ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੇ ਅਧੀਨ ਫੂਡ ਲੇਬਲਿੰਗ, ਇਸ਼ਤਿਹਾਰਬਾਜ਼ੀ ਅਤੇ ਦਾਅਵਿਆਂ 'ਤੇ ਭਾਰਤ ਦੇ ਰੈਗੂਲੇਟਰੀ ਢਾਂਚੇ ਨੂੰ ਮਜ਼ਬੂਤ ਕਰਨ ਦੇ ਇੱਕ ਠੋਸ ਯਤਨ ਲਈ ਭਾਰਤੀ ਖੁਰਾਕ ਸੁਰੱਖਿਆ ਅਤੇ ਮਿਆਰ ਅਥਾਰਟੀ (FSSAI) ਨੇ ਅੱਜ ਵਿਗਿਆਨ ਭਵਨ ਵਿਖੇ 'ਫੂਡ ਲੇਬਲਿੰਗ, ਇਸ਼ਤਿਹਾਰਬਾਜ਼ੀ ਅਤੇ ਦਾਅਵਿਆਂ 'ਤੇ ਰੈਗੂਲੇਟਰੀ ਢਾਂਚੇ ਦਾ ਵਿਆਪਕ ਵਿਸ਼ਲੇਸ਼ਣ' 'ਤੇ ਰਾਸ਼ਟਰੀ ਹਿੱਸੇਦਾਰ ਸਲਾਹ-ਮਸ਼ਵਰਾ ਦਾ ਆਯੋਜਨ ਕੀਤਾ। ਇਸ ਸਲਾਹ-ਮਸ਼ਵਰੇ ਵਿੱਚ ਸਬੰਧਤ ਮੰਤਰਾਲਿਆਂ, ਸਰਕਾਰੀ ਵਿਭਾਗਾਂ, ਵਿਗਿਆਨਕ ਮਾਹਿਰਾਂ, ਖੁਰਾਕ ਕਾਰੋਬਾਰਾਂ, ਰਾਜ ਖੁਰਾਕ ਸੁਰੱਖਿਆ ਅਥਾਰਟੀਆਂ, ਉਦਯੋਗ ਸੰਗਠਨਾਂ, ਖਪਤਕਾਰ ਸੰਗਠਨਾਂ ਅਤੇ ਅਕਾਦਮਿਕ ਸੰਸਥਾਵਾਂ ਦੇ ਲਗਭਗ 700 ਪ੍ਰਤੀਨਿਧੀਆਂ ਨੇ ਹਿੱਸਾ ਲਿਆ। ਇਸ ਦਾ ਉਦੇਸ਼ ਮੌਜੂਦਾ ਨਿਯਮਾਂ ਦੀ ਪ੍ਰਭਾਵਸ਼ੀਲਤਾ ਦਾ ਮੁਲਾਂਕਣ ਕਰਨਾ, ਲਾਗੂ ਕਰਨ ਦੀਆਂ ਚੁਣੌਤੀਆਂ ਨੂੰ ਹੱਲ ਕਰਨਾ, ਅਤੇ ਖਪਤਕਾਰ ਸੁਰੱਖਿਆ ਨੂੰ ਮਜ਼ਬੂਤ ਕਰਨ, ਜਨਤਕ ਸਿਹਤ ਨੂੰ ਉਤਸ਼ਾਹਿਤ ਕਰਨ ਅਤੇ ਭੋਜਨ ਉਦਯੋਗ ਵਿੱਚ ਨਵੀਨਤਾ ਦਾ ਸਮਰਥਨ ਕਰਨ ਲਈ ਵਿਸ਼ਵਵਿਆਪੀ ਮਾਪਦੰਡਾਂ ਨਾਲ ਤਾਲਮੇਲ ਬਣਾਉਣ ਦੇ ਸਵਰੂਪ ਨੂੰ ਲੱਭਣਾ ਸੀ।

