প্ৰধানমন্ত্ৰী শ্ৰী নৰেন্দ্ৰ মোদীয়ে আজি ওড়িশাৰ ভুৱনেশ্বৰত উৎকৰ্ষ ওড়িশা – মেক ইন ওড়িশা কনক্লেভ ২০২৫ আৰু মেক ইন ওড়িশা প্ৰদৰ্শনী উদ্বোধন কৰে। সভাত ভাষণ দি প্ৰধানমন্ত্ৰীয়ে ২০২৫ চনৰ জানুৱাৰী মাহত তেওঁৰ দ্বিতীয়টো ওড়িশা ভ্ৰমণ বুলি উল্লেখ কৰি প্ৰবাসী ভাৰতীয় দিৱস ২০২৫ অনুষ্ঠান উদ্বোধন উপলক্ষে কৰা ভ্ৰমণৰ কথা স্মৰণ কৰে। আজিলৈকে ওড়িশাত এইখনেই আটাইতকৈ ডাঙৰ ব্যৱসায়িক সন্মিলন বুলি উল্লেখ কৰি শ্ৰী মোদীয়ে কয় যে মেক ইন ওড়িশা কনক্লেভ ২০২৫ত প্ৰায় ৫-৬ গুণ অধিক বিনিয়োগকাৰীয়ে অংশগ্ৰহণ কৰিছে। এই বিশাল অনুষ্ঠান আয়োজন কৰাৰ বাবে জনসাধাৰণ আৰু ওড়িশা চৰকাৰক তেওঁ অভিনন্দন জনায়।

“পূব ভাৰত দেশৰ উন্নয়নৰ সমৃদ্ধিৰ ইঞ্জিন আৰু ইয়াত ওড়িশাই মূল ভূমিকা পালন কৰে”, প্ৰধানমন্ত্ৰীয়ে উল্লেখ কৰে। তেওঁ লগতে কয় যে ঐতিহাসিক তথ্যই এই কথাও প্ৰকাশ কৰে যে যেতিয়া ভাৰতে বিশ্বৰ বৃদ্ধিত মুখ্য ভূমিকা পালন কৰিছিল তেতিয়া পূব ভাৰতৰ অৱদান উল্লেখযোগ্য আছিল। শ্ৰী মোদীয়ে উল্লেখ কৰে যে পূব ভাৰতত বিশাল ঔদ্যোগিক কেন্দ্ৰ, বন্দৰ, বাণিজ্যিক কেন্দ্ৰ আছে আৰু ইয়াত ওড়িশাৰ অংশগ্ৰহণ উল্লেখযোগ্য। “আগতে ওড়িশা দক্ষিণ-পূব এছিয়াৰ বাণিজ্যৰ এক গুৰুত্বপূৰ্ণ কেন্দ্ৰ আছিল আৰু বন্দৰসমূহ ভাৰতৰ প্ৰৱেশদ্বাৰ আছিল”, প্ৰধানমন্ত্ৰীয়ে কয়। তেওঁ লগতে কয় যে আজিও ওড়িশাত বালি যাত্ৰা উদযাপন কৰা হয়। শেহতীয়াকৈ ইণ্ডোনেছিয়াৰ ৰাষ্ট্ৰপতিৰ ভাৰত ভ্ৰমণৰ কথা স্মৰণ কৰি প্ৰধানমন্ত্ৰীয়ে কয় যে ৰাষ্ট্ৰপতিয়ে উল্লেখ কৰিছিল যে তেওঁৰ ডি এন এত সম্ভৱতঃ ওড়িশাৰ উপস্থিতি আছে।

