্লাস অমসুং মিদল ক্লাসকী তৌবাা ঙম্বা হেনগৎহন্নবা থবকশিং পায়খৎলে। চৎলিবা বজেত অসিদা মিদল ক্লাসকী শরুক অমা তেক্সশিং লৌদ্রে। ২০১৩ দা লুপা লাখ ২ ফাওবা ইনকম তেক্স লৌরম্বনি, অদুবু হৌজিক লুপা লাখ ১২ ফাওবা তেক্স লৌদ্রে। চহি ৭০ গী মথক্ত লৈরবা, ওইনিংবা শেন-থুমগী ফিবম নত্ত্রগা কাংলুপ অমগী লনাই মীওইশিং অয়ুস্মান ভারত স্কিমগী কান্নবা ফংলে অমসুং মসিনা মিদল ক্লাসকী অহলশিংদা খুদোংচাবা পীরে।

প্রধান মন্ত্রীনা হায়খি ঐখোয়না মীয়ামগী য়ুম করোর মরি শারে, মসিগা লোয়ননা সহরশিংদা য়ুম করোর অমা হেন্না শারে। নমথাক তৌবা মীওইশিংনা য়ুম লৈরিবশিংদা খুদোংচাবা কয়া থোকহল্লিবা অসি ঙাকথোকপা তঙাইফদে। মিদল ক্লাসনা য়ুম অমা লৈনবা মখোয়গী মঙলানশিংদা অপনবা পীরিবা অসি লাকশিন্নবা হন্দক্কী সংসদ অসিদা রিয়েল ইষ্টেৎ (রিগুলেসন এন্দ দিবলপমেন্ত ) (রেরা) এক্ত চৎনবা অসি অফবা খুৎলায় অমা ওইরে। পন্দুনা লৈরকপা হাওসিং প্রোজেকশিং লোইশিন্নবা হন্দক্কী বজেত অসিদা লুপা করোর ১৫,০০০ কাইথোক্তুনা শ্বামিহ থবক পায়খৎলে। থবক অসিনা মিদল ক্লাসকী মঙলানশিং মঙফাওন্নবা পান্দম থম্লি।

প্রধান মন্ত্রীনা হায়খি মালেম্না মশক খঙলবা ষ্টার্দঅপকী অওনবা অসি মিদল ক্লাসকী নহারোলশিংনা মরুওইনা লমজিংবনি। লৈবাক্কী মফম ৫০-৬০ দা জি-২০ মীফমশিং পাংথোকখিবা মরমনা মালেমগী লৈবাকশিংনা ভারত পাম্নবা হেনগৎলক্লে। মীফম অসিদা দিল্লি, মুম্বাই অমসুং বেঙ্গালুরুগী ৱাংমদা লৈরিবা ভারতকী পাক-চাউবা মশক তাকখ্রে। ভারতকী তুরিজমদা মালেম্না পাম্নবা হেনগৎলকপা অসিনা খুদোংচাবা কয়া ফংহল্লে, তোঙান তোঙানবা শেন্থোক লম্বী কয়া পীদুনা মিদল ক্লাসতা য়াম্না চাউনা কান্নবা পীরে। ঙসিগী মিদল ক্লাস থাজবনা থল্লে, মসিনা লৈবাক্কী অচৌবা মপাঙ্গল ওইরে। বিকসিত ভারত অমগী মঙলান মঙফাওনবা ঙম্নবা ভারতকী মিদল ক্লাসগী অচেৎপা ফিরেপ লৈরে অমসুং মপুংফানা থৌরাং তৌরে হায়না ঐনা থাজৈ।

