ભારતીય નાગરિક ખાતા સેવા (ICAS) ના 1991 બેચના અધિકારી સુશ્રી ટી.સી.એ. કલ્યાણીએ નાણા મંત્રાલયના ખર્ચ વિભાગમાં નવા કંટ્રોલર જનરલ ઓફ એકાઉન્ટ્સ (CGA) તરીકેનો ચાર્જ સંભાળ્યો છે. તેઓ આ પ્રતિષ્ઠિત પદ સંભાળનારા 29મા અધિકારી છે.

સુશ્રી કલ્યાણી દિલ્હી યુનિવર્સિટીમાંથી ગોલ્ડ મેડલ વિજેતા છે અને તેમણે લેડી શ્રી રામ કોલેજમાંથી પોલિટિકલ સાયન્સમાં બી.એ. ડિગ્રી મેળવી છે. તેમણે જવાહરલાલ નહેરુ યુનિવર્સિટીમાંથી ઇન્ટરનેશનલ પોલિટિક્સ અને વેસ્ટર્ન યુરોપિયન સ્ટડીઝમાં એમ.ફિલ. પણ મેળવ્યું છે. 34 વર્ષથી વધુની વિશિષ્ટ સેવા સાથે, સુશ્રી કલ્યાણી જાહેર નાણાકીય વ્યવસ્થાપન, એકાઉન્ટિંગ, શાસન અને વહીવટમાં વ્યાપક કુશળતા ધરાવે છે.

તેમના કાર્યકાળ દરમિયાન, સુશ્રી કલ્યાણીએ સંરક્ષણ, દૂરસંચાર, ખાતર, નાણા, સામાજિક ન્યાય અને સશક્તિકરણ, માહિતી અને પ્રસારણ અને ગૃહ બાબતો સહિતના મુખ્ય મંત્રાલયોમાં સેવા આપી છે. સુશ્રી કલ્યાણીએ ટેકનોલોજી અપનાવીને જાહેર સેવા વિતરણમાં પારદર્શિતા અને કાર્યક્ષમતાને સતત પ્રોત્સાહન આપ્યું છે. નોંધનીય છે કે, ભારત સરકાર તરફથી ખાતર ખરીદી સહાય માટે ખેડૂતોને ડાયરેક્ટ બેનિફિટ ટ્રાન્સફર (DBT) યોજના શરૂ કરવામાં તેમનું નેતૃત્વ મહત્વપૂર્ણ રહ્યું હતું.

સુશ્રી કલ્યાણીનું યોગદાન ભારત સરકારની બહાર પણ વિસ્તરિત છે. મહાનગર ટેલિફોન નિગમ લિમિટેડ (MTNL) ખાતે, તેમણે ઓનલાઈન બિલ ચુકવણી અને કિઓસ્ક ચુકવણી દ્વારા ડિજિટલ પરિવર્તનનું નેતૃત્વ કર્યું. તેમણે ફર્ટિલાઇઝર કોર્પોરેશન ઓફ ઇન્ડિયા લિમિટેડના પુનરુત્થાનમાં પણ મુખ્ય ભૂમિકા ભજવી હતી.

ચીફ કંટ્રોલર ઓફ એકાઉન્ટ્સ (CGA) તરીકે ચાર્જ સંભાળતા પહેલા, સુશ્રી કલ્યાણીએ ગૃહ મંત્રાલયમાં પ્રિન્સિપલ ચીફ કંટ્રોલર ઓફ એકાઉન્ટ્સ (Pr. CCA) તરીકે સેવા આપી હતી, જ્યાં તેમણે ભારત સરકારના સૌથી મોટા મંત્રાલયોમાંના એકના બજેટ અને એકાઉન્ટ્સનું સંચાલન કર્યું હતું.

તેમના સમૃદ્ધ અનુભવ અને સાબિત નેતૃત્વ સાથે, સુશ્રી કલ્યાણી દેશની જાહેર નાણાકીય વ્યવસ્થાપન પ્રણાલીઓને વધુ મજબૂત બનાવશે અને સરકારી હિસાબીમાં નવીનતા અને પારદર્શિતાને આગળ ધપાવશે તેવી અપેક્ષા છે.

SM/IJ/GP/JD