ಬುಡಕಟ್ಟು ವ್ಯವಹಾರಗಳ ಸಚಿವಾಲಯವು ಅಧಿಕೃತವಾಗಿ ಆದಿ ಕರ್ಮಯೋಗಿ ಅಭಿಯಾನವನ್ನು ಪ್ರಾರಂಭಿಸಿದೆ - ಇದು ವಿಶ್ವದ ಅತಿದೊಡ್ಡ ಬುಡಕಟ್ಟು ತಳಮಟ್ಟದ ನಾಯಕತ್ವ ಕಾರ್ಯಕ್ರಮವಾಗಿದೆ, ಇದು ಬುಡಕಟ್ಟು ಸಮುದಾಯಗಳನ್ನು ಸಬಲೀಕರಣಗೊಳಿಸುವ, ಸ್ಪಂದಿಸುವ ಆಡಳಿತವನ್ನು ಬಲಪಡಿಸುವ ಮತ್ತು ದೇಶಾದ್ಯಂತ ಸ್ಥಳೀಯ ನಾಯಕತ್ವದ ಅವಕಾಶಗಳನ್ನು ಸೃಷ್ಟಿಸುವ ಗುರಿಯನ್ನು ಹೊಂದಿದೆ.

ಗೌರವಾನ್ವಿತ ಪ್ರಧಾನಮಂತ್ರಿಯವರ ದೂರದೃಷ್ಟಿಯ ನಾಯಕತ್ವದಲ್ಲಿ ಪ್ರಾರಂಭಿಸಲಾದ ಈ ಅಭಿಯಾನವು "ಸಬ್ಕಾ ಸಾಥ್, ಸಬ್ಕಾ ವಿಕಾಸ್, ಸಬ್ಕಾ ಪ್ರಯಾಸ್, ಸಬ್ಕಾ ವಿಶ್ವಾಸ್" ಎಂಬ ಮಾರ್ಗದರ್ಶಿ ತತ್ವವನ್ನು ಪ್ರತಿಬಿಂಬಿಸುವ ಸೇವೆ, ಸಂಕಲ್ಪ ಮತ್ತು ಸಮರ್ಪಣೆಗಳಿಗೆ ಒತ್ತು ನೀಡುತ್ತದೆ. ಈ ಉಪಕ್ರಮವು ಜನಜಾತೀಯ ಗೌರವ ವರ್ಷದ ಪ್ರಮುಖ ಭಾಗವಾಗಿದೆ ಮತ್ತು 2047 ರ ವೇಳೆಗೆ ವಿಕಸಿತ ಭಾರತದ ದೃಷ್ಟಿಕೋನಕ್ಕೆ ಕೊಡುಗೆ ನೀಡುತ್ತಿದೆ.

ಆದಿ ಕರ್ಮಯೋಗಿ ಅಭಿಯಾನದ ಉದ್ದೇಶಗಳು:

1. ಗ್ರಾಮ ಮತ್ತು ಸಮುದಾಯ ಮಟ್ಟದಲ್ಲಿ ಪ್ರತಿಸ್ಪಂದಿಸುವ, ಜನ-ಕೇಂದ್ರಿತ ಆಡಳಿತವನ್ನು ಉತ್ತೇಜಿಸುವುದು.
2. ಜುಲೈ 10, 2025 ರಿಂದ ನಡೆಯುತ್ತಿರುವ ರಾಜ್ಯ, ಜಿಲ್ಲೆ ಮತ್ತು ಬ್ಲಾಕ್ ಮಾಸ್ಟರ್ ತರಬೇತುದಾರರ ಸಾಮರ್ಥ್ಯ ವೃದ್ಧಿಗಾಗಿ ರಾಜ್ಯದಿಂದ ಜಿಲ್ಲೆ, ಬ್ಲಾಕ್ ಮತ್ತು ಗ್ರಾಮ ಮಟ್ಟಗಳಿಗೆ ಬಹು-ಇಲಾಖೆಯ ಆಡಳಿತ ಲ್ಯಾಬ್‌ ಕಾರ್ಯಾಗಾರಗಳು/ಪ್ರಕ್ರಿಯೆ ಲ್ಯಾಬ್‌ ಗಳನ್ನು ನಡೆಸುವುದು.
3. ಬುಡಕಟ್ಟು ಸಮುದಾಯಗಳು ಮತ್ತು ಸರ್ಕಾರಿ ಅಧಿಕಾರಿಗಳು ಜಂಟಿಯಾಗಿ ವಿವರವಾದ ಕ್ರಿಯಾ ಯೋಜನೆಗಳು ಮತ್ತು ಹೂಡಿಕೆ ತಂತ್ರಗಳನ್ನು ಒಳಗೊಂಡಂತೆ "1 ಲಕ್ಷ ಬುಡಕಟ್ಟು ಗ್ರಾಮಗಳು-ವಿಷನ್ 2030" ಅನ್ನು ರೂಪಿಸುವ ಅಭಿವೃದ್ಧಿ ಯೋಜನೆಗಳನ್ನು ರಚಿಸುವುದು.
4. ತಳಮಟ್ಟದ ಅಭಿವೃದ್ಧಿ ಉಪಕ್ರಮಗಳನ್ನು ಅನುಷ್ಠಾನಗೊಳಿಸಲು 550 ಜಿಲ್ಲೆಗಳು ಮತ್ತು 30 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳಲ್ಲಿ 20 ಲಕ್ಷ ಬದಲಾವಣೆ ನಾಯಕರ ಜಾಲವನ್ನು ನಿರ್ಮಿಸುವುದು.

