ലോക്സഭാ സെക്രട്ടേറിയേറ്റ്
പാർലമെൻ്റ് അംഗങ്ങൾക്കായി പുതുതായി നിർമ്മിച്ച 184 ടൈപ്പ്-VII ബഹുനില ഫ്ലാറ്റുകൾ പ്രധാനമന്ത്രി ഉദ്ഘാടനം ചെയ്യും
ലോക് സഭ സ്പീക്കർ,കേന്ദ്രമന്ത്രിമാർ,ഹൗസ് കമ്മിറ്റി(ലോക്സഭ)ചെയർപേഴ്‌സൺ, പാർലമെൻ്റ് അംഗങ്ങൾ, ഉന്നത ഉദ്യോഗസ്ഥർ തുടങ്ങിയവർ ചടങ്ങിൽ പങ്കെടുക്കും
Posted On:
10 AUG 2025 2:48PM by PIB Thiruvananthpuram
ന്യൂഡൽഹിയിലെ ബാബ ഖരക് സിംഗ്(BKS) മാർഗിൽ പാർലമെൻ്റ് അംഗങ്ങൾക്കായി പുതുതായി നിർമ്മിച്ച 184 ടൈപ്പ്-VII ബഹുനില ഫ്ലാറ്റുകൾ പ്രധാനമന്ത്രി ശ്രീ നരേന്ദ്ര മോദി 2025 ആഗസ്റ്റ് 11 തിങ്കളാഴ്ച ഉദ്ഘാടനം ചെയ്യും.ഈ അവസരത്തിൽ പ്രധാനമന്ത്രി പാർപ്പിട പരിസരത്ത് സിന്ദൂരത്തൈ നടുകയും
തൊഴിലാളികളുമായി സംവദിക്കുകയും ചെയ്യും.ലോക്സഭാ സ്പീക്കർ ശ്രീ ഓം ബിർള,കേന്ദ്ര ഭവന,നഗരകാര്യ, ഊർജ്ജ മന്ത്രി ശ്രീ മനോഹർ ലാൽ, കേന്ദ്ര പാർലമെൻ്ററി,ന്യൂനപക്ഷ കാര്യ മന്ത്രി ശ്രീ കിരൺ റിജിജു, ഹൗസ് കമ്മിറ്റി(ലോക്സഭ)ചെയർപേഴ്‌സൺ ഡോ. മഹേഷ് ശർമ,പാർലമെൻ്റ് അംഗങ്ങൾ, മറ്റ് വിശിഷ്ട വ്യക്തികൾ എന്നിവർ ചടങ്ങിൽ പങ്കെടുക്കും.
സ്വയംപര്യാപ്തമായി രൂപകൽപ്പന ചെയ്തിരിക്കുന്ന ഈ സമുച്ചയം ബഹുമാനപ്പെട്ട എംപിമാരുടെ പ്രവർത്തനപരമായ ആവശ്യങ്ങൾ പരിഹരിക്കുന്നതിനായി വിപുലമായ ആധുനിക സൗകര്യങ്ങളോടെയാണ് സജ്ജീകരിച്ചിരിക്കുന്നത്.പരിസ്ഥിതിസൗഹൃദ സാങ്കേതികവിദ്യ ഉൾപ്പെടുത്തിയ ഈ പദ്ധതി GRIHA 3-സ്റ്റാർ റേറ്റിങ് മാനദണ്ഡങ്ങൾ പാലിക്കുകയും 2016-ലെ ദേശീയ കെട്ടിട കോഡ് (NBC) പാലിക്കുകയും ചെയ്യുന്നു.
പരിസ്ഥിതിസൗഹൃദപരമായ ഈ സവിശേഷതകൾ ഊർജ്ജ സംരക്ഷണം,പുനരുപയോഗ ഊർജ്ജ ഉത്പാദനം, ഫലപ്രദമായ മാലിന്യ സംസ്കരണം എന്നിവയ്ക്ക് സംഭാവന നൽകുമെന്ന് പ്രതീക്ഷിക്കുന്നു.
നൂതന നിർമ്മാണ സാങ്കേതികവിദ്യയുടെ ഉപയോഗം, പ്രത്യേകിച്ച് അലുമിനിയം ഷട്ടറിംഗുള്ള മോണോലിത്തിക് കോൺക്രീറ്റ്, ഘടനാപരമായ ഈട് ഉറപ്പാക്കുന്നതിനോടൊപ്പം പദ്ധതി സമയബന്ധിതമായി പൂർത്തിയാക്കാനും സഹായകമായി. ദിവ്യാംഗ സൗഹൃദപരമായ ഈ സമുച്ചയം എല്ലാവരേയും ഉൾക്കൊള്ളുന്ന രൂപകൽപ്പനയോടുള്ള പ്രതിബദ്ധത പ്രകടമാക്കുന്നു.
ഓരോ പാർപ്പിട യൂണിറ്റും താമസത്തിനും ഔദ്യോഗിക പ്രവർത്തനങ്ങൾക്കും മതിയായ ഇടം നൽകുന്നു. ഓഫീസുകൾ,ജീവനക്കാരുടെ താമസം, കമ്മ്യൂണിറ്റി സെൻ്റർ എന്നിവയ്ക്കായി പ്രത്യേക ഇടങ്ങൾ ഉൾപ്പെടുത്തിയത് എംപിമാർക്ക് പൊതുജന പ്രതിനിധികൾ എന്ന നിലയിൽ അവരുടെ ഉത്തരവാദിത്തങ്ങൾ നിറവേറ്റുന്നതിന് സഹായകമാകും.
സമുച്ചയത്തിലെ എല്ലാ കെട്ടിടങ്ങളും ആധുനിക രീതിയിലുള്ള ഘടനാപരമായ രൂപകൽപ്പനാ മാനദണ്ഡങ്ങൾക്കനുസൃതമായി ഭൂകമ്പത്തെ പ്രതിരോധിക്കാൻ കഴിയുന്ന തരത്തിലാണ് നിർമ്മിച്ചിരിക്കുന്നത്.താമസക്കാരുടെ സുരക്ഷ ഉറപ്പാക്കുന്നതിന് സമഗ്രവും ശക്തവുമായ സുരക്ഷാ സംവിധാനവും ഇവിടെ ഒരുക്കിയിട്ടുണ്ട്.
പാർലമെൻ്റ് അംഗങ്ങൾക്കുള്ള മതിയായ താമസ സൗകര്യങ്ങളുടെ അഭാവം മൂലമാണ് പദ്ധതിയുടെ വികസനം ആവശ്യമായി വന്നത്.ഭൂമിയുടെ ലഭ്യത കുറവായതിനാൽ ഭൂമി പരമാവധി പ്രയോജനപ്പെടുത്തുന്നതിനും പരിപാലന ചെലവ് കുറയ്ക്കുന്നതിനുമായി ബഹുനില ഭവന നിർമ്മാണത്തിന് തുടർച്ചയായ ഊന്നൽ നൽകിയിട്ടുണ്ട്.ന്യൂഡൽഹിയിലെ ബി.കെ.എസ് മാർഗിൽ സ്ഥിതി ചെയ്യുന്ന ഈ പാർപ്പിട സമുച്ചയം,പാർലമെൻ്റ് ഹൗസ് സമുച്ചയത്തിന് സമീപമായതിനാൽ പാർലമെൻ്റ് അംഗങ്ങൾക്ക് കൂടുതൽ സൗകര്യപ്രദമായ രീതിയിൽ പ്രവർത്തിക്കാൻ കഴിയും.
SKY
************
(Release ID: 2155000)