ਆਪਣੇ ਉਦਘਾਟਨੀ ਭਾਸ਼ਣ ਵਿੱਚ, ਸਿਹਤ ਅਤੇ ਪਰਿਵਾਰ ਭਲਾਈ ਮੰਤਰਾਲੇ ਦੀ ਸਕੱਤਰ, ਸ਼੍ਰੀਮਤੀ ਪੁਣਯ ਸਲੀਲਾ ਸ਼੍ਰੀਵਾਸਤਵ ਨੇ ਖੁਰਾਕ ਖੇਤਰ ਵਿੱਚ ਲੇਬਲਿੰਗ ਅਤੇ ਇਸ਼ਤਿਹਾਰਬਾਜ਼ੀ ਵਿੱਚ ਨੈਤਿਕ ਅਤੇ ਸਹੀ ਅਭਿਆਸਾਂ ਦੀ ਮਹੱਤਤਾ 'ਤੇ ਜ਼ੋਰ ਦਿੱਤਾ। ਖੁਰਾਕ ਖੇਤਰ ਦੇ ਵਿਕਸਿਤ ਹੋ ਰਹੇ ਵਾਤਾਵਰਣ ਵੱਲ ਇਸ਼ਾਰਾ ਕਰਦੇ ਹੋਏ, ਸ਼੍ਰੀਮਤੀ ਸ਼੍ਰੀਵਾਸਤਵ ਨੇ ਕਿਹਾ ਕਿ "ਅੱਜ ਚੀਜ਼ਾਂ ਤੇਜ਼ੀ ਨਾਲ ਬਦਲ ਰਹੀਆਂ ਹਨ। ਅਸੀਂ ਹੁਣ ਪੂਰੀ ਦੁਨੀਆ ਦੇ ਸਾਹਮਣੇ ਹਾਂ, ਜਿਸ ਦਾ ਮਤਲਬ ਹੈ ਕਿ ਸਾਨੂੰ ਬਹੁਤ ਸਾਰੀਆਂ ਸਕਾਰਾਤਮਕ ਤਬਦੀਲੀਆਂ ਅਤੇ ਵਧੀਆ ਅਭਿਆਸਾਂ ਨੂੰ ਅਪਣਾਉਣਾ ਚਾਹੀਦਾ ਹੈ, ਨਾਲ ਹੀ ਖੁਰਾਕ ਉਤਪਾਦਾਂ ਦੀ ਹੋਰ ਨੇੜਿਓਂ ਜਾਂਚ ਵੀ ਕਰਨੀ ਚਾਹੀਦੀ ਹੈ। ਇਸ ਤੇਜ਼ੀ ਨਾਲ ਵਧਦੀ ਦੁਨੀਆ ਵਿੱਚ, ਇਸ ਤਰ੍ਹਾਂ ਦੇ ਸਲਾਹ-ਮਸ਼ਵਰੇ ਬਹੁਤ ਜ਼ਰੂਰੀ ਹਨ।"

ਖਪਤਕਾਰ ਮਾਮਲੇ ਵਿਭਾਗ ਦੀ ਸਕੱਤਰ ਸ਼੍ਰੀਮਤੀ ਨਿਧੀ ਖਰੇ ਨੇ ਖੁਰਾਕ ਉਦਯੋਗ ਵਿੱਚ ਇਮਾਨਦਾਰ ਅਤੇ ਸਹੀ ਐਲਾਨਾਂ ਦੀ ਜ਼ਰੂਰਤ ਨੂੰ ਉਜਾਗਰ ਕਰਦੇ ਹੋਏ, ਉਦਯੋਗ ਨੂੰ ਸਹੀ ਅਤੇ ਇਮਾਨਦਾਰ ਐਲਾਨ ਕਰਨ ਅਤੇ ਸਵੈ-ਇੱਛਾ ਨਾਲ ਇਹ ਦੱਸਣ ਲਈ ਕਿਹਾ ਕਿ ਉਤਪਾਦ ਵਿੱਚ ਕੀ ਹੈ ਅਤੇ ਗੁੰਮਰਾਹਕੁੰਨ ਇਸ਼ਤਿਹਾਰਾਂ ਅਤੇ ਹੇਰਾਫੇਰੀ ਅਭਿਆਸਾਂ ਤੋਂ ਪਰਹੇਜ਼ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਨੇ ਕਿਹਾ ਕਿ "ਫੂਡ ਲੇਬਲਿੰਗ ਸਿਰਫ਼ ਇੱਕ ਮਾਰਕੀਟਿੰਗ ਸਾਧਨ ਨਹੀਂ ਹੋਣਾ ਚਾਹੀਦਾ, ਸਗੋਂ ਇਸ ਨੂੰ ਇੱਕ ਨਿਰਮਾਤਾ ਅਤੇ ਖਪਤਕਾਰ ਦਰਮਿਆਨ ਵਿਸ਼ਵਾਸ ਦੇ ਸਭ ਤੋਂ ਜ਼ਰੂਰੀ ਕਾਰਕ ਵਜੋਂ ਵੀ ਮੰਨਿਆ ਜਾਣਾ ਚਾਹੀਦਾ ਹੈ। ਅਸੀਂ ਚਾਹੁੰਦੇ ਹਾਂ ਕਿ ਖੁਰਾਕ ਉਤਪਾਦ ਵਿੱਚ ਜੋ ਵੀ ਸ਼ਾਮਲ ਹੈ ਉਸ ਦੀ ਸਹੀ ਅਤੇ ਇਮਾਨਦਾਰ ਘੋਸ਼ਣਾ ਹੋਵੇ ਅਤੇ ਖਪਤਕਾਰ ਨੂੰ ਅੰਤਿਮ ਚੋਣ ਕਰਨ ਲਈ ਛੱਡ ਦੇਣਾ ਚਾਹੀਦਾ ਹੈ।" ਉਨ੍ਹਾਂ ਨੇ ਇਹ ਯਕੀਨੀ ਬਣਾਉਣ ਦੀ ਸਮੂਹਿਕ ਜ਼ਿੰਮੇਵਾਰੀ 'ਤੇ ਵੀ ਜ਼ੋਰ ਦਿੱਤਾ ਕਿ ਇਹ ਜਾਣਕਾਰੀ ਸਟੀਕ, ਪਾਰਦਰਸ਼ੀ ਅਤੇ ਸੱਚੀ ਹੋਵੇ, ਜਿਸ ਨਾਲ ਖਪਤਕਾਰ ਪੂਰੇ ਵਿਸ਼ਵਾਸ ਨਾਲ ਸੂਚਿਤ, ਸੁਰੱਖਿਅਤ ਅਤੇ ਸਿਹਤਮੰਦ ਚੋਣਾਂ ਕਰ ਸਕਣ।

ਪ੍ਰਧਾਨ ਮੰਤਰੀ ਦੇ ਆਰਥਿਕ ਸਲਾਹਕਾਰ ਪ੍ਰੀਸ਼ਦ ਦੇ ਮੈਂਬਰ ਸ਼੍ਰੀ ਸੰਜੀਵ ਸਾਨਿਆਲ ਨੇ ਉਦਘਾਟਨੀ ਸੈਸ਼ਨ ਦੌਰਾਨ ਆਪਣੇ ਵਿਸ਼ੇਸ਼ ਸੰਬੋਧਨ ਵਿੱਚ ਕਿਹਾ ਕਿ "ਇਸ਼ਤਿਹਾਰਾਂ ਵਿੱਚ ਦਾਅਵਿਆਂ ਦੇ ਮੁੱਦੇ ਦੀ ਵੀ ਡੂੰਘਾਈ ਨਾਲ ਜਾਂਚ ਕਰਨ ਦੀ ਲੋੜ ਹੈ ਕਿਉਂਕਿ ਭਾਵੇਂ ਉਨ੍ਹਾਂ ਦਾ ਸਮਰਥਨ ਕਰਨ ਵਾਲੇ ਕਥਿਤ ਵਿਗਿਆਨਕ ਸਬੂਤ ਹੋਣ, ਪਰ ਇਸ ਨੂੰ ਬਾਹਰੀ ਤੌਰ 'ਤੇ ਪ੍ਰਮਾਣਿਤ ਕਰਨ ਦੀ ਜ਼ਰੂਰਤ ਹੈ।" ਇਸ ਸਬੰਧ ਵਿੱਚ FSSAI ਦੇ ਯੋਗਦਾਨ ਦੀ ਸ਼ਲਾਘਾ ਕਰਦੇ ਹੋਏ, ਸ਼੍ਰੀ ਸਾਨਿਆਲ ਨੇ ਕਿਹਾ ਕਿ "ਇਸ ਸਾਲ ਦੇ ਸ਼ੁਰੂ ਵਿੱਚ FSSAI ਦੁਆਰਾ ਇੱਕ ਐਲਾਨ ਕੀਤਾ ਗਿਆ ਸੀ ਕਿ ਸਾਰੇ ਲੇਬਲ ਬਦਲਾਅ ਅਤੇ ਸਬੰਧਿਤ ਨਿਯਮ ਅਤੇ ਵੀਨਿਯਮ ਹੁਣ ਸਾਲ ਵਿੱਚ ਸਿਰਫ ਇੱਕ ਵਾਰ, 1 ਜੁਲਾਈ ਨੂੰ ਲਾਗੂ ਕੀਤੇ ਜਾਣਗੇ। ਇਹ ਅਸਲ ਵਿੱਚ ਇੱਕ ਵੱਡਾ ਕਦਮ ਹੈ, ਕਿਉਂਕਿ ਇਹ ਲੇਬਲਿੰਗ ਉਦਯੋਗ ਲਈ ਇੱਕ ਵੱਡੀ ਸਮੱਸਿਆ ਅਤੇ ਅਨਿਸ਼ਚਿਤਤਾ ਨੂੰ ਦੂਰ ਕਰਦਾ ਹੈ।"

ਸੂਚਨਾ ਅਤੇ ਪ੍ਰਸਾਰਣ ਮੰਤਰਾਲੇ ਦੇ ਵਧੀਕ ਸਕੱਤਰ ਸ਼੍ਰੀ ਪ੍ਰਭਾਤ ਨੇ ਖੁਰਾਕ ਖੇਤਰ ਵਿੱਚ ਝੂਠੇ ਦਾਅਵਿਆਂ ਦੀ ਗੰਭੀਰਤਾ ਨੂੰ ਉਜਾਗਰ ਕਰਦੇ ਹੋਏ, ਜਵਾਬਦੇਹੀ ਅਤੇ ਸਟੀਕ ਸੰਚਾਰ ਦੀ ਜ਼ਰੂਰਤ 'ਤੇ ਜ਼ੋਰ ਦਿੱਤਾ।  ਉਨ੍ਹਾਂ ਨੇ ਕਿਹਾ, "ਇਹ ਯਕੀਨੀ ਬਣਾਉਣ ਦੀ ਜ਼ਰੂਰਤ ਵੱਧਦੀ ਜਾ ਰਹੀ ਹੈ ਕਿ ਇਸ਼ਤਿਹਾਰ ਨੈਤਿਕ, ਸੱਚੇ ਹੋਣ ਅਤੇ ਗੁੰਮਰਾਹਕੁੰਨ ਨਾ ਹੋਣ, ਖਾਸ ਕਰਕੇ ਸਿਹਤ ਅਤੇ ਪੋਸ਼ਣ ਸਬੰਧੀ ਦਾਅਵਿਆਂ ਦੇ ਸੰਦਰਭ ਵਿੱਚ। ਇਸ ਖੇਤਰ ਵਿੱਚ ਝੂਠੇ ਦਾਅਵੇ ਨਾ ਸਿਰਫ਼ ਖਪਤਕਾਰਾਂ ਦੇ ਵਿਸ਼ਵਾਸ ਨੂੰ ਕਮਜ਼ੋਰ ਕਰਦੇ ਹਨ ਬਲਕਿ ਜਨਤਕ ਸਿਹਤ ਲਈ ਗੰਭੀਰ ਜੋਖਮ ਵੀ ਪੈਦਾ ਕਰਦੇ ਹਨ," 