বিকসিত ভারত অমা শেমগৎপদা নহারোলশিংনা মরুওইবা থৌদাং অমা লৌরিবা অদু পল্লদুনা, প্রধান মন্ত্রীনা হায়খি লৈবাক অসিদা থবক শুবা কনবা চহি মতাংগী মীওই মশিং য়াম্না লৈরি, হৌজিক স্কুল অমসুং কোলেজ কারিবা মহৈরোয়শিং চাউখৎলবা লৈবাক অমগী মরুওইবা কান্নবা ফংবা মীওইশিং ওইরগনি। নহারোলশিং অসি বিকসিত ভারত অমগী মরুওইবা য়ুম্ফম অমনি। হৌখিবা চহি ১০ দা, স্কুলশিং অমসুং কোলেজশিংগী নহারোলশিং শেমগৎনবা থবকশিং পায়খৎলে। হৌখিবা চহি ৩০ দা, ২১শুবা চহিচাগী লাইরিক-লাইশুগী মতাংদা কোক কয়া থাদখিদে অমসুং মমাংদা মখোয় ওইনিংবা ওইজসনু হায়না থমখি। খুদোংচাদবশিং অসি কোকহন্নবা চহি ৩০ গী মতুংদা অনৌবা নেসনেল ইজুকেসন পোলিসি হৌদোক্লে। থৌশিল অসিগী মখাদা, পি.এম শ্রী স্কুলশিং লিংখৎতুনা, লাইরিক-লাইশুগী অওনবা পুরক্নবা পান্দম থম্লি। পি.এম শ্রী স্কুল ১০,০০০ দগী ১২,০০০ ফাওবা লিংখৎখ্রে অমসুং তুংদা অহেনবা কয়া লিংখৎনবা থৌরাং তৌরি। লাইরিক-লাইশুগী লমদা অহোংবা পুরক্নবা মরুওইবা থৌশিল অমদি মমা লোলদা লাইরিক তম্বা অমসুং পরিক্ষা পাংথোকপা য়াওরে। ভারত্ত লোলগী মতাংদা লোয়লম লৈঙাক্কী ৱাখল চেল্লি। লোলগী অথিংবা কয়া লৈবদগী লায়রবা, দলিত, ত্রাইবেল অমসুং তোল্লবা ফুরুপশিংগী অঙাংশিং খুদোংচাদবা কয়া মায়োক্নরে। কনাগুম্বা অমগী মমা লোলদা লাইরিক তম্বা, মখোয় ইংলিস ফজনা ঙাংবা নত্ত্রগা ঙাংদবা থিদনা মহৈরোয়শিং দোক্তরশিং অমসুং ইঞ্জিনিয়ারশিং ওইহনবা হায়বসি দরকার ওই। হৌরকফম খুদিংমক্কী অঙাংশিং দোক্তরশিং অমসুং ইঞ্জিনিয়ারশিং ওইনবা অওনবশিং পুরক্লে। ত্রাইবেল নহারোলশিংগীদমক এক্লাব্য মোদল রেসিদেন্সিএল স্কুলশিং মশিং হেনগৎহল্লে অমসুং চহি ১০ গী মমাঙদা স্কুল ১৫০ লৈরম্বদগী হৌজিক স্কুল ৪৭০ য়ৌরে, তুংদা ২০০ হেন্না লিংখৎনবা থৌরাং তৌরি।

প্রধান মন্ত্রীনা মখা তানা হায়খি মদুদি সাইনিক স্কুলশিংদা অচৌবা অওনবা পুরক্তুনা নুপীশিং মিং চনবা য়ারে। হৌজিক নুপীমচা চা কয়া মরৈবাক নুংশিবগী ফিবম অসিদা লাইরিক তম্লে, মসিনা মহৌশানা লৈবাক্কীদমক কৎথোকপগী ৱাখল অমা পোকহল্লে। নহারোলশিং শেমগৎপদা নেসনেল কেদেদ কোরগী মরুওইবা থৌদাং লৈরি। এন.সি.সি য়াওবশিংনা খঙই মদুদি মসিনা হিরম খুদিংমক্ত চাউনবা অমসুং মরুওইবা চহি মতাং অমদা অনৌবা কয়া থেংনবগী অফবা খুদোংচাবা অমা পীরি। চহি খর অসিদা মমাঙদা ওইখিদ্রিবা মওংদা এন.সি.সি পাকথোক-চাউথোক্লে, ২০১৪ দা কেদেদ মশিং লাখ ১৪ ওইরম্বদগী ঙসিদি লাখ ২০ হেল্লে।

প্রধান মন্ত্রীনা হায়খি অনৌবা থবক কয়া পাংথোক্নিংবগী খৌরাংবা লৈবাক অসিগী নহারোলশিংদা লৈরে। শ্বাছ ভারত অভিয়ান্দা সহর কয়াদা নহারোলশিংনা মখোয় মশামক পুক্নিং থৌগৎতুনা লু-নানবগী থবকশিং পায়খৎলে। নহারোল খরনা শ্লমশিংদা লাইরিক তম্বীবগী থবকশিং অমসুং অতোপ্পা থবকশিং পায়খৎলে। মসি উরবা মতুংদা, নহারোলশিংদা খুদোংচাবশিং পীবা দরকার ওইবদগী “মাই ভারত” নত্ত্রগা মেরা যুব ভারত ইহৌ হৌদোকখিবনি। ঙসিদা নহারোল করোর ১.৫ হেন্না শরুক য়ারে অমসুং হৌজিক থেংনরিবা ৱাফমশিং, মীয়াম ৱাখল তাহনবা অমসুং অফবা থবকশিং পাংথৌক্নবা খন্ন-নৈনবদা থৱায় য়াওনা শরুক য়ারে।