প্ৰধানমন্ত্ৰীয়ে মন্তব্য কৰে যে ওড়িশাই দক্ষিণ-পূব এছিয়াৰ সৈতে সংযোগ কৰা এক উত্তৰাধিকাৰ বহন কৰে। তেওঁ লগতে কয় যে ওড়িশাই এতিয়া একবিংশ শতিকাত গৌৰৱময় ঐতিহ্যক পুনৰুজ্জীৱিত কৰিবলৈ আৰম্ভ কৰিছে। তেওঁ উল্লেখ কৰে যে ছিংগাপুৰৰ ৰাষ্ট্ৰপতিয়ে শেহতীয়াকৈ ওড়িশা ভ্ৰমণ কৰিছিল আৰু ওড়িশাৰ সৈতে থকা সম্পৰ্কক লৈ ছিংগাপুৰ অতি উৎসাহী আছিল। তেওঁ আলোকপাত কৰে যে আছিয়ান দেশসমূহেও ওড়িশাৰ সৈতে বাণিজ্য আৰু পৰম্পৰাগত সংযোগ শক্তিশালী কৰাৰ প্ৰতি আগ্ৰহ প্ৰকাশ কৰিছে। প্ৰধানমন্ত্ৰীয়ে জোৰ দি কয় যে এই অঞ্চলত অসংখ্য সুযোগ মুকলি হৈছে, স্বাধীনতাৰ পিছত যিটো পূৰ্বতকৈও অধিক। তেওঁ উপস্থিত সকলো বিনিয়োগকাৰীক আহ্বান জনাই কয় যে ওড়িশাৰ উন্নয়ন যাত্ৰাত বিনিয়োগ কৰাৰ এয়াই সঠিক সময় আৰু তেওঁলোকৰ বিনিয়োগে সফলতাৰ নতুন উচ্চতালৈ লৈ যাব বুলি তেওঁ আশ্বাস দিয়ে।

“ভাৰত কোটি কোটি মানুহৰ আকাংক্ষাৰ দ্বাৰা পৰিচালিত উন্নয়নৰ পথত আগবাঢ়িছে”, শ্ৰী মোদীয়ে এনেদৰে মন্তব্য কৰি এই কথাত গুৰুত্ব আৰোপ কৰে যে এ আই কৃত্ৰিম বুদ্ধিমত্তা আৰু ভাৰতৰ আকাংক্ষা দুয়োটাৰে বাবে থিয় দিছে, যিটো দেশৰ শক্তি। তেওঁ কয় যে মানুহৰ প্ৰয়োজনীয়তা পূৰণ হ’লে আকাংক্ষা বৃদ্ধি পায় আৰু বিগত দশকে কোটি কোটি নাগৰিকক সবল কৰি তুলিছে, জাতিটোক উপকৃত কৰিছে। প্ৰধানমন্ত্ৰীয়ে আলোকপাত কৰে যে ওড়িশাই এই আকাংক্ষাক প্ৰতিনিধিত্ব কৰে। তেওঁ ওড়িশাক অসাধাৰণ বুলি অভিহিত কৰি কয় যে ই নতুন ভাৰতৰ আশাবাদ আৰু মৌলিকতাৰ প্ৰতীক। তেওঁ লগতে কয় যে ওড়িশাত অসংখ্য সুযোগ আছিল আৰু ইয়াৰ লোকসকলে সদায় পাৰদৰ্শিতাৰ প্ৰতি আকৰ্ষণ দেখুৱাই আহিছে। গুজৰাটত ওড়িশাৰ লোকসকলৰ দক্ষতা, কঠোৰ পৰিশ্ৰম, আৰু সততাৰ সাক্ষী হোৱাৰ ব্যক্তিগত অভিজ্ঞতা ব্যক্ত কৰি প্ৰধানমন্ত্ৰীয়ে এই আত্মবিশ্বাস ব্যক্ত কৰে যে ওড়িশাত নতুন সুযোগৰ উন্মেষ ঘটাৰ লগে লগে ৰাজ্যখনে অতি সোনকালে উন্নয়নৰ অভূতপূৰ্ব উচ্চতাত উপনীত হ’ব। তেওঁ মুখ্যমন্ত্ৰী শ্ৰী মোহন চৰণ মাঝি আৰু তেওঁৰ দলটোক ওড়িশাৰ উন্নয়ন ত্বৰান্বিত কৰাৰ বাবে কৰা প্ৰচেষ্টাৰ বাবে প্ৰশংসা কৰে। প্ৰধানমন্ত্ৰীয়ে উল্লেখ কৰে যে খাদ্য সংসাধন, পেট্ৰ’কেমিকেল, বন্দৰভিত্তিক উন্নয়ন, মীন, আই টি, শিক্ষা-প্ৰযুক্তি, বস্ত্ৰশিল্প, পৰ্যটন, খনন আৰু সেউজ শক্তিকে ধৰি বিভিন্ন উদ্যোগত ওড়িশা ভাৰতৰ অন্যতম আগশাৰীৰ ৰাজ্য হৈ পৰিছে।

