ସମ୍ମାନନୀୟ ଭଦ୍ରବ୍ୟକ୍ତିମାନେ,

ସାଥିମାନେ,

ମୁଁ ଏକ ସରଳ ପରୀକ୍ଷଣରୁ ଆରମ୍ଭ କରିବାକୁ ଚାହୁଁଛି ।

ଯଦି ଆପଣ ନିଜର ଡାକ୍ତରୀ ରିପୋର୍ଟକୁ ଏକ ଏ. ଆଇ. ଆପରେ ଅପଲୋଡ କରନ୍ତି, ତେବେ ଏହା ସରଳ ଭାଷାରେ ବ୍ୟାଖ୍ୟା କରିପାରିବ, କୌଣସି ଶବ୍ଦକୋଷ ବିନା, ଆପଣଙ୍କ ସ୍ୱାସ୍ଥ୍ୟ ପାଇଁ ଏହାର ଅର୍ଥ କ’ ଣ। କିନ୍ତୁ, ଯଦି ଆପଣ ସେହି ଆପ୍ ରେ କୌଣସି ବ୍ୟକ୍ତିଙ୍କୁ  ଜଣେ ବାମ ହାତରେ ଲେଖିଥିବା ବ୍ୟକ୍ତିଙ୍କ ଛବି ଅଙ୍କନ କରିବାକୁ କୁହନ୍ତି, ତେବେ ଏହି ଆପ୍ ସମ୍ଭବତଃ ଡାହାଣ ହାତରେ ଲେଖିଥିବା ବ୍ୟକ୍ତିଙ୍କୁ ଅଙ୍କନ କରିବ। କାରଣ ତାହା ହିଁ ପ୍ରଶିକ୍ଷଣ ତଥ୍ୟ ଦ୍ୱାରା ପ୍ରାଧାନ୍ୟ ବିସ୍ତାର କରିଥାଏ।

ଏହା ଦର୍ଶାଉଛି ଯେ ଯଦିଓ ଆର୍ଟିଫିସିଆଲ ଇଣ୍ଟେଲିଜେନ୍ସର ସକାରାତ୍ମକ ସମ୍ଭାବନା ସମ୍ପୂର୍ଣ୍ଣ ଆଶ୍ଚର୍ଯ୍ୟଜନକ, ତଥାପି ଏଥିରେ ଅନେକ ପକ୍ଷପାତିତା ରହିଛି ଯାହା ବିଷୟରେ ଆମକୁ ଯତ୍ନ ସହକାରେ ଚିନ୍ତା କରିବାର ଆବଶ୍ୟକତା ରହିଛି। ସେଥିପାଇଁ ଏହି ଶିଖର ସମ୍ମିଳନୀ ଆୟୋଜନ କରିଥିବାରୁ ଏବଂ ଏହାର ସହ-ଅଧ୍ୟକ୍ଷତା କରିବା ପାଇଁ ମୋତେ ନିମନ୍ତ୍ରଣ କରିଥିବାରୁ ମୁଁ ମୋର ବନ୍ଧୁ ରାଷ୍ଟ୍ରପତି ମାକ୍ରୋନଙ୍କ ନିକଟରେ କୃତଜ୍ଞ।

ସାଥିମାନେ,

ଆର୍ଟିଫିସିଆଲ ଇଣ୍ଟେଲିଜେନ୍ସ ଆମର ରାଜନୀତିକୁ, ଆମର ଅର୍ଥବ୍ୟବସ୍ଥାକୁ, ଆମର ସୁରକ୍ଷାକୁ, ଏପରିକି ଆମ ସମାଜକୁ ମଧ୍ୟ ନୂଆ ରୂପ ଦେଉଛି। ଏଆଇ ଏହି ଶତାବ୍ଦୀରେ ମାନବତା ପାଇଁ କୋଡ୍ ଲେଖୁଛି। କିନ୍ତୁ, ମାନବ ଇତିହାସର ଅନ୍ୟ ବୈଷୟିକ ମାଇଲଖୁଣ୍ଟଗୁଡ଼ିକ ଠାରୁ ଏହା ବହୁତ ଭିନ୍ନ।