প্রধান মন্ত্রীনা হায়খি শান্নরোয়শিং য়োকখৎনবা, শেন্থং পীনবা অমসুং ইনফ্রাষ্ট্রকচর শেমগৎনবা থবক কয়া পায়খৎলে। তার্গেত ওলেম্পিক পোদিয়ম স্কিম অমসুং খেলো ইন্দিয়ানা শান্নবগী লমদা অওনবা কয়া পুরক্লে। হৌখিবা চহি ১০ অসিদা, তোঙান তোঙানবা থৌরমশিংদা ভারতকী শান্নরোয়শিংনা মখোয়গী তৌবা ঙম্বা উৎখ্রে, নুপীশিং য়াওনা ভারতকী নহারোলশিংনা মালেমগী ফম্বাক্ত লৈবাক অসিগী মপাঙ্গল উৎলে।

প্রধান মন্ত্রীনা হায়খি চাউখৎলক্লিবা লৈবাক অমা চাউখৎলবা লৈবাক অমা ওইনবা ইনফ্রাষ্ট্রকচর অসি য়াম্না মরুওই। লৈবাক অমা চাউখৎপদা য়াইফ থৌরাংগী স্কিমশিং অমসুং ইনফ্রাষ্ট্রকচর অনিমক য়াম্না মরুওই অমসুং ইনফ্রাষ্ট্রকচর প্রোজেকশিং মতম চানা লোইশিনবা দরকার ওই। থবক থেংথবনা তেক্স থিরবশিংগী শেন মাঙহল্লি অমসুং কান্নবশিং মীয়ামদা ফংহন্দে। মমাঙগী সরকারশিংগী মতমদা থেংথবগী চৎনবীশিং অমসুং প্রোজেক পায়খৎপদা রাজনিতিগী অপনবা পীবা থোকখি। প্রাগাতি প্লেতফোর্ম লিংখৎতুনা, দ্রোনশিং শীজিন্নদুনা খুদক্ত ভিদিও নমদুনা অমসুং মরী লৈনবশিংগী লাইভ ওইনা ৱারি শানদুনা ইনফ্রাষ্ট্রকচর প্রোজেকশিং মহাক মশামক্না য়েংশিল্লে। রাজ্য অমসুং কেন্দ্র সরকার নত্ত্রগা তোঙান তোঙানবা বিভাগশিংগী মরক্ত চুংশিন্নবা ৱাৎপদগী লুপা করোর লাখ ১৯ গী প্রোজেকশিং পন্দুনা লৈখি। ওক্সফোর্দ য়ুনিভর্সিতিনা থিজিনবা অমদা প্রাগাতি থাগৎখি অমসুং চাউখৎলক্লিবা লৈবাকশিংনা থবক অসিগী কান্নবশিং লৌনবা পাউতাক পীখি। উত্তর প্রদেসতা ১৯৭২ দা অয়াবা পীখ্রবা সার্য়ু কেনেল প্রোজেক চহি ৫০ পন্দুনা লৈখি অমসুং মসি ২০২১ দা লোইশিনখি। ১৯৯৪ দা অয়াবা পীখ্রবা উধামপুর-শ্রীনগর-বরামুল্লা রেলৱে লাইন চহি কয়া পন্দুনা লৈরক্লবা মতুংদা হন্দক ২০২৫ দা লোইশিনখ্রে। উরিসাদা হরিদাসপুর-পারাদিপ রেলৱে লাইন লোইশিনখ্রে। প্রোজেক অসি ১৯৯৬ দা অয়াবা পীখ্রে অদুবু চহি কয়া পন্দুনা লৈরক্লবা মতুংদা মসি ২০১৯ দা হৌজিক পাল্লিবা লৈঙাক অসিনা লোইশিনখ্রে। ১৯৯৮ দা অয়াবা পীখ্রবা অসামগী বোগীবিল থোঙ মহাক্কী সরকারনা ২০১৮ দা লোইশিনখ্রে। হৌখিবা মতমদা প্রোজেক কয়া পন্দুনা লৈবগী খুদম চা কয়া মহাক্না পীবা ঙমগনি। অসিগুম্বা মরুওইবা প্রোজেকশিং মতম চানা লোইশিনবগী চৎনবী অমা অহোংবা পুরকপা দরকার ওইরে অমসুং হৌখিবা সরকারশিংগী মতমদা মসিগী চৎনবী অসিনা লৈবাক অসি মপুংফানা চাউখৎহনবদা অপনবা ওইখি। ইনফ্রাষ্ট্রকচর প্রোজেকশিং ফজনা থৌরাং তৌবা অমসুং মতম চানা লোইশিনবা য়াম্না মরুওই। মসিগীদমক মহাক্না পি.এম গাতি শক্তি নেসনেল মাষ্টর প্লান হৌদোক্লে। ফজনা ৱারেপ লৌনবা অমসুং প্রোজেক পায়খৎপদা য়াংশিন্নবা, দেতা লায়ার ১,৬০০ য়াওরবা পি.এম গাতি শক্তি প্লেতফোর্ম রাজ্যশিংনা শীজিন্নগদবনি। লৈবাক অসিদা ইনফ্রাষ্ট্রকচরগী থবকশিং য়াংশিন্নবা প্লেতফোর্ম অসি মরুওইবা য়ুম্ফম অমনি।