ভাৰত বিশ্বৰ তৃতীয় বৃহত্তম অৰ্থনীতি হোৱাৰ দিশত দ্ৰুতগতিত আগবাঢ়িছে বুলি আলোকপাত কৰি প্ৰধানমন্ত্ৰীয়ে কয় যে পাঁচ ট্ৰিলিয়ন ডলাৰৰ অৰ্থনীতিৰ মাইলৰ খুঁটি বহু দূৰত নহয়। তেওঁ লগতে কয় যে বিগত দশকত ভাৰতৰ উৎপাদন ক্ষেত্ৰতো শক্তি স্পষ্ট হৈ পৰিছে। প্ৰধানমন্ত্ৰীয়ে আলোকপাত কৰে যে ভাৰতৰ অৰ্থনীতিৰ সম্প্ৰসাৰণ দুটা প্ৰধান স্তম্ভৰ ওপৰত নিৰ্ভৰশীল- উদ্ভাৱনী সেৱা খণ্ড আৰু মানসম্পন্ন সামগ্ৰী। তেওঁ জোৰ দি কয় যে দেশৰ দ্ৰুত অগ্ৰগতি কেৱল কেঁচামালৰ ৰপ্তানিৰ ওপৰত নিৰ্ভৰ কৰিব নোৱাৰে আৰু সেয়েহে সমগ্ৰ পৰিবেশতন্ত্ৰক এক নতুন দৃষ্টিভংগীৰে ৰূপান্তৰিত কৰা হৈছিল। প্ৰধানমন্ত্ৰীয়ে উল্লেখ কৰে যে ভাৰতে খনিজ পদাৰ্থ নিষ্কাসন কৰি বিদেশলৈ পণ্য উৎপাদন আৰু মূল্য সংযোজনৰ বাবে প্ৰেৰণ কৰাৰ ধাৰা সলনি কৰি আছে, মাথোঁ সেই সামগ্ৰীসমূহ ভাৰতলৈ ঘূৰি আহিবলৈ। একেদৰে তেওঁ লগতে কয় যে আন দেশত সংসাধনৰ বাবে সাগৰীয় খাদ্য ৰপ্তানিৰ ধাৰাও সলনি হৈছে। শ্ৰী মোদীয়ে উল্লেখ কৰে যে চৰকাৰে ওড়িশাৰ সম্পদৰ সৈতে জড়িত উদ্যোগসমূহ যাতে ৰাজ্যখনৰ ভিতৰতে প্ৰতিষ্ঠা হয়, তাৰ বাবে কাম কৰি আছে। তেওঁ উল্লেখ কৰে যে উৎকৰ্ষ ওড়িশা কনক্লেভ-২০২৫ এই দৃষ্টিভংগীক বাস্তৱায়িত কৰাৰ এক মাধ্যম।