ଆର୍ଟିଫିସିଆଲ ଇଣ୍ଟେଲିଜେନ୍ସ ଅଭୂତପୂର୍ବ ସ୍ତରରେ ଏବଂ ଦ୍ରୁତ ଗତିରେ ବିକଶିତ ହେଉଛି। ଏବଂ ଗ୍ରହଣ କରାଯାଉଛି ଏବଂ ଆହୁରି ଦ୍ରୁତ ଗତିରେ ନିୟୋଜିତ କରାଯାଉଛି। ସୀମା ବାହାରେ ମଧ୍ୟ ଗଭୀର ଆନ୍ତଃନିର୍ଭରଶୀଳତା ରହିଛି। ତେଣୁ, ଶାସନ ଏବଂ ମାନକ ପ୍ରତିଷ୍ଠା କରିବା ପାଇଁ ସାମୂହିକ ବିଶ୍ୱସ୍ତରୀୟ ପ୍ରୟାସର ଆବଶ୍ୟକତା ରହିଛି, ଯାହା ଆମର ସହଭାଗୀ ମୂଲ୍ୟବୋଧକୁ ବଜାୟ ରଖିବ, ବିପଦର ମୁକାବିଲା କରିବ ଏବଂ ବିଶ୍ୱାସ ସୃଷ୍ଟି କରିବ।

କିନ୍ତୁ, ଶାସନ କେବଳ ବିପଦ ଏବଂ ପ୍ରତିଦ୍ୱନ୍ଦ୍ୱିତାର ପରିଚାଳନା ବିଷୟରେ ନୁହେଁ। ଏହା ନବସୃଜନକୁ ପ୍ରୋତ୍ସାହିତ କରିବା ଏବଂ ବିଶ୍ୱର ମଙ୍ଗଳ ପାଇଁ ଏହାକୁ ନିୟୋଜିତ କରିବା ବିଷୟରେ ମଧ୍ୟ ଅଛି। ତେଣୁ, ଆମକୁ ଗଭୀର ଭାବେ ଚିନ୍ତା କରିବାକୁ ହେବ ଏବଂ ନବସୃଜନ ଏବଂ ଶାସନ ବିଷୟରେ ଖୋଲାଖୋଲି ଭାବେ ଆଲୋଚନା କରିବାକୁ ହେବ।

ପ୍ରଶାସନ ମଧ୍ୟ ସମସ୍ତଙ୍କ ପାଇଁ, ବିଶେଷ କରି ଗ୍ଲୋବାଲ ସାଉଥରେ, ଉପଲବ୍ଧତା ସୁନିଶ୍ଚିତ କରିବା ଉପରେ ଆଧାରିତ। ଯେଉଁଠି କ୍ଷମତାର ସର୍ବାଧିକ ଅଭାବ ରହିଛି-ତାହା ଗଣନା ଶକ୍ତି ହେଉ, ପ୍ରତିଭା ହେଉ, ତଥ୍ୟ ହେଉ, କିମ୍ବା ଆର୍ଥିକ ସମ୍ବଳ ହେଉ।

ସାଥିମାନେ,

 ଆର୍ଟିଫିସିଆଲ ଇଣ୍ଟେଲିଜେନ୍ସ ସ୍ୱାସ୍ଥ୍ୟ, ଶିକ୍ଷା, କୃଷି ଏବଂ ଆହୁରି ଅନେକ କ୍ଷେତ୍ରରେ ଉନ୍ନତି କରି ଲକ୍ଷ ଲକ୍ଷ ଲୋକଙ୍କ ଜୀବନରେ ପରିବର୍ତ୍ତନ ଆଣିବାରେ ସହାୟକ ହୋଇପାରିବ। ଏହା ଏପରି ଏକ ବିଶ୍ୱ ସୃଷ୍ଟି କରିବାରେ ସହାୟକ ହୋଇପାରିବ, ଯେଉଁଥିରେ ନିରନ୍ତର ବିକାଶ ଲକ୍ଷ୍ୟ ହାସଲ ପାଇଁ ଯାତ୍ରା ସହଜ ଏବଂ ଦ୍ରୁତତର ହେବ।