"ਫੂਡ ਲੇਬਲਿੰਗ, ਇਸ਼ਤਿਹਾਰਬਾਜ਼ੀ ਅਤੇ ਦਾਅਵਿਆਂ 'ਤੇ ਗਲੋਬਲ ਅਤੇ ਭਾਰਤੀ ਰੈਗੂਲੇਟਰੀ ਫਰੇਮਵਰਕ ਦਾ ਸੰਖੇਪ" 'ਤੇ ਇੱਕ ਸੂਝਵਾਨ ਤਕਨੀਕੀ ਸੈਸ਼ਨ ਆਯੋਜਿਤ ਕੀਤਾ ਗਿਆ, ਜਿਸ ਤੋਂ ਬਾਅਦ ਐੱਫਐੱਸਐੱਸਏਆਈ (FSSAI) ਦੁਆਰਾ "ਦਾਅਵਿਆਂ ਤੋਂ ਪਾਲਣਾ ਤੱਕ" ਸਿਰਲੇਖ ਵਾਲੇ ਇਨਫੋਰਸਮੈਂਟ ਕੇਸ ਸਟੱਡੀਜ਼ 'ਤੇ ਇੱਕ ਸੈਸ਼ਨ ਆਯੋਜਿਤ ਕੀਤਾ ਗਿਆ। ਸੈਸ਼ਨਾਂ ਦਾ ਅੰਤ ਵੱਖ-ਵੱਖ ਹਿੱਸੇਦਾਰਾਂ ਨਾਲ ਇੱਕ ਇੰਟਰਐਕਟਿਵ ਚਰਚਾ ਨਾਲ ਹੋਇਆ, ਜਿਸ ਵਿੱਚ ਮੁੱਖ ਚੁਣੌਤੀਆਂ, ਉਦਯੋਗ ਦੀਆਂ ਜ਼ਿੰਮੇਵਾਰੀਆਂ, ਅਤੇ ਫੂਡ ਲੇਬਲਿੰਗ ਅਤੇ ਇਸ਼ਤਿਹਾਰਬਾਜ਼ੀ ਨਿਯਮਾਂ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਲਾਗੂ ਕਰਨ ਲਈ ਸਹਿਯੋਗੀ ਪਹੁੰਚਾਂ 'ਤੇ ਗੱਲਬਾਤ ਨੂੰ ਉਤਸ਼ਾਹਿਤ ਕੀਤਾ ਗਿਆ।

ਇਸ ਸਲਾਹ-ਮਸ਼ਵਰੇ ਨੇ ਹਿੱਸੇਦਾਰਾਂ ਦਰਮਿਆਨ ਗਿਆਨ ਅਤੇ ਤਜ਼ਰਬਿਆਂ ਦੇ ਆਦਾਨ-ਪ੍ਰਦਾਨ ਨੂੰ ਸੁਵਿਧਾਜਨਕ ਬਣਾਇਆ, ਜਿਸ ਦੇ ਨਤੀਜੇ ਵਜੋਂ ਰੈਗੂਲੇਟਰੀ ਢਾਂਚੇ ਨੂੰ ਬਿਹਤਰ ਬਣਾਉਣ, ਉੱਭਰ ਰਹੀਆਂ ਚੁਣੌਤੀਆਂ ਨੂੰ ਹੱਲ ਕਰਨ ਅਤੇ ਖਪਤਕਾਰਾਂ ਦੇ ਵਿਸ਼ਵਾਸ ਅਤੇ ਜਨਤਕ ਸਿਹਤ ਨੂੰ ਵਧਾਉਣ ਲਈ ਸਹਿਯੋਗ ਨੂੰ ਉਤਸ਼ਾਹਿਤ ਕਰਨ ਲਈ ਕਾਰਵਾਈਯੋਗ ਸਿਫ਼ਾਰਸ਼ਾਂ ਕੀਤੀਆਂ ਗਈਆਂ।