বিশ্বই বহনক্ষম জীৱনশৈলীৰ ওপৰত ক্ৰমান্বয়ে মনোনিৱেশ কৰি সেউজ ভৱিষ্যতৰ দিশত আগবাঢ়িছে বুলি মন্তব্য কৰি শ্ৰী মোদীয়ে উল্লেখ কৰে যে সেউজ নিয়োগৰ সম্ভাৱনাও যথেষ্ট বৃদ্ধি পাইছে। তেওঁ সময়ৰ দাবী আৰু প্ৰয়োজনীয়তাৰ লগত খাপ খুৱাই লোৱাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ আলোকপাত কৰে যে ভাৰতে সৌৰ, বতাহ, জল আৰু সেউজ হাইড্ৰ’জেনকে ধৰি সেউজ প্ৰযুক্তি আৰু সেউজ ভৱিষ্যতৰ ওপৰত গুৰুত্ব আৰোপ কৰিছে, যিয়ে উন্নত ভাৰতৰ শক্তি সুৰক্ষাক সামৰ্থ্য প্ৰদান কৰিব। প্ৰধানমন্ত্ৰীয়ে এই ক্ষেত্ৰত ওড়িশাৰ অপৰিসীম সম্ভাৱনা থকা বুলি উল্লেখ কৰি দেশখনে ৰাষ্ট্ৰীয় পৰ্যায়ৰ সেউজ হাইড্ৰজেন আৰু সৌৰশক্তি অভিযান আৰম্ভ কৰা বুলি উল্লেখ কৰে। শ্ৰী মোদীয়ে উল্লেখ কৰে যে ওড়িশাত নবীকৰণযোগ্য শক্তি উদ্যোগক সম্প্ৰসাৰিত কৰাৰ বাবে উল্লেখযোগ্য নীতিগত সিদ্ধান্ত গ্ৰহণ কৰা হৈছে আৰু হাইড্ৰজেন শক্তি উৎপাদনৰ বাবে কেইবাটাও পদক্ষেপ গ্ৰহণ কৰা হৈছে।

প্ৰধানমন্ত্ৰীয়ে মন্তব্য কৰে যে সেউজ শক্তিৰ সমান্তৰালভাৱে ওড়িশাত পেট্ৰ’ আৰু পেট্ৰ’কেমিকেল খণ্ড সম্প্ৰসাৰণৰ বাবেও পদক্ষেপ গ্ৰহণ কৰা হৈছে। তেওঁ আলোকপাত কৰে যে পাৰাদীপ আৰু গোপালপুৰত উৎসৰ্গিত ঔদ্যোগিক উদ্যান আৰু বিনিয়োগ অঞ্চল গঢ়ি তোলা হৈছে, যিয়ে এই খণ্ডত বিনিয়োগৰ উল্লেখযোগ্য সম্ভাৱনাৰ ইংগিত দিয়ে। ৰাজ্যখনৰ বিভিন্ন অঞ্চলৰ সম্ভাৱনাক বিবেচনা কৰি ক্ষিপ্ৰ সিদ্ধান্ত গ্ৰহণ আৰু নতুন পৰিবেশতন্ত্ৰ গঢ়ি তোলাৰ বাবে শ্ৰী মোদীয়ে ওড়িশা চৰকাৰক অভিনন্দন জনায়।

“একবিংশ শতিকা ভাৰতৰ বাবে সংযুক্ত আন্তঃগাঁথনি আৰু বহু দিশযুক্ত সংযোগৰ যুগ”, শ্ৰী মোদীয়ে কয় আৰু ভাৰতত বিশেষ আন্তঃগাঁথনি যি পৰিসৰ আৰু গতিৰে বিকশিত হৈছে, সেই পৰিসৰ আৰু গতিবেগে দেশখনক এক উৎকৃষ্ট বিনিয়োগৰ গন্তব্যস্থান কৰি তুলিছে বুলি আলোকপাত কৰে। তেওঁ উল্লেখ কৰে যে উৎসৰ্গিত মালবাহী কৰিড’ৰে পূব আৰু পশ্চিম উপকূল সংযোগ কৰি আছে, যাৰ ফলত পূৰ্বতে স্থলভূমিৰে আবদ্ধ অঞ্চলসমূহৰ বাবে সাগৰলৈ দ্ৰুত প্ৰৱেশৰ ব্যৱস্থা কৰা হৈছে। তেওঁ উল্লেখ কৰে যে সমগ্ৰ দেশতে প্লাগ-এণ্ড-প্লেৰ সুবিধা থকা কেইবা ডজনো ঔদ্যোগিক চহৰ নিৰ্মাণ কৰা হৈছে। শ্ৰী মোদীয়ে জোৰ দি কয় যে ওড়িশাতো একেধৰণৰ সুযোগ বৃদ্ধি কৰা হৈছে আৰু ৰাজ্যখনত ৰে’ল আৰু ঘাইপথ নেটৱৰ্কৰ সৈতে জড়িত হাজাৰ হাজাৰ কোটিৰ প্ৰকল্প চলি আছে। তেওঁ লগতে কয় যে ওড়িশাৰ উদ্যোগসমূহৰ বাবে সা-সামগ্ৰীৰ পৰিবহণ খৰচ হ্ৰাস কৰিবলৈ চৰকাৰে বন্দৰসমূহক ঔদ্যোগিক ক্লাষ্টাৰৰ সৈতে সংযোগ কৰি আছে আৰু উল্লেখ কৰে যে বৰ্তমানৰ বন্দৰসমূহৰ সম্প্ৰসাৰণ আৰু নতুন বন্দৰ নিৰ্মাণ দুয়োটা কাম চলি আছে। তেওঁ জোৰ দি কয় যে সাগৰীয় সম্পদ ব্যৱহাৰৰ জৰিয়তে অৰ্থনৈতিক সমৃদ্ধিৰ ক্ষেত্ৰত ওড়িশা দেশৰ অন্যতম শীৰ্ষ ৰাজ্য হিচাপে পৰিগণিত হ’ব।

দ্ৰুতগতিত পৰিবৰ্তিত বিশ্বত বিশ্ব যোগান শৃংখলৰ প্ৰত্যাহ্বানসমূহ স্বীকাৰ কৰিবলৈ সকলোকে আহ্বান জনাই প্ৰধানমন্ত্ৰীয়ে এই কথাত গুৰুত্ব আৰোপ কৰে যে ভাৰতে খণ্ডিত আৰু আমদানিভিত্তিক যোগান শৃংখলৰ ওপৰত নিৰ্ভৰ কৰিব নোৱাৰে। ইয়াৰ পৰিবৰ্তে বিশ্বৰ উঠা-নমাৰ প্ৰভাৱ কম কৰিবলৈ ভাৰতৰ ভিতৰতে এক শক্তিশালী যোগান আৰু মূল্য শৃংখল গঢ়ি তুলিব লাগিব বুলিও তেওঁ লগতে কয়। তেওঁ আলোকপাত কৰে যে এই দায়িত্ব চৰকাৰ আৰু উদ্যোগ উভয়ৰে ওপৰত। বৃদ্ধিৰ বাবে গৱেষণা আৰু উদ্ভাৱনত গুৰুত্ব আৰোপ কৰি শ্ৰী মোদীয়ে উদ্যোগসমূহক এম এছ এম ই আৰু নতুন ষ্টাৰ্টআপসমূহক সহায় কৰিবলৈ আহ্বান জনায়। তেওঁ লগতে কয় যে চৰকাৰে দেশত এক সজীৱ গৱেষণা পৰিবেশতন্ত্ৰৰ সৃষ্টি কৰিছে, বিশেষ পুঁজি আৰু শিক্ষানবিচী আৰু দক্ষতা বিকাশৰ বাবে পেকেজৰ সৈতে। তেওঁ উদ্যোগসমূহক সক্ৰিয়ভাৱে অংশগ্ৰহণ আৰু চৰকাৰৰ সৈতে সহযোগিতা কৰিবলৈ উৎসাহিত কৰে। এটা শক্তিশালী গৱেষণা পৰিবেশতন্ত্ৰ আৰু এটা দক্ষ যুৱ কৰ্মশক্তিয়ে উদ্যোগটোক প্ৰত্যক্ষভাৱে উপকৃত কৰিব বুলি জোৰ দি শ্ৰী মোদীয়ে যুৱক-যুৱতীসকলৰ বাবে নতুন সুযোগ প্ৰদান কৰাৰ লগতে উদ্যোগৰ অংশীদাৰ আৰু ওড়িশা চৰকাৰক একেলগে কাম কৰি ওড়িশাৰ আকাংক্ষাৰ সৈতে মিল থকা আধুনিক পৰিবেশতন্ত্ৰ গঢ়ি তুলিবলৈ আহ্বান জনায়। ইয়াৰ ফলত ওড়িশাৰ ভিতৰত অধিক নিয়োগৰ সুযোগ সৃষ্টি হ’ব বুলিও তেওঁ কয়, যাৰ ফলত ৰাজ্যখনৰ সমৃদ্ধি আৰু অগ্ৰগতি হ’ব।