ಅಭಿಯಾನದ ಫಲಿತಾಂಶಗಳು:

• ಆದಿ ಸೇವಾ ಕೇಂದ್ರ: ಬುಡಕಟ್ಟು ಜನಾಂಗ ಪ್ರಾಬಲ್ಯದ ಎಲ್ಲಾ ಹಳ್ಳಿಗಳಲ್ಲಿ ಪ್ರಸ್ತಾಪಿಸಲಾಗಿದೆ, ಅಲ್ಲಿ ಸರ್ಕಾರಿ ಅಧಿಕಾರಿಗಳು ಮತ್ತು ಸಮುದಾಯದ ಸದಸ್ಯರು 'ಆದಿ ಸೇವಾ ಸಮಯ' ವಾಗಿ ಹದಿನೈದು ದಿನಗಳಿಗೊಮ್ಮೆ 1-2 ಗಂಟೆಗಳ ಸಮಯವನ್ನು ಸ್ಥಳೀಯ ಸಮಸ್ಯೆಗಳನ್ನು ಸಹಯೋಗದಿಂದ ಪರಿಹರಿಸಲು, ಯುವಕರಿಗೆ ಮಾರ್ಗದರ್ಶನ ನೀಡಲು ಮತ್ತು ಆಡಳಿತ ಉಪಕ್ರಮಗಳನ್ನು ಬೆಂಬಲಿಸಲು ಮೀಸಲಿಡುತ್ತಾರೆ.
• ಆಡಳಿತ ಲ್ಯಾಬ್‌ ಕಾರ್ಯಾಗಾರಗಳು: ರಾಜ್ಯದಿಂದ ಗ್ರಾಮ ಮಟ್ಟಕ್ಕೆ ರಚನಾತ್ಮಕ ಪ್ರಕ್ರಿಯೆ ಲ್ಯಾಬ್‌ ಗಳು, ಬುಡಕಟ್ಟು ಅಭಿವೃದ್ಧಿಗೆ ಪರಿಹಾರಗಳನ್ನು ಸಹ-ರೂಪಿಸಲು ಬಹು ಇಲಾಖೆಗಳನ್ನು ತೊಡಗಿಸಿಕೊಳ್ಳುತ್ತವೆ.
• ಬುಡಕಟ್ಟು ಗ್ರಾಮ ಕ್ರಿಯಾ ಯೋಜನೆ: ಗ್ರಾಮಸ್ಥರು ಮತ್ತು ಅಧಿಕಾರಿಗಳು ಬುಡಕಟ್ಟು ಗ್ರಾಮ ವಿಷನ್ 2030 ಅನ್ನು ಜಂಟಿಯಾಗಿ ರೂಪಿಸುತ್ತಾರೆ, ಇದು ಸುಸ್ಥಿರ ಅಭಿವೃದ್ಧಿ ಗುರಿಗಳು ಮತ್ತು ಸಮಗ್ರ ಅಭಿವೃದ್ಧಿಯ ಕಡೆಗೆ ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಬದ್ಧತೆಗಳಿಗೆ ಅನುಗುಣವಾಗಿರುತ್ತದೆ.
• ಸರ್ಕಾರಿ ಯೋಜನೆಗಳು ಮತ್ತು ಮಧ್ಯಸ್ಥಿಕೆಗಳ ಪರಿಪೂರ್ಣತೆ.
• ಸ್ವಯಂಸೇವಕರಿಗೆ ಕರೆ:

