નાણાકીય વર્ષ 2024-25માં વાર્ષિક સંરક્ષણ ઉત્પાદન 1,50,590 કરોડ રૂપિયાના સર્વોચ્ચ સ્તરે પહોંચવાની તૈયારીમાં છે. આ સિદ્ધિ પાછલા નાણાકીય વર્ષમાં 1.27 લાખ કરોડ રૂપિયાના ઉત્પાદન કરતાં 18%ની મજબૂત વૃદ્ધિ દર્શાવે છે અને નાણાકીય વર્ષ 2019-20માં જ્યારે આ આંકડો 79,071 કરોડ રૂપિયા હતો ત્યારથી 90%નો આશ્ચર્યજનક વધારો દર્શાવે છે.

રક્ષા મંત્રી શ્રી રાજનાથ સિંહે આ સીમાચિહ્ન હાંસલ કરવામાં સંરક્ષણ ઉત્પાદન વિભાગ અને તમામ હિસ્સેદારો, જેમ કે સંરક્ષણ જાહેર ક્ષેત્રના ઉપક્રમો (DPSUs), જાહેર ક્ષેત્રના ઉત્પાદકો અને ખાનગી ઉદ્યોગના સામૂહિક પ્રયાસોની પ્રશંસા કરી. તેમણે આ વૃદ્ધિને ભારતના મજબૂત સંરક્ષણ ઔદ્યોગિક આધારનું સ્પષ્ટ સૂચક ગણાવ્યું હતું.

સંરક્ષણ જાહેર ક્ષેત્રના ઉપક્રમો (DPSUs) અને અન્ય PSUs કુલ ઉત્પાદનમાં લગભગ 77% ફાળો આપે છે જ્યારે ખાનગી ક્ષેત્રનો ફાળો 23% છે. નાણાકીય વર્ષ 2023-24માં ખાનગી ક્ષેત્રનો હિસ્સો 21%થી વધીને નાણાકીય વર્ષ 2024-25માં 23% થવાનો અંદાજ છે, જે દેશના સંરક્ષણ ઇકોસિસ્ટમમાં આ ક્ષેત્રની વધતી જતી ભૂમિકાને પ્રતિબિંબિત કરે છે.

છેલ્લા દાયકામાં, ઉદ્યોગના જાહેર અને ખાનગી ક્ષેત્રો બંનેએ દૂરગામી નીતિગત સુધારાઓ, વ્યવસાય કરવાની સરળતામાં વધારો અને સ્વદેશીકરણ પર વ્યૂહાત્મક ધ્યાન કેન્દ્રિત કરવાના કારણે સતત વૃદ્ધિ નોંધાવી છે. નાણાકીય વર્ષ 2024-25માં સંરક્ષણ જાહેર ક્ષેત્રના ઉપક્રમો (DPSUs) અને ખાનગી ક્ષેત્રના કુલ ઉત્પાદનમાં અનુક્રમે 16% અને 28%નો વધારો થયો છે.

આ રેકોર્ડબ્રેક સિદ્ધિ પ્રધાનમંત્રી શ્રી નરેન્દ્ર મોદીના નેતૃત્વ હેઠળ આત્મનિર્ભર ભારત પહેલ હેઠળ સંરક્ષણ ઉત્પાદનમાં આત્મનિર્ભરતા તરફ સરકારના વધતા પ્રયાસોને રેખાંકિત કરે છે. આયાત પર નિર્ભરતા ઘટાડવા અને એક સંરક્ષણ ઔદ્યોગિક સંકુલ બનાવવા પર ભાર મૂકવામાં આવ્યો છે જે ફક્ત ભારતની જરૂરિયાતોને પૂર્ણ કરે છે એટલું જ નહીં પરંતુ નિકાસ ક્ષમતાને પણ મજબૂત બનાવે છે, જેના સકારાત્મક પરિણામો મળ્યા છે.

નોંધનીય છે કે નાણાકીય વર્ષ 2024-25માં સંરક્ષણ નિકાસ વધીને રૂ. 23,622 કરોડના રેકોર્ડ સ્તરે પહોંચી ગઈ છે. નાણાકીય વર્ષ 2023-24માં રૂ. 21,083 કરોડના સંરક્ષણ નિકાસ આંકડાની તુલનામાં આ રૂ. 2,539 કરોડ અથવા 12.04%નો વધારો છે.

સતત નીતિગત સમર્થન, વધતી જતી ખાનગી ભાગીદારી અને વધતી જતી નિકાસ ક્ષમતાઓ સાથે, ભારતનું સંરક્ષણ ઉત્પાદન ક્ષેત્ર આગામી વર્ષોમાં સતત ગતિ મેળવવા માટે તૈયાર છે.

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com