প্রধান মন্ত্রীনা হায়খি ঙসিগী নহারোলশিংনা মখোয়গী মমা-মপাশিংগী অৱাবশিং অমসুং লৈবাক অসিগী হৌখিবা ফিবমশিংগী তুংদা লৈরিবা মরমশিং খঙবা দরকার ওই। হৌখিবা চহি ১০ দা অকনবা ৱারেপশিং লৌদনা অমসুং থবকশিং পায়খৎতনা, দিজিতেল ইন্দিয়াগী কান্নবশিং ফংবদা চহি কয়া চঙগনি। অচুম্বা ৱারেপ লৌবা অমসুং থবকশিং পায়খৎপদগী ভারত মতম চানা অমসুং ঙনখৎনা মাঙলোমদা চঙশিনবা ঙম্বনি। মালেমগী ওইনা খ্বাইদগী য়াংবা চাংচৎ অমদা হৌজিক ভারত শীনবা থুংনা ৫-জি তেক্নোলোজি শীজিন্নরে।

প্রধান মন্ত্রীনা হায়খি কম্পুতরশিং, মোবাইল ফোনশিং অমসুং এ.তি.এমগুম্বা তেক্নোলোজিশিং লৈবাক কয়ানা ভারত্তগী হান্না শীজিন্নখ্রে। হকশেলগী লমদা, স্মোলপোক্স অমসুং বি.সি.জিগুম্বা লায়নাশিংগী তিকাশিং মালেমগী ওইনা ফংলবসু থবক ফজনা পায়খৎতবদগী ভারত মনিংদা লৈহৌখি। হৌখিবা মতমদা লৈবাক ঙাকপগী থবক্ত অশোইবা লৈবদগী থবকশিং অসি থেংথবনি অমসুং মতম অদুদা মরুওইবা লৌশিং অমসুং থবক ওইনা পায়খৎপা লাকশিনবদগী, মদুনা “লাইসেন্স পর্মিত রাজ” অমা লৈবদগী চাউখৎপা থিন্থখি। অসিগুম্বা নমশিন্দুনা থম্বগী থবক অসিনা লৈবাক অসিগী চাউখৎপদা অপনবা ওইখি। মমাংঙৈদা কম্পুতরশিং মপান লৈবাকশিংদগী পুশিল্লক্নবা লাইসেন্স অমা লৌনবা হোৎনবদা চহি কয়া চঙখি। মসিনা ভারত্ত অনৌবা তেক্নোলোজি শীজিন্নবা থেংথহনখি। মতম অমদা, য়ুম শানবগী বিলামাতি লৈবা ফাওবা অয়াবা লৌবা দরকার ওইখি অমসুং লুহোংবগী চা লোন্নবা চিনি লৈবা ফাওবা লাইসেন্স দরকার ওইখি। হায়রিবা খুদোংচাদবশিং অসি নিংতম্বা ফংলবা মতুংগী ভারত্ত থেংনখিবনি অমসুং মসিগী খুদোংচাদবশিং অসি ঙসিগী নহারোলশিংনা খঙগদবনি, শেঞ্জা-থুমজা তৌবগী দাইত্ব কনানো অমসুং শেনফম অদু কদাইদা চৎখিবগে হায়বা হংফম থোকই।