প্ৰধানমন্ত্ৰীয়ে মন্তব্য কৰে যে সমগ্ৰ বিশ্বৰ মানুহে ভাৰতৰ বিষয়ে বুজিবলৈ আৰু জানিবলৈ আগ্ৰহী। তেওঁ আলোকপাত কৰে যে হাজাৰ হাজাৰ বছৰীয়া ঐতিহ্য আৰু ইতিহাসৰ সৈতে ওড়িশা ভাৰতক বুজিবলৈ এক উৎকৃষ্ট গন্তব্যস্থান। তেওঁ লগতে কয় যে ৰাজ্যখনে বিশ্বাস, আধ্যাত্মিকতা, অৰণ্য, পাহাৰ আৰু সাগৰৰ এক অনন্য সংমিশ্ৰণ আগবঢ়ায়, এই সকলোবোৰ একে ঠাইতে। শ্ৰী মোদীয়ে ওড়িশাক উন্নয়ন আৰু ঐতিহ্যৰ আৰ্হি বুলি অভিহিত কৰি জি-২০ সাংস্কৃতিক অনুষ্ঠান ওড়িশাত অনুষ্ঠিত হোৱা আৰু ক’নাৰ্ক সূৰ্য্য মন্দিৰৰ চকাক মূল অনুষ্ঠানৰ অংশ হিচাপে গঢ়ি তোলাৰ কথা উল্লেখ কৰে। তেওঁ ৫০০ কিলোমিটাৰ উপকূল, ৩৩ শতাংশতকৈ অধিক বনাঞ্চল আৰু পৰিবেশ পৰ্যটন আৰু দুঃসাহসিক পৰ্যটনৰ অন্তহীন সম্ভাৱনাৰ সৈতে ওড়িশাৰ পৰ্যটন সম্ভাৱনাক অন্বেষণ কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। প্ৰধানমন্ত্ৰীয়ে উল্লেখ কৰে যে ভাৰতৰ গুৰুত্ব "ৱেড ইন ইণ্ডিয়া" আৰু "হিল ইন ইণ্ডিয়া"ৰ ওপৰত আছিল আৰু ওড়িশাৰ প্ৰাকৃতিক সৌন্দৰ্য্য আৰু পৰিবেশে এই পদক্ষেপসমূহৰ প্ৰতি অতিশয় সহায় কৰিছিল।