ଏହା କରିବା ପାଇଁ, ଆମକୁ ସମ୍ବଳ ଏବଂ ପ୍ରତିଭାକୁ ଏକାଠି କରିବାକୁ ପଡ଼ିବ। ଆମକୁ ମୁକ୍ତ ଉତ୍ସ ବ୍ୟବସ୍ଥାର ବିକାଶ କରିବାକୁ ହେବ ଯାହା ବିଶ୍ୱାସ ଏବଂ ସ୍ୱଚ୍ଛତା ବୃଦ୍ଧି କରିବ। ଆମକୁ ପକ୍ଷପାତମୁକ୍ତ, ଗୁଣାତ୍ମକ ଡାଟା ସେଟ୍ ନିର୍ମାଣ କରିବାକୁ ହେବ। ଆମକୁ ଟେକ୍ନୋଲୋଜିର ଗଣତାନ୍ତ୍ରିକକରଣ କରିବାକୁ ହେବ ଏବଂ ଜନ କୈନ୍ଦ୍ରିକ ଆପ୍ଲିକେସନ୍ ସୃଷ୍ଟି କରିବାକୁ ହେବ। ଆମକୁ ସାଇବର ସୁରକ୍ଷା, ଭୁଲ ସୂଚନା ଏବଂ ଗଭୀର ନକଲି ସମ୍ବନ୍ଧୀୟ ଚିନ୍ତାର ସମାଧାନ କରିବାକୁ ପଡିବ। ଏବଂ, ଆମକୁ ଏହା ମଧ୍ୟ ସୁନିଶ୍ଚିତ କରିବାକୁ ହେବ ଯେ ପ୍ରଯୁକ୍ତିବିଦ୍ୟା ପ୍ରଭାବଶାଳୀ ଏବଂ ଉପଯୋଗୀ ହେବା ପାଇଁ ସ୍ଥାନୀୟ ଇକୋସିଷ୍ଟମରେ ନିହିତ |

ସାଥିମାନେ,

ଚାକିରି ହରାଇବା ହେଉଛି ଆର୍ଟିଫିସିଆଲ ଇଣ୍ଟେଲିଜେନ୍ସର ସବୁଠାରୁ ଭୟଙ୍କର ବ୍ୟାଘାତ। କିନ୍ତୁ, ଇତିହାସ ଦର୍ଶାଉଛି ଯେ ପ୍ରଯୁକ୍ତିବିଦ୍ୟା କାରଣରୁ କାର୍ଯ୍ୟ ଲୋପ ପାଇନାହିଁ। ଏହାର ପ୍ରକୃତି ବଦଳିଥାଏ ଏବଂ ନୂତନ ପ୍ରକାରର ନିଯୁକ୍ତି ସୃଷ୍ଟି ହୋଇଥାଏ। ଏକ ଆର୍ଟିଫିସିଆଲ ଇଣ୍ଟେଲିଜେନ୍ସ ପରିଚାଳିତ ଭବିଷ୍ୟତ ପାଇଁ ଆମକୁ ଆମ ଲୋକମାନଙ୍କ ଦକ୍ଷତା ବୃଦ୍ଧି ଏବଂ ପୁନଃକୌଶଳରେ ନିବେଶ କରିବାର ଆବଶ୍ୟକତା ରହିଛି।

ସାଥିମାନେ,

ଏଥିରେ କୌଣସି ସନ୍ଦେହ ନାହିଁ ଯେ ଆର୍ଟିଫିସିଆଲ ଇଣ୍ଟେଲିଜେନ୍ସର ଉଚ୍ଚ ଶକ୍ତି ତୀବ୍ରତା ଉପରେ ଧ୍ୟାନ ଦେବାର ଆବଶ୍ୟକତା ରହିଛି। ଏହାର ଭବିଷ୍ୟତକୁ ଇନ୍ଧନ ଯୋଗାଇବା ପାଇଁ ସବୁଜ ଶକ୍ତିର ଆବଶ୍ୟକତା ପଡ଼ିବ।