প্রধান মন্ত্রীনা হায়খি মমাংঙৈদা অঙম-অথৌশিংগী থবক্না অপনবা কয়া পীখি। স্কুতর অমা লৈনবা বুক তৌবা অমসুং শেন পীবা, মখা তারকপদা চহি ৮-১০ ঙাইবা দরকার ওইখি। স্কুতর অমা য়োনবা ফাওবা সরকারগী অয়াবা দরকার ওইখি। গ্যাস সিলিন্দরগুম্বা তঙাইফদবা পোৎলমশিং ফংনবা হোৎনবদা খুদোংচাদবশিং থেংনখি, এম.পিশিংদা কপনশিং পীদুনা সিলিন্দরশিং ফংহনখি অমসুং গ্যাস লৌনবা পরেং শাংনা লেপ্নখি। তেলিফোন কন্নেক্সন অমা লৌনবা মতম য়াম্না শাংনা চঙখিবগী খুদোংচাদবশিং অদু ঙসিগী নহারোলশিংনা খঙগদবনি। ঙসি ৱা য়াম্না শাংনা ঙাংলিবশিংনা মখোয়গী হৌখ্রবা সরকার অমসুং মদুনা লৈবাক্ত পীখিবা চৈথেংগী মমি তাহনগদবনি।

প্রধান মন্ত্রীনা হায়খি অথিংবা থম্বা থৌশিলশিং অমসুং লাইসেন্স রাজনা ভারত মালেমদা চাউখৎপগী চাং য়াম্না তপ্পা লৈবাক অমা ওইহনখি। মসিগী চাউখৎপগী চাং য়াম্না নেম্বা অসি “হিন্দু রেত ওফ গ্রোথ” হায়না খঙনদুনা, মসিনা মশিং য়াম্লবা ফুরুপ অমা ইকায়বা পীখি। সরকার পায়রিবশিং মতিক চাদবা, খঙবা ৱাৎপা অমসুং শেঞ্জা-থুমজ তৌবদগী চাউখৎপগী খোঙজেল তপখিবনি।

প্রধান মন্ত্রীনা হায়খি মমাঙদা শেন-থুমগী থবক ফজনা পাংথোকখিদবা অমসুং অশোইবা থৌশিলশিংনা অপুনবা খুন্নাইদা মরাল শিখি অমসুং মিংচৎ থিহনখি। পুৱারিদা, ভারতকী নাৎ অমসুং থৌশিলদা লাইসেন্স রাজগী অথিংবা লৈখিদে অমসুং ভারতমচাশিং মনিংতম্বদা থাজখি অমসুং মালেমগী ওইনা অথিংবা লৈতনা ললোন-ইতিক পাংথোকপা লৈবাকশিংগী মনুংদা অহানবা ওইখি। হৌজিক মালেম্না ভারতকী শেন-থুমগী মপাঙ্গল অমসুং য়াংনা চাউখৎলকপা অসি খঙবদা ভারতমচা খুদিংমক চাউথোকচরে। হৌজিক ভারত য়াংনা চাউখৎলক্লিবা লৈবাকশিংগী মনুংদা অমা ওইরে অমসুং লৈবাক অসিগী শেন-থুম শিংথাবা য়ানা ফগৎলক্লে।

প্রধান মন্ত্রীনা হায়খি মদুদি অথিংবা লৈবা লাইসেন্স রাজ অমসুং অশোইবা থৌশিলশিংদগী মনিংতম্লবা মতুংদা হৌজিক লৈবাক অসি চনিং তানা শ্বর হোন্দোক্লে অমসুং ফিবম ফগৎলে। লৈবাক অসিদা মেনুফেকচরিং চাউখৎনবা পান্দমদা “মেক ইন ইন্দিয়া” থবক য়োকখৎলে। প্রদক্সন লিঙ্ক ইন্সেন্তিপ (পি এল আই) স্কিম হৌদোক্লে অমসুং ফোরেন দাইরেক্ত ইনভেষ্টমেন্তগা মরী লৈনবশিং নৌনা শেমদোক্লে। মালেমদা ভারত মোবাইল ফোন শাবা অনিশুবা খ্বাইদগী চাউবা লৈবাক ওইদুনা, মপান লৈবাকশিংদগী ফোন লৈবা লৈবাক অমা ওইরম্বদগী মপান্দা থাদোকপা লৈবাক অমা ওইরে।

