بھارتی ریلوے اور اسٹیٹ بینک آف انڈیا نے ریلوے ملازمین کو مزید بیمہ فوائد بہم پہنچانے کی غرض سے، جناب اشونی ویشنو کی موجودگی میں مفاہمتی عرضداشت پر دستخط کیے

آج ہندوستان کے دو سرکردہ اداروں – بھارتی ریلوے (آئی آر)، جو دنیا کا سب سے بڑا ریل نیٹ ورک ہے، اور ملک کے سب سے بڑے پبلک سیکٹر بینک اسٹیٹ بینک آف انڈیا (ایس بی آئی) کے درمیان ایک تاریخی مفاہمتی عرضداشت(ایم او یو) پر دستخط کیے گئے۔ اس تقریب میں ریلوے، اطلاعات و نشریت، الیکٹرانکس اور اطلاعاتی تکنالوجی کے محترم وزیر  جناب اشونی ویشنو؛ ریلوے بورڈ کے چیئرمین جناب ستیش کمار؛ اور ایس بی آئی کے چیئرمین جناب سی ایس شیٹی کی مبارک موجودگی بھی ملاحظہ کی گئی۔

اس مفاہمتی عرضداشت کے تحت، ایس بی آئی کے ساتھ تنخواہ کے کھاتوں کو برقرار رکھنے والے ریلوے ملازمین کے لیے بیمہ احاطے میں نمایاں اضافہ کیا گیا ہے۔ حادثاتی موت کی صورت میں، سی جی ای جی آئی ایس کے تحت آنے والے گروپ اے ، بی، اور سی ملازمین کے لیے بالترتیب 1.20 لاکھ روپے، 60,000  روپے اور 30,000 روپے کے موجودہ احاطے کے مقابلے میں، بیمہ کا فائدہ بڑھا کر ایک کروڑ روپے کر دیا گیا ہے۔

مزید برآں، ایس بی آئی کے پاس صرف تنخواہ کا کھاتہ رکھنے والے ریلوے کے تمام ملازمین ، بغیر کسی پریمیم کی ادائیگی یا کسی طبی معائنے کی ضرورت کے، اب 10 لاکھ روپے کے قدرتی موت کے بیمہ احاطے کے اہل ہوں گے ۔

ریلوے کے تقریباً 7 لاکھ ملازمین ایس بی آئی کے ساتھ تنخواہ کے کھاتوں کو برقرار رکھتے ہیں، یہ معاہدہ ملازمین کی فلاح و بہبود کی طرف ایک اہم قدم کی نشاندہی کرتا ہے، جو ہندوستانی ریلوے اور ایس بی آئی کے درمیان ایک محتاط اور تعمیری شراکت کی عکاسی کرتا ہے۔

اس مفاہمتی عرضداشت کے تحت چند کلیدی اعزازی بیمہ احاطے شامل ہیں: 1.60 کروڑ روپے کے بقدر کا ہوائی حادثہ (موت) بیمہ احاطہ ، اس کے علاوہ روپے ڈیبٹ کارڈ پر 1.00 کروڑ روپے کا اضافی احاطہ؛ ذاتی حادثہ (مستقل کلی معذوری) 1.00 کروڑ روپے کا احاطہ؛ اور ذاتی حادثہ (مستقل جزوی معذوری) 80 لاکھ روپے تک کا احاطہ۔

دو سرکردہ اداروں کے مابین یہ مفاہمتی عرضداشت  ملازمین  اور جذبہ ترحم پر مبنی ہے، اور اسے افرادی قوت خصوصاً گروپ سی کے ہراول ریلوے اہلکاروں اور دیگر کو خصوصی فوائد بہم پہنچانے کی غرض سے وضع کیا گیا ہے۔

**********

 (ش ح –ا ب ن- ن ع)

U.No:5559