ଭାରତ ଏବଂ ଫ୍ରାନ୍ସ ବର୍ଷ ବର୍ଷ ଧରି ସୂର୍ଯ୍ୟର ଶକ୍ତିକୁ ଉପଯୋଗ କରିବା ପାଇଁ ଆନ୍ତର୍ଜାତୀୟ ସୌର ମେଣ୍ଟ ଭଳି ପଦକ୍ଷେପ ମାଧ୍ୟମରେ ମିଳିତ ଭାବେ କାର୍ଯ୍ୟ କରିଛନ୍ତି। ଯେହେତୁ ଆମେ ଆର୍ଟିଫିସିଆଲ ଇଣ୍ଟେଲିଜେନ୍ସ ପ୍ରତି ଆମର ଭାଗିଦାରୀକୁ ଆଗକୁ ବଢ଼ାଇଛୁ, ଏକ ସ୍ମାର୍ଟ ଏବଂ ଦାୟିତ୍ୱବାନ ଭବିଷ୍ୟତକୁ ରୂପ ଦେବା ପାଇଁ ସ୍ଥିରତା ଠାରୁ ନବସୃଜନ ପର୍ଯ୍ୟନ୍ତ ଏହା ଏକ ସ୍ୱାଭାବିକ ପ୍ରଗତି।

ଏଥି ସହିତ, ସ୍ଥାୟୀ ଆର୍ଟିଫିସିଆଲ ଇଣ୍ଟେଲିଜେନ୍ସର ଅର୍ଥ କେବଳ ସ୍ୱଚ୍ଛ ଶକ୍ତିର ବ୍ୟବହାର ନୁହେଁ। ଆର୍ଟିଫିସିଆଲ ଇଣ୍ଟେଲିଜେନ୍ସ ମଡେଲଗୁଡ଼ିକ ଆକାର, ତଥ୍ୟ ଆବଶ୍ୟକତା ଏବଂ ସମ୍ବଳ ଆବଶ୍ୟକତା କ୍ଷେତ୍ରରେ ମଧ୍ୟ ଦକ୍ଷ ଏବଂ ସ୍ଥାୟୀ ହେବା ଆବଶ୍ୟକ। ସର୍ବୋପରି, ମାନବ ମସ୍ତିଷ୍କ ଅଧିକାଂଶ ଲାଇଟ୍ ବଲ୍ବ ଅପେକ୍ଷା କମ୍ ଶକ୍ତି ବ୍ୟବହାର କରି କବିତା ରଚନା ଏବଂ ସ୍ପେସ୍ ଜାହାଜ ଡିଜାଇନ୍ କରିବାରେ ସଫଳ ହୁଏ|

ସାଥିମାନେ,

ଭାରତ ଅତି କମ୍ ଖର୍ଚ୍ଚରେ 1.4 କୋଟିରୁ ଅଧିକ ଲୋକଙ୍କ ପାଇଁ ଏକ ଡିଜିଟାଲ୍ ସାର୍ବଜନୀନ ଭିତ୍ତିଭୂମି ସଫଳତାର ସହ ନିର୍ମାଣ କରିଛି। ଏହା ଏକ ଖୋଲା ଏବଂ ସୁଲଭ ନେଟୱାର୍କ ଚାରିପାଖରେ ନିର୍ମିତ | ଆମର ଅର୍ଥବ୍ୟବସ୍ଥାର ଆଧୁନିକୀକରଣ, ଶାସନ ବ୍ୟବସ୍ଥାରେ ସଂସ୍କାର ଏବଂ ଆମ ଲୋକମାନଙ୍କ ଜୀବନରେ ପରିବର୍ତ୍ତନ ଆଣିବା ପାଇଁ ଏହାର ନିୟମାବଳୀ ଏବଂ ବ୍ୟାପକ ପ୍ରୟୋଗ ରହିଛି।

ଆମେ ଆମର ତଥ୍ୟ ସଶକ୍ତିକରଣ ଏବଂ ସୁରକ୍ଷା ସ୍ଥାପତ୍ୟ ମାଧ୍ୟମରେ ତଥ୍ୟର ଶକ୍ତିକୁ ଉନ୍ମୁକ୍ତ କରିଛୁ। ଏବଂ, ଆମେ ଡିଜିଟାଲ ବାଣିଜ୍ୟକୁ ଗଣତାନ୍ତ୍ରିକ ଏବଂ ସମସ୍ତଙ୍କ ପାଇଁ ସୁଲଭ କରିଛୁ। ଏହି ଦୂରଦୃଷ୍ଟି ହେଉଛି ଭାରତର ଜାତୀୟ ଆର୍ଟିଫିସିଆଲ ଇଣ୍ଟେଲିଜେନ୍ସ ମିଶନର ମୂଳଦୁଆ।