প্রধান মন্ত্রীনা হায়খি দিফেন্স মেনুফেকচরিংদা ভারত মাইপাক্তুনা হৌখিবা চহি ১০ দা মপান লৈবাকশিংদা দিফেন্সকী খুৎলায়শিং থাদোকপা শরুক ১০ হেনগৎলে। সোলার মোদুল পুথোকপা শরুক ১০ হেনগৎলে। ভারত হৌজিক মালেমদা ষ্টিল পুথোকপদা অনিশুবা খ্বাইদগী চাউবা লৈবাক ওইরে অমসুং হৌখিবা চহি ১০ দা মেছিনশিং অমসুং ইলেক্ত্রোনিক মপান্দা থাদোকপা য়াংনা হেনগৎলকপা উরে। শান্নপোৎশিং মপান্দা য়োনবা শরুক অহুম হেনগৎলে অমসুং এগ্রোকেমিকেলশিং মপান্দা থাদোকপা শিংথাবা য়ানা হেনগৎলে। কোবিদ-১৯ লাইচৎ মনুংদা, ভারতনা “মেক ইন ইন্দিয়া” গী মখাদা লৈবাক ১৫০ হেনবদা তিকাশিং অমসুং হিদাক-লাংথকশিং ফংহনখ্রে। অয়ুস অমসুং মনা-মশিংদগী শুংবা পোৎথোকশিং মপান্দা থাদোকপসু হেনগৎলে।

প্রধান মন্ত্রীনা হায়খি মমাঙগী সরকারশিংনা খাদি য়োকখৎনবা থবক পায়খৎপা ৱাৎখি। নিংতম লালহৌ মনুংদগী হৌখিবা খোঙজং অসি খুমাঙচাউশিনবা ঙমখিদে। অহানবা ওইনা খাদি অমসুং ভিলেজ ইন্দষ্ট্রিগী তর্নওভর লুপা করোর লাখ ১.৫ হেল্লে। হৌখিবা চহি ১০ দা, পোৎথোক পুথোকপা শরুক মরি হেনগৎলে অমসুং লৈবাক শীনবা থুংবগী এম.এস.এম.ই সেক্তর কান্নবা ফংলে অমসুং থবক কয়া ফংহল্লে।

প্রধান মন্ত্রীনা হায়খি মীয়ামগী মীহুৎ খুদিংমক মীয়ামগী মীনাইশিংনি। লৈবাক্কী অমসুং খুন্নাইগী পান্দম অসি মীয়ামগী মীহুৎশিংগী মরুওইবনি অমসুং থবক তৌনবা ৱাখলগা লোয়ননা থবক পাংথোকপা হায়বসি মখোয়গী মথৌনি। বিকসিত ভারত অমগী মঙলান মঙফাওনহনবা হায়বসি ভারতমচা খুদিংমক্কী অপুনবা থৌদাংনি। মসি সরকার অমা খক্তগী নত্ত্রগা লনাই মীওই অমা খক্তগী পান্দম নত্তে, মীওই করোর ১৪০ গী থবক্নি। পান্দম অসিদগী তোঙান্না লৈরিবা মীওইশিং খুন্নাইনা হুন্দোক্লমগনি। ভারতকী মিদল ক্লাস অমসুং নহারোলশিংগী অচেৎপা ফিরেপনা লৈবাক অসি মাঙলোমদা পুখৎকনি।

প্রধান মন্ত্রীনা হায়খি লৈবাক অসি চাউখৎপগী অনৌবা থাকশিং য়ৌরকপগা লোয়ননা লৈবাক অসি চাউখৎহনবদা মীওই খুদিংমক্কী থৌদাং য়াম্না মরুওই। সরকারগী ওপোজিন লৈবা হায়বসি মহৌশানি অমসুং গনতন্ত্রদা মসি তঙাইফদে। অদুবু কা হেন্না ফত্তবা ৱাখল চেনবা অমসুং কনাগুম্বা অমগী থবকশিং হেনগৎহন্নবা হোৎনবগী মহুত্ত অতোপ্পশিংগী মিংচৎ থিনবা হোৎনবা অসিনা ভারত চাউখৎহনবদা অপনবা ওইগনি। হাওসতা খন্ন-নৈনবা অসিনা মমল য়াম্লবা লৌশিং কয়া ফংহনগদবনি অমসুং মসিনা মাঙলোমদা চৎখৎকনি। রাষ্ট্রপতিগী ৱারোলদগী মখা তানা ইথল ফংলে হায়না প্রধান মন্ত্রীনা ফোঙদোকখি অমসুং মহাক্না রাষ্ট্রপতি অমসুং সংসদকী মেম্বরশিং থাগৎপা ফোঙদোকখি।

***