মহৈরোয়শিং সাইন্তিস অমগা নোংমা লৈনবা প্রধান মন্ত্রী শ্রী নরেন্দ্র মোদীনা লাউথোকখিবগী মতুংইন্না, দিপার্তমেন্ত ওফ হেল্থ রিছার্স অমসুং আই.সি.এম.আরনা শীন্দুনা ওগষ্ট ৭ অমসুং ওগষ্ট ৮,২০২৫ দা মসিগী ইন্সতিতুৎশিং অমসুং দি.ঐচ.আর-মোদেল রুরেল হেল্থ রিছার্স য়ুনিতশিংদা লৈবাক শীনবা থুংনা সাইন- সাইন্স, হেল্থ এন্দ ইন্নোবেসন ফোর নেক্সজেন এক্সপ্লোররস পাংথোকখ্রে।

থৌরম অদুদা লৈবাক শীনবা থুংবদা লৈরিবা তোঙান তোঙানবা আই.সি.এম.আর ইন্সতিতুৎশিংদা রাজ্য অমসুং য়ু.তি ১৬ দা জিলা ৩৯ দা স্কুল ৩০০ হেনবগী ক্লাস ৯-১২ গী মহৈরোয় ১৩,১৫০ হেন্না শরুক য়াখি। মহৈরোয়শিংদা হকশেল অমসুং বাইওমেদিকেলগী রিছার্সকী লমদা খঙহন্নবা, লৈবাক অসিগী হকশেল ফগৎনবা আই.সি.এম.আরগী থবকশিং খঙহন্নবা অমসুং ২০৪৭ গী বিকসিত ভারতকী মাইকৈদা থাংজিল্লিবা ভারতকী খোঙচৎ শৌগৎতুনা নহারোলশিং সাইন্স অমসুং হকশেলগী শীনফমদা চঙনবা পুক্নিং থৌগৎনবা পান্দম থম্লি।

থৌরম অদুদা ৱা ঙাংবদা, দি.ঐচ.আরগী সেক্রেতরি অমসুং আই.সি.এম.আরগী দি.জি দোক্তর রজিব বালনা হায়খি মদুদি আই.সি.এম.আরগী অখন্নবা থবক অসিনা হকশেলগী লমদা থিজিল্লিবা তুংগী মীরোলশিংদা সাইন্তিফিক ওইবা থবকশিংগী ইখৌ লাংবা পোকহনগনি, ইন্নোবেসন হেনগৎহনগনি অমসুং ইথিল পীগনি। থিজিনবা অমসুং অনা-লায়য়েংদা ভারতকী তুংগী ফিবম শেমগৎনবা সাইন্তিফিক ওইবা ৱাখল্লোন পোকহনবা, ইন্নোবেসন অমসুং নহারোলশিং শরুক য়াহনবা অসি য়াম্না মরুওই। ঙসিগী অসি চুম্নগী খোঙচৎ অমা খক নত্তে, মসি সাইন্তিস অমগী খোঙ্গুল লিনবা চেপাউ পীবা অমনি। অদোম্না সাইন্তিফিক ওইবা ৱাখলগা লোয়ননা য়েংবা, ৱাহং হংবা অমসুং অহানবা ওইনা থেংনবা ঐখোয়না পাম্মী। ঐখোয়গী সাইন্তিসশিংগা উনৌ, লেবশিং য়েংউ অমসুং মেদিকেল অমসুং হকশেলগী লমদা ভারতনা থিজিল্লিবা অসি য়েংউ। ইখৌ লাংবা, খুদম অমসুং থাজবগী খুৎথাংদা কমদৌনা ঐখোয়না বিকসিত ভারত অমা শেমগৎলিবগে হায়বদু মসিনি।

পাংথোকখিবা থৌরমশিংগী মনুংদা মহৈরোয়শিংনা লেবোরেতোরি তুরশিং, রিছার্স একজিবিসনশিং, পোষ্টর ৱাল্কশিং, ভিদিও য়েংবা অমসুং হৌজিক চৎথিরবা সাইন্তিফিক ওইবা থবকশিংগী দেমোষ্ট্রেসনশিং লাইভ ওইনা য়েংবা য়াওখি। মহৈরোয়শিংনা আই.সি.এম.আরগী সাইন্তিসশিংগা ৱারি শানবগী খুদোংচাবা ফংখি, মখোয়গী থিজিনবগী থবকশিং, মরুওইবা হিরমশিং অমসুং মীয়ামগী হকশেলগী নুমিৎ খুদিংগী পায়খৎলিবা থবকশিংগী মতাংদা খঙখি। মহৈরোয়শিংগী মরুপ অমা ওইনা অমসুং লমজিংবা ওইনা দোক্তর কুরিও কৌবা মেস্কোত অমা নুমিৎ চুপ্পা থবক তৌখি।

থৌরমশিং অসিগী মথক্ত, আই.সি.এম.আরগী  মরুওইবা থবকশিং: ভারত মশাগী ভেক্সিন-কোবাক্সিন পুথোকপা, হকশেলগী থবকশিং মীয়ামদা ফংহন্নবা আইদ্রোনগী থবক, ভারতনা পায়খৎলিবা তি.বি মুৎথৎনবা থবকশিং অমসুং তুংদা লাক্কবা লাইচৎশিংগী শেম-শাবগী থবকশিং য়েংশিন্নবা লৈবাক শীনবা থুংবগী মোক দ্রিন-বিষ্ণু য়ুধ অভ্যাস য়াওবা অখন্নবা অতেনবা ফিল্ম মরি মহৈরোয়শিংনা য়েংখি।

খঙজিনবা য়াবদি, ওগষ্ট ৮ অসি ভারতকী শক্নাইরবা সাইন্তিস, পেথোলোজিস্ত, মেদিকেল রাইতর অমসুং আই.সি.এম.আরগী দি.জি দোক্তর ভুলিমিরি রামালিঙ্গশ্বামীগী ১০৪ শুবা মপোক কুমওন্নি। মহাক্না পায়খৎলম্বা থবকশিংনা মীরোল কয়াগী থিজিল্লোয়শিংদা মখা তানা ইথিল পীখি।

এস.ঐচ.আই.এন.ই ইনিসিয়েতিপকী খুৎথাংদা, নহারোল মহৈরোয়শিংগী মরক্ত সাইন্স পাম্বা হেনগৎহন্নবা অমসুং মীয়ামগী হকশেল ফগৎনবা রিছার্সনা লৌরিবা মরুওইবা থৌদাং হেন্না খঙহন্নবা মসিনা পায়খৎলিবা থবকশিং আই.সি.এম.আরনা অমুক হন্না ফোঙদোকখ্রে।

***