காமன்வெல்த் நாடாளுமன்ற சங்கத்தின் இந்திய பிராந்தியத் தலைவரும், மக்களவைத் தலைவருமான திரு ஓம் பிர்லா, நாளை (செப்டம்பர் 11, 2025) பெங்களூரு சட்டப்பேரவையில் காமன்வெல்த் நாடாளுமன்ற சங்க இந்திய பிராந்தியத்தின் 11-வது மாநாட்டைத் தொடங்கி வைக்கிறார். இந்த மாநாட்டில், நாடாளுமன்றம் மற்றும் சட்டப்பேரவைகளில் மக்களிடம் நம்பிக்கையை ஏற்படுத்தும் வகையிலும், அவர்களது விருப்பங்களை நிறைவேற்றும் வகையிலும் ஆக்கப்பூர்வமான செயல்பாடுகள்  நடைபெறுவது குறித்து விவாதிக்கப்படவுள்ளது.

இந்த மாநாட்டின் தொடக்க நிகழ்ச்சியில், கர்நாடக மாநில முதலமைச்சர் திரு சித்தராமையா, மாநிலங்களவைத் துணைத் தலைவர் திரு ஹரிவன்ஷ் உள்ளிட்ட பல முக்கிய பிரமுகர்கள் சிறப்புரையாற்றுவார்கள். இதில் கர்நாடக மாநில சட்டப்பேரவைத் தலைவர் சட்டமன்ற திரு யு.டி. காதர் ஃபரீத் வரவேற்பு உரையாற்றுகிறார். அதே நேரத்தில் காமன்வெல்த் நாடாளுமன்ற சங்கத்தின் கர்நாடக மாநிலக் கிளையின் செயலாளர் நன்றியுரையாற்றுகிறார்.

கர்நாடக மாநில சட்டப்பேரவை வளாகத்தில் நடைபெறும் இம்மாநாட்டின் தொடக்க விழாவில், மாநிலங்கள் / யூனியன் பிரதேசங்களின் சட்டப்பேரவைத் தலைவர்கள் பங்கேற்கின்றனர்.

கர்நாடக மாநில ஆளுநர் திரு தாவர் சந்த் கெலாட் மற்றும் மக்களவைத் தலைவர் திரு ஓம் பிர்லா ஆகியோர் டிசம்பர் 13, 2025 அன்று நடைபெறவுள்ள நிறைவுநாள் நிகழ்ச்சியில் உரையாற்றுவார்கள்.

செப்டம்பர் 11-ம் தேதி முதல் 13-ம் தேதி வரை மூன்று நாட்கள் நடைபெறும் இந்த மாநாட்டை, காமன்வெல்த் நாடாளுமன்ற சங்கத்தின் கர்நாடக கிளையின் சார்பில், அம்மாநில சட்டப்பேரவை ஏற்பாடு செய்துள்ளது. இந்த மாநாட்டின் ஒரு பகுதியாக நடைபெறவுள்ள கண்காட்சியை, மக்களவைத் தலைவர் திரு ஓம் பிர்லா தொடங்கி வைக்கிறார்.

வெளிநாடுகளைச் சேர்ந்த நாடாளுமன்றங்களின் தலைவர்கள், காமன்வெல்த் நாடாளுமன்ற சங்கத்தின் தலைவர் மற்றும் பொதுச்செயலாளர் ஆகியோரும் இந்த மாநாட்டில் பங்கேற்பதற்காக  அழைக்கப்பட்டுள்ளனர்.

இதில், சட்டப்பேரவைத் தலைவர்கள், துணைத் தலைவர்கள், மாநில / யூனியன் பிரதேச சட்டப்பேரவைகளின் செயலாளர்கள் உள்ளிட்ட பிரதிநிதிகள் கலந்து கொண்டு நாடாளுமன்ற முக்கியத்துவம் வாய்ந்த விஷயங்கள் குறித்து விவாதிக்க உள்ளனர். நாடாளுமன்றம், மாநில மற்றும் யூனியன் பிரதேச சட்டப்பேரவைகளின் செயல்பாடுகளை வலுப்படுத்தவும், கருத்துகளைப் பரிமாறிக் கொள்ளவும், சிறந்த நடைமுறைகளைப் பகிர்ந்து கொள்ளவும், இந்த மாநாடு உதவிடும் என்று எதிர்பார்க்கப்படுகிறது.

***

AD/SV/AG/SH

 

(Release ID: 2165433) Visitor Counter : 2