সন্মিলন পৰ্যটনৰ ক্ষেত্ৰত ভাৰতৰ উল্লেখযোগ্য সম্ভাৱনা আছে বুলি আলোকপাত কৰি প্ৰধানমন্ত্ৰীয়ে কয় যে দিল্লীৰ ভাৰত মণ্ডপম আৰু যশোভূমিৰ দৰে স্থানসমূহ এই খণ্ডৰ বাবে প্ৰধান কেন্দ্ৰ হৈ পৰিছে। তেওঁ ঐক্যতান অৰ্থনীতিৰ উদীয়মান খণ্ডৰ কথাও উল্লেখ কৰে। তেওঁ উল্লেখ কৰে যে সংগীত, নৃত্য, আৰু গল্প কোৱাৰ চহকী ঐতিহ্য আৰু কনচাৰ্টলৈ যোৱা যুৱক-যুৱতীসকলৰ এক বৃহৎ পুলৰ সৈতে ভাৰতত কনচাৰ্ট অৰ্থনীতিৰ বাবে অপৰিসীম সম্ভাৱনা আছে। তেওঁ লগতে কয় যে বিগত দশকত লাইভ ইভেণ্টৰ ধাৰা আৰু চাহিদা বৃদ্ধি পাইছে। শেহতীয়াকৈ মুম্বাই আৰু আহমেদাবাদত অনুষ্ঠিত হোৱা ক’ল্ডপ্লে কনচাৰ্টক ভাৰতত লাইভ কনচাৰ্টৰ পৰিসৰৰ প্ৰমাণ হিচাপে আঙুলিয়াই দি শ্ৰী মোদীয়ে জোৰ দি কয় যে বিশ্বৰ প্ৰধান শিল্পীসকল ভাৰতৰ প্ৰতি আকৰ্ষিত হৈছে আৰু কনচাৰ্টৰ অৰ্থনীতিয়ে পৰ্যটনক বৃদ্ধি কৰে আৰু অসংখ্য চাকৰিৰ সৃষ্টি কৰে। তেওঁ ৰাজ্য আৰু ব্যক্তিগত খণ্ডক কনচাৰ্ট অৰ্থনীতিৰ বাবে প্ৰয়োজনীয় আন্তঃগাঁথনি আৰু দক্ষতাৰ ওপৰত গুৰুত্ব দিবলৈ আহ্বান জনায়। ইয়াৰ ভিতৰত ইভেণ্ট মেনেজমেণ্ট, আৰ্টিষ্ট গ্ৰুমিং, ছিকিউৰিটি আৰু অন্যান্য ব্যৱস্থাও অন্তৰ্ভুক্ত, য’ত নতুন সুযোগৰ উন্মেষ ঘটিছে।

শ্ৰী মোদীয়ে মন্তব্য কৰে যে অহা মাহত ভাৰতে প্ৰথমবাৰৰ বাবে বিশ্ব দৃশ্য-শ্ৰাব্য আৰু মনোৰঞ্জন সন্মিলন (ৱেভছ) আয়োজন কৰিব। তেওঁ আলোকপাত কৰে যে এই উল্লেখযোগ্য অনুষ্ঠানটোৱে ভাৰতৰ সৃষ্টিশীল শক্তিক বিশ্বৰ আগত প্ৰদৰ্শন কৰিব। তেওঁ এই কথাত গুৰুত্ব আৰোপ কৰে যে এনেধৰণৰ পৰিঘটনাই ৰাজহ আহৰণ কৰে আৰু ধাৰণাক গঢ় দিয়ে, অৰ্থনীতিৰ বৃদ্ধিত অৰিহণা যোগায়। তেওঁ উল্লেখ কৰে যে ওড়িশাত এনে অনুষ্ঠান আয়োজন কৰাৰ অপৰিসীম সম্ভাৱনা আছে।

“উন্নত ভাৰত গঢ়ি তোলাত ওড়িশাই উল্লেখযোগ্য ভূমিকা পালন কৰে”, প্ৰধানমন্ত্ৰীয়ে জোৰ দি এনেদৰে কয়। তেওঁ আলোকপাত কৰে যে ওড়িশাৰ জনসাধাৰণে এখন সমৃদ্ধিশালী ৰাজ্য গঢ়ি তোলাৰ সংকল্প লৈছে আৰু এই লক্ষ্যত উপনীত হ’বলৈ কেন্দ্ৰীয় চৰকাৰে সকলোধৰণৰ সহায় আগবঢ়াইছে। তেওঁ প্ৰধানমন্ত্ৰী হিচাপে প্ৰায় ৩০ বাৰ ৰাজ্যখন ভ্ৰমণ কৰা আৰু ইয়াৰ প্ৰায়বোৰ জিলালৈ যোৱাৰ কথা উল্লেখ কৰি ওড়িশাৰ প্ৰতি নিজৰ মৰম প্ৰকাশ কৰে। তেওঁ ওড়িশাৰ সম্ভাৱনা আৰু ইয়াৰ জনসাধাৰণৰ ওপৰত নিজৰ আস্থাৰ ওপৰত গুৰুত্ব আৰোপ কৰে। ভাষণৰ সামৰণিত প্ৰধানমন্ত্ৰীয়ে আস্থা প্ৰকাশ কৰে যে সকলো অংশীদাৰে কৰা বিনিয়োগে তেওঁলোকৰ ব্যৱসায় আৰু ওড়িশাৰ অগ্ৰগতি দুয়োটাকে নতুন উচ্চতালৈ উন্নীত কৰিব। তেওঁ জড়িত থকা সকলোকে শুভেচ্ছা জ্ঞাপন কৰে।