• ಆದಿ ಸಹಯೋಗಿ: ಸಮುದಾಯಗಳಿಗೆ ಮಾರ್ಗದರ್ಶನ ನೀಡುವ ಮತ್ತು ಸಜ್ಜುಗೊಳಿಸುವ ಶಿಕ್ಷಕರು, ವೈದ್ಯರು ಮತ್ತು ವೃತ್ತಿಪರರು.
• ಆದಿ ಸಾಥಿ: ಅನುಷ್ಠಾನ ಮತ್ತು ಪ್ರಭಾವವನ್ನು ಬೆಂಬಲಿಸುವ ಸ್ವಸಹಾಯ ಸಂಘಗಳು, ಎನ್‌ ಆರ್‌ ಎಲ್‌ ಎಂ ಸದಸ್ಯರು, ಬುಡಕಟ್ಟು ಹಿರಿಯರು, ಯುವಕರು ಮತ್ತು ಸ್ಥಳೀಯ ನಾಯಕರು.
• ಸಮುದಾಯ ನಾಯಕತ್ವ ತರಬೇತಿ: ಬುಡಕಟ್ಟು ಯುವಜನರು, ಮಹಿಳೆಯರು ಮತ್ತು ಸಮುದಾಯ ನಾಯಕರಿಗೆ ಆಡಳಿತ, ಸಮಸ್ಯೆ ಪರಿಹಾರ ಮತ್ತು ಸಾಮಾಜಿಕ ಸಜ್ಜುಗೊಳಿಸುವಿಕೆಯ ಕುರಿತು ಸಾಮರ್ಥ್ಯ ನಿರ್ಮಾಣ ಕಾರ್ಯಕ್ರಮಗಳು.

ಭಾಗವಹಿಸುವಿಕೆ ಮತ್ತು ಸಂಪರ್ಕ:

ಈ ಅಭಿಯಾನವು 550 ಜಿಲ್ಲೆಗಳು ಮತ್ತು 30 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳಲ್ಲಿ 20 ಲಕ್ಷ ಬದಲಾವಣೆ ನಾಯಕರನ್ನು ಸಜ್ಜುಗೊಳಿಸುವ ಮೂಲಕ 1 ಲಕ್ಷಕ್ಕೂ ಹೆಚ್ಚು ಬುಡಕಟ್ಟು ಪ್ರಾಬಲ್ಯದ ಹಳ್ಳಿಗಳನ್ನು ತಲುಪಲಿದೆ. ಇದು ಸರ್ಕಾರದ ಪ್ರಮುಖ ಯೋಜನೆಗಳ ಯಶಸ್ವಿ ಅನುಷ್ಠಾನದ ಮೇಲೆ ನಿರ್ಮಿಸಲಾಗಿದೆ, ಅವುಗಳೆಂದರೆ:

• ಧರ್ತಿ ಆಬಾ ಜನಜಾತೀಯ ಗ್ರಾಮ ಉತ್ಕರ್ಷ ಅಭಿಯಾನ
• ಪ್ರಧಾನ ಮಂತ್ರಿ ಜನಜಾತಿ ಆದಿವಾಸಿ ನ್ಯಾಯ ಮಹಾ ಅಭಿಯಾನ (ಪಿಎಂ ಜನಮನ್)
• ರಾಷ್ಟ್ರೀಯ ಆನುವಂಶಿಕ ರಕ್ತಹೀನತೆ ನಿರ್ಮೂಲನಾ ಆಭಿಯಾನ

"ಆದಿ ಕರ್ಮಯೋಗಿ ಅಭಿಯಾನವು ಎಲ್ಲರನ್ನೂ ಒಳಗೊಂಡ ಆಡಳಿತ ಮತ್ತು ಜನರ ಭಾಗವಹಿಸುವಿಕೆಯನ್ನು ಸಾಕಾರಗೊಳಿಸುವಲ್ಲಿ ಒಂದು ಐತಿಹಾಸಿಕ ಹೆಜ್ಜೆಯಾಗಿದೆ. ಸೇವಾ, ಸಂಕಲ್ಪ ಮತ್ತು ಸಮರ್ಪಣಾ ಭಾವವನ್ನು ಬೆಳೆಸುವ ಮೂಲಕ ಮತ್ತು ಬುಡಕಟ್ಟು ಸಮುದಾಯಗಳು ಮತ್ತು ಸರ್ಕಾರಿ ಅಧಿಕಾರಿಗಳ ಸಹಯೋಗದ ತೊಡಗಿಸಿಕೊಳ್ಳುವಿಕೆಯ ಮೂಲಕ, ನಾವು 1 ಲಕ್ಷ ಬುಡಕಟ್ಟು ಗ್ರಾಮಗಳ ವಿಷನ್ - 2030 ಅನ್ನು ಜಂಟಿಯಾಗಿ ರೂಪಿಸುತ್ತೇವೆ" ಎಂದು ಬುಡಕಟ್ಟು ವ್ಯವಹಾರಗಳ ಸಚಿವರಾದ ಶ್ರೀ ಜುವಲ್ ಓರಂ ಅವರು ಹೇಳಿದರು.

ಬುಡಕಟ್ಟು ವ್ಯವಹಾರಗಳ ರಾಜ್ಯ ಸಚಿವರಾದ ಶ್ರೀ ದುರ್ಗಾದಾಸ್ ಉಯಿಕೆ ಅವರು, "ಈ ಉಪಕ್ರಮವು ತಳಮಟ್ಟದಲ್ಲಿ ಬುಡಕಟ್ಟು ಅಭಿವೃದ್ಧಿಯಲ್ಲಿ ಪರಿವರ್ತನಾತ್ಮಕ ಸಾಮರ್ಥ್ಯವನ್ನು ಹೊಂದಿದೆ ಮತ್ತು ಬುಡಕಟ್ಟು ಗ್ರಾಮಗಳ ಸಮಗ್ರ ಅಭಿವೃದ್ಧಿಯನ್ನು ಮಿಷನ್ ಮೋಡ್‌ ನಲ್ಲಿ ಸಾಧಿಸಲು ಸಹಾಯ ಮಾಡುತ್ತದೆ" ಎಂದು ಹೇಳಿದರು.

ಬುಡಕಟ್ಟು ವ್ಯವಹಾರಗಳ ಸಚಿವಾಲಯದ ಕಾರ್ಯದರ್ಶಿ ಶ್ರೀ ವಿಭು ನಾಯರ್ ಅವರು "ಆದಿ ಕರ್ಮಯೋಗಿ ಅಭಿಯಾನವನ್ನು ತಳಮಟ್ಟದಲ್ಲಿ ಸ್ಪಂದಿಸುವ ಆಡಳಿತವನ್ನು ಕಾರ್ಯಗತಗೊಳಿಸಲು ವಿನ್ಯಾಸಗೊಳಿಸಲಾಗಿದೆ. ಆಡಳಿತ ಪ್ರಕ್ರಿಯೆ ಲ್ಯಾಬ್‌ ಗಳ ಮೂಲಕ, ಎಲ್ಲಾ ಹಂತಗಳಲ್ಲಿರುವ ಸರ್ಕಾರಿ ಅಧಿಕಾರಿಗಳು ಪರಿಣಾಮಕಾರಿ ಬದಲಾವಣೆಯ ನಾಯಕರಾಗಲು ರಚನಾತ್ಮಕ ತರಬೇತಿಯನ್ನು ಪಡೆಯುತ್ತಿದ್ದಾರೆ" ಎಂದು ಒತ್ತಿ ಹೇಳಿದರು.

ಬುಡಕಟ್ಟು ವ್ಯವಹಾರಗಳ ಸಚಿವಾಲಯವು ಎಲ್ಲಾ ಪಾಲುದಾರರಿಗೆ - ಬುಡಕಟ್ಟು ಸಮುದಾಯಗಳು, ಯುವಜನರು, ಸ್ವಸಹಾಯ ಸಂಘಗಳು, ನಾಗರಿಕ ಸಮಾಜ ಮತ್ತು ಸರ್ಕಾರಿ ಅಧಿಕಾರಿಗಳಿಗೆ - ಈ ಐತಿಹಾಸಿಕ ಉಪಕ್ರಮದಲ್ಲಿ ಸಕ್ರಿಯವಾಗಿ ಭಾಗವಹಿಸಲು ಕರೆ ನೀಡುತ್ತದೆ, ಇದು ದೇಶಾದ್ಯಂತ ಬುಡಕಟ್ಟು ನಾಯಕತ್ವ ಮತ್ತು ಸಮಗ್ರ ಅಭಿವೃದ್ಧಿಯನ್ನು ಬಲಪಡಿಸುತ್ತದೆ.

*****