ସେଥିପାଇଁ, ଆମର ଜି-20 ଅଧ୍ୟକ୍ଷତା ସମୟରେ, ଆମେ ଆର୍ଟିଫିସିଆଲ ଇଣ୍ଟେଲିଜେନ୍ସକୁ ଦାୟିତ୍ୱର ସହ, ଭଲ ପାଇଁ ଏବଂ ସମସ୍ତଙ୍କ ପାଇଁ ଉପଯୋଗ କରିବା ଉପରେ ସହମତି ସୃଷ୍ଟି କରିଥିଲୁ। ଆଜି, ତଥ୍ୟ ଗୋପନୀୟତା ଉପରେ ଆର୍ଟିଫିସିଆଲ ଇଣ୍ଟେଲିଜେନ୍ସ ଗ୍ରହଣ ଏବଂ ବୈଷୟିକ-ଆଇନଗତ ସମାଧାନ କ୍ଷେତ୍ରରେ ଭାରତ ଅଗ୍ରଣୀ ରହିଛି।

ଆମେ ଜନସ୍ୱାର୍ଥ ପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସ ଆପ୍ଲିକେସନ ବିକଶିତ କରୁଛୁ। ଆମ ପାଖରେ ବିଶ୍ୱର ସର୍ବବୃହତ୍ ଆର୍ଟିଫିସିଆଲ ଇଣ୍ଟେଲିଜେନ୍ସ ପ୍ରତିଭାର କୌଣସି ଅଭାବ ନାହିଁ । ଆମର ବିବିଧତାକୁ ବିଚାରକୁ ନେଇ ଭାରତ ନିଜର ବୃହତ ଭାଷା ମଡେଲ ନିର୍ମାଣ କରୁଛି। କମ୍ପ୍ୟୁଟ ପାୱାର ଭଳି ସମ୍ବଳକୁ ଏକାଠି କରିବା ପାଇଁ ଆମ ପାଖରେ ଏକ ଅନନ୍ୟ ସରକାରୀ-ଘରୋଇ ଭାଗିଦାରୀ ମଡେଲ ମଧ୍ୟ ରହିଛି। ଏହା ଆମର ଷ୍ଟାର୍ଟଅପ୍ ଏବଂ ଗବେଷକମାନଙ୍କ ପାଇଁ ସୁଲଭ ମୂଲ୍ୟରେ ଉପଲବ୍ଧ କରାଯାଇଛି। ଏବଂ, ଭାରତ ନିଜର ଅଭିଜ୍ଞତା ଏବଂ ବିଶେଷଜ୍ଞତା ବାଣ୍ଟିବା ପାଇଁ ପ୍ରସ୍ତୁତ ଅଛି, ଯାହାଦ୍ୱାରା ଆର୍ଟିଫିସିଆଲ ଇଣ୍ଟେଲିଜେନ୍ସ ଭବିଷ୍ୟତ ଭଲ ଏବଂ ସମସ୍ତଙ୍କ ପାଇଁ ସୁନିଶ୍ଚିତ ହୋଇପାରିବ।

ସାଥିମାନେ,ଆମେ ଏ.ଆଇ ଯୁଗର ପ୍ରାରମ୍ଭରେ ଅଛୁ, ଯାହା ମାନବତାର ଗତିକୁ ରୂପ ଦେବ। କେତେକ ଲୋକ ଚିନ୍ତା କରନ୍ତି ଯେ ଯନ୍ତ୍ରଗୁଡ଼ିକ ମଣିଷ ତୁଳନାରେ ବୁଦ୍ଧିରେ ଶ୍ରେଷ୍ଠ ହୋଇଯାଉଛି। କିନ୍ତୁ, ଆମ ମଣିଷ ମାନଙ୍କ ବ୍ୟତୀତ ଆଉ କାହାର ପାଖରେ ନାହିଁ  ସାମୂହିକ ଭବିଷ୍ୟତ ଏବଂ ସହଭାଗୀ ଭାଗ୍ୟର ଚାବିକାଠି ।

ଦାୟିତ୍ୱବୋଧ ସେହି ଭାବନା ଆମର ମାର୍ଗଦର୍ଶନ କରିବା ଉଚିତ।

  ଧନ୍ୟବାଦ।

****