ਇਹ ਸਮਾਗਮ ਰਾਸ਼ਟਰੀ ਪੱਧਰ ਦੇ ਹਿੱਸੇਦਾਰਾਂ ਨਾਲ ਗੱਲਬਾਤ ਦੀ ਇੱਕ ਚੱਲ ਰਹੀ ਲੜੀ ਦਾ ਹਿੱਸਾ ਸੀ ਜੋ ਬਹੁ-ਹਿੱਸੇਦਾਰਾਂ ਦੀ ਸ਼ਮੂਲੀਅਤ ਦੀ ਲੋੜ ਵਾਲੇ ਮੁੱਖ ਰੈਗੂਲੇਟਰੀ ਮੁੱਦਿਆਂ ਨੂੰ ਹੱਲ ਕਰਨ ਲਈ ਤਿਆਰ ਕੀਤਾ ਗਿਆ ਹੈ। ਉਦਯੋਗ, ਅਕਾਦਮਿਕ, ਖਪਤਕਾਰ ਸਮੂਹਾਂ, ਕਿਸਾਨ ਸੰਗਠਨਾਂ ਅਤੇ ਰੈਗੂਲੇਟਰੀ ਸੰਸਥਾਵਾਂ ਨਾਲ ਮਿਲ ਕੇ ਕੰਮ ਕਰਕੇ, ਐੱਫਐੱਸਐੱਸਏਆਈ ਦਾ ਉਦੇਸ਼ ਆਪਣੇ ਰੈਗੂਲੇਟਰੀ ਢਾਂਚੇ ਵਿੱਚ ਸੈਕਟਰ-ਵਿਸ਼ੇਸ਼ ਦ੍ਰਿਸ਼ਟੀਕੋਣਾਂ ਅਤੇ ਜ਼ਮੀਨੀ-ਪੱਧਰੀ ਸੂਝਾਂ ਨੂੰ ਏਕੀਕ੍ਰਿਤ ਕਰਨਾ ਹੈ, ਇਹ ਯਕੀਨੀ ਬਣਾਉਣਾ ਹੈ ਕਿ ਨੀਤੀਆਂ ਵਿਵਹਾਰਕ ਅਤੇ ਜਨਤਕ ਸਿਹਤ ਤਰਜੀਹਾਂ ਦੇ ਨਾਲ ਇਕਸਾਰ ਹੋਣ।

ਇਸ ਸਮਾਗਮ ਵਿੱਚ ਐੱਫਐੱਸਐੱਸਏਆਈ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਸ਼੍ਰੀ ਜੀ. ਕਮਲਾ ਵਰਧਨ ਰਾਓ, ਐੱਫਐੱਸਐੱਸਏਆਈ ਦੇ ਸਲਾਹਕਾਰ (ਐੱਸ ਐਂਡ ਐੱਸ ਐਂਡ ਆਰ) ਡਾ. ਅਲਕਾ ਰਾਓ, ਐੱਫਐੱਸਐੱਸਏਆਈ ਦੇ ਕਾਰਜਕਾਰੀ ਨਿਰਦੇਸ਼ਕ ਸ਼੍ਰੀ ਯੂਐੱਸ ਧਿਆਨੀ, ਐੱਫਐੱਸਐੱਸਏਆਈ ਦੇ ਸਲਾਹਕਾਰ (ਕਿਊਏ) ਸ਼੍ਰੀ ਸਤਯੇਨ ਕੁਮਾਰ ਪਾਂਡਾ,  ਐੱਫਐੱਸਐੱਸਏਆਈ ਅਤੇ ਮੰਤਰਾਲੇ ਦੇ ਸੀਨੀਅਰ ਅਧਿਕਾਰੀ ਵੀ ਮੌਜੂਦ ਸਨ।

************

ਐਮ.ਵੀ.