উক্ত অনুষ্ঠানত ওড়িশাৰ ৰাজ্যপাল ডঃ হৰি বাবু কম্ভমপতি, ওড়িশাৰ মুখ্যমন্ত্ৰী শ্ৰী মোহন চৰণ মাঝি, কেন্দ্ৰীয় মন্ত্ৰী শ্ৰী ধৰ্মেন্দ্ৰ প্ৰধান, শ্ৰী অশ্বিনী বৈষ্ণৱৰ লগতে অন্যান্য বিশিষ্ট ব্যক্তিসকল উপস্থিত থাকে।

পৃষ্ঠভূমি

উৎকৰ্ষ ওড়িশা – মেক ইন ওড়িশা কনক্লেভ ২০২৫ হৈছে ওড়িশা চৰকাৰে আয়োজন কৰা এক ধ্বজাবাহী গোলকীয় বিনিয়োগ সন্মিলন, যাৰ লক্ষ্য হৈছে ৰাজ্যখনক পূৰ্বোদয়া দৃষ্টিভংগীৰ কেন্দ্ৰ হিচাপে স্থান দিয়াৰ লগতে ভাৰতৰ এক আগশাৰীৰ বিনিয়োগ গন্তব্য স্থান আৰু ঔদ্যোগিক কেন্দ্ৰ হিচাপে স্থান দিয়া।

প্ৰধানমন্ত্ৰীয়ে এক সজীৱ ঔদ্যোগিক পৰিবেশতন্ত্ৰ গঢ়ি তোলাৰ ক্ষেত্ৰত ৰাজ্যখনৰ কৃতিত্বসমূহৰ ওপৰত আলোকপাত কৰা মেক ইন ওড়িশা প্ৰদৰ্শনীও উদ্বোধন কৰে। ২৮ জানুৱাৰীৰ পৰা ২৯ জানুৱাৰীলৈ দুদিনীয়া সন্মিলন অনুষ্ঠিত হ’ব। ই উদ্যোগৰ নেতৃস্থানীয়, বিনিয়োগকাৰী আৰু নীতি নিৰ্ধাৰকসকলৰ বাবে এক মঞ্চ হিচাপে কাম কৰিব যাতে তেওঁলোকে একত্ৰিত হ’ব পাৰে আৰু ওড়িশাই বিনিয়োগৰ পছন্দৰ গন্তব্য স্থান হিচাপে আগবঢ়োৱা সুযোগসমূহৰ বিষয়ে আলোচনা কৰিব। এই সন্মিলনত মুখ্য কাৰ্যবাহী বিষয়া আৰু নেতাসকলৰ ঘূৰণীয়া মেজমেল, খণ্ডভিত্তিক অধিবেশন, বি২বি বৈঠক আৰু নীতি আলোচনাৰ আয়োজন কৰা হ’ব, যাৰ ফলত সমগ্ৰ বিশ্বৰ বিনিয়োগকাৰীৰ সৈতে লক্ষ্যভিত্তিক যোগাযোগ নিশ্চিত কৰা হ’ব।

***

MJPS/SR